Mateo 15
15
Atɩtɩfɔ Amandɩɛ
(Marko 7:1-13)
1Mʋ́ ɔma a, Farisifɔ pʋ́ Mose mbla asunapʋ akʋ botsu Yerusalem ba Yesu wa, bɛfɩtɛ mʋ bɛɛ, 2“Ntogyi sʋ fʋ akasɩpʋ amʋ bʋtamagyi anɩ anain amandɩɛsʋ. Bʋtamafwɩ ɩbɩ amandɩɛ ɔkpasʋ asa bʋtegyi atɔ?”
3Yesu lɛlɛ mʋ́ ɔnɔ ɔbɛɛ, “Ntogyi sʋ mlɩ ɛ mlɩ anain amandɩɛ sʋ mlɩmɛdɛ Bulu mbla amʋsʋ gyi? 4Mose lɔwanlɩn wa Bulu mbla amʋtɔ ɔbɛɛ, ‘Bu fʋ sɩ mʋ́a fʋ yin,> ɔlɛtra wanlɩn ɔbɛɛ, ‘Nɩ ɔkʋ lɛblɩ asʋkpan tsu mʋ sɩ ntɛ mʋ yin ɩwɩ a, bʋmɔ mʋ?> 5-6Tamɛ mlɩ mʋ́ mlɩaa, ɔha ɔbɛ́talɩ bla mʋ sɩ ntɛ mʋ yin ɔbɛɛ, ‘Tɔá tɛkɩ nɔ́pʋha fʋ a, napʋha Bulu. Imehian ánɩ́ nɛ́tra kɩ fʋ.> Mlɩ anain amandɩɛ sʋ mlɩtra mlɩmɛdɛ Bulu mblasʋ gyi. 7Apinabwɛbi abwɛpʋ! Ɔnɔkwalɩ Bulu ɔnɔsʋ ɔtɔɩpʋ Yesaia lɛblɩ tsu mlɩ ɩwɩ tswɩ ɔbɛɛ,
8‘Aha anfɩ bʋdɛpʋ amʋ́ ɔnɔ bu mɩ,
tamɛ amʋ́ klʋn bʋ ɩfɔ mɩ wa.
9Kpaalɩ bʋdɛ mɩ sum,
tsufɛ basi Bulu mbla tswɩ, yɔ bʋdɛ anyankpʋsa mbla suna.> ”
Tɔá Ɩtɔkpɔɩ Ɔha Bulu Ansɩtɔ
(Marko 7:14-23)
10Yesu lɛtra tɩ ɔdɔm amʋ ba mʋ ɩwɩ wa, ɔlɛbla amʋ́ ɔbɛɛ, “Mlɩyaa asʋ, mɛnɩ mlónu ɩnɩ asɩ. 11Megyi tɔá ɔha tegyi tɔkpɔɩ mʋ Bulu ansɩtɔ, mboun mʋ́á ɩtɛdalɩ tsu mʋ ɔnɔ tɔkpɔɩ mʋ.”
12Ɩnʋ mʋ akasɩpʋ amʋ bɛba mʋ wa bɛfɩtɛ mʋ bɛɛ, “Fʋyin ánɩ́ fʋ asʋn blɩhɛ anfɩ lawɔ Farisifɔ amʋ?”
13Yesu lɛlɛ mʋ́ ɔnɔ ɔbɛɛ, “Bópuli oyigyioyiá megyi mɩ Sɩ amʋʋ ɔbʋ ɔsʋsʋ amʋ loswie tsitsa. 14Mlɩsi Farisifɔ amʋ asʋn. Ansibi abwiepʋ bʋgyi, bʋdɛ ansibi abwiepʋ kpa. Nɩ nsibi obwiepʋ dɛ nsibi obwiepʋ kpa a, ɔbɔtɔ amʋ́ abanyɔ bʋtɛkpa wie.”
15Mʋʋ Petro lɛbla mʋ ɔbɛɛ, “Lɛ yebi anfɩ asɩ suna anɩ.”
16Yesu lɛfɩtɛ amʋ́ ɔbɛɛ, “Mʋ́ sʋ mlɩ ɛ mlɩtamanu asʋn asɩ? 17Mlɩmeyin ánɩ́ tɔá iwie ɔha ɔnɔ a, mʋ iputɔ itowie, ɔtɛyɛlɛ mʋ́ wa ɔkpʋntɔ? 18Asʋngyiasʋn ánɩ́ ɩtɛdalɩ tsu ɔha ɔnɔ a, mʋ klʋntɔ ɩtɛdalɩ tsu. Mʋ́tɔkpɔɩ mʋ Bulu ansɩtɔ nɩ. 19Tsufɛ ɔha klʋntɔ agywɩɩn lalahɛ tɛdalɩ tsu. Mʋ́tɛha ɔtɔmɔ ɔha, ɔtɔtɔ mbʋa, ɔtɔwa atsɩ mʋa ayin asʋn, otowi atɔ, ɔtɔwa afunu, otetsii ɔha. 20Ɩnɩ aná tɔkpɔɩ ɔha, tamɛ nɩ ɔha mɔfwɩ ɩbɩ amandɩɛ ɔkpasʋ asa olegyi atɔ a, ɩtamakpɔɩ mʋ Bulu ansɩtɔ.”
Ɔtsɩ Ɔkʋá Omegyi Yudayin Hogyi
(Marko 7:24-30)
21Yesu lɛnatɩ ɩnʋ yɔ Tiro mʋa Sidon nsaɩntɔ. 22Kanaanyintse ɔkʋá otsie ɩnʋ lɛba Yesu wa. Ɔdɛ okitikiti sʋra, olokokoli Yesu ɔbɛɛ, “Dawid mʋ na, wun mɩ nwɛ! Ɔŋɛ lalahɛ bʋ mɩ bi tsɩhɛtɔ. Ɩdɛ mʋ han dʋbɩ.”
23Tamɛ Yesu mɛkpla mʋ. Ɩnʋ mʋ akasɩpʋ amʋ bobwii ɩpa ha mʋ bɛɛ “Ha ɔtsɩ anfɩ ɔnatɩ, tsufɛ obuo anɩ ɔdɛ okitikiti sʋra dʋbɩ.”
24Yesu lɛbla ɔtsɩ amʋ ɔbɛɛ, “Israel akufa fwɩhɛ pɛ wa Bulu lɔwa mɩ.”
25Tamɛ ɔtsɩ amʋ lɛda akpawunu mʋ ayabitɔ, bla mʋ ɔbɛɛ, “Mɩ Wie, gyi mɩ bʋalɛ.”
26Yesu lɛbla mʋ ɔbɛɛ, “Ɩma alɛá fɔ́swɩɩ nyebi atogyihɛ pʋha akɩaɩ.”
27Ɔtsɩ amʋ lɛlɛ mʋ́ ɔnɔ ɔbɛɛ, “Owie, ɩbʋ mʋ́tɔ alɩ, tamɛ akɩaɩ ɛ bʋtegyi atogyihɛ mpupubiá ɩtɛkpakpa bun amʋ́ wie ɔpʋnʋasɩ.”
28Mʋʋ Yesu lɛbla mʋ ɔbɛɛ, “Ɔtsɩ, fʋ hogyi lomoni. Ɩba mʋ́tɔ ha fʋ alɩá fʋdekle.” Ɩnʋnʋ ɩwɩ lɔwa mʋ bi amʋ ɔnlɩn.
Aha Tsɔtsɔɔtsɔ Ɩlɔ Tsa
29Tsu ɩnʋ a, Yesu lɔtsʋn Galilea ɔpʋ ɔnɔ, dʋ yetsia okuku kʋsʋ. 30Aha tsɔtsɔɔtsɔ bɔpʋ abubupʋ, ansibi abwiepʋ, abɔ, amumu pʋ́ ɩlɔ bamba alɔpʋ bobun Yesu ayabiasɩ, ɔlɛtsa amʋ́ fɛ́ɛ́. 31Aha amʋ ɔnɔ lobwie amʋ́ brɛá bowun amumu bʋdɛtɔɩ, abubupʋ ɩwɩ lawa amʋ́ ɔnlɩn, abɔ bʋna, ansibi abwiepʋ ɛ bʋdɛ atɔ wun, bɛkanfʋ Israel Bulu amʋ.
Aha Mpɩm-na Atogyihɛ Ha
(Marko 8:1-10)
32Yesu lɛtɩ mʋ akasɩpʋ, bla amʋ́ ɔbɛɛ, “Aha anfɩ asʋn dɛ mɩ nwɛ wa. Ndɛ ɛkɛ sasɩ ɔpá bʋbuo mɩ, bʋtra bʋma tɔtɔá bégyi. Nɩ nɛha amʋ́ bɔpʋ akʋn natɩ a, ansɩtɔ béyebi amʋ́ ɔkpatɔ.”
33Mʋ akasɩpʋ amʋ bɛfɩtɛ mʋ bɛɛ, “Nkʋnʋ abénya atogyihɛ ha ɔdɔm anfɩ ɔsʋlʋkpan anfɩsʋ?”
34Yesu lɛfɩtɛ amʋ́ ɔbɛɛ, “Bodobodo afɩnɩ mlɩbʋ?”
Bɛlɛ mʋ́ ɔnɔ bɛɛ, “Asienɔ pʋ́ aye putuputu kpalobi kʋ.”
35Yesu lɛha ɔdɔm amʋ betsia asɩ. 36Mʋʋ olotsu bodobodo asienɔ pʋ́ aye amʋ, da Bulu ɩpan, olebiabia mʋ́tɔ ha akasɩpʋ amʋ, beye ha amʋ́. 37Amʋ́ fɛ́ɛ́ begyi mwɛ. Bɔtɔsɩ sianhɛ amʋ bʋla alakpa yile asienɔ. 38Ayin ánɩ́ begyi atɔ amʋ nkʋlɛ bʋgyi mpɩm-na (4,000). Bʋmɛkla atsɩ mʋ́a nyebi.
39Ɩnʋ Yesu lesi aha amʋ ɔkpa, olowie ɔklʋntɔ fa ɔpʋ yɔ Magadanfɔ ɔsʋlʋsʋ.
Obecnie wybrane:
Mateo 15: nko
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
