KHABÊNG 1
1
Rang Ahah Hôan Ngĩnkõng
1Khhabâng thhôan ko, Chenthû Joban ma rang ahah bânghôan ko#1.1 Khhabâng ko...rangkhhen hahtokkhoh pa;bã chenthû Joban ma bânghôan ko bãKhhabâng ko Joban ma bânghôan wah, 2Hahtokkhoh pa sekhõtã dâng wah. Ngãle rangnyek ma josi heh hep lahma dâng wah. Ngãle Joban Ju#1.2 Joban Ju;bã Joban ngewah pông;bã nyahrãng pôngchãn. pa jo khoh ko dâng wah. 3#2Kor 4.6Ediko Joban ma chîen wah, “wẽn chenphiak a”— ephûmma wẽn phiakwah. 4Ephûmma Joban ma wẽnphiak pa asen khẽ lahma khũhah wah. Ephûmma Joban ma wẽnphiak pa rangnyek demwah phânsiet wah 5ngãle Tema wẽnphiak ko rangwô ngãma mînwah, ediko anyekdong ko rangnyek ngãma mînwah —ngãle epa khhabâng rangwô dâng wah.
6-7 #
2Pet 3.5
Ediko Joban ma chîen wah, “Jo pa thenîî nâng phansiet lahma mâmâ thethe nâng thîenrãng rangtung siwã chendanga”—ngãle eroh dâng wah. Ephûmma Joban ma rangtung siwã hôan wah, ngãle epumma rangkhoh wah jo ngãle hahkhhen jo pa phânsiet wah. 8Ngãle Tema rangtung siwã ko “rangkho” ngãma mînwah. Ngãle rangjâthah pa lien lahma rangkhahkho hokwah —epa khhadijâ pa dâng wah.
9Ediko Joban ma chîen wah, “Rangkhhen wah jo heh thetheh nâng chenkhhôan jen a, ephûmma hahchoak chenhõnga”—ngãle erohjô dâng wah. 10Tema hahchoak ko hahtokkhoh ngãma mînwah, ngãle thetheh nâng khhôngjen ekah jo ko josi ngãma mînwah. Ngãle Joban ma epa senkhẽ lahma khũhah wah.
11Ediko Tema chîen wah, “Hahtokkhoh ma jatrup bãngchhõng khochhõng chenhõng phoak a, tõ achhah ngãle penrĩ wahrã rîte bãng chenhõng phoak a”—ngãle erohjô hông phoak wah. 12Phûmma hahtokkhoh ma jatrup bãng achhong heh hông phoak wah. Phûmma Joban ma epa khẽ lahma khũhah wah. 13Ngãle sanhem lahma rangkhah hokwah —epa jârem jâ pa dâng wah.
14Ediko Joban ma chîen wah, “Rangwô ngãle rangnyek nîî phânsiet rãng rangkho nâng wẽn chenphiak a ngãle chenpoat ko ngãle chenre rangwô jâko ngãle chenre rangpâ ko rangsôam nîem lõkuh chhahwã#1.14 rangsôam nîem lõkuh chhahwã heh;bã sanpoat heh. bângdâng min a epa khêsok rãng chenphiak a; 15thinma rangkho nâng phiak lahma hahtokkhoh ko chen phiakkat rah.” Ngãle erohjô dâng wah. 16Ephûmma Joban ma wẽnphiak dong wannîî hôan wah, rangwô ko phiakrãng san ngãle rangnyek ko phiakrãng dâ hôan wah; ngãle merit hehmĩn hôan wah. 17Ngãle hahtokkhoh ko phiakkat rãng Tema rangkho nâng wẽnphiak thîen wah, 18rangwô ko phiak ngãle rangnyek ko phiakrãng thîen wah, ngãle rangnyek kowah rangwô khhêsiet rãng hôan wah. Ngãle Joban ma epa khẽ lahma khũhah wah. 19Ngãle sanhem lahma rangkhah hokwah —epa jâ belîî jâ dâng wah.
20Ngãle Joban ma chîen wah, “Jo ko jonâng tôngte jat heh hõng lahma chenmen a, ngãle rangkho ko wõ hehma chenmen a.” 21Ephûmma Joban ma josi nâng tôngte ngemdong ngahdong heh hôan wah, ngãle jonâng tôngte chentô jat apat heh mâmâ jatjat hôan rêwah, ngãle rangwîn wõ heh mâmâ jatjat hôan rêwah. Ngãle epa khẽ lahma Joban khũhah wah. 22Ngãle Tema thin nâng rangkoh lahma jowah tôngte hehnâng ngatwah, “Pôpan lijan dang latma josi lânmen roh jat aja en, ngãle Tema wõ hehmĩn hahtokkhoh ko jat aja en ngatwah.” 23Ngãle sanhêm diko rangkhah dâng wah —epa jâ bengâ jâ dâng wah.
24Ediko mĩn Joban ma chîen wah, “Hahtokkhoh ko jatrup ngem angah chenhõnga: humnyem achhah ngãle wũnngem wũnngah, dong arin chenhõnga.” Phûmma erohjô hôngwah. 25Phûmma Joban ma ereheh phangtang hôan wah, ngãle ereheh khẽ lahma ate khũhah wah. 26#1Kor 11.7Ediko Joban ma ngatwah, “Ngãle ade a nãngma mihnyãn nyũchha hôan e; thin a nãng rãngrãng dângmin ngãle nãngkhhoak nãngmoang dângmin. Thin nâng ngah heh khoh nâng, wõ heh khoh nâng, ngãle chentô ngem angah heh, apêm nyem ngãle wũnngem,#1.26 Khhama nâng litraang wah wantheh nâng ngem angah heh, apêm nyem ngãle wũnngem; Hebrew nâng apêm nyem heh ngãle hahtokkhoh phangtang. dong ngãle arin heh khoh nâng chenpên a.”
27 #
Mt 19.4; Mk 10.6 #
Kha 5.1-2
Ephûmma Joban ma mihnyãn nyũchha heh ate rãngrãng hôan wah. Tema dela ngãle dihiak hôan wah, 28Ngãle Joban ma thin nâng rangkoh lahma ngatwah, “Pôpan lijan jat aja en, nê chhũ nê chha heh hahtokkhoh phangtang nâng sõng lahma thinkhhen nâng chenthîen a. Ngãma nê a ngah heh, wõ heh, ediko wũnngem heh khoko pênrãng thîen ekah. 29Ngãma nê nâng lirup tõ achhah ngãle penrĩ wahrã heh phhekchhah rãng koh ekah. 30Rohkomĩn Ngãma wũnngem ngãle chentô wõchhũ wõchha hehnâng bãngdek wandã ngãle bãngchhõng khochhõng heh phhekchhah rãng koh ekãng”—ngãle erohjô dâng wah. 31Joban ma Tema chentô hôantah hehnâng sû lahma te a nyahrãng khũhah wah. Ngãle sanhem lahma rangkhah hokwah —epa jâ erok jâ dâng wah.
Currently Selected:
KHABÊNG 1: Nokte
Highlight
Share
ਕਾਪੀ।
Want to have your highlights saved across all your devices? Sign up or sign in
The Bible Society of India