KENDEU 31
31
Jakob Laban dade Pakkedi
1Laban name “Jakob ne anui pei gu pelane keuteu dida. Pe mabam pelane anui pei gu gade gwang” de eh rang zeu lie kecu ci lu. 2Pa Laban peda de ndaa nzwa nzangyi ta kedi de ngau di. 3Ge Rampaube peda de, “N peime deu ga nah n kibaume da caili gwang lu. I ncu ngngwa lazie” debeu.
4Cine Jakob Rachel penai Leah dage pecu mie luh ga ketum hau kebam gade keredau lo eh sam lang gai. 5Pa penai dade cu, “Nnai pei ndaa nzwa tadi eh acu nzangyi ta kedi I ci bam dida; dede a pei Tinggwang acu ngngwa la. 6Nnai hang nana I a kenkieng pelane teu nnai pei ziemne matei kecu ci bam. 7Dede pa acu cwa dida nah a ziehi pia kerei ge tei kedi dida. Dede Tinggwang pecu peu acu tei rezam dima. 8Laban ‘Hemeu pegiak kedau dung n ziehi zie’ de rang kegai dau hekau hau pelane pegiak kedaube mciu lu. 9Tinggwang hekaune hau dung de n pei dade keugi di eh cidung de pwa acu peu dida.
10“Kemciu tingdau I a mang ge mmii, nah I hemeuseu hah kebam dung dede kedau nah pegiak pung eh ngau. 11Tinggwang gwabe a mang lede ada de rang eh cu, ‘Jakob!’ dedi. Ge I ‘Hoiy’ degai. 12Ge pa rang si eh ‘Ainie’, ‘hemeuseu hah kebam bedung pelane pegiakdau, dau nah daurik lie. I aide tei gai zeu kedanemene I Laban nda ge tei kegai dung ngau bam di delu. 13#Ken. 28:18-22.I Bethel gade ncu acu peu ngau kegaibe Tinggwang cika de nang kensung tsu ge sum lü olive caa pwa cide keniak gai nah cika de nang ada ge n reset sam acu peu. Cu au ncu nna kelu deu ga caili gwang dai kera ntei lu’” debeu.
14Rachel penai Leah Jakob sam keli eh cu, “Anai pei dade magede anai hema gum kera gah da. 15Pa anai de pwa sangme nzwa dida. Pa anai de zwa dida, nah cu pa rangkang ngaukelu dung de mpet ciak dida. 16Mahei aidung de Tinggwang anai pei dade keuteu kedi dung de anui gu nah anui name gu. Tinggwang nda ge rang kebeu nzwa tei lulo” debeu.
17-18Cine Jakob Canaan deu ga pe pei da caili gwang kera ntei lu. Pa pe name nah pe nau kena de ut dung reu gage kai lu, delü pe kauhau pelane de pe dwa ge kai lu, pa Mesopotamia gade ngaukelu pelane si eh, 19Laban pe meurün dung mai bit kera miedi, nah pa kega gade Rachel pe pei gu pe kibaume rabe dung rega lu. 20Jakob pa tetti kera Laban ze reci gai mene pecu cwa di. 21Pa pe gu pelane teu eh kelwa tetti. Pa Euphrate Reuki de kahlü lamlwatuh nam Gilead lamge tet gaidi.
Laban Jakob ze Zui kecu
22Lang cumne cai Jakob pak di delie kecu Laban dage rang beu. 23Pa pe mina dung de ngngwa lü lang senane Jakob ze zui eh gwang lamlwatuh nam Gilead gade pecu cang lu. 24Cipau ziu Laban mang lam de Tinggwang peda gwang eh cu, “Jakob ze magede teu keheu siabi lie” dedi. 25Jakob lamlwatuh ge gage pe ramzeuki liam lu, nah Laban de pe kibaume de ngngwa lamlwatuh nam Gilead gage pe ramzeuki liam lu.
26Laban Jakob dade cu, “Nang daitei acu cwa di eh a napui kena de heroi gade tuihkelu nzwa nzang tetti no? 27Nang daitei acu cwa di eh ada de malie mene mbaih tetti no? Nang ada ge rang gai cai, I peu ncu n suiyi nah lei tei eh leibung nah harp koa eh ncu n lampui gage lang gaizie nage. 28Nang acu peu a came nah a napui kena dede yi lalo kemam kegai de tei ma. Cide au kemie tage! 29I ncu tei keherei lu kebui kenkieng bam, dede nzieziu n pei Tinggwang ncu keheu eh magede tei helo mrai ada ge rang beu. 30Kilung gwang dai neu zu kedine nang tet kedi I ci bam, dede nang daitei a kibaume rabe dung de rega teu tetti no?” dedi.
31Jakob keli eh, “Nang ada de n napui kena de luu teu dai di kera I mning eh hing di. 32Dede nang aika keheibe de n rabe dung kebam ngau lu cai, pecu teitset tizie. Ainie, anui mina dung de teu zierang tei eh n gu keheibe de peei lu n gube keu lu” debeu. Jakob au Rachel ne Laban gu rabe dung rega teu kela ci ma.
33Laban mie Jakob paiki kechung; pecai pa Leah paiki ga mie, nah kilapui kena paiki gade, dede pa pe rabe dung de ngau luma. Pecai Rachel paiki ga lüt. 34Rachel pe kibaume rabe dung keu lu delü ut püt pai gage cidung de kailü cipau reu ntum cim pwabam di. Laban paiki pelane kechung, dede cidung de ngau luma. 35Rachel pe pei dade rang, “Kedihbo, acu n rata di helo, dede I n dwa ga cu sap gai lakta; I mipui zai ada bam lie” dedi. Laban kechung dede pe kibaume rabe dung ngau luma.
36Pecai Jakob pe rata süt ti. Pa pe rata süt eh cu, “I daipai kemau tei di dino? I daipai zai gileu di eh nang acu zui mie maisia dino? 37Nang cu a gu ma pelane kechung gwang kap da, n kibaume gu daipai nang ngau lu dino? N mina nah a mina dung ngau lu kebui aika ge cide kai gailo, delü penui ze peu anai cau be petau bi cet lulo. 38I cu ncu ngngwa mmi 20 ge lungh dida; n meurün nah n meu hingh rau dima, nah I n kauhau gade hemeuseu gede dap tyei ma. 39Renaam kaune ne meurünna gede teitset ti ge, kekap cide I ne su muih. I cide a mau melie nda teugwang liahma. Tingmui mede tingna rega teu kedi dung de acu mjo lo nang rang di. 40I pia kekiee ge tingna lum nah tingmui reggeu eh keherei süt. I zip degai lakdi. 41I mmi 20 ge pelane ciciu eh nda la. I n napui kena ze luu lu kerane mmi 14 matei nah mmi herok n kaune hau ziemne. Ciciu de nang a ziehi kecang de pia kerei ge teili gwang. 42A peime Tinggwang, Abraham penai Isaac Tinggwang acu ngngwa la maige, nang acu mta langgi di zieda. Dede Tinggwang a rei nah a bata de ngau da, nah nzieziu pa pe tutiak kai beu da” dedi.
Jakob penai Laban Samdau kelu
43Laban cu Jakob sam keli eh, “Relei ai kena ze a napui, penai name de a gu, nah hekau hau aidung dede a gu. Kesangbe, keheibe de aika nang ngau kebam dung de a gu ciak. Dede I magede tei eh a napui kena nah penai name ze kaipwa bam gailak kedine, 44I ncu ngngwa kesamdau keluge ntei luda. Anai kesamdau kelu de nsung lalu kerane tsuqoa ge qoa lugo” dedi.
45Cine Jakob ntsu ge keu lü kensung ge tei kerane cide sum lu. 46Pa pe mina dung ze ntsuqang dung pwa hekwa lü kwa lulo beu. Ciciu eh penui tsuqoa tai gade matyei. 47Laban cipau zi de Jegar Sahadutha#31:47 Jegar sahadutha: Aipau zi de Aramaic gade pekieh “Mide nsung beu kela ntsubauh ge.” ntak lu, nah Jakob cide zi Galeed#31:47 Galeed: Aide Ibri gade pekieh “Mide nsung beu kela ntsubauh ge”. msiak lu. 48Laban Jakob dade, “Aipau tsuqoa de anai hang nana ziemne kensung ge tei zie” dedi. Cine heni cide de Galeed qu di. 49Laban rang si eh cu, “Anai lamna kedi gade Rampaube ze peu anai mapie la lulo” degai. Cine heni cide de Mizpah#31:49. Mizpah: Aipau zi de Ibri gade “pie kera bahm ge.” lie qu la. 50Laban rang si eh, “Nang a napui kena dade n zai sia, mede nang mipui keda de luu cai, I cide ci melie de, Tinggwang anai ze kwa kebam nang nsung lulo. 51Anai kak gage I ntsu qoakelu aidung de bam da, nah kensung tsusum de aika bam da. 52Aipau tsubau de nah kensung tsusum kenana de nsung dai lu kerane lie. I madaude ncu ketang kera tsuqoa aide gole kah pet lak, nah nang de madaude acu ketang kera cipau gole mede kensung tsusum aide gole kah pet so. 53Abraham Tinggwang nah Nahor#31:53 Abraham... Nahor: Abraham au Jakob pao nah Nahor au Laban pao. Tinggwang ne anai kak hetu tiak zie” debeu. Pecai, pe pei Isaac reca kela Tinggwang zi gade, Jakob sampet aide mzai kera reset sünne gaidi. 54Pa makaune ge teitset lü cide pwa lamlwatuh reu gade ratak tei gaibeu, nah pa pe mina dung ze qu lü ketaktyei. Penui matyei lü cipau ziu lamlwatuh gade penui ting nggwang. 55Cipau cai benai tingcang nuge Laban pe came nah pe napui kena ze yi la lulo kemam gai, delü kilung caili gwang kera tetti.
Currently Selected:
KENDEU 31: ZemeNB
Highlight
Share
ਕਾਪੀ।
Want to have your highlights saved across all your devices? Sign up or sign in
© 2018, The Bible Society of India
All rights reserved.