1 ATHESALONIKE 5
5
1NO rĩrĩ, ariũ a Ithe witũ, ha ũhoro wa mahinda na ciathĩ-rĩ, mũtirĩ na bata mũtinde mũkĩandĩkĩrũo. 2#Mat 24.43; Luk 12.39; 2 Pet 3.10.Nĩ gũkorũo nĩmũũĩ wega inyuene atĩ Mũthenya wa Mwathani nĩũgoka o ta ũrĩa mũici okaga ũtukũ. 3Hĩndĩ ĩrĩa andũ moigaga atĩ, Nĩkũrĩ thayũ, na gũtirĩ mburuga-rĩ, o hĩndĩ ĩo nĩyo makahobanĩrio nĩ kwanangwo kwa narua, o ta ũrĩa mũtumia wĩ na ihu akoragĩrĩrũo nĩ ruo rũa kũrũmwo; nao matikahonoka o na atĩa. 4No inyuĩ, ariũ a Ithe witũ-rĩ, mũtikĩrĩ nduma-inĩ, atĩ mũthenya ũcio ũmũkorerere ta mũici; 5nĩ gũkorũo inyuothe mũrĩ ciana cia ũtheri na ciana cia mũthenya. Tũtikĩrĩ a ũtukũ kana a nduma; 6nĩ ũndũ ũcio nĩtũtigei gũkoma toro ta acio angĩ, no makĩria nĩtũikarage twĩiguĩte na tũterigĩtwo. 7Nĩ gũkorũo andũ arĩa makomaga toro-rĩ, makomaga ũtukũ; nao andũ arĩa arĩu marĩagwo ũtukũ. 8#Isa 59.17; Ef 6.13-17.No ithuĩ-rĩ, kuona atĩ tũrĩ a mũthenya, nĩtũikaragei tũterigĩtwo, twĩohete gako ga kũgitĩra gĩthũri karĩa ka wĩtĩkio na ka wendani; na tũgekĩra ũhoro wa kwĩrĩgĩrĩra ũhonokio ta arĩ gĩtukũ. 9Tondũ Ngai ndaatũtuire a kũrakarĩrũo, no gũtua aatũtuire a kũhonokio nĩ ũndũ wa Mwathani witũ Jesu Kristo, 10o we wakuire nĩ ũndũ witũ, nĩ getha tũgatũũrania nake, o na tũngĩkorũo twĩiguĩte kana tũkomete. 11Tondũ wa ũguo-rĩ, ũmanagĩrĩriai o mũndũ na mũndũ ũrĩa ũngĩ, na mwĩkanagĩre hinya, o ta ũrĩa mũtũire mwĩkaga.
12Na rĩrĩ, ariũ a Ithe witũ, twamũthaitha atĩ mũtĩage andũ arĩa mamũnogagĩra makĩmũrutĩra wĩra, o arĩa matuĩtwo arori anyu maũndũ-inĩ ma Mwathani, makamũtaaraga, 13na mũmekagĩrĩre mũno makĩria, mũkĩmendaga, nĩ ũndũ wa wĩra ũcio marutaga. Gĩagai na ũiguano thiritũ-inĩ yanyu.
14Na ningĩ twamũhatĩrĩria, ariũ a Ithe witũ, atĩrĩ, atĩ mũtaarage andũ arĩa mathiaga na mĩthiĩre ĩtaagĩrĩire, na mũũmagĩrĩrie arĩa ahũthũ ngoro, na mũtiiragĩrĩre arĩa maagĩte hinya, nao othe-rĩ, mũtige kũmathethũkĩra. 15Menyai mũndũ o na ũrĩkũ akanerĩhĩria ũũru na ũũru kũrĩ mũndũ ũngĩ; no hingo ciothe mũrũmanagĩrie gwĩkana wega inyuene, o na gwĩkaga andũ othe wega.
16Kenagai hingo ciothe; 17hoyagai mũtegũtigithĩria; 18maũndũ-inĩ mothe-rĩ, cokagĩriai Ngai ngatho; nĩ ũndũ ha ũhoro wanyu-rĩ, ũguo noguo Ngai endaga, e thĩinĩ wa Kristo Jesu. 19Mũtikanahorie mwaki wa Roho; 20mũtikanararie mohoro marĩa marathagwo; 21roranagiai maũndũ mothe; mũrũmagie ũndũ o wothe ũrĩa mwega; 22na mũthemage ũndũ o wothe ũngĩonwo wĩ mũũru.
23Nake Ngai Mwene thayũ we mwene aromwamũra amũtherie kũna. Namo maroho manyu, na ngoro cianyu, o na mĩĩrĩ yanyu iroikario irĩ ng’ima, na igakorũo itarĩ na ũcuke, hĩndĩ ĩrĩa Mwathani witũ Jesu Kristo akoneka. 24Ũcio ũmwĩtaga nĩ wa kwĩhokeka, nake nĩakahingia ũhoro ũcio.
25Ariũ a Ithe witũ, tũhoyagĩrei. 26Geithiai ariũ a Ithe witũ othe na ngeithi theru cia kũmumunyana. 27Nĩndamwĩhĩtithia na Mwathani atĩ mũtikaage gũthomera ariũ a Ithe witũ othe marũa maya.
28Wega wa Mwathani witũ Jesu Kristo ũrogĩa na inyuĩ.
Obecnie wybrane:
1 ATHESALONIKE 5: OGKBIBLE
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
©Bible Society of Kenya, 2019