Matta 6
6
Sərək a talaŋ ley tər məstakwaŋ iyi
1«Hi jəɗ talaŋ təheni, hi mba i ɗal kəzəɗ sə delele a ma tə hedi iyi amba i mə gəraheni səku. Əŋgah heni kəɗal za mənaŋ mba seh, hi lim muwurɓay tə kəzəɗ təheni a ndəra Baba təheni tə wuzlaf seh halla.»
2«Əŋgah hwa kəvəl məsəkəŋ əŋ hedi məstakwaŋ seh, hwa mba i mbuw ma amba hedi iyi i mə gərah səku, mənaŋ hedi mə zlap ganaɗ sə bək bək iyi i mə ɗal tə əŋ biŋ kə ɗal mbuh əŋ Bizlaf liŋ əŋ kataf tata i mə pik iyi fuk. I kəɗal mənaŋ mba amba i lim həmən a ndəra hedi dakayta iyi. Sa kəzlapaheni məndiwiŋ: I kəlim muwurɓay tə kəzəɗ tata cuza. 3Ama hwa seh, əŋgah hwa kəvəl məsəkəŋ əŋ hedi məstakwaŋ, ndəra gula təkwa mə mba i səŋ məsəkəŋ ndəra zəma təkwa mə ɗalu səku, 4mənaŋ wa, a kəlim seh, vəl məsəkəŋ təkwa mə nja abə ɓah, Bizlaf, Baba təkwa, hedi mə gər məsəkəŋ hwa mə ɗal tə abə ɓah mba, a mineh muwurɓay tə kəzəɗ təkwa za.»
Sərək a talaŋ ley ɗal mbuh
(Luka 11:2-4)
5«Əŋ heni kəɗal mbuh seh, hi mba i ɗal mənaŋ hedi mə zlap ganaɗ sə bək bək iyi səku. Tata seh, i kəmba i gar ley ɗal mbuh əŋ biŋ kə ɗal mbuh əŋ Bizlaf liŋ a meɗek kataf iyi amba hedi iyi fuk i mə gərta. Sa kəzlapaheni məndiwiŋ: I kəlim muwurɓay tə kəzəɗ tata cuza. 6Ama hwa seh, əŋ hwa kəmba i ɗal mbuh, təɗ əŋ biŋ təkwa, əŋ lay hedi iyi i mə limeh səku, pek mebiŋ, abə dawaŋ ta, ɗalaŋ mbuh əŋ Baba təkwa Bizlaf, hedi mə gər məsəkəŋ hwa mə ɗal tə abə ɓah mba, a mineh muwurɓay tə kəzəɗ təkwa za.»
7«Əŋ heni kəɗal mbuh seh, hi mba i zlap ma mbeh səku səku, mənaŋ hedi mə səŋ Bizlaf iyi səku. I cek seh Bizlaf a zlim ɗal mbuh tata za, əŋ tata i kəɗal mbuh mbeh səku ta. 8Hi mba i ɗal mənaŋ tata səku, məŋgəvday Baba təheni a kəsəŋ məsəkəŋ heni mə mba, mar heni kəɗəpza halla ndagwa.»
Ɗal mbuh əŋ Baba takwa
9«Heni seh, hi ɗal mbuh mənaŋ wa:
“Waa Baba tini tə wuzlaf,
ɗal kwa viyey mə səŋ hwa seh, hwa Bizlaf sə Kweɗek.
10Ɗal Bay təkwa mə ndaha.
Mba təkwa mə ɗal əŋ məŋhayak mənaŋ tə wuzlaf.
11Vəlanini məsəkəŋ kə zəm tiɗe mənaŋ nini mə mba tə eci.
12Yakanini hem tə a talaŋ tini iyi,
mənaŋ nini abə talaŋ tini bahayim nini mə yakaŋta hem tə hedi mə ɗalanini hem iyi.
13Hwa mba i yakanini ley ndəv əŋ məsəkəŋ mə nda i təlanini səku.
Ama rehenini za a ndəra Məsəkəŋ madawar.
[Məŋgəvday ar əŋ hwa bay, mazla, səndawl kwa a pipi a pipi. Amen]”».
14«Məŋgəvday a ɗek, əŋgah heni kəyakaŋta məsəkəŋ madawar tə hedi mə ɗalaheni məsəkəŋ madawar iyi, Baba təheni tə wuzlaf a yakaheni məsəkəŋ madawar təheni za bahayim. 15Ama, əŋgah heni kəyakaŋta məsəkəŋ madawar tə hedi iyi səku, Baba təheni bahayim a yakaheni məsəkəŋ təheni madawar iyi halla.»
Sərək a talaŋ ɗal dalyam
16«Əŋ heni kəɗal dalyam seh, hi mba i kurcuf nje mənaŋ hedi mə zlap ganaɗ sə bək bək iyi i mə ɗal səku: I kəzlambaɗ nje tata iyi amba hedi iyi i mə gərta i kəɗal dalyam. Sa kəzlapaheni məndiwiŋ: I kəlim muwurɓay tə kəzəɗ tata cuza. 17Ama hwa, əŋgah hwa kəɗal dalyam seh, baŋ nje təkwa, ɗal mel a talaŋ təkwa, 18amba hedi iyi i mə mba i səŋ hwa kəɗal dalyam səku. Ama sey Baba təkwa Bizlaf taataɗ ŋga tə a namba tə əŋ lay maɓah ta, mə səŋgu. Baba təkwa Bizlaf, hedi mə gər məsəkəŋ hwa mə ɗal tə abə ɓah mba, a mineh muwurɓay tə kəzəɗ təkwa za.»
Ley cakal məsəkəŋ əŋ Bay tə wuzlaf
(Luka 12:33-34)
19«Hi mba i ziber ley cakal məsəkəŋ tə əŋ məŋhayak wa səku, əŋ lay fiyaŋw iyi abə dədər i gula i gayu, əŋ lay məhil iyi bahayim, i gula i təv ge ley hilʉ. 20Ama hi cakal məsəkəŋ iyi mbeh səku əŋ talaŋ təheni a wuzlaf, a namba fiyaŋw iyi abə dədər i gula i gayu səku, məhil iyi bahayim i gula i təv ge ley hilʉ səku. 21Məŋgəvday əŋ lay məsəkəŋ təkwa mbə a namba, nəf təkwa bahayim mbə a namba.»
Lalam tə wucum
(Luka 11:34-36)
22«Lalam tə wucum seh, ar nje. Əŋgah nje təkwa ləlaw diya, wucum təkwa fuk mbə əŋ lay mawaɗ. 23Ama əŋgah nje təkwa lawlaw halla, wucum təkwa fuk mbə əŋ ləvəŋ. Məŋgəvday a ɗek, əŋgah waɗ tə əŋ hwa mənaŋ ləvəŋ seh, ləvəŋ təkwa ta a nda i ɗal ɓikɓik.»
Bizlaf, aka səku dala
(Luka 16:13)
24«Hedi mə gula i ɗalaŋ kəzəɗ əŋ bay iyi bək tata a lay ta seh halla: A nda i mba bay məzəwindi, a kənda i mba bay məzəwindi halla, aka səku a nda i waŋgaŋ talaŋ əŋ bay məzəwindi, a nda i geŋgir bay məzəwindi. Heni gula i ɗalaŋ kəzəɗ əŋ Bizlaf abə dala bək tata a lay ta seh halla.»
Hi ɗiy wulək təheni a Bizlaf
(Luka 12:22-31)
25«Ehe, sa kəzlapaheni: Hi mba i wulək a nja təheni səku, a məsəkəŋ heni mə nda i zəm səku, a məsəkəŋ heni mə nda i sa abə a rukut heni mə nda i ndək rukut a wucum səku. Mədəŋcur pay day a məsəkəŋ kə zəm səku vaw? Wucum bahayim pay day a rukut səku vaw? 26Hi gər vigem iyi i kəzlək səku, i kəbəl ndəri səku, i kəcakal kwa mey əŋ tebeŋ səku, ama Baba təheni Bizlaf tə wuzlaf a kəzəmta. Heni pay day a vigem iyi ta mba halla vaw? 27Ar viyey əŋ faŋw təheni, mə gula i fəfəl waŋ ŋga kwa mbizek abə wulək ŋga wa?
28«Heni wulək mbeh səku a talaŋ rukut seh, məŋgəvday a mey? Hi gər faŋwfaŋw iyi tə damu, i gəl seh viŋgey? I kəɗal kəzəɗ səku, i kəja rukut səku. 29Ama sa kəzlapaheni: Kwa Sulaymanu abə məsəkəŋ ŋga sə mbeh səku iyi wa fuk, kəlim kwa ley ndək rukut maŋgəm mənaŋ faŋwfaŋw ntaɗ tə əŋ faŋw tə faŋwfaŋw iyi halla. 30Bizlaf a kəndəkaŋta rukut əŋ ŋgusawf iyi wa eci a damu, mpat bahayim i kapta za əŋ kahaw. Əŋgah mənaŋ mba seh, a ndəkaheni rukut pay day a mba seh halla vaw? Heni, hedi mə kuw ma sə kʉsit iyi?
31«Mənaŋ wa izey, hi mba i wulək mbeh səku abə ley zlap: “Nini nda i zəm seh mey?” Səku, “Nini nda i sa seh mey?” Səku, “Nini nda i ndək a wucum seh mey?” Səku. 32Ar hedi mə səŋ Bizlaf iyi səku i mə pələk məsəkəŋ iyi ta mba kwa yip halla. Ama Baba Bizlaf təheni tə wuzlaf a kəsəŋ məsəkəŋ heni mə mba fuk. 33Hi mar ley pələk Bay tə Bizlaf abə ley ɗal kəzəɗ mənaŋ mbiŋ mə mba ndagwa, abə dawaŋ ta, a vəlaheni məsəkəŋ iyi ta wa fuk za mənaŋ fəfəl. 34Hi mba i wulək a məsəkəŋ mə nda i ɗal tə mpat səku, məŋgəvday wulək tə mpat mə nda i sla a talaŋ ŋga. Tuwah tə əŋ waŋ ntaɗ, ga abə waŋ ta.»
Currently Selected:
Matta 6: xmd
Highlight
Share
ਕਾਪੀ।
Want to have your highlights saved across all your devices? Sign up or sign in