KENDEU 29
29
Jakob Laban Ki ga Gwang kelu
1Jakob pe lampui lege tet si gai eh tingbangle deu lambie miedi. 2Pa zette luh dung ga tekwa ge meurün hau kecum ne togwa kebam gega gwang lu. Meurün hau dung de tekwa aika de peu dui sak la, nah cide pe poi reu ga ntsu kedi ge bam. 3Meurün hau pelane gwang nkwa luge, Meurün kekwame ntsu de let lü peu penui ze dui sak la. Ciciu eh penui ntsube pwa kai dai dila.
4Jakob meurün kekwame ze keteu eh cu, “A zangme dung, nnui daiga de gwang no?” dedi.
Penui keli eh, “Haran gade” dedi.
5Pa keteu, “Nnui Nahor napei Laban ze ci mi?” dedi.
Penui keli eh, “Yeo, anui ci bam” dedi.
6Pa keteu, “Pa yibam mi?” dedi.
Penui keli eh, “Pa yibam. Ainie, aika pe napui Rachel pe meurün hau de nzang eh gwang lada” debeu.
7Jakob cu, “Ting baaha bamreu nah meurün hau kilung nlüt kera hi mereu, nnui daitei penui de peu dui sak lü penui de ngngwa mie peu tsehei tyei dai meno?” dedi.
8Penui keli eh, “Meurün hau pelane gwang lu kemaktane nah ntsube let lu kemakne anui cide tei gailak; ciciu kelu caine anui meurün hau de peu dui sak zie” dedi.
9Jakob penui dage marang bam kecune Rachel meurün hau de nzang eh gwang. 10Jakob au Rachel pe pao Laban meurün hau de nzang kela ngau luge, pa tekwa ga mie eh ntsu de let ti delü meurün dung de peu dui sak. 11Delü pa pecu kemam eh pesui yi eh hap di. 12Pa peda de, “I n pei kibaume, Rebecca napei lie” dedi.
Pa pe pei dage pau beu kera pak gwang di; 13nah pa pe capei Jakob ha siu luge, pa pak pet pecu redau, pecu tuipwa lü kemam gai, delü pecu ngngwa kilung nlüt lu. Jakob Laban dage ma tei kedibe pelane ranglia gaige, 14Laban cu, “Yeo, nang a teih a jai kesang” dedi. Jakob cika kei mui ge bam di.
Jakob Rachel nah Leah Ziemne Laban Gwa ketei
15Laban Jakob dade, “Nang a kibaume lu de eh nang mta a ta tei bam kerabe ma. Nang n ziehi dai kenzwa ge luu neu no?” Dedi. 16Laban pe napui hang na bam; kecingbe pui zi Leah, nah henabe pui Rachel. 17Leah pe mik hezuyi#29:17. hezukeyi; mede kennei., dede Rachel be pe rehi yi nah hezuyi. 18Jakob Rachel ze pesui yidi, cine pa cu, “Nang acu peu Rachel ze a nau cai, I mmi sena n ta tei zie” debeu.
19Laban keli eh “I mi keda de swa pecu pwa ncu peu neuki; aika acu ngngwa bam lulo” debeu. 20Jakob au Rachel ze luu lu kerane mmi sena heta tei, nah cipau ting de tingbazie kecam nage nzwa, pa pecu nrai kedine.
21Pecai Jakob Laban dade, “Peting cang dida; acu peu n napui ze a nau lu culo” dedi. 22Cine Laban nautak ngyi ge ntei lü mileune ze qu gai. 23Dede cipau ziu Rachel ding gade, pa Leah ze pwa Jakob ze peu, nah Jakob pecu ngngwa henauhepei zai tei di. 24(Laban pe hebaang pui Zilpah ze pwa pe napui Leah nkütpui tei kera peu.) 25Pecai benai tingco kemaktane Jakob cide Leah lie kecu ci luma. Pa Laban da gwang eh cu, “Nang daitei aide ada ge tei gai lano? I Rachel ziemne bata tei. Nang daitei ada de heciem tei dino?” dedi.
26Laban keli eh, “Aika kecingbe pui dwa henabe pui ze peu meu kecu hezai ma. 27Nautak ngyi mtak cang di kemaktane kwa lulo, ciciu de I Rachel ze pwa ncu peu zie, nang a ziemne mmi keda sena mata tei dai cai” dedi.
28Jakob cide samdau lu, nah nautak ngyi mtak de cang dige, Laban pe napui Rachel ze pwa pe nau tei kera pecu peu. 29(Laban pe hebaang pui Bilhah ze pwa pe napui nkütpui tei kera pecu peu.) 30Jakob Rachel ze de ngngwa henauhepei zai tei di, nah pa pecu Leah ze swa kuki. Ciciu eh pa mmi sena Laban gwa tei dai.
Jakob ze Hena lungh Kebeu
31 Rampaube Leah ze be Rachel ze swa ku cam kecu ngau luge, pa pecu peu hena lungh lu kera tei beu, dede Rachel pe na tei mene bam di. 32Leah tetlak lü mipeina ge nna lu. Pa cu, “Rampaube a rei ngau da, nah cu au a naapei acu qu zieda” dedi; cine pa pezi msiakpwa Reuben#29:32. Reuben: Aipau zi de Ibri gade “Pielo, napei ge” nah “A rei ngau da”. tei lu. 33Pa tetlak dai lü mipeina ge nna dai lu. Pa cu, “Rampaube mipeina aide acu peu da, kedanemene acu ku kemak pa siu kelu ne” dedi; cine pa pezi Simeon#29:33 Simeon: Aipau zi de Ibri gade “Siu” de kecu koa ge nzwa. msiak lu. 34Pa tetlak dai lü mipeina gede nna dai lu. Pa cu, “Cu au a naapei acu nnungki dilu buida, I pecu mipei hang cum nna beudi delu” dedi; cine pa pezi Levi#29:34 Levi: Aipau zi de Ibri gade “kang kelu” de kecu koa ge nzwa. ntak lu. 35Pecai de pa tetlak dai lü mipeina ge nna lu. Pa cu, “Henai pia I Rampaube ze twa zie” dedi; cine pa pezi Judah#29:35 Judah: Aipau zi de Ibri gade “ketwa” de kecu koa ge nzwa. ntak lu. Pecai pa pe na lungh sita di.
Currently Selected:
KENDEU 29: ZemeNB
Highlight
Share
ਕਾਪੀ।
Want to have your highlights saved across all your devices? Sign up or sign in
© 2018, The Bible Society of India
All rights reserved.