KENDEU 33
33
Jakob Esau ze Redau kecu
1Esau pe mina 400 ze nzang eh gwang kela Jakob ngau lu, cine pa hename ze Leah, Rachel, nah pe nauseupui kena dage mzi lu. 2Pa nauseupui kena nah penai name ze peu rai lu, pecai Leah nah pe name, nah kamtube Rachel nah Joseph ze kekamle ge kai lu. 3Jakob penui dwa rai gwang eh pe swacingbe ze mna gwang luge hangdeu ga pia sena keumie. 4Dede Esau pecu redau kera pak gwang eh pecu tuipwa lü kemam. Penai hang nana hap di. 5Esau pie togwa gai eh mipui dung nah hename ze ngau lü keteu, “Ai ncu ngngwa kela dung de cau dung no?” dedi.
Jakob keli eh, “Kedihbo, hename aidung de Tinggwang pezai yi eh acu kepeu dung lie” debeu. 6Ciciu ge nauseupui kena penai name ze ngngwa eh keumie; 7pecai Leah nah pe name gwang, nah kamtube Rachel penai Joseph gwang eh keumie. 8Esau keteu, “I keredau kecu maa keda dung de be daino? Cide pekieh dai ah?” dedi.
Jakob keli eh, “Cide n suiyi tei lu kerane delie” debeu.
9Dede Esau cu, “I bam süt, a sinabo, nang kebam be kaizeu lulo” dedi.
10Jakob cu, “Ciciu lak, keherei de, I n suiyi tei lulie cai, a mapeuh de luu lulo. A ziemne au n ju kengau au Tinggwang ju kengau nzwa da, nang ada ze n zai yi süt kecune. 11Keherei de mapeuh I ncu teugwang kebeu aide luu lulo; Tinggwang ada ze pezai yi eh I teu maikesia leune acu peu” dedi. Pa luu lu kemaktane Jakob pecu peubi bam di.
12Esau cu, “Anui tet kera ntei lucu go. I nnui dwa rai gwang zie” dedi.
13Jakob keli eh, “Hename nnei kecu nang ci bam, nah I meurün nah ketum nah penui na dung ziu cet maisia. Penui de tingnai gede gwa nteei gai cai pe hau pelane tsai dizie. 14Keherei de a dwa nswa gwang cu, nah I tei sünne eh hekaune nah hename ze mjang eh mzet lu kebuita mzet eh Edom gade gwang ncu redau luzie” debeu.
15Esau cu, “Ciciu de peu a mina kang gede nda ge kaidiak lo” dedi.
Dede Jakob keli eh, “Ciciu kera tau gah I n suiyibe ngau lu keneu deda”#33:15 I au n suiyi rünne ngau lu neu la; mede cide nda ze petau lulie cai. dedi. 16Cine cipau nai Esau Edom ga caili gwang kera tet cuh gai. 17Dede Jakob Sukkoth ga miedi, cika ge pa pe ziemne nah pe kaune dung ziemne kensiuki ge tei lu. Cine heni cide de Sukkoth lie qu di.#33:17 Sukkoth: Aipau zi de Ibri gade pekieh “kensiu ni”.
18Mesopotamia gade caili gwang kela dau Jakob Canaan deu ga Shechem namdi ga kuak eh gwang lu delü namdi tai luh gage ramzeuki ge tei lu. 19#Jos. 24:32; Jhn. 4:5.Pa luh cilam bie tu de Shechem pei Hamor leuhme dade rangkang goi 100 le lui lu. 20Pa cika ge recabam ge tei lu delü pezi Israelme Tinggwang zi loi eh El msiak lu.
Currently Selected:
KENDEU 33: ZemeNB
Highlight
Share
ਕਾਪੀ।
Want to have your highlights saved across all your devices? Sign up or sign in
© 2018, The Bible Society of India
All rights reserved.