KENDEU 30
30
1Dede Rachel pe na kette nna pwa Jakob ze peu ma, cine pe swa kecingbe pui ze periak di nah Jakob dade, “Acu hena peu lo, maige I tsai di zieda” dedi.
2Jakob Rachel ze pe rata eh cu “I Tinggwang sap ga sap gailak. Pa ne ncu peu hena lungh lu kebui kaam pwabam” dedi.
3Pa cu, “Aika a baangpui Bilhah bam; pecu ngngwa zeu lu, ciciu de pa a ziemne hename ge lungh beuzie. Ainzwa eh I peda de mipui ge tei luzie” dedi. 4Cine pa Bilhah ze pwa pe naapei ze peu, nah pa pecu ngngwa henauhepei zai tei di. 5Bilhah tetlak lü Jakob ze mipeina ge nna beu. 6Rachel cu, “Tinggwang a lam pwa beu da. Pa a kekie kingnei lü acu mipeina ge peu da” dedi; cine pa pezi Dan#30:6. Dan: Aipau zi de Ibri gade “lam tiak kelu” de kecu koa ge nzwa. msiak lu. 7Bilhah tetlak dai lü Jakob ze mipeina pekenabe nna beu. 8Rachel cu, “I a swacingbe pui ze ngngwa heroi kewhung ge tei da, dede I ne nkieng luda” dedi; cine pa pezi Naphtali#30:8. Naphtali: Aipau zi de Ibri gade “regi” de kecu koa ge nzwa. msiak lu.
9Leah pa pe na lungh sita kedi ci luge, pa pe baangpui Zilpah ze pwa Jakob nau tei kera peu. 10Ciciu eh Zilpah Jakob ze mipeina ge nna beu. 11Leah cu, “I a raci da” dedi; cine pa pezi Gad#30:11. Gad: Aipau zi de Ibri gade pekieh “ziuyi.” msiak lu. 12Zilpah mipeina keda ge Jakob ze nna beu dai, 13nah Leah cu, “I a sui dai kenzwa ge yi no! Cu au mipui dung acu suiyi lie qu zieda” dedi; cine pa pezi Asher#30:13. Asher: Aipau zi de Ibri gade pekieh “suiyi.” msiak lu.
14Wheat luhlüt tingdau Reuben luh ga mie eh hekuheih#30:14. Hekuheih: Mabam nalung peu lalie cet kelage nah hekuheih ge tei teu kela. ngau lü pa cide teugwang pe pui Leah ze peu. Rachel Leah dade cu, “Keherei de acu bai n na gu hekuheih kesa peu lo” dedi.
15Leah keli eh, “Nang a naapei ze teu tetti kecu de cang mereu ni? Nang cude a na gu hekuheih dung keuteu di neu la reuni?” dedi.
Rachel cu, “Nang acu n na gu hekuheih de peu cai, nang teziu Jakob ze ngngwa zip lubui” dedi.
16Jakob tinghegi luh gade gwang ge, Leah pet pecu redau lü cu, “Nang teziu acu ngngwa zip zie, kedanemene I ncu a na gu hekuheih le lui lu delu” dedi. Cine pa pecu ngngwa cipau ziu henauhepei zai tei di.
17Tinggwang Leah kekie kingnei lu, delü pa tetlak lü mipeina pemengeibe nna beu. 18Leah cu, “Tinggwang acu a ziehi peu da, I a baangpui ze a naapei ze kepeu ne” dedi; cine pa pe na zi Issachar#30:18. Issachar: Aipau zi de Ibri gade “Mina gede lilu” nah “cika ziehi bam” de kecu koa ge nzwa. msiak lu. 19Leah tetlak dai lü Jakob ze mipeina peherokbe nna beu. 20Pa cu, “Tinggwang acu mapeuh keyi peu da. Cu au a naapei acu rüt lu zieda, I pecu mipeina hang herok nnabeudi delu” dedi; cine pa pezi Zebulun#30:20 Zebulun: Aipau zi de Ibri gade “luu lu” nah “mapeuh” de kecu koa ge nzwa. msiak lu. 21Pecai pa mipuina ge nna lu, cipau pui zi Dinah msiak lu.
22Pecai Tinggwang Rachel ze nsung lu; pa pe kekie tei beu eh pecu pe na lungh lu kebui tei beu. 23Pa tetlak lü mipeina ge nna beu. Pa cu “Tinggwang acu mipeina ge peu eh a ngngam keugi di beu da. 24Rampaube ze peu acu mipeina keda ge peu dai kelube tei lu” dedi; cine pa pezi Joseph#30:24 Joseph: Aipau zi de Ibri gade “pecu peu keda peu lo” nah “pa keutet tida” de kecu koa ge nzwa. msiak lu.
Jakob Laban ze Ngngwa Kelilia kecu
25Joseph ze nna luge, Jakob Laban dade cu, “Acu peu tet lu culo, ciciu eh a ki ga gwang dai lu kerane. 26I n ta tei eh hi kelu a nau kena nah a name de acu peu culo, ciciu de I tetti zieda. I dai kenzwa ge n ta tei gwang bi nang ci bam” dedi.
27Laban peda ze cu, “Acu peu aide rang lo; I hera puisau gade n ziemne Rampaube acu samlam kebeu ci lu. 28N ziehi dung rang gailu, I cidung de peu zie” dedi.
29Jakob keli eh, “Nang I dainzwa n ta tei bi nah I penui ma kepie gade n meurün dung dai kenzwa ge yilu dibi kecu nang ci bam. 30I kegwang dwa nang kecam nage kebam de lungh nkiee süt luda, nah Rampaube I kemie leu ga#30:30. I kemie leu ga; mede a ziemne. ncu samlam beu da. Cu au I de a gube peei maikesia ting dida” delu.
31Laban keteu eh, “I dai pwa ncu peu lai?” dedi.
Jakob keli eh, “I ziehi gede luu neu ma. I n kauhau kwa si zie nang a sam aide kesuizwa lu cai: 32Acu peu henai n kauhau dung da mie delü meurünna ketik be leune#30:32. Paopai rangswa kela ket meurün ketik leune; Ibri meurün pegiak ketei nah dau kecu leune, nah meurün ketik leune. nah hemeu pegiak kepungbe leune keu lu. I luu keneu a ziehi cide pelane da. 33Gwang si kera lede I masang mi mebi nang laka eh ngau luzie. Nang gwang a ziehi pie kecu dau. I hemeu pegiak pung kemakbe mede meurün tik kemakbe gede bam eh ngau lu cai, nang cide rega teu kedi ci luzie” dedi.
34Laban keli eh, “Suizwa da. Nang kerang de nzwa anai tei zieda” dedi. 35Dede cipau nai Laban hemeuseu pegiak kebam be mede hemeupui pegiak kedau dung pelane mede keha dau kecube dung kedettsam mpet ti; pa meurün ketik pelane de si eh keu mpet ti. Pa pe name ze peu cidung de pielu, 36delü aipau hau dede ngngwa eh Jakob dade lang cumne mbeuh mdei lu kebuita mdei eh tetti. Jakob Laban kaune hau kebangh bedung de rengei lu.
37Jakob poplar nah almond kiak kendiak dung nah tsingbang keda kiak dung tei lü pe geu kesa siep gidi, ciciu eh tsingkiak cidung de ga keha giak dung tei lu. 38Pa tsingkiak aidung de hekaune hau dwa ga duisakkwak dung gage kai lu. Pa cidung de cika ge kai lu, kedanemene makaune dui sak kera kegwang dau kereha la kecune. 39Cine hemeu dung tsingkiak dung dwa gade mciu kecu dau, penui pe na kedau nah pegiak ketei bedung lungh lu.
40Jakob meurün dung de dade hemeu dung de kedettsam lu delü penui de peu Laban kauhau dung pegiak kepung nah hekaune ketik dung lam nreu eh kainzeu. Aiciu eh pa pe kauhau tei nkiee lu nah Laban kaune dade keutsam lu.
41Hekaune keyi bedung kereha tingdau Jakob tsingkiak dung pwa penui dwa duisakkwak dung gage kai beu, ciciu eh penui de peu tsingkiak dung kak gade mciu lu kerane. 42Ciciu de pa makaune kennei dung dwa ge tsingkiak dung pwa gai ma. Zette Laban gu kaune dung nnei di, nah Jakob gu kaune dung be yi nkieng di. 43Ainzwa eh Jakob mahei süt pet ti. Pa hekau hau, hebaangme, ut dung, nah gada dung kekiee ge bam di.
Currently Selected:
KENDEU 30: ZemeNB
Highlight
Share
ਕਾਪੀ।
Want to have your highlights saved across all your devices? Sign up or sign in
© 2018, The Bible Society of India
All rights reserved.