२ कोरिन्थी 4
4
सए पुमैंर परमेश्रजी थेंमिंबै सै न्होर
1परमेश्वरजी खीए दयाम्हाँयाउँइँले ङिलाइ खीए सेवा लबै के पिंइमुँ। छतसि ङिए सैं खोंयोंइ च्योंब आत। 2छलु-म्हिलु नेरो फा पिन् तबै केमैं ङिइ पिवाइमुँ। छलेन ङिइ परमेश्वरए ताँमैं म्हिमैंने बिप्रमा स्योलिबै ताँमैं कोंसि आबि। बरु म्हिमैंलाइ क्ह्रोंसेंन्बै ताँ उँइँमिंसि परमेश्वर नेरो म्हिमैंए उँइँर ह्रोंसलाइ ठिक ठर्दिबै केमैं ङि लम्। 3छतसि ङिइ बिबै सैं तोंबै ताँ नास तब्मैंए ल्हागिर मत्त्रे हुथेंब् धों तइमुँ। 4परमेश्वर खैब मुँ, ख्रीष्टै या छाबन् मुँ। खी ङाँइँले खबै सैं तोंबै ताँ आक्होरिगे बिसि चु ह्युलर्बै देवताइ बिश्वास आलब्मैंए सैंर्बै मिइ च ताँ म्रोंल् आखाँब लवाइमुँ। 5ङिइ ह्रोंसए ताँ आबि, दिलेया येशूए ल्हागिर ङि क्हेमैंए केब्छैंमैं धोंन् तसि येशू ख्रीष्टन् प्रभु ग बिबै ताँ ङि बिप्रम्। 6“मिछु खैबै क्ल्ह्योउँइँले ह्वे चाररिगे” बिसि परमेश्वरजी बिइ। येशू ख्रीष्टए लिउँइँले परमेश्वरए चारबै ह्वे कति थेब् मुँ बिब ङिइ सेरिगे बिसि खीजी ह्रोंसए ह्वे ङिए खोंर चारल् पिंइमुँ।#उत १:३
7ताँन् भन्दा थेबै शक्ति ङिल आङिं, परमेश्वरलन् ग बिसि छेनाले उँइँमिंबै ल्हागिर चु सै न्होर ङि सए पुमैं धों तबै म्हिमैंने खीजी थेंमिंइमुँ। 8ङिइ खन्तोंदोंउँइँले दुःख योंइमुँ, दिलेया आप्लेइमुँ। खैला-तोला तसि सैं ङ्हिरि तनाबिलेया ङिए सैं च्योंब आतइमुँ। 9ङिए बिरोध लब्मैं ल्हेंन् मुँलेया परमेश्वरजी ङिलाइ खोंयोंइ आपिइमुँ। ङिलाइ ल्हिसि क्हुरलेया ङि आसिइमुँ। 10येशूजी थोब् धों तबै छ्ह ङिज्यै या थोल् खाँरिगे बिसि ङिए ल्हागिर खी सिमिंबै दुःख मैंसि ङिज्यै या ह्रोंसए ज्युर्न खोंयोंइ बिलै दुःख नोप्रम्। 11सिसि ह्याल् त्हुबै ङिए ज्युउँइँले या अरूमैंइ येशूजी थोबै छ्ह म्रोंरिगे बिसि ङि सोगों मुँमा खोंयोंन् बिलै येशूए ल्हागिर कालए सुँर्न फेनेम्। 12छले येशूउँइँले खबै सैं तोंबै ताँ बिप्रमा ङि सिब् धों तलेया क्हेमैंइ खोंयोंइ आखाँबै छ्ह योंइमुँ।
13भजनसंग्रहर बिब् धोंले,
“ङइ परमेश्वरए फिर बिश्वास लइ, छतसि ङइ खीए ताँ पोंइ।”#भज ११६:१०
छ बिब् धोंलेन् ङिज्यै या खीए फिर बिश्वास लइ, छतसि ङि खीए ताँ पोंम्। 14येशू ख्रीष्टलाइ सिबउँइँले सोगों लमिंबै परमेश्वरजी ङिलाज्यै या येशू ख्रीष्टने घ्रिन् लसि सिबउँइँले सोगों लमिंब्मुँ, धै खीजी ङिलाइ क्हेमैंने बालुन् खीए ङाँर बोब्मुँ बिब ङि सेइमुँ। 15तलेबिस्याँ ङिइ दुःख नोदै के लब क्हेमैंए ल्हागिर्न ग। खैले परमेश्वरए दयाम्हाँया ल्हें म्हिमैंइ योंइमुँ, छलेन परमेश्वरए मान कति थेब मुँ बिसि धन्यबाद पिंब्मैं या ल्हेंन् तब्मुँ।
16छतसि ङि सैं च्योंब आल। ङिए ज्युर्बै भों नु-नुइ ह्यालेया ङिए सैं त्हिंइ ह्रोंसे भोंब् ततै ह्याम्। 17तलेबिस्याँ ङिइ योंबै तिस्याँबै च्युगुथिरि दुःखइ ङिए ल्हागिर खोंयोंइ आखाँबै छ्ह नेरो थेबै मान योंबै के लइन मुँ। 18म्रोंल् खाँबै सैमैंम् नास तयाम्, आम्रोंबै सै खोंयोंन् बिलै तरिम्। छतसि ङि म्रोंबै सैमैंए लिलि आप्र, आम्रोंबै सैमैंए लिलि प्रम्।
Obecnie wybrane:
२ कोरिन्थी 4: GCMB
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2020, Wycliffe Bible Translators, Inc. All rights reserved.