LUKA 18
18
Indjɛ la djudji na mwali ɔgwedja momi
1Yesu abala na bu indjɛ dii tina ɛ obainedja boo eboani oongɔɔnɔ bihole bisusu na pɛpɛ oembɛ: 2«Ɛdaka ta ibonga imɔti na djudji ɔ pɛpɛ obanga Ndjambe ko ailɛkɛ noko moto omɔti. 3Ɛdaka koko ena ta ibonga dia mwali ɔgwedja moomi ona oduaka bihole bisusu abala na nde boo: “Longedjani na ikambo odii moto ɔdihana na mbai!” 4Ehole eyai, djudji alona. Bea asabalea boo: “Sooti, tebange Ndjambe ko telɛɛ moto noko omɔti; 5endolo ta elɔkɛ mwali hoo ɔgwedja momi aembɛdjɛni: namolongedjalea na ikambo, tina ɛ boo asaka sekoa atungeani.”» 6Bea Kumu abakea boo: «Okani moda mabala djudji mobe! 7Ko Ndjambe alongedjaetelea bato ibahɔɔ yo ibadii omoongɔɔnɔ na ingbanbga bulu na moi? Ayeyoalea pɛpɛ obakɔmɛdja? 8Nabali na nu ohuu boo: Abalongedjalea pɛpɛlɛ mɛɛnɛ. Endolo Mwana ɔ moto akadoabi, ataneabi edhimeli ta ngondo?»
Indjɛ la mofalusai na moputedjɛli ɔ puti
9Yesu abala naikina indjɛ dii tina ɛ oinedja odii bia ibalɛdjaka boo bakɔkɔ olulea ba Ndjambe ko batitedjaka bakina: 10Ɛdaka na «Bato babae bakɛɛ ta tepelo tina ɛ oongɔɔnɔ; omɔti adaka mofalusai, okina moputedjɛli ɔ puti. 11Mofalusai, aema diko, aongɔɔnɔkɔ bea ta tei ɛ nde mɛɛnɛ boo: “Ndjambe, ɔ mbai, naopi misakoa tina ɛ boo naditi elengɛ bia bakina basusu, ibadii baibi, bato bataka ɛ odjoo na bɔɔli; naopi misakoa tina ɛ boo naditi elengɛ moputedjeli hoo ɔ puti. 12Nakasabekee maswi mabae engi pɔsɛ ko nakaope ibondo la doomi la madiheli ma mbai masusu.” 13Moputedjeli ɔ puti, yo, aemaa ohali ko aihɔnɔ noko ongangodja miso o diko, endolo abakea mabo ta bupa ko abalaka boo: “Ndjambe ɔ mbai, okeani ndjokwa nadii moto ɔ masumu.” 14Yesu abakea boo, nabali na nu, moto ona aenɛmɛ molongi ta miso ma Ndjambe ehole ɛyana yo ta ndako ɛ nde, endolo titi Mofalusai. Na tina hee, ona ɔsangangodjaka, atitedjamabi, endolo ona osatitedjaka, angangodjamabi.»
Yesu adjongoi bana bakɛkɛ
(Hokea koko Mat 19, 13-15; Mal 10, 13-16)
15Bato badua na bana bakɛkɛ odii Yesu bo ababakee mabɔ. Batingami ba nde ɔenɛ bo bea, babanga obasia. 16Endolo Yesu abea biɛngɛ ko abala boo: «Kinani bana bakɛkɛ badoe odii mbai! Pɛpɛ obasiani, tina ɛ boo Okumu ba Ndjambe bodii tina ɛ bia ibadi elengɛ ibo. 17Nabali na nu sooti boo: Moto ona odii pɛpɛ oosɔ Okumu ba Ndjambe elengɛ mwana mokɛkɛ, aingietebi ena.»
Yesu na modiheli
(Hokea koko Mat 19, 16-30; Mal 10, 17-31)
18Kumu omɔti ɔ Bayuda ahɔdja Yesu boo: «Molehi mopele, eboani mbai okɔ tina ɛ odiha mohelo ma seko ye?» 19Yesu abala na nde boo: «Tina ndani obeakani mopele? Moto mopele aditi dongedja oko Ndjambe yo buki. 20Odjebi mibeko: “Pɛpɛ okwa na bɔɔli, pɛpɛ owa moto; pɛpɛ oiba; pɛpɛ oda na tati ebe, suma sangwao na ngwao.”» 21Moto ona amosɔmbɛdja boo: «Naakokedja mibeko mia misusu donga bwɛngɛ ba mbai.» 22Ɔoka Yesu bea, abala na nde boo: «Otaki modjɔ momɔti: tɛkɛ leka losusu lodii na wɛ ko kaana falanga odii bakwali, ko odalea na madiheli o diko; ngɔngɔ dua ko kimanani.» 23Endolo ehole ɛoka yo bibaeli bia, aimea na ndjokwa enɛnɛ mɛɛnɛ, tina ɛ boo adaka modiheli monɛnɛ. 24Ɔenɛmɛ yo na ndjokwa, Yesu abala boo: «Edii opipo tina ɛ badiheli oingea ta Okumu ba Ndjambe! 25Edii opipo tina ɛ kamela oingea ta iposi la tonga endolo enoi na opipo tina ɛ modiheli oingea ta Okumu ba Ndjambe.» 26Bato ibamookaka babala boo: «Ekada bea, ona ohɔni ohela nda?» 27Yesu asɔmbɛdja boo: «Modjɔ modii bato pɛpɛ ohɔnɔ okokedja Ndjambe adii omokokedja.» 28Bea Piɛlɛ abala boo: «Hokamedja, iso lakina leka la boso losusu tina ɛ okimana wɛ.» 29Yesu abala na bu boo: «Nabali na nu sooti: ekada boo moto akini, tina ɛ Okumu ba Ndjambe, ndako ɛ nde, mwali ɔ nde, bananango, baboti ba nde na bana ba nde, 30adihalea obuke onɔ donga hadɛdi, ko ta ngondo ɛduake, adihabi mohelo ma seko.»
Yesu adjebedjai mbala ɛ basato ogwa na opusoama ba nde
(Hokea koko Mat 20, 17-19; Mal 10, 32-34)
31Yesu atomba batingami doomi na babae mbuti na nde ko abala na bu boo: «Hokamedjani, lakɛɛni ta Yelusalema oho midjɔ misusu makoma batɛli ta tina ɛ Mwana ɔ moto mikokedjamalea. 32Tina ɛ boo akabamalea ta mabɔ ma bato iba pɛpɛ odjeba Ndjambe, bamosɛkɛlea, bamosingalea ko bamotɔlea masɔi. 33Bamobomalea pimbo ko bamowalea. Ko ta iswi la basato, apuswualea ta ogwa.» 34Endolo batingami baisipoa modjɔ mua; tingo ɛ kɔpɛ djia ɛbombama odii bo ko baisipoa eka ndani ɛbalaka Yesu.
Yesu aheledjai moto ɔ miso mago ta Yeliko
(Hokea koko Mat 20, 29-34; Mal 10, 46-52)
35Ena ɔbatama Yesu na Yeliko, moto ɔ miso mago adaka adii ta mokpɛngɔ ma ndjia ko asɛngɛkɛ. 36Aoka kilingo ɛ bato bike ibadaka banoe ko ahɔdja bato boo: muu modjɔ nda. 37Bamosɔmbɛdja boo: «Edii Yesu ɔ Nasaleta iyona ɔnɔke.» 38Bea agama boo: «Yesu, Mwana ɔ Davidi, okeani ndjokwa!» 39Bato ibadalaka boso ba Yesu bamopɛlɛ bɛngɛ akine ogama, endolo agama onɔ: «Mwana ɔ Davidi, okeani ndjokwa!» 40Yesu aema ko apa enɔli boo badoe na nde. Ehole ebatama moto ɔ miso mago mbuti na nde, Yesu a mohɔdja boo: 41«Ɛpalaka wɛ nakɔe tina ɛ wɛ yee?» Asɔmbɛjda boo: «Kumu, kɔɔ boo naenɛ koko.» 42Ko Yesu abala na nde boo: «Enɛ naikina! Edhimeli ɛ wɛ eoheledjai.» 43Ambuku, aenɛ, ko atingama na Yesu ena akumedjae Ndjambe. Bato basusu ibaenɛ modjɔ mua basakoa Ndjambe.
Currently Selected:
LUKA 18: ngc
Highlight
Share
ਕਾਪੀ।
Want to have your highlights saved across all your devices? Sign up or sign in
©2025 Communauté des Eglises Travaillistes (CET)
