MATTHEW 3
3
Baptisma Diya John Pora Raasta Jugar Kora
1Heitu din te Baptisma diya John ahhi kene, Judea laga jungol jaga pora prachar kori kene koise, 2“Mon ghurabi, kilemane sorgo rajyo usor te ase.” 3Kilemane Isaiah bhavobadi pora, kon laga eneka koi thakise, eitu tar ase,
“Jungol pora ekjon he awaz di kene koi ase:
‘Prabhu laga raasta jugar koribi;
Tar laga khuj raasta sidha bonai lobi.’”
4Etiya John he ut laga chuli kapoor pindhise aru chamra rosi komor bandha bandhi kene thakise; aru tar laga kua-lua tu kakoti foring aru jungol laga mou jhul thakise. 5Tetiya Jerusalem manuh khan aru Judea jaga sob pora aru Jordan nodi phale thaka nagor sob pora tar usor te jai thakise, 6aru paap shikar kori kene, taikhan Jordan nodi te John pora baptisma dise.
7Kintu ketiya pharisees aru Sadducees khan besi baptisma lobo nimite ahha dekhise, tar pora koise: “Tumikhan sanp laga bacha khan! Ahhi thaka khong pora polabole kon he tumikhan ke hushier koribole dise? 8Mon ghurai ahha nisna thik phol dhori bole dibi, 9aru tumikhan nijor mon te andas pora eneka bhabna nakoribi, ‘Amikhan laga pitri Abraham ase,’ kilemane moi tumikhan ke koi ase, Isor pora eitu pathor khan pora bhi Abraham laga bacha khan ulai dibo pare. 10Etiya bhi kuthar tu gos laga hipa te rakhi kene ase. Eitu nimite kon tu gos bhall phol nadhore, eitu kati kene jui te phelai dibo.
11“Mon ghurabo nimite moi tumikhan ke paani te baptisma di ase, kintu moi laga piche te ahha ekjon tu moi pora besi shaktiman ase; tar laga juta bukhibole bhi moi jugyo nahoi; tar pora he tumikhan Pobitro Atma te aru jui te baptisma dibo. 12Muli thaka dhan safa kora khola-chamos Tar laga haat te dhori kene ase, aru Tar he nijor laga dhan mula jaga safa koribo aru ghehu dhan bhoral te jama koribo; kintu dhan chamra tu Tar pora ketiya bhi namora jui te jolai dibo.”
Jisu Baptisma Lua
13Tetiya Jisu Galilee pora Jordan nodi te baptisma lobole John usor te ahhise. 14Tetiya John pora Jisu ke rukhai kene, eneka koise, “Moi he Apuni pora baptisma lobo lage, kintu apuni he moi usor te keneka ahhise?” 15Kintu Jisu he tar logote uttar dise, “Etiya karne eneka hobole dibi; kilemane dharmikota sob hidho hobo nimite amikhan majote eneka kora tu thik ase.” Tetiya John he mani loise. 16Aru ketiya Jisu baptisma loise, aru paani pora Tar ulaise, tetiya sabi loge loge sorgo khulise aru Isor laga Atma kopo-chiriya nisna Tar uporte nami ahhise, aru Tar logot thaki jaise; 17aru sabi, sorgo pora ekta awaz he koise, “Eitu moi laga priyo Putro, Kon ke moi besi khushi pai.”
Currently Selected:
MATTHEW 3: NagaMe
Highlight
Share
ਕਾਪੀ।
Want to have your highlights saved across all your devices? Sign up or sign in
© 2014, The Bible Society of India
All rights reserved.