KENDEU 20
20
Abraham nah Abimelech
1Abraham Mamre gade tetpwa Canaan tingpile gwanglü Kadesh penai Shur kak ga lungh ladi. Kekamle, pa Gerar ga lungh kebam dau, 2#Ken. 12:13; 26:7.pa pe nau Sarah ze pe tipui lie rang beu. Cine Gerar ga hegwangpei Abimelech da Sarah ze ngngwa gwang beu. 3Zeuziu ge pe mang lede Tinggwang peu pecu ngau gai eh cu, “Nang tsaidi zieda, kedanemene nang mipui aide de ngngwa teu kedine; pa meu dida,” dedi.
4Dede Abimelech pecu mna gwang ma, nah pa cu, “Rampaubo, I aide ci ma! Nang acu nah a mina dung de nkap dizie deni? 5Abraham pekatei de pecu le pe tipui lie zeu, nah pa de cinzwa rang. I aide a lung ncigi eh tei, nah I kemau tei ma,” delu.
6Tinggwang pe mang lede pe sam keli eh, “Yeo, nang cide n lung nci eh tei kecu I ci; cine I ncu peu ada ge kemau tei gai dima nah peu ncu pecu tung ma. 7Dede cuge mipuibe ze pwa pe naapei ze peu dai dilu. Pa caihakecime ge, nah pa n ziemne kie zie, ciciu de nang tsai dilak. Dede nang pecu pwapeu dai dimai, nang tsai zie lie kecu mrai I nda ge rang gaila, nang nah n mina pelane tsai zie,” dedi. 8Tingcang nuge Abimelech pe kang ga kedihme dung pelane de qu lü daipai tei dibi kecu ranglia gai, ge penui ze keheu di. 9Ge Abimelech au Abraham ze qu lü keteu eh, “Nang anui dage daipai tei gai zeu no? Kekap aide ada ge nah a hegwangram gage nang teugwang gai maisia kedi I daipai kemau nda ge tei gai dino? Nang ada ge tei kegai de migede madaude tei kerabe ma. 10Daitei nang cide teino?” dedi.
11Abraham keli eh, “Aika migede Tinggwang mie kehing bam ma nah penui a nau ze luu lu kerane acu teitset tizie lie kecu I cet ti lie. 12Pa a tipui kesang. Pa a pei napui, dede a pui napui ma, nah I pecu a nau lu. 13Cine Tinggwang acu a pei ki gade sangme deu gage langkegai dau, I peda de, ‘Nang mi dage I n heibe lie kecu kerang gade nang ada de masang kecu keulia luzie’” debeu.
14Ge Abimelech Sarah ze pwa Abraham ze peu dai di, nah pecu meurün, ketum nah hebaangme de peu. 15Pa Abraham dage, “Aide pelane a deu da; nang lungh keneu ga lungh lu” debeu. 16Pa Sarah dage, “Nang mau melie kecu ncu ngngwa kelaleu dage keu kelia gade I n heibe de rangkang goi 1,000 peu zie; keheibe de nang kemau tei kemak ci luzie” debeu.
17-18Abraham nau Sarah dage tei kegai dung ziemne Rampaube Abimelech hegwangki ga mipui leune de peu hena lungh lu tadi. Cine Abraham Abimelech ziemne kie, nah Tinggwang pecu tei myi beu. Pa pe nau nah pe baang releime dede tei myi beu, ciciu eh penui hena lungh lu kerane.
Currently Selected:
KENDEU 20: ZemeNB
Highlight
Share
ਕਾਪੀ।
Want to have your highlights saved across all your devices? Sign up or sign in
© 2018, The Bible Society of India
All rights reserved.