Marcos 3
3
Jesúcã wãmo bʉrigʉre ñujeañerõcã tirigue
(Mt 12:1-8; Lc 6:1-5)
1Jesús upatuti cʉ̃cã ticucũãriaronorã judío basocacã neãporiwipʉ sãwayugʉ tamʉ. Topʉ ĩcʉ̃ wãmo bʉsoyoarigʉ niyugʉ. 2Ãpẽrã Jesúre yerisãrĩbʉreco nicapetacã cʉ̃rẽ ñujeañerõcã tigʉagari ĩrã ĩñadutira tiyura Jesúcã cʉ̃rẽ ñujeañerõcã tiñerõcã tiemena cʉ̃rẽ wedesãmasĩrãda ĩrã.
3Tocãrõrã Jesús wãmo bʉrigʉre abiro ĩyugʉ:
—¡Wʉmʉnʉcãnigʉ̃ ãnijã nipetira decopʉ eanʉcãgʉ̃ watiya! ―ĩyugʉ.
4Tuwanʉcõ ãpẽrãpere to nirãrẽ abiro ĩ sãĩñayugʉ:
—¿Yerisãrĩbʉreco niñerõcãrẽ marĩrẽ dotire ñenorẽ tidotiri? ¿Ñurẽrẽ o ñañarẽpere? ¿Ĩcʉ̃ basocʉye catirere cametʉorepere o sĩãcõãrẽpere? ―ĩyugʉ.
Buri cʉ̃jãpe disura pʉtʉayura. 5Tairo tigʉ Jesús cʉ̃rẽ nicamewõnoãrãrẽ cuaremena ĩñagʉ̃ ĩñerõcã cʉ̃jãcã cʉ̃jãye yeripũnarĩpʉre tʉorugahera niñerõcã ĩñagʉ̃ bʉtoro wãcũpasʉtiremena wãmo bʉsoyoarigʉre ĩyugʉ:
—¡Mʉya wãmorẽ sucoya! ―ĩyugʉ.
Cʉ̃pe cʉ̃cã ĩrõrã abirora tiyugʉ. Cʉ̃cã tairo tiremenarã cʉ̃ya wãmo ñuriwãmo pʉtʉayuro. 6Buri fariseo basoca tore witiarara Herodeyabu macãrãmena neãpo Jesúre sĩãcõãrugarere quenosocoyura.
Jesúcã upatara tʉsaropʉ pajʉ basocare buerigue
7Jesúcã neãporiwipʉ niãrigʉ cʉ̃ bueramena upatara tʉsaropʉ wañerõcã pajʉ basoca Galilea ditamacãrã quetatuwʉmʉãyura. 8Cʉ̃cã paca ñurẽ tiẽñoñerõcã tʉora pajʉ basoca Judea dita macãrã, Jerusalén macãrã, Idumea macãrã, Jordán muĩpʉ̃ mʉãtirope macãrã, Tiro ĩñerõcã Sidón wãmẽcʉtire macãrĩ macãrã Jesúre ĩñarã eayura. 9Anorã abiro basoca niñerõcã ĩñagʉ̃ Jesús cʉ̃ buerare ĩcã doriacũmuã pẽrĩcũmuãrẽ cʉoyuedotiyugʉ basocare cʉ̃ñarõjoro niboga ĩgʉ̃. 10Cʉ̃cã pajʉre diare cʉorare ñujeañerõcã ticapetacãrã marĩcʉ̃ pajʉjoro diare cʉora nicamewõnoãyura. Tairo tira cʉ̃rẽ ñeĩñarugara cʉ̃ cʉtiropʉ tubatewʉmʉãtiyura.
11Wãtĩã sãyoriara Jesúre ĩñarã cʉ̃ diamacã ãsʉ̃rʉ̃poperimena ñanujea abiro ĩ caribiyura:
—Mʉ Manigʉ̃ Macʉ̃ ña ―ĩyura. 12Buri Jesúpe wãtĩãrẽ tutuaromena icãta pẽrõgãno nipetira tʉocoropʉ cʉ̃yere wederucũdotiheriyugʉ.
Jesúcã cʉ̃ buera niãnarẽ docejoro ñerigue
(Mt 10:1-4; Lc 6:12-16)
13Siro Jesús ĩcãrã cʉ̃rẽ quetaturare cʉ̃cã borare sioyugʉ cʉ̃mena ĩcã buropʉ mʉãwadotigʉ. 14Cʉ̃jãcã cʉ̃ cʉtiropʉ eawapetiremena cʉ̃jã watoa nirãrẽ docejoro ñeyugʉ cʉ̃rẽ bapuanarẽ ĩñerõcã cʉ̃ye quetire wedeanarẽ. Ãnijãrẽ cʉ̃ye quetire bueana beseyoriara#3:14 cʉ̃ye quetire bueana beseyoriara: Anorẽ apóstoles ĩrugaro ya. wãme turigʉ niwĩ.
15Ĩñerõcã cʉ̃ye dotimasĩrẽrẽ cʉ̃jãrẽ nʉniyugʉ wãtĩãrẽ cõãwiocomasĩãro ĩgʉ̃.
16Docejoro cʉ̃cã ñeyoriara ãnijã niyura:
Simón cʉ̃rã “Pedro” wãme tuyorigʉ;
17Santiago ĩñerõcã
cʉ̃ baji Juan niyura. Cʉ̃jã Zebedeo pũna niyura. (Cʉ̃jãrã “Boanerges” wãme tuyugʉ queorojoropʉare “bʉpo pũna” ĩgʉ̃);
18ãpẽrã: Andrés,
Felipe,
Bartolomé,
Mateo,
Tomás,
Santiago Alfeo macʉ̃; ĩñerõcã
Tadeo,
Simón celote wãmecʉtiribumacʉ̃ Roma macãrã nirũpãrãrẽ cõãrugariarayabumacʉ̃,
19ãpĩ Judas Iscariote siropʉre Jesúre ĩñatutirapʉre wiyoacʉ niyura.
Jesúre “wãtĩcã tutuaremena wãtĩãrẽ cõãwiocowi” ĩ wedesãrigue
(Mt 12:22-32; Lc 11:14-23; 12:10)
20Siro tiburopʉ niãrigʉ buatigʉ Jesús cʉ̃ bueramena ĩcãwipʉ sãwayugʉ. Tamʉ cotoarora topʉcãrẽ pajʉ basoca tiwipʉre neãpojeayura cʉ̃basurupecã ĩñerõcã cʉ̃ bueracã dairo ti yamasĩña manirõpʉ. 21Tairo warere tʉora Jesúya wedera “cʉ̃ niñayogʉ tigawi” ĩrã cʉ̃rẽ nerã wayura.
22Moisécã ojariguere bueribasoca Jerusalénpʉmena watiariara abiro ĩyura: —Beelzebú wãtĩã nirũpʉ̃ ãnirẽ wãtĩãrẽ cõãwiocomasĩrẽ tutuarere nʉniãyi ―ĩyura.#Mt 9:34; 10:25.
23Cʉ̃jãcã tora abiro ĩñerõcã tʉogʉ Jesús cʉ̃jãrẽ sioco queoremena abiro ĩyugʉ:
—¿Dairo tigʉ wãtĩã nirũpʉ̃ cʉ̃basurupera cõãwiocomasĩbogari? 24Ĩcãdita macãrã ĩcãrõmena nihera cʉ̃jãbasurupe camequẽrã tidita macãrã petiasugawa. 25Tairora ĩcãwi macãrãcã ĩcãrõmena nihera cʉ̃jãbasurupe dicawati camequẽrã cʉ̃jãcã petiasugawa. 26Tiwãmerã wãtĩã nirũpʉ̃cã cʉ̃basurupera wãtĩãmena dicawati camequẽgʉ̃ ĩcãrõrã nimasĩherigawi. Cʉ̃cã dotire petiduiasuga, tiemena yapacʉtiasugawi. 27Ĩcʉ̃ basocʉ ãpĩ tutuagʉya wipʉre sãwa cʉ̃yere emamasĩherigawi marĩcʉ̃ cʉ̃rẽ siatucũsocohericapeicãrã. Cʉ̃ tutuagʉre siatucũãriasiropʉ docare cʉ̃ya wire sãwa cʉ̃cã cʉore nipetirere ñepetigʉ eagawi ―ĩyugʉ Jesús.#3:27 Yʉ wãtĩsotoare tutuacametʉanʉcãgʉ̃ ña ĩgʉ̃ tairo ĩyugʉ Jesús. 28Diamacãrã yʉ mʉjãrẽ wedegʉda. Manigʉ̃ nonirẽ basocacã ñañarẽ tirere, ñañarẽ ĩrẽrẽ acõbogʉagawi. 29Buri Espíritu Santopere boheranorẽ icãta acõboherigawi; tairo wapa cʉorucũrãrã nirucũmocãrõãgawa ―ĩyugʉ Jesús.
30Jesús cʉ̃jãrẽ anorã abiro ĩyugʉ cʉ̃jãcã cʉ̃rẽ cʉ̃ wãtĩã nirũpʉ̃ye tutuaremena wãtĩãrẽ cõãwiocowi ĩrẽye wapamena.
Jesús paco ĩñerõcã cʉ̃ baira ĩñarã earigue
(Mt 12:46-50; Lc 8:19-21)
31Cʉ̃cã tairo ĩriwatoa Jesús paco ĩñerõcã cʉ̃ baira eayura. Cʉ̃jã sopepʉtopʉ eanʉcãjea Jesúre pisudoticoyura. 32Basoca cʉ̃ cʉtiro duira Jesúre abiro ĩyura:
—Mʉ paco, mʉ baira ĩñerõcã mʉ baira nomiã sopepʉ mʉrẽ amarã yawa ―ĩyura.
33Cʉ̃ cʉ̃jãrẽ boca yʉyugʉ:
—¿Noãno nibogari yʉ paco ĩñerõcã yʉ bairajoro?
34Tomenarã cʉ̃ cʉtiro duirapere ĩñaco abiro ĩñemocoyugʉ:
—Ãnijãpe ñawã yʉ paco ĩñerõcã yʉ baira nirã. 35Merẽ nobogʉra yʉpacʉ ʉmʉãwesepʉ nigʉ̃cã boriwãmepe tigʉnorã yʉ baji, yʉ bajio ĩñerõcã yʉ pacora abiro nigʉ̃ ñawĩ ―ĩyugʉ Jesús.
Currently Selected:
Marcos 3: yui
Highlight
Share
ਕਾਪੀ।
Want to have your highlights saved across all your devices? Sign up or sign in
© 2026, SIL Global. All rights reserved.