Matyáasa 6
6
Twiiŋí kówo o geremenámó weréena vawora
1Yésusu a ma wundé ojárá anáá: «kérikyánó tama éjé no eŋgámó até éyé Tetáŋgá wa vinó ójó na máná a susámó vinó ká eŋga na eŋgisó ra vato ukú ójó anáá vá no séŋgiye. Na eŋgá náná no ta né timbe ipéyí na Tetáŋgá wa vinó. 2Támá éjé wo eréenámó owora wandá, mámó ka vá tíhíyé ámó vato va pimbirí vá eŋgámó na byanje vyá besoóriye kó na ejɔŋɔ́ ukú ójó anáá vato vá wo séŋgiye. Ŋgo nó jánámó na vatɔ́ɔ́tɔ́ anáá vá omana otimbe ipéyí yáwó. 3Kó mámó, tama éjé wó wo eréenámó owora wandá, ombɔ́ɔ́ rɔ́ɔ́ rá vakótó ó ta geréméná ojembe até éyé ombɔ́ɔ́ rá enémé wó eŋgámó, 4ukú ójó anáá mómí rɔɔ e rií na asɔɔ́ kó tyó ójó na máná a né wo péyámó esene éyé a enámó mamba ámá na asɔɔ́.»
Yésusu a yeérámó vato mbásóóríye
5Itindikána ijí no vaóóriyámó vinó kó eŋga ámó vato vá mpimbirí ává vá ndíŋgámó ovasóórye viténé na byanje vyá mbasóóriye, kó hée na kɔ́ŋgɔ́ ra enjɔ́ŋɔ́ ombótá ójó anáá vá wó éná. Ŋgo nó ojánámó na vatɔ́ɔ́tɔ́ anáá vá omána timbé ipéyí yáwó. 6Kó mámó, itíndíkáná ijí odiŋgámó anáá ovasóóriye, iŋgááná naáté yá comba rɔɔ, peté ohóto, ovasóóriyámó tyó ójó a ámó na asɔɔ́. Kaá tyó mwané ójó a enámó na asɔɔ́ a né wo péyámó. 7Itindíkána iji no vasóóriyámó vinó ka pɔ́pɔ́rɔnɔ ámó vato ává vá ta jembe Irɔŋgɔ esene éyé vá mwané vá búŋganámó anáá ámó vá járáanámó mbunu Irɔŋgɔ a né wó ovámó. 8No ta eŋgá no purana nawó esene éyé Tyó wa vinó ojó Irɔŋgɔ a jembámó ate éyé é géremenámó na vinó hɔrɔ́ no arɔ́wɔ́ ka me súsé.
Tetáŋgá wa visó ójó na máná
(Rúk 11:2-4)
9«Kaá aaná kówo no geremenámó ovasóóriye:
Tetáŋgá wa visó ójó na máná,
ŋgá niyo nɔ́ɔ́ no ríi mwáŋ mwáŋ na wusó wá moto uŋgimé.
10Ŋgá Tamba rɔɔ yo uré,
ŋgá anáá mbaŋgéná rɔɔ yo eŋgavena
na cí ámó na máná.
11O só hwámó manyá amá ma géremenámó na visó wusí owó.
12O só jwámó mabé ma visó
ámó visó hónó to jwámó ava vá só eŋgámó wobé.
13Mámó ka atɔ́wɔ anáá to rií na vimaa
o só atámó na ombɔ́ɔ́ ra saátana amaa vato
Esené mámó kójo o timbámó Tamba, ŋguru na niimí na mbeya aá mbeya wó rií naná!#6:13 Aŋgóŋgí ájá na mamana má mbásóóríyé á ta ámó na va kárate vá póná.
14Na vatɔ́ɔ́tɔ́ na jwé vasɔ́ɔ́ mabé máwó, tyó wa vinó ojó na máná a né nó jwámó vinó hónó mabé má vinó, 15esene éyé no a ríi ka njwe vasɔ́ɔ́ mabé máwó, tyó wa vinó ójó na máná a ta né nó jwé vinó hónó.»
Iki rá manyá
16Itindíkána ijí na eŋgámó iki vinó ka ríí móndá sútaŋ ámó vato va mpimbiria ává vá cenjámó pwényí anáá moto uŋgimé a jembe anáá vá ámó na iki. Ŋgo nó ojánámó o ámó vatɔ́ɔ́tɔ́ vá mána timbe ipéyí yá awó. 17Kó mámó itíndíkáná ijí wó eŋgámó iki rá manyá mámó osová wusó wɔɔ́ mámó osuune arebínde na ucé rɔɔ́. 18Hɔ́rɔ́ vato vá ta ne jembe anáá o ámó na motindikáná mwa iki. Kó Irɔŋgɔ tyó ójó a ámó na sɔ́ a ne enámó até eyé wó eŋgámó na asɔ́ kó a ne opeyámó.
Owónjá ówó ekúmé na máná
(Rúk 12:33-34)
19«Vinó ka wónjá akúmé rá vinó na cí, esene éyé na cí, nyáányá na myeréŋgééŋ mo ndeérámó, va ŋgubí vá báŋgona mpimi anáá vá ibána. 20Wó je rií anáá, wónjánó akúmé rá vinó na máná esene éyé na máná, nyáányá, na myeréŋgééŋ mo tá ndééré, itɔɔ va ŋgubí vá ta báŋgoná ehótó na wibáná 21esene éyé homó ówó oweténámó akúmé rɔ́ɔ́ ɔ́wɔ́ kówo otémá rɔ́ɔ́ hónó o ámó.»
Osɔ́tɔ́ owó naáté yá ineŋgí
(Rúk 11:34-36)
22«Rámba wa nótó kójo aŋgísó. Ŋgé aŋgísó rɔ́ɔ́ á ta ámó enɔ́ nótó rɔɔ iŋgimé í ámó naáté yá ineŋgí. 23Kó aŋgísó rɔɔ́ yá nɔ́, nótó rɔɔ iŋgímé e ámó naáté yá mbínó. Kó ineŋgí éyé na notó rɔɔ yá ríi na mbinó, mbinó mwané e ámó éjé hiítiti mbat mbat!»
Ijata ŋgé Irɔŋgɔ ŋgé mwení
(Rúk 16:13)
24«Moto a ta ámó onɔnɔɔwena va mása váváne orɔŋgɔ umwesíi, a ne benámó umwesíi o diŋge ojomó, ŋgé a ne rii ámó kiritítí na umwesií oseŋgá ojomo, no ta ámó onɔnɔɔwena Irɔŋgɔ no nɔnɔwena hónó Mwení.»
25«Na wusó mwané kówo njárámó na vinó anáá vinó ká yérána na até éyé enémenámó ésɔ́tɔ́ yá vinó, até gwɔ́s até éyé no ne nyámó na até éyé no né byámó esene éyé ésɔ́tɔ́ é ámó na mpí otómbá manyá, nótó na mpí otómbá cunú. 26Neménáno monóoní mó ta nemá kó mó ta buwé ovétéena na ndáŋgé. Wó je rií anáá Tyɔ́ wa vinó ójó na máná a wó béeryámó, yé no ta ámó na mpí otómbá munóoní omúmu? 27Kó ané ójó na vinó kójo a hítyámó urehye metúú máá ma esɔ́tɔ́ tɔɔ katitíi, esene éyé a katé yérána? 28Kó até kéye no yéránámó na wusó wá cunú? Néménáno va faráwa ává na kondo ámó vá gónámó, vá ta nɔnɔ́wɔ́ kó vá ta nová. 29Na vatɔ́ɔ́tɔ́ ŋgo nó ojánámó anáá itɔɔ Sárómono maté naáté yá ekúmé ráa áŋgímé a ta ma byá vesi vá cunú ámó va faráwa amáva! 30Ihuwe rá kondo éjé e ámó ɔ́wɔ́ wusí owó éjé vá né túmámó ihyáné namberi, Irɔŋgɔ a wó váámó vesi vá cunú. Eŋgendɔ enií vinó? Aá vato ává na mwaná wa ŋgɔ́tééná! 31Vinó ka yérána sɔ́ anáá até eye to né nyámó namberí? Ítɔɔ até eye to né vényámó? Até eye to né byámó? 32Wó ámó vato ává vá ta jembé Irɔŋgɔ káva vá sɔ́sɔmó motéé umúmu ka tɔɔ, Tyó wa vinó ójó na máná a jembámó wusi na wusi anáá motéé umúmu mó nó sɔ́sɔvenámó. 33Sɔ́sɔ́no na makésyé edɔŋgɔ yá Irɔŋgɔ na até éyé é ámó ndíŋgirííŋ na wusó wáa, kó Irɔŋgɔ a né nó uswíyámó motéé umúmu mwimé. 34Vinó ka yérána sɔ́ na wusó wa namberi, esene éyé namberi a né yéránámó na ómwané maté, ámó isí é géremenámó na etɔɔ yáa.»
Currently Selected:
Matyáasa 6: tii
Highlight
Share
ਕਾਪੀ।
Want to have your highlights saved across all your devices? Sign up or sign in
© 2024, CABTAL