San Marcos 8
8
Allempo Jesúspaꞌ rratenan shonteꞌ acheñeneshaꞌ ñeñthña acheñeneshaꞌpaꞌ alloꞌtsen paꞌtatsoch mil
(Mt. 15.32-39)
1Allempoña poꞌpocheño shonterrerr acheñeneshaꞌ Jesúsesho. Allempopaꞌxhoꞌña ama eñalle ñeñthchaꞌ rret. Ñeñthoꞌmar Jesúspaꞌ agotan poeyochreshaꞌpaꞌ ateth otapanet:
2—Napaꞌ xha atarr nemoereña allowen acheñeneshaꞌ ñeñth shontetsa arr. Oꞌ maꞌpamtoset nesho ama eñallmeñeto ñeñthchaꞌ rret. 3Ama pokteyeꞌ nenteñe oꞌch awanerret eꞌñe paꞌchporrñeshaꞌ theꞌt ama aꞌñsheꞌmterreto thoño tharroꞌmar patantaꞌtetspaꞌ atarr bhaxhayoth wapyenet.
4Poeyochreshaꞌñapaꞌ ateth ochet:
—Errawachkaꞌye yentña rreñetstheꞌ ñeñthchaꞌ yerrach shonteꞌ acheñ arrpaꞌ amayakaꞌye.
5Jesúsñapaꞌ ateth oterraneterr:
—Sapaꞌ ¿errponaꞌt sechenña pan?
Ñetñapaꞌ ateth otereterr:
—Eꞌñekaꞌye kanxhrra yechen.
6Allempoñapaꞌ otan acheñeneshaꞌ:
—Theꞌpaꞌ sanorrxhaꞌtyes patso.
Allñapaꞌ agapan ñeñth kanxherr pan. Agapwepaꞌ oꞌ parasyosoꞌtenanerr Pompor allothñapaꞌ oꞌ shotaꞌtan pan, apanatyesan poeyochreshaꞌ. Ñetñapaꞌ oꞌ epatyeset ñamet allowen acheñeneshaꞌ eꞌñe epaꞌwet. 7Apwanet panpaꞌ eñall ñamha patheꞌtets kakatholleshaꞌ. Jesúsñapaꞌ alla parasyosoꞌtamperranerr ñamha kakatholleshaꞌ allempoñapaꞌ oterranerr poeyochreshaꞌ:
—Sepatyerraneterr ñamha kakatholleshaꞌ.
8Allempoñapaꞌ oꞌ rrallmeꞌchet allowenet, eꞌñe yetrraꞌtwawet. Oꞌ eꞌñe yetwawetpaꞌ xha aꞌpchatyeset ñeñthñapaꞌ aꞌyapaxherret. Ñeñthña aꞌyapaxherretpaꞌ xhepaꞌtchaꞌ chorrats kanxherr kañther eꞌñe thamoꞌyareꞌ. 9Ñeñth rrallmeꞌchats atarr aton acheñeneshaꞌ ñatoꞌ alloꞌtsentheꞌ paꞌtatsoch mil acheñeneshaꞌ. Allempoña Jesúspaꞌ soꞌtnerran acheñeneshaꞌpaꞌ awerr, 10aꞌtapos noñtho poeyochreshowen awamphset oꞌch awanmoet anetso ñeñth paꞌsoꞌcheñ Dalmanuta.
Attho fariseoneshaꞌ enamoset Jesús gatapanetepaꞌtoꞌ poꞌpartsoña
(Mt. 16.1-4; Lc. 12.54-56)
11Allempoña Jesúspaꞌ waxherrñañerr ñamha fariseoneshaꞌ awoꞌch otnareꞌchet Jesús. Ñetñapaꞌ xha moeneñet oꞌch topachet Jesús. Ñeñthoꞌmarña ateth otoset:
—Yapaꞌ añkaꞌye yemnen oꞌch pegatapoey pepartsoña entoth allochñapaꞌ atthoch yeñotoseph poꞌñoxh phapaꞌ Parets Poechemereph.
12Jesúsñapaꞌ allentha enara xha moeneꞌ poꞌpoñ entanet poeyoxhro ñeñthoꞌmarña ateth otanet:
—Esoꞌmartheꞌkaꞌye acheñeneshaꞌ ñeñth korraꞌyetsa theꞌ ñetñapaꞌ aña atarr eꞌnenet oꞌch norrtatanet nepartsoña entoth. Poꞌñoxhkaꞌye na theꞌpaꞌ oꞌch notas, amaꞌt koñeꞌtha amach es negataneto.
13Allempoña Jesús sowanerranetpaꞌ aꞌtapwerr noñthopaꞌ awampes, pechaterra yomhtaꞌn.
Attho Jesús tomaꞌntaterraneterr ñeñth poꞌchaser pen fariseoneshaꞌ
(Mt. 16.5-12)
14Poeyochreshaꞌñapaꞌ xha poesnomoet oꞌch anmoet pokrramh, noñthopaꞌ ama es eñalle ñeñthchaꞌ rret, eꞌñe pathrra pan eñall. 15Jesúsñapaꞌ alla tomaꞌntaterraneterr, ñeñthñapaꞌ ateth otanet:
—Eꞌñech señota ñatoꞌt semeñeꞌteñaꞌña fariseoneshaꞌ amaꞌt ñamha Herodes poꞌchaser allo tsetenet pan.
16Ñetña kothapeꞌchyesetpaꞌ ateth otannaꞌtyeset:
—Amakaꞌye yechenoña pan ñeñthoꞌmartheꞌkaꞌyeña oteney añoꞌch yemeñeꞌtatscheña fariseoneshaꞌ poꞌchaser.
17Jesúsña allempo eñotanet ateth kothapeꞌchyenet ñañapaꞌ ateth oterraneterr:
—Esoꞌmareꞌt sellkëñeshaꞌ sotannaꞌtyena añoꞌ eñalle ñeñthchaꞌ serraꞌ. ¿Amaꞌt señoteñe? ¿Amaꞌt xhennasoña seyoxhro? Themeꞌttsenaꞌt seꞌcharrtatenña seyoxher. 18Sapaꞌ amaꞌt aklloꞌyetheseñpaꞌ xhakaꞌye sottena ñerraꞌmrratheꞌ ama senteno. Amaꞌt etatheseñpaꞌ xhakaꞌye sottena ñerraꞌmrratheꞌ ama seꞌmoeno. Amaꞌt mameshapaꞌ areꞌtña es seyerpoeno. 19Ñewa, awaña allempo neshotaꞌt amnar pan eꞌñekaꞌye epaꞌwa amnaroch mil yakmaneshaꞌ. Ellopaꞌ ¿errponaꞌtña sapxhaꞌwerrña ñeñth ashotaꞌtyesareth allempo eꞌñe seyetwa? ¿Errponaꞌtña kañther seꞌchorrerr?
Ñetñapaꞌ ateth ochet:
—Xharraꞌkaꞌye poechena epa kañther.
20—Ñamha allempo neshotaꞌt kanxherr pan paꞌtatsoch mil acheñ ñeñth rreꞌ ¿errponaꞌtña sapxherrerrña ñeñth ashotaꞌtyesareth allempo eꞌñe seyetwerrerr? ¿Errponaꞌtña kañther seꞌchorrerrerr?
Ñetña ateth ochet:
—Kanxherrkaꞌye kañther yeꞌchorrerrerrña allempo.
21Jesúsñapaꞌ alla oterraneterr:
—Theꞌñapaꞌ ¿amaꞌtña oꞌ xhaponasoña seyoxhro? Ñeñth neñotatenes ñeñthpaꞌ ama serrarekpayeꞌ notenso.
Allempo Jesúspaꞌ aꞌkrraterran aporoꞌyeth all Betsaido
22Allempoña xhaxhaꞌtet anetso Betsaido, allñapaꞌ wapaterrñañeterr aporoꞌyeth, ñeñthpaꞌ ateth otoset Jesús:
—Añekopkaꞌye yewapateñña oꞌch phaꞌphllaklleꞌchaph atthoch pekwater.
23Allempoña Jesúspaꞌ echaꞌnman aporoꞌyeth potothpaꞌ anemh aꞌyeneth all ama eñalle pokoll. Allñapaꞌ aꞌyaklleꞌchos paꞌsnemo, atthoña aꞌphllaklleꞌchos, allñapaꞌ ateth och:
—¿Amaꞌt koñeꞌthapaꞌ amaꞌt oꞌ pento?
24Aporoꞌyethña kowaꞌyestsapaꞌ allentha otan Jesús:
—Oꞌkaꞌye nent acheñ alla chopeñen tharraña eꞌñe ateth nentyenanet ñerraꞌmrratheꞌ tsach thomxhaꞌtyets.
25Jesúsñapaꞌ alla aꞌphllaklleꞌchererr, aporoꞌyethñapaꞌ kowaꞌyerrtserrpaꞌ xhepaꞌtchaꞌ eꞌñe kowenterrtsaña paꞌklleꞌ. Eꞌñe kowen es entyeswawerr allowen. 26Allempoña Jesúspaꞌ ateth och:
—Theꞌña ñerraꞌm oꞌch awerreph pepakllopaꞌ tharraña amach phoñmatsterroña anetsoꞌmar, allochñapaꞌ amach eseshaꞌ photaphsaꞌtatsetnerro amaꞌt eꞌñe poesheñarra.
Attho Pedropaꞌ otan Jesús, phapaꞌ phaña Yompor Poechemereph ñeñtheph Cristotosets
(Mt. 16.13-20; Lc. 9.18-21)
27Allempoña awerrerr Jesús poeyochreshowen. Arr sechenet all oteñet Cesarea ñeñthara Filipo allchaꞌ chopeñeꞌchyenetaꞌ all anetsoꞌmar. Allña thoñopaꞌ aꞌphthoꞌtnoman poeyochreshaꞌ ñeñthpaꞌ ateth otnomanet:
—¿Errothenaꞌt otyenenña allowen acheñeneshaꞌ, napaꞌ eseshantheꞌ?
28Ñetñapaꞌ ateth otyeset:
—Patantarr acheñeneshaꞌpaꞌ atethkaꞌye otyenpet phapaꞌ Juanañphoꞌtheꞌ ñeñthephoꞌ apatañtatseꞌth Yomporekop. Poꞌpotantaññapaꞌ ateth otyenpet phapaꞌ Elíasophoꞌtheꞌ; poꞌpotantaññapaꞌ ateth otyenpet phapaꞌ añephoꞌtheꞌ poꞌpsheñeñ ñeñth aꞌmhtayeꞌth Yompor poꞌñoñ awath.
29Allempoñapaꞌ alla aꞌphthoꞌterraneterr:
—Sañapaꞌ ¿errothenaꞌtña sotenenña sa?
Pedroña eñoratsapaꞌ ateth och:
—Phapaꞌ ñeñthephkaꞌye Cristotosets.
30Allempoñapaꞌ otan poeyochreshaꞌ:
—Amach eseshaꞌ sotaphsaꞌtatsto amaꞌt poesheñarra napaꞌ na ñeñthen Cristotets.
Attho Jesúspaꞌ eñotatan poeyochreshaꞌ ñapaꞌ amtsarethterrach
(Mt. 16.21-28; Lc. 9.22-27)
31Jesúsña eꞌñe allempotheñpaꞌ mothetnomh eñotatyesnomoeꞌ poeyochreshaꞌ ñeñth ateth anareth ñokop, ñeñthpaꞌ ateth otanet:
—Na Ñeñthen Acheñetosetspaꞌ ateth anareth nokop, nanakchaꞌ naꞌmoeroxhtatarethterra. Amach eseshaꞌ pokteyeꞌ nenterraye —amaꞌt ñeñth pomporneshaꞌ pen judioneshaꞌ, amaꞌt ñeñth paꞌmhchaꞌtarether pen judioneshaꞌ poꞌkornaneshar, amaꞌt ñamha ñeñth etsotayenayeñ ñoñets ñeñth ateth anareth judioneshakop— amaꞌt ñetpaꞌ amach eseshayeꞌ neyemterraye. Atthochña napaꞌ moetsataterrnetchaꞌ. Tharraña pomaꞌpamtañoch oꞌch alla netanterra.
32Ñeñthpaꞌ eꞌñe eñotoxhen otnomanet ñapaꞌ atethchaꞌ apharethterra. Pedroñapaꞌ allentha anemh aꞌyenethpaꞌ allñapaꞌ ateth otos:
—Arepaꞌch Partseshachaꞌ attheyeꞌ perrpeto amaꞌt errponaña.
33Jesúsñapaꞌ alla poerraperra kowos poeyochresheshoneth allñapaꞌ ateth otan Pedro:
—Orraph aꞌyo neshoth oneñethe; phapaꞌ amakaꞌye Yomporeyeꞌ ateth phokthapeꞌchatenaye; ñeñthpaꞌ acheñarramcheꞌ pokthaphña.
34Allempoña Jesúspaꞌ agotan acheñeneshaꞌ ñamha poeyochreshaꞌ ñeñthpaꞌ ateth otanet:
—Ñerraꞌm eseshaꞌ moeneneꞌ oꞌch kotherrnet na eꞌñe poꞌñoxh atthoch neyochreshaꞌ neperranet añ poktetsa sowanmoetepaꞌña ñeñth ateth moenenet eꞌñe ñokpoeta amaꞌt eꞌñe pokrreñowenet. Atthochña ñetpaꞌ oꞌch eꞌñe tomaꞌnteret ñeñth chechneneꞌ poꞌkorsoch allchaꞌ moeroxhtet ñamet. Atthochña kotherrnet eꞌñe poꞌñoxh. 35Tharroꞌmar ñerraꞌm eseshaꞌ eꞌñe aña moenenet oꞌch korrenet atomat atthoch eꞌñe koshenet arr patsro, ñetñapaꞌ xhach aꞌchenkatet ñañeñeta. Tharraña ñerraꞌm eseshaꞌ eꞌñe pokteꞌ enteneꞌ oꞌch es sowanerret eꞌñe pokrreñowenet nokop atthoch epatwerret kowen ñoñets ñeñthpaꞌ alloch sekeshperra, ñeñthña acheñerpaꞌ ñañapaꞌ korretsach eꞌñe kowen thayotheñ errponañowen. 36Amaꞌt errponenapharen esokmañen es yeyoratsetyes ora allpon ñeñth yentyen añe patsro, tharraña ñerraꞌm ñeñthach eꞌñe yaꞌchenkaterreꞌ yekamkëñowen, ñeñthñapaꞌ amaꞌt koñeꞌthapaꞌ amach es sherberrye. Tharroꞌmar ama eñalle poꞌpoñ ñeñth atarr sherbets, añña atarr nanak sherbets ñeñthchaꞌ aꞌkeshphaterreꞌ yekamkëñ. 37Tharroꞌmar yokoppaꞌ ama es eñalle ñeñthchaꞌ yepomoerr alloch alla yerañtherra yekamkëñ. 38Tharraña ñerraꞌm erraꞌtsenchaꞌ nepenkënaya na theꞌ, neñoñpaꞌxhoꞌña xha apenkoxhen entennanet, napaꞌxhoꞌña nepenkaꞌwerranetchaꞌ esempoch nowerra. Shonteꞌ acheñeneshaꞌ ñeñth korraꞌyetsa theꞌ arr patsro ñetñapaꞌ atarr ochñatheneshet tharroꞌmar ñetpaꞌ poꞌpoña poꞌyomporer phaꞌyenet. Tharraña ñerraꞌm eseshaꞌch poepenkëñothetan na amach aꞌmethenneto all, ñeñthña acheñerpaꞌ napaꞌxhoꞌña xhach nepenkaꞌwera ñerraꞌm esempoch nowerra. Poꞌñoxh napaꞌ Ñeñthen Acheñetosetspaꞌ nowerrach eꞌñe Nompor poꞌkowenñoth epan ñamha poꞌmhllañotheñnaneshar ñeñth eꞌñe thorraꞌyetsa Partsokop.
Currently Selected:
San Marcos 8: ame
Highlight
Share
ਕਾਪੀ।
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.
San Marcos 8
8
Allempo Jesúspaꞌ rratenan shonteꞌ acheñeneshaꞌ ñeñthña acheñeneshaꞌpaꞌ alloꞌtsen paꞌtatsoch mil
(Mt. 15.32-39)
1Allempoña poꞌpocheño shonterrerr acheñeneshaꞌ Jesúsesho. Allempopaꞌxhoꞌña ama eñalle ñeñthchaꞌ rret. Ñeñthoꞌmar Jesúspaꞌ agotan poeyochreshaꞌpaꞌ ateth otapanet:
2—Napaꞌ xha atarr nemoereña allowen acheñeneshaꞌ ñeñth shontetsa arr. Oꞌ maꞌpamtoset nesho ama eñallmeñeto ñeñthchaꞌ rret. 3Ama pokteyeꞌ nenteñe oꞌch awanerret eꞌñe paꞌchporrñeshaꞌ theꞌt ama aꞌñsheꞌmterreto thoño tharroꞌmar patantaꞌtetspaꞌ atarr bhaxhayoth wapyenet.
4Poeyochreshaꞌñapaꞌ ateth ochet:
—Errawachkaꞌye yentña rreñetstheꞌ ñeñthchaꞌ yerrach shonteꞌ acheñ arrpaꞌ amayakaꞌye.
5Jesúsñapaꞌ ateth oterraneterr:
—Sapaꞌ ¿errponaꞌt sechenña pan?
Ñetñapaꞌ ateth otereterr:
—Eꞌñekaꞌye kanxhrra yechen.
6Allempoñapaꞌ otan acheñeneshaꞌ:
—Theꞌpaꞌ sanorrxhaꞌtyes patso.
Allñapaꞌ agapan ñeñth kanxherr pan. Agapwepaꞌ oꞌ parasyosoꞌtenanerr Pompor allothñapaꞌ oꞌ shotaꞌtan pan, apanatyesan poeyochreshaꞌ. Ñetñapaꞌ oꞌ epatyeset ñamet allowen acheñeneshaꞌ eꞌñe epaꞌwet. 7Apwanet panpaꞌ eñall ñamha patheꞌtets kakatholleshaꞌ. Jesúsñapaꞌ alla parasyosoꞌtamperranerr ñamha kakatholleshaꞌ allempoñapaꞌ oterranerr poeyochreshaꞌ:
—Sepatyerraneterr ñamha kakatholleshaꞌ.
8Allempoñapaꞌ oꞌ rrallmeꞌchet allowenet, eꞌñe yetrraꞌtwawet. Oꞌ eꞌñe yetwawetpaꞌ xha aꞌpchatyeset ñeñthñapaꞌ aꞌyapaxherret. Ñeñthña aꞌyapaxherretpaꞌ xhepaꞌtchaꞌ chorrats kanxherr kañther eꞌñe thamoꞌyareꞌ. 9Ñeñth rrallmeꞌchats atarr aton acheñeneshaꞌ ñatoꞌ alloꞌtsentheꞌ paꞌtatsoch mil acheñeneshaꞌ. Allempoña Jesúspaꞌ soꞌtnerran acheñeneshaꞌpaꞌ awerr, 10aꞌtapos noñtho poeyochreshowen awamphset oꞌch awanmoet anetso ñeñth paꞌsoꞌcheñ Dalmanuta.
Attho fariseoneshaꞌ enamoset Jesús gatapanetepaꞌtoꞌ poꞌpartsoña
(Mt. 16.1-4; Lc. 12.54-56)
11Allempoña Jesúspaꞌ waxherrñañerr ñamha fariseoneshaꞌ awoꞌch otnareꞌchet Jesús. Ñetñapaꞌ xha moeneñet oꞌch topachet Jesús. Ñeñthoꞌmarña ateth otoset:
—Yapaꞌ añkaꞌye yemnen oꞌch pegatapoey pepartsoña entoth allochñapaꞌ atthoch yeñotoseph poꞌñoxh phapaꞌ Parets Poechemereph.
12Jesúsñapaꞌ allentha enara xha moeneꞌ poꞌpoñ entanet poeyoxhro ñeñthoꞌmarña ateth otanet:
—Esoꞌmartheꞌkaꞌye acheñeneshaꞌ ñeñth korraꞌyetsa theꞌ ñetñapaꞌ aña atarr eꞌnenet oꞌch norrtatanet nepartsoña entoth. Poꞌñoxhkaꞌye na theꞌpaꞌ oꞌch notas, amaꞌt koñeꞌtha amach es negataneto.
13Allempoña Jesús sowanerranetpaꞌ aꞌtapwerr noñthopaꞌ awampes, pechaterra yomhtaꞌn.
Attho Jesús tomaꞌntaterraneterr ñeñth poꞌchaser pen fariseoneshaꞌ
(Mt. 16.5-12)
14Poeyochreshaꞌñapaꞌ xha poesnomoet oꞌch anmoet pokrramh, noñthopaꞌ ama es eñalle ñeñthchaꞌ rret, eꞌñe pathrra pan eñall. 15Jesúsñapaꞌ alla tomaꞌntaterraneterr, ñeñthñapaꞌ ateth otanet:
—Eꞌñech señota ñatoꞌt semeñeꞌteñaꞌña fariseoneshaꞌ amaꞌt ñamha Herodes poꞌchaser allo tsetenet pan.
16Ñetña kothapeꞌchyesetpaꞌ ateth otannaꞌtyeset:
—Amakaꞌye yechenoña pan ñeñthoꞌmartheꞌkaꞌyeña oteney añoꞌch yemeñeꞌtatscheña fariseoneshaꞌ poꞌchaser.
17Jesúsña allempo eñotanet ateth kothapeꞌchyenet ñañapaꞌ ateth oterraneterr:
—Esoꞌmareꞌt sellkëñeshaꞌ sotannaꞌtyena añoꞌ eñalle ñeñthchaꞌ serraꞌ. ¿Amaꞌt señoteñe? ¿Amaꞌt xhennasoña seyoxhro? Themeꞌttsenaꞌt seꞌcharrtatenña seyoxher. 18Sapaꞌ amaꞌt aklloꞌyetheseñpaꞌ xhakaꞌye sottena ñerraꞌmrratheꞌ ama senteno. Amaꞌt etatheseñpaꞌ xhakaꞌye sottena ñerraꞌmrratheꞌ ama seꞌmoeno. Amaꞌt mameshapaꞌ areꞌtña es seyerpoeno. 19Ñewa, awaña allempo neshotaꞌt amnar pan eꞌñekaꞌye epaꞌwa amnaroch mil yakmaneshaꞌ. Ellopaꞌ ¿errponaꞌtña sapxhaꞌwerrña ñeñth ashotaꞌtyesareth allempo eꞌñe seyetwa? ¿Errponaꞌtña kañther seꞌchorrerr?
Ñetñapaꞌ ateth ochet:
—Xharraꞌkaꞌye poechena epa kañther.
20—Ñamha allempo neshotaꞌt kanxherr pan paꞌtatsoch mil acheñ ñeñth rreꞌ ¿errponaꞌtña sapxherrerrña ñeñth ashotaꞌtyesareth allempo eꞌñe seyetwerrerr? ¿Errponaꞌtña kañther seꞌchorrerrerr?
Ñetña ateth ochet:
—Kanxherrkaꞌye kañther yeꞌchorrerrerrña allempo.
21Jesúsñapaꞌ alla oterraneterr:
—Theꞌñapaꞌ ¿amaꞌtña oꞌ xhaponasoña seyoxhro? Ñeñth neñotatenes ñeñthpaꞌ ama serrarekpayeꞌ notenso.
Allempo Jesúspaꞌ aꞌkrraterran aporoꞌyeth all Betsaido
22Allempoña xhaxhaꞌtet anetso Betsaido, allñapaꞌ wapaterrñañeterr aporoꞌyeth, ñeñthpaꞌ ateth otoset Jesús:
—Añekopkaꞌye yewapateñña oꞌch phaꞌphllaklleꞌchaph atthoch pekwater.
23Allempoña Jesúspaꞌ echaꞌnman aporoꞌyeth potothpaꞌ anemh aꞌyeneth all ama eñalle pokoll. Allñapaꞌ aꞌyaklleꞌchos paꞌsnemo, atthoña aꞌphllaklleꞌchos, allñapaꞌ ateth och:
—¿Amaꞌt koñeꞌthapaꞌ amaꞌt oꞌ pento?
24Aporoꞌyethña kowaꞌyestsapaꞌ allentha otan Jesús:
—Oꞌkaꞌye nent acheñ alla chopeñen tharraña eꞌñe ateth nentyenanet ñerraꞌmrratheꞌ tsach thomxhaꞌtyets.
25Jesúsñapaꞌ alla aꞌphllaklleꞌchererr, aporoꞌyethñapaꞌ kowaꞌyerrtserrpaꞌ xhepaꞌtchaꞌ eꞌñe kowenterrtsaña paꞌklleꞌ. Eꞌñe kowen es entyeswawerr allowen. 26Allempoña Jesúspaꞌ ateth och:
—Theꞌña ñerraꞌm oꞌch awerreph pepakllopaꞌ tharraña amach phoñmatsterroña anetsoꞌmar, allochñapaꞌ amach eseshaꞌ photaphsaꞌtatsetnerro amaꞌt eꞌñe poesheñarra.
Attho Pedropaꞌ otan Jesús, phapaꞌ phaña Yompor Poechemereph ñeñtheph Cristotosets
(Mt. 16.13-20; Lc. 9.18-21)
27Allempoña awerrerr Jesús poeyochreshowen. Arr sechenet all oteñet Cesarea ñeñthara Filipo allchaꞌ chopeñeꞌchyenetaꞌ all anetsoꞌmar. Allña thoñopaꞌ aꞌphthoꞌtnoman poeyochreshaꞌ ñeñthpaꞌ ateth otnomanet:
—¿Errothenaꞌt otyenenña allowen acheñeneshaꞌ, napaꞌ eseshantheꞌ?
28Ñetñapaꞌ ateth otyeset:
—Patantarr acheñeneshaꞌpaꞌ atethkaꞌye otyenpet phapaꞌ Juanañphoꞌtheꞌ ñeñthephoꞌ apatañtatseꞌth Yomporekop. Poꞌpotantaññapaꞌ ateth otyenpet phapaꞌ Elíasophoꞌtheꞌ; poꞌpotantaññapaꞌ ateth otyenpet phapaꞌ añephoꞌtheꞌ poꞌpsheñeñ ñeñth aꞌmhtayeꞌth Yompor poꞌñoñ awath.
29Allempoñapaꞌ alla aꞌphthoꞌterraneterr:
—Sañapaꞌ ¿errothenaꞌtña sotenenña sa?
Pedroña eñoratsapaꞌ ateth och:
—Phapaꞌ ñeñthephkaꞌye Cristotosets.
30Allempoñapaꞌ otan poeyochreshaꞌ:
—Amach eseshaꞌ sotaphsaꞌtatsto amaꞌt poesheñarra napaꞌ na ñeñthen Cristotets.
Attho Jesúspaꞌ eñotatan poeyochreshaꞌ ñapaꞌ amtsarethterrach
(Mt. 16.21-28; Lc. 9.22-27)
31Jesúsña eꞌñe allempotheñpaꞌ mothetnomh eñotatyesnomoeꞌ poeyochreshaꞌ ñeñth ateth anareth ñokop, ñeñthpaꞌ ateth otanet:
—Na Ñeñthen Acheñetosetspaꞌ ateth anareth nokop, nanakchaꞌ naꞌmoeroxhtatarethterra. Amach eseshaꞌ pokteyeꞌ nenterraye —amaꞌt ñeñth pomporneshaꞌ pen judioneshaꞌ, amaꞌt ñeñth paꞌmhchaꞌtarether pen judioneshaꞌ poꞌkornaneshar, amaꞌt ñamha ñeñth etsotayenayeñ ñoñets ñeñth ateth anareth judioneshakop— amaꞌt ñetpaꞌ amach eseshayeꞌ neyemterraye. Atthochña napaꞌ moetsataterrnetchaꞌ. Tharraña pomaꞌpamtañoch oꞌch alla netanterra.
32Ñeñthpaꞌ eꞌñe eñotoxhen otnomanet ñapaꞌ atethchaꞌ apharethterra. Pedroñapaꞌ allentha anemh aꞌyenethpaꞌ allñapaꞌ ateth otos:
—Arepaꞌch Partseshachaꞌ attheyeꞌ perrpeto amaꞌt errponaña.
33Jesúsñapaꞌ alla poerraperra kowos poeyochresheshoneth allñapaꞌ ateth otan Pedro:
—Orraph aꞌyo neshoth oneñethe; phapaꞌ amakaꞌye Yomporeyeꞌ ateth phokthapeꞌchatenaye; ñeñthpaꞌ acheñarramcheꞌ pokthaphña.
34Allempoña Jesúspaꞌ agotan acheñeneshaꞌ ñamha poeyochreshaꞌ ñeñthpaꞌ ateth otanet:
—Ñerraꞌm eseshaꞌ moeneneꞌ oꞌch kotherrnet na eꞌñe poꞌñoxh atthoch neyochreshaꞌ neperranet añ poktetsa sowanmoetepaꞌña ñeñth ateth moenenet eꞌñe ñokpoeta amaꞌt eꞌñe pokrreñowenet. Atthochña ñetpaꞌ oꞌch eꞌñe tomaꞌnteret ñeñth chechneneꞌ poꞌkorsoch allchaꞌ moeroxhtet ñamet. Atthochña kotherrnet eꞌñe poꞌñoxh. 35Tharroꞌmar ñerraꞌm eseshaꞌ eꞌñe aña moenenet oꞌch korrenet atomat atthoch eꞌñe koshenet arr patsro, ñetñapaꞌ xhach aꞌchenkatet ñañeñeta. Tharraña ñerraꞌm eseshaꞌ eꞌñe pokteꞌ enteneꞌ oꞌch es sowanerret eꞌñe pokrreñowenet nokop atthoch epatwerret kowen ñoñets ñeñthpaꞌ alloch sekeshperra, ñeñthña acheñerpaꞌ ñañapaꞌ korretsach eꞌñe kowen thayotheñ errponañowen. 36Amaꞌt errponenapharen esokmañen es yeyoratsetyes ora allpon ñeñth yentyen añe patsro, tharraña ñerraꞌm ñeñthach eꞌñe yaꞌchenkaterreꞌ yekamkëñowen, ñeñthñapaꞌ amaꞌt koñeꞌthapaꞌ amach es sherberrye. Tharroꞌmar ama eñalle poꞌpoñ ñeñth atarr sherbets, añña atarr nanak sherbets ñeñthchaꞌ aꞌkeshphaterreꞌ yekamkëñ. 37Tharroꞌmar yokoppaꞌ ama es eñalle ñeñthchaꞌ yepomoerr alloch alla yerañtherra yekamkëñ. 38Tharraña ñerraꞌm erraꞌtsenchaꞌ nepenkënaya na theꞌ, neñoñpaꞌxhoꞌña xha apenkoxhen entennanet, napaꞌxhoꞌña nepenkaꞌwerranetchaꞌ esempoch nowerra. Shonteꞌ acheñeneshaꞌ ñeñth korraꞌyetsa theꞌ arr patsro ñetñapaꞌ atarr ochñatheneshet tharroꞌmar ñetpaꞌ poꞌpoña poꞌyomporer phaꞌyenet. Tharraña ñerraꞌm eseshaꞌch poepenkëñothetan na amach aꞌmethenneto all, ñeñthña acheñerpaꞌ napaꞌxhoꞌña xhach nepenkaꞌwera ñerraꞌm esempoch nowerra. Poꞌñoxh napaꞌ Ñeñthen Acheñetosetspaꞌ nowerrach eꞌñe Nompor poꞌkowenñoth epan ñamha poꞌmhllañotheñnaneshar ñeñth eꞌñe thorraꞌyetsa Partsokop.
Currently Selected:
:
Highlight
Share
ਕਾਪੀ।
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.