२ कोरिन्थी 10
10
कुल्मिंबै चेला चिब तबइले ङने हग मुँ बिब
1क्हेमैंए न्होंरि को-कोइइ “पावल ङिउँइँले ह्रेंगो तमा ङिलाइ हौदिबै प्ह्रिछ्या प्ह्रिम्, दिलेया ङि ङाँर मुँमा च्योंब तसि तोइ आबिल्ले टिम्,” बिसि बिम् रो। दिलेया ख्रीष्टजी ङ्योए फिर म्हाँया लब् धोंले ङए सैंरै या ल्हयो खबइले क्हेमैने ङ यो छ्युँ लम्: 2“ङ क्हेमैं ङाँर खमा ङइ ह्रिस उँइँल् आत्हुरिगे।” तलेबिस्याँ ङिइ आछ्याँबै सैंइ के लम् रो बिब्मैं म्रोंसि ङ ह्रिस खम्। 3ङि चु ह्युलर टिलेया, चु ह्युलर्बै म्हिमैं धोंले ङि प्होंब्-न्हेब् आल। 4तलेबिस्याँ ङिइ छेबै हातियार ह्युलर्बै म्हिमैंइ छेब् धों तब आङिं, ङिइ छेबै हातियारम् परमेश्वरए थेबै शक्ति मुँबै बचन ग। च बचनइ भोंबै किल्लामैं नास लवाल् खाँम्। 5परमेश्वरए ज्ञानए बिरोध लसि आतबै ताँ पोंब्मैं नेरो थेब् प्हैंसि पोंबै म्हिमैंए बिचारमैं ङिइ नास लवाम्, धै छाबै म्हिमैंलाइ ख्रीष्टजी बिबै ताँ म्हाँदिलन् त्हुब लवाम्। 6ङिइ लद् बिबै केमैं ताँन् क्हेमैंइ लल् खाँबै लिउँइँ ङिइ बिब् आङिंब्मैंलाइ दण्ड पिंबर ङि तयार तब्मुँ।
7क्हेमैंइ ह्रोंसए मिइ म्रोंबै सैमैं मत्त्रे ङ्ह्योम्। क्हेमैंए न्होंरि खाबज्यै या “ङ येशू ख्रीष्टए म्हि ग!” बिम् बिस्याँ च धोंलेन् ङि या ख्रीष्टए म्हिन् ग बिसि चइ क्होल् त्हुम्। 8प्रभुजी ङिलाइ पिंबै अधिकार क्हेमैंलाइ न्होह्रों लबै ल्हागिर पिंब आङिं, बरु क्हेमैंलाइ भोंब् लमिंबै ल्हागिर पिंब् ग। छतसि प्रभुजी ङिलाइ पिंबै अधिकारए बारेर ङइ प्हैंसि पोंलेया ङ फापिल् त्हुरिब् आरे। 9ङइ क्हेमैंलाइ प्ह्रिबै प्ह्रिछ्यामैं क्हेमैंलाइ ङ्हिंन् लबर प्ह्रिब् ग बिसि आमैंन्। 10“पावलए प्ह्रिछ्यामैंरम् दयाम्हाँया आरेबै म्हिइ धोंले हौदिबै ताँमैं प्ह्रिम्, दिलेया ङ्यो ङाँर मुँमा चइ तोइ बिल् आखाँ,” बिसि को-कोइ बिम्। 11छ बिबै म्हिमैंइ चु ताँ सेल् त्हुम्, प्ह्रिछ्यार ङिइ खैले प्ह्रिइमुँ, क्हेमैं ङाँर खमैं या ङिइ छलेन् के लम्!
12ह्रोंसइ ह्रोंसलाइन थेब् लसि प्हैंबै म्हिमैंने ङि च्हैंदा आङ्हाँ। चमैंइ ह्रोंसलाइन अरूमैंने च्हैंसि ङ्ह्योमा चमैं कत्ति बुद्धि आरेब्मैं तब्मुँ। 13दिलेया ङिम् छले थेब् प्हैंसि आपों। बरु परमेश्वरजी ङिने “लद्” बिबै केमैं मत्त्रे ङिइ लम्, धै क्हेमैंए ङाँर खसि लबै केमैं या परमेश्वरजी ङिने “लद्” बिबै केन् ग। 14परमेश्वरजी क्हेमैं ङिए जिम्मार पिंइमुँ। छतसि ख्रीष्टउँइँले खबै सैं तोंबै ताँ धाँसे ओंसों क्हेमैं ङाँर बिखब्मैं ङिन् ग। 15ङिलाइ परमेश्वरजी पिंबै जिम्मा बाहेक् अरू चेलामैंइ लबै केर ङिइ यो झोंसि थेब् आप्हैं। बरु क्हेमैंए बिश्वास भोंब् तरिगे धै परमेश्वरजी ङिलाइ जिम्मा पिंब् धोंले ङिइ क्हेमैंने बालु झन् ल्हें के लल् खाँरिगे बिब ङिए आशा मुँ। 16झाइले क्हेमैंए ह्युलर मत्त्रे आङिं, अरू ह्रें-ह्रेंगोबै ह्युलजरै या येशू ख्रीष्टउँइँले खबै सैं तोंबै ताँ ङि बिप्रल् खाँम्। झाइले अरूइ लबै केर आङिं, ह्रोंसइ लल् खाँबै केर मत्त्रे ङिइ थेब् प्हैंल् योंब्मुँ।
17परमेश्वरए छ्वेर छले प्ह्रिइमुँ,
“खाबज्यै या थेब् प्हैंसि पोंदा ङ्हाँस्याँ,
चइ याहवेहजी लबै केर्न प्हैंसि पोंरिगे।”#यर ९:२४
18तलेबिस्याँ ह्रोंसइन ह्रोंसलाइ थेब् प्हैंसि पोंबै म्हिलाइ प्रभुजी आखो, बरु प्रभुजी ठिक ठर्दिबै म्हिन् ठिक ठर्दिम्।
Obecnie wybrane:
२ कोरिन्थी 10: GCMB
Podkreślenie
Kopiuj
Porównaj
Udostępnij
Chcesz, aby twoje zakreślenia były zapisywane na wszystkich twoich urządzeniach? Zarejestruj się lub zaloguj
© 2020, Wycliffe Bible Translators, Inc. All rights reserved.