Mateo 14
14
Asu Ɔbɔpʋ Yohane Lowu
(Marko 6:14-29; Luka 9:7-9)
1Galilea ɔmásʋ ogyipʋ Herode lonu Yesu ɩwɩ asʋn alɩ brɛ amʋtɔ. 2Mʋʋ ɔlɛbla mʋ asumpʋ ɔbɛɛ, “Asu Ɔbɔpʋ Yohane amʋ nɩ. Mʋlakʋsʋ tsu afulitɔ. Mʋ́ sʋ ɔdɛ ofula anfɩ odu bwɛ nɩ.”
3-4Brɛ kʋtɔ a, Yohane letsia bla Owie Herode ɔbɛɛ, mbla mɛha ɔkpa ánɩ́ otsia mʋ pio Filipo mʋ ka Herodia. Ɩnɩ sʋ Herode lɛha bɛkɩta Yohane, wa mʋ ɩkan, pʋ mʋ wa obu. 5Ɔlɔbwɛ agywɩɩn ánɩ́ ɔbɔ́mɔ Yohane, tamɛ olenya aha amʋ ifu, tsufɛ bʋtobu Yohane ánɩ́ Bulu ɔnɔsʋ ɔtɔɩpʋ ogyi.
6Tamɛ ɛkɛ ɔkʋá Owie Herode dɛ mʋ ɔkwɩɩkɛ gyi a, mʋ ka Herodia mʋ bi tsɩhɛ lobowie ɔbʋntɔ tsa Herode mʋa mʋ ahandɛ ansɩtɔ. Mʋ tsa amʋ lɔwa owie amʋ ansigyi. 7Mʋ́ sʋ ɔlɛka ntam ɔbɛɛ, ɔbɛ́ha mʋ togyitɔá odekle.
8Otsibi amʋ mʋ yin lɛha mʋ ɔlɛbla Herode ɔbɛɛ, “Ndekleá fʋpʋ Asu Ɔbɔpʋ Yohane nwun dɩnka ɩlɩnsʋ ha mɩ seseesei.”
9Asʋn anfɩ lɛhɩɛ han Herode, tamɛ mʋ ntam amʋʋ ɔlɛka, pʋ́ aha amʋʋ bʋbʋ ɩnʋ amʋ sʋ a, ɔlɛha mʋ aha ɔtɩnpʋ ɔkpa ɔbɛɛ, ɔbwɛ tɔá otsibi amʋ lafɩtɛ ha mʋ. 10Aha ɔtɩnpʋ amʋ lɛyɛtɩn Yohane nwun obu ɔdɩkpa ɩnʋ. 11Mʋʋ ɔlɔpʋ nwun amʋ dɩnka ɩlɩnsʋ ba otsibi amʋ, mʋ ɛ ɔlɔpʋya mʋ yin Herodia. 12Asu Ɔbɔpʋ Yohane akasɩpʋ bɛba botsu mʋ satin yopula. Mʋ́ ɔma a, bɔyɔ yɛbla Yesu asʋn ánɩ́ ɩlaba.
Aha Mpɩm-nu Atogyihɛ Ha
(Marko 6:30-44; Luka 9:10-17; Yohane 6:1-14)
13Yesu lenya nu asʋn amʋ alɩ, olowie ɔklʋntɔ, fa ntsu yetsia ɔtɩnɛkʋ mʋ nkʋlɛ. Tamɛ ɔdɔm amʋ bɛbɩ ɔtɩnɛá ɔyɔ. Mʋ́ sʋ bɛnatɩ ayabitɔ tsu amʋ́ awulusʋ gya mʋ nkpa. 14Brɛá ɔlɛkplɩ dalɩ ɔklʋn amʋtɔ, wun ɔdɔm kpɔnkpɔɔnkpɔntɩ a, amʋ́ asʋn lɔwa mʋ nwɛ. Mʋ́ sʋ ɔlɛtsa amʋ́tɔ alɔpʋ.
15Owi lɔpɔn a, akasɩpʋ amʋ bɛba mʋ wa bɛbla mʋ bɛɛ, “Dimbisʋ nfɩ gyi, owi ɛ dɛta. Mʋ́ sʋ ha amʋ́ abʋyɔ awuluá ɩbʋ bomli nfɩ asɩ yɛhɔ tɔkʋ gyi.”
16Tamɛ Yesu lɛlɛ mʋ́ ɔnɔ ɔbɛɛ, “Imehian ánɩ́ bɔ́yɔ. Mlɩdunka tɔkʋ ha amʋ́ abʋgyi.”
17Mʋ akasɩpʋ amʋ bɛbla mʋ bɛɛ, “Tɔá anɩbʋ fɛ́ɛ́ gyi bodobodo apin anu pʋ́ ntsutso iye bwahɛ anyɔ pɛ.”
18Yesu lɛbla amʋ́ ɔbɛɛ, “Mlɩtsu ba mɩ.” 19Mʋʋ ɔlɛha aha amʋ betsiatsia ɩfa bɔbwɛ amʋsʋ. Ɩnʋ olotsu bodobodo anu pʋ́ ntsutso iye bwahɛ anyɔ amʋ. Olotsu ansɩ fʋa kɩ ɔsʋsʋ, ɔlɛda Bulu ɩpan. Mʋʋ olebiabia bodobodo amʋtɔ ha akasɩpʋ amʋ, amʋ́ ɛ beye mʋ́ ha aha amʋ fɛ́ɛ́. 20Amʋ́ fɛ́ɛ́ begyi mwɛ sian. Akasɩpʋ amʋ bɔtɔsɩ sianhɛ amʋ. Ɩlɔbʋla alakpa duanyɔ. 21Ayin ánɩ́ begyi atɔ amʋ nkʋlɛ bʋgyi fɛ mpɩm-nu (5,000). Bʋmɛkla atsɩ mʋ́a nyebi mʋ́.
Ɔpʋsʋ Natɩ
(Marko 6:45-52; Yohane 6:15-21)
22Mʋʋ Yesu lɛha akasɩpʋ amʋ ɔbɛɛ, bʋwie ɔklʋntɔ, abʋgyankpa fa ɔpʋ amʋ yɔ mʋ́ ɔbɩn. Mʋ mʋ́ olesin ɔma si aha amʋ ɔkpa. 23Brɛá olesi amʋ́ ɔkpa ta a, ɔlɔdʋ yɔ bʋsʋ yɔbɔ mpaɩ. Mʋ nkʋlɛ oletsia ɩnʋ yɔfʋn owi tahɛ. 24Alɩ brɛ amʋtɔ a, ɔklʋn amʋ lawie ntsu nsɩnɛ. Ilefia afu kpɔnkpɔntɩ kʋ, ɔpʋ amʋ lɔwa dabɩ.
25Bakɛ-bakɛ a, Yesu lɛnatɩ ntsu amʋsʋ ayabitɔ buo amʋ́. 26Brɛá bowun mʋ, ɔna ɔpʋ amʋsʋ a, benya ifu sʋra okitikiti, blɩ bɛɛ, “Fuli ogyi.”
27Tamɛ ɔlɔwa ɔsa bla amʋ́ ɔbɛɛ, “Mlɩwa klʋn. Mɩ nɩ. Mlɩmánya ifu.”
28Petro lɛbla Yesu ɔbɛɛ, “Mɩ Wie, nɩ fʋ nɩ mʋ́ a, ha mɩ ɛ annatɩ ɔpʋ amʋsʋ bɔtʋ fʋ.”
29Yesu lɛbla mʋ ɔbɛɛ, “Natɩ ba.” Petro lɛdalɩ ɔklʋn amʋtɔ ɔna ɔpʋ amʋsʋ ɔyɔ Yesu wa. 30Tamɛ brɛá olowun alɩá afu amʋ ɔnɔ bʋ ɔnlɩn a, ifu lowie mʋ ayetɔ. Mʋ́ sʋ ɔlɔwa mɛ bɩ. Mʋʋ ɔlɔkplʋn kpoli Yesu ɔbɛɛ, “Mɩ Wie, hɔ mɩ!”
31Ɩnʋnʋ Yesu lɛtɩnkɩ ɩbɩ kɩta mʋ, bla mʋ ɔbɛɛ, “Fʋ hogyi mɔtsɔ. Ntogyi sʋ fʋdɛ nwɛn gyi?”
32Benya dʋ wie ɔklʋn amʋtɔ alɩ, afu amʋ lɛka itin. 33Ɩnʋ aha amʋʋ bʋbʋ ɔklʋn amʋtɔ amʋ bɛda akpawunu Yesu ayabitɔ, blɩ bɛɛ, “Lɛlɛ, Bulu mʋ Bi fʋgyi.”
Genesaretfɔ Alɔpʋ Tsa
(Marko 6:53-56)
34Yesu mʋa amʋ́nyɔ bɛfa ɔpʋ amʋ yesi Genesaret otsubunɔ. 35Brɛá ɩnʋfɔ bɛbɩá mʋ nɩ a, bɔwa abi ya amʋ́ awulu fɛ́ɛ́sʋ, ha amʋ́ bɔpʋ alɔpʋ fɛ́ɛ́ ba mʋ. 36Bokokoli Yesu bɛɛ, ɔha alɔpʋ amʋ abʋpʋ ɩbɩ da mʋ atadɩɛ ɔdanʋ kpan. Amʋ́á bɔpʋ ɩbɩ da mʋ́ fɛ́ɛ́ benya ɩlɔtsa.
Obecnie wybrane:
Mateo 14: nko
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation
