Matié 10
10
Yésus mátɔ́m popíónyí páát na páandɛ́
(Mál 3.16-19; Lúk 6.14-16)
1Yésuse waapílikɛn popíónyí pɛ́ɛ́yɛ́ peem páát na páandɛ, weekeeki pɔ́ numíánsina ɔ́ pilɔk pí piliínditíe ɛ́ɛ́ pákúúŋa pɛ́ɛ, póond pééŋukesi epé pánúmanɛ́ɛ no pikóndi. 2Pisiɛ́n pí petúmí páát na páandɛ́ epie: ukutúan, Símune, pápílanɛ́ ɛ́ɛ́ Píɛ́lɛ, ne Endelée, andimán wɛɛyɛ́, Sáakɛ, muɔ́nɔ́ u Sépeté, na andimán wɛɛyɛ́ Isáaŋ; 3Fílipe na Patelemí; Túmasɛ na Matié etúúsí lemfúe; Sáakɛ, muɔ́nɔ u Alifée na Taaté; 4Símune umɔɔ́yɔ́ kitɔŋ kíɛ́yɛ́ táásɛ na Yútas Isikalióte, ewú umɛɛ́sɛ́m Yésuse.
Pusɔ́m pú pápáát na páandíɛ
(Mál 6.7-11; Lúk 9.2-5; Lúk 10.3-12)
5Papáát na páandíɛ pɛɛ́tɛ, pɔ́ɔ́pɔ́ɔ Yésus maátɔ́m pɔ́ ni imbítíinɛ eye: «Nutiyɔɔ́k ku pɔsɔ́k pátiányípá pémenyen Támbákɛ́ɛ, nutipíkín á papálɛ́k pá Samali; 6ánuupɔ́ kiáyí kí paán pí Ísilayɛ́l pɛ́nyɛɛ́ ɛlɛɛ́ pitúúmbɛ́ɛ piinyímén. 7Kí iŋilí, énukémé ɛ́ɛ́ Pufuŋ pú muɛnɛ́ kanyi mekúyekúye. 8Núéŋukesi pɔsɔ́k pánúmanɛ́ɛ, núenyukesi piku, núéŋukesi pekúnúkun, núkúúŋa pilɔk pí piliínditíe. Numápiá sɛ́kísɛ́k, énuekényí sɛ́kísɛ́k.
9«Nutikɔ́l tɛ kóol, tɛ kíɛ́nsɛ́ɛ u kiɔyɔ́ɔ, tɛ muenyí mú kuák káánɔ́ á malaká, 10tɛ imbalá yi ɛŋɛnd, tɛ indífɔnɔ́ íyáandɛ́, tɛ pasílípas, tɛ kisume, á kiákí ɛ́ɛ́ eŋelípuólí ɛ́ɛ́kɛɛsikɛnɛn kupia púkunya púɛ́yɛ́. 11Aká numényípíkín á pálɛ́k tɛ ɔ́ kitɔŋ ónuówún mɔɔnd unyɛɛ́ pilɔŋ peseé ɛ́ kunúnɛk, núnyɔ́mbɛt kɔ́ɔk kuám káánɔ́ á kuatɔk. 12Aká nupíkené á kiansi, énupíkélítí pɛɛ́tí kiansi; 13índɛ pɛɛnd pá kiansi siɔnúkɔ́l ne peseé, kiyeéwe kíánɔ pá á kiansi kikáánɛ́; maná, índɛ pɔ́timɔ́ɔ́núkɔ́l ne peseé, nuond ne kiyeéwe kíánɔ́. 14Índɛ pɛ́siɛl pɔ́tinúkɔ́l ne peseé, índɛ pátipá pɔ́pítɔ́likɔn puandá nuɔyɔnɛ́ɛ pɔ, nukanyɛɛ́ núátɔk á kiansi kikáánɛ́ púnyaánɛ á pálɛ́k ukáánɛ́, énukitit etuúte ú pikɔ́nd píánɔ́. 15Kémuémue, yɔɔ́núɔ́yɔn ɛ́ɛ́: puɔ́s pú imbakɛ́, pálɛ́k ukáánɛ́ áányípia inséésítényí itápukanɛ́ i Sɔtɔ́ɔm nɔ Kɔmɔ́ɔl.
Yésus ɔ́ɔ́kɔɔyɔ inséésítényí síólonée
(Mál 13.9-13; Lúk 12.11-12; 21.12-19)
16«Niiŋúɛ kɔk, imánútɔ́m ɛlɛɛ́ pitúúmbɛ́ɛ ɛ́ kikɛtɛ́kɛtɛ́ɛ kí imbuá sí ɛɛm; ánupá iŋuɛ́l ɛlɛɛ́ mɔnyɔ́ki, kati kipalalá ɛlɛɛ́ tukɔlɔɔ́mbɔ.
17«Énupíkeŋényésí pɛɛnd: pákɛɛp kuanúyapá ó pusíó pú pesúmbí maayɔ́ póond pénúkite á piansi píɔ́p pí imbísókólí. 18Pɔ́kɔnúsɔ́mɔnɔn ku pɔɔŋgɔ́munɛ ne pefuŋ káámɛ ó pusíó: nuányímbíákinan itóy kɔ́ɔ́p ó pusíó, nɔ pɔsɔ́k pátíányípá pémenyen Támbákɛ́ɛ. 19Aká pɔ́ɔ́nyínúsɔ́mɔnɔnɛ́, nutifíká ni iŋondínyínyí tɛ epú nuɔ́yitɛ́ɛ: epú nuɛ́nyɛ́sikɛɛnɛnɛ́ kuɔyɛt, Támbák éényinútúun púú á kisikɛl kikáánɛ́, 20Á kiákí ɛ́ɛ́ nutipá panɔ́ nukaányíkála, kiliínditíe kí Síí waanɔ́ kíi kíkaányíkála. 21Andimán áányínyɛ́ɛn andimán ikɔ́ɔ́n ɛ́ɛ́ pɔ́ɔ́ŋ wɔ́, Síí nyɛ́ɛn muɔ́nɔ́; paán nyíínan pesíí ɛ́ɛ́ pɔ́ɔ́nɔ pɔ́. 22Pɛɛnd peem ɛ́ɛ́nyínúfɛmɛ Káámɛ ó pusíó. Ewú waányípílúndinɛ́ɛ kuám kí insúkie, ukáánɛ́ Támbák óónyísóti wɔ. 23Aká péényínúnuenesié á pálɛ́k u imbáakináa, nupínɔ á pálɛ́k olotí; kémuémue, yɔɔ́núɔ́yɔn ɛ́ɛ́ nutiékíndíményí kupɔŋɔ pa pálɛ́k pí Ísilayɛ́l kati ɛ́ɛ́ Muɔ́nɔ́ u mɔɔnd móólée. 24Opíónyí tipá utápukan oŋónyóonyí wɛɛyɛ́, tɛ eŋelípuólí, utipá utápukan máásɛ wɛɛyɛ́. 25Epú pépéétenyé kó opiónyí nyɛ ɛ́ɛ́ úpá ɛlɛɛ́ oŋónyóonyí wɛɛyɛ́, eŋelípuólí ɛlɛɛ́ máásɛ wɛɛyɛ́. Púéndi muɛ́t nuyá pɔ́kɔ́lɔn wɔ́ asi Pɛlisipúlɛ#10.25 Pɛlsepúle ɔkɔ́n u pilɔk pí piliínditíe., ɔɔyɔ́ kɔk pɔsɔ́k pá nuyá: Tíki pɔ́ yá pimbíyuukɛn á!
Puunɛmbɛ́n pɔ́ɔ́nyɔ́ɔ́sɔn, pú insumbú áányípalɔk
(Mál 8.38; Lúk 9.26; 12.2-9)
26«Nutipiá puumbíla, á kiákí ɛ́ɛ́ pɔ́ɔ́nyɔ́ɔ́sɔn puunɛmbɛ́n, pú insumbú áányípalɔk. 27Epú inúɔ́yɔnɛ́ɛ kí imbíne, énukémé púú kuɔ́mu kupálán; epú nuɔ́pɔnɛ́ɛ kí ipálí yí etú, énukémé púú kí insɛkɛ mɛnɛ́mɛnɛ́ɛ. 28Nutitíín epé pɔ́ɔ́nɔnɛ́ɛ nuɔ́l kati piɔ́nɛ́n pumuundɛ; énutííné sɔ́k unyɛɛ́ ukuɔ́n na pumuundɛ nɔ nuɔ́l é yiik í kati kuwéene. 29Tíkɛ péétúénen tuyɛ́kɛ́l túandɛ́ á kikɔ́ŋ kímoómí á? Númoómí tipá núkunyím kati ɛ́ɛ́ Síí waanɔ́ mémenyée. 30Yɔ́ɔyɔ́ kɔk panɔ́ epé tuúnye túánɔ́ tuum nyɛɛ́ tuanán. 31Nutitííné kɔk á kiákí ɛ́ɛ́ nuátápukan tuyɛ́kɛ́l. 32Ewú weényímbísimesié ó pusíó pú pɛɛnd ɛ́ɛ́ unyi waamɛ, yeényípísimesi wɔ́ kákáámɛ ké iŋís yá Taatá unyɛɛ́ mɛnɛ́mɛnɛ́ɛ; 33maná kɔk, ewú waányímbísáŋunɛ́ ó pusíó pú pɛɛnd, yaányípísáŋɔn wɔ́ kákáámɛ ó pusíó pú Taatá unyɛɛ́ mɛnɛ́mɛnɛ́ɛ.
Indiól ne kiyeéwe, yoól nɔ yɔɔ́nɔnɔ́ í pitíí
(Lúk 12.51-53)
34«Nutipítááká ɛ́ɛ́ yoónúólín ne kiyeéwe e kúúsí; indiónúólin ne kiyeéwe, yoól nɔ yɔɔ́nɔnɔ́ í pitíí. 35Ɛ́ɛ́ɛ, yoól á kuasiátɔ́n kinɔ́k ne síí, ɔmbúl no yóótí, akányí muɔ́nɛ́ɛ ní imbóómbé wɛɛyɛ́: 36pokóyikoy pááwɔ kapá pɛɛnd epé nunyɛɛ́ nikúli nímoómi nɔɔpɔ́.
Kupísáŋɔn aaŋú muɛ́t ɔ́ kuɔŋ é Yésus
(Mál 8.34-35; Lúk 14.26-27; 9.23-24)
37«Ewú wɔɔyɔɔnɛ́ɛ síí wɛɛyɛ́ púnyaánɛ yóótíe wɛɛyɛ́ kutápɔk aná wuuŋɔyɔnɛ́ɛ tipá ɛŋɛsíkɛ́ɛ́nɛ́n ɛ́ɛ́ pɛ́ɛlɛ ɛ́ɛ́ unyɛ waamɛ; ewú wɔɔyɔɔnɛ́ɛ paán pɛ́ɛ́yɛ́ kundápɔk tipá ɛŋɛsíkɛ́ɛ́nɛ́n ɛ́ɛ́ pɛ́ɛlɛ ɛ́ɛ́ unyɛ waamɛ. 38Ewú utiányípá usɛmbɛn kolóse#10.38 Kusɛmb kolóse nyɛ kuátap niku ó pusío pú Yésus. wɛɛyɛ́ wɔɔŋ káámɛ, utipá ɛŋɛsíkɛ́ɛ́nɛ́n ɛ́ɛ́ pɛ́ɛlɛ ɛ́ɛ́ unyɛ waamɛ. 39Ewú ukáákanɛ́ kusɔ́t kúɛ́yɛ́, weényínyími kɔ́ɔ, ewú weényínyímié kusɔ́t kúɛ́yɛ́ káámɛ ó pusíó áányítáŋap kusɔ́t kú tɛ nííkí. 40Ewú unúkɔ́lɔnɛ́ peseé ɔ́kiŋgɔ́lɔn peseé, mɔɔnd wuuŋgɔ́lɔnɛ́ peseé ɔ́ɔ́kɔ́lɔn ewú umiíndɔ́m peseé. 41Ewú úmónyikólí eŋémímekélíe u Támbák asi eŋémímekélíe, áányípia pinamá píɛ́sikɛɛnɛnɛ́ ne eŋémímekélíe, ewú úmónyikólí u indɛ́ndɛ́nɛ asi sɔ́k u indɛ́ndɛ́nɛ áányípia pinamá píɛ́sikɛɛnɛnɛ́ nɔ sɔ́k u indɛ́ndɛ́nɛ. 42Ewú ne ewú ukeényéeki tɛ opíónyí waamɛ weekétíkétie kiláas kí moomb mé kusíin, ɛ́ɛ́ opíónyí ukáanɛ́ ɔ́ɔ́kɔɔŋɔn káámɛ, kémuémue yɛ́ɛ́pí káánɔ́ ɛ́ɛ́ mɔɔnd ukáánɛ́ tiényinyímí pinamá píɛ́yɛ́.»
Currently Selected:
Matié 10: yav
Highlight
Share
ਕਾਪੀ।
Want to have your highlights saved across all your devices? Sign up or sign in
© 2026, CABTAL