Matius Kata-Kata Partama
Kata-Kata Partama
Matius pung Kabar Bae soal Yesus ni, akang carita soal Yesus Kristus pung hidop, mulai dari Antua lahir, dapa salib, sampe hidop kombali. Matius carita Yesus kasi balajar orang, kasi bae orang yang saki, user setang dari orang yang takanal, kasi hidop orang mati, kasi ampong orang pung dosa, deng biking tanda-tanda herang. Abis samua tu, Yesus dapa tangkap, dapa siksa, deng dapa salib, mar hidop kombali pas akang pung hari katiga. Tarus, Yesus pasáng Antua pung murid-murid par kasi tau Kabar Bae soal Antua par sagala bangsa di dunya.
Kitab ni dapa kasi nama par Kabar Bae, tagal akang carita soal bagemana Allah Bapa utus Yesus Kristus par mati deng hidop kombali par tabus manusia pung dosa, biar sapa sa yang parcaya Antua bisa baku bae kombali deng Antua, deng hidop tarus-tarus deng Antua.
Sapa yang tulis kitab ni: Dalang kitab ni seng bilang sapa yang tulis akang. Kalo iko pamimping-pamimping gareja dolo-dolo, yang tulis kitab ni nama Matius. Dia tu orang Yahudi, satu dari Yesus pung sapulu dua murid (10:3), yang dolo jadi tukang tagi pajak par pemerinta Roma (9:9). Dia su lia deng mata kapala sandiri apa yang Yesus biking deng dengar apa yang Antua ajar, la dia tulis akang dalang kitab ni.
Kitab ni par sapa: Matius tulis kitab ni par orang-orang Yahudi. Jadi dia kasi maso Yesus pung silsila yang mulai dari Abraham (1:1-17), pake nats-nats dari Alkitab Janji Lama, deng pake istila-istila deng gaya bahasa yang orang Yahudi biasa pake. Orang Yahudi jua dapa panggel par orang Israel ka orang Ibrani. Dong tu bangsa yang Allah pili par jadi Antua pung orang-orang. Allah su janji nanti angka satu Orang par kasi salamat dong (Yesaya 11:1-9, 53:1-12; Mika 5:1), la dong ada tunggu-tunggu apa yang Allah janji tu.
Mangapa Matius tulis kitab ni: Matius tulis kitab ni par kasi unju kalo Yesus tu Raja Daud pung turunang yang Allah su janji dari dolo-dolo. Tagal itu, dari waktu buka dia pung kitab lai dia su tulis Yesus pung silsila, mulai dari Abraham, Raja Daud, sampe ka Yesus (1:1-17). Mala Yesus tu Imanuel, yang pung arti Allah ada sama-sama deng katong (1:23). Antua pung kuasa par anging, omba, panyaki, setang, dosa, deng kamatiang.
Ulang kali Matius kasi bukti kalo apa yang Allah bilang dolo-dolo lewat Antua pung juru-juru bicara tu jadi lewat Yesus pung diri deng apa yang Antua biking (Yesaya 35:5-6; Matius 11:2-6). Yesus tu Orang yang Allah su Angka par Kasi Salamat Manusia (1:16, 16:16). Antua datang kasi Antua pung diri par mati par tabus manusia dari dong pung dosa-dosa (20:28, 26:28).
Kitab ni tabage par babarapa bagiang:
| 1:1—2:23 | Yesus pung silsila deng carita lahir |
| 3:1-12 | Yohanis Tukang Baptis pung karja |
| 3:13—4:11 | Yesus dapa baptis deng dapa coba |
| 4:12—18:35 | Yesus pung karja di propinsi Galilea |
| 19:1—25:46 | Yesus pung karja di propinsi Yudea deng kota Yerusalem |
| 26:1—28:20 | Yesus dapa tangkap, dapa salib, deng hidop kombali |
Obecnie wybrane:
Matius Kata-Kata Partama: ABMA
Podkreślenie
Udostępnij
Kopiuj
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2022, Sinode Gereja Protestan Maluku