Mateo 8
8
Jesúcã cami boagʉre cametʉorigue
(Mc 1:40-45; Lc 5:12-16)
1Jesúcã burogʉpʉ niãrigʉ duijeañerõcã pajʉ basoca cʉ̃rẽ quetatuyura. 2Topʉ ĩcʉ̃ cami boagʉ cʉ̃ cʉtiro wati ãsʉ̃rʉ̃poperimena eacumuã abiro ĩyugʉ:
—Nirũpʉ̃ mʉ yʉcã diarecʉtirere ñujeañerõcã tirugagʉ ñujeañerõcã tiya ―ĩyugʉ.
3Cʉ̃cã tairo ĩñerõcã tʉogʉ Jesús cʉ̃ya wãmorẽ suco cʉ̃rẽ ñapeogʉra:
—Mʉrẽ cametʉorugaga. ¡Merẽ camimanigʉ̃ pʉtʉaya! ―ĩyugʉ.
Cʉ̃cã tairo ĩrẽmenarã mata cʉ̃ya cami yatipetia ñugʉ̃ pʉtʉayugʉ. 4Tairo tituwa Jesús cʉ̃rẽ ĩyugʉ:
—¡Mʉrẽ biariguere icãta ãpẽrãrẽ wedegʉmetiwa! Tairo tirono tigʉ pai cʉtiropʉ wa mʉya cami yatiariguere cʉ̃rẽ eñogʉ̃ waya cʉ̃cã mʉrẽ ‘camimanigʉ̃ ñugʉ̃ ñawĩ’ ĩãtora abiro. Siro Moisécã nʉnidotiriguere nʉniña. Mʉcã tairo tiñerõcã ĩñarã nipetira basoca ‘camimanigʉ̃ ñugʉ̃ ñawĩ’ ĩrõãgawa ―ĩyugʉ̃ Jesús.
Jesúcã Roma macãrã surara nirũpʉ̃rẽ padedecotegʉre ñujeañerõcã tirigue
(Lc 7:1-10)
5Jesúcã Capernaúmpʉ eañerõcã ĩcʉ̃ Roma macãrã surara nirũpʉ̃ cʉ̃ cʉtiro wati cʉ̃rẽ titamurẽ sãĩyugʉ.
6Abiro ĩyugʉ:
—Nirũpʉ̃ yʉre padedecotegʉ bʉtoro diagʉ yawipʉ cõãwĩ. Icãta ñomemasĩheriawi. Bʉtorojoro pũniyoawi ―ĩyugʉ.
7Cʉ̃cã tairo ĩñerõcã tʉogʉ Jesús abiro yʉyugʉ:
—Cʉ̃rẽ cametʉogʉ wagʉda ―ĩyugʉ.
8Surara nirũpʉ̃pe cʉ̃rẽ ĩyugʉ:
—Nirũpʉ̃ yʉ buri nigʉ̃ ña. Tairo tigʉ yʉ mʉrẽ ‘yawipʉ sãtiya’ ĩmasĩheriga. Buri anopʉmenarã mʉcã dotimasĩrẽmena yʉre padedecotegʉre ‘ñujearo’ ĩcoñerõcã yʉre padedecotegʉ ñujeasugʉagawi. 9Yʉ ãpẽrã dotiro docapʉ ña. Yʉcã ãpẽrã surarare doti. Yʉcã ĩcʉ̃rẽ ‘waya’ ĩñerõcã cʉ̃ wawi. Ãpĩrẽ ‘watiya’ ĩñerõcã watiwi. Yʉre padedecotegʉre ‘abiro tiya’ ĩñerõcã tiere yawí ―ĩyugʉ.
10Jesús cʉ̃cã ĩrẽrẽ tʉogʉ tʉomaniã cʉ̃rẽ quetaturare abiro ĩyugʉ: “Ãni Roma macãrã surara nirũpʉ̃, Israelyabumacʉ̃ nihericapeicã yʉre ñurõ wedewõwĩ. Diamacãrã mʉjãrẽ ĩgʉ̃da: Icãta ĩcʉ̃no Israelyabumacãrã watoapʉre ãnirã abiro bʉtoro wedewõrẽ cʉogʉre bʉajeaĩñaheriga. 11Mʉjãrẽ wede. Pajʉ basoca judío basoca nihera muĩpʉ̃ mʉãtirisopemacãrã, muĩpʉ̃ sãwarisopemacãrãpʉ ãni Roma macãrã surara nirũpʉ̃rã abiro ʉmʉãwesepʉ Manigʉ̃cã cʉ̃yarare dotiropʉre earagawa marĩ ñecʉ̃sʉmʉã Abrahamena, Isaamena, Jacomena yaduiradara. 12Buri mʉjã judío basoca cʉ̃yamacã macãrã niboariarapere cʉ̃rẽ wedewõhere wapa Manigʉ̃ mʉjãrẽ yoaro naĩtĩãrõpʉ cõãgʉagawi. Topʉ pũniyora opire bacadiotu bʉtoro otiroacu” ĩyugʉ.
13Tiere ĩtuwa Jesús Roma macãrã surara nirũpʉ̃rẽ ĩyugʉ:
—Mʉyawipʉ pʉtʉaya. Mʉrẽ padedecotegʉ mʉcã wedewõariarora abiro ñujeagʉagawi ―ĩyugʉ Jesús.
Cʉ̃cã tairo ĩrẽmenarã cʉ̃rẽ padedecotegʉ cametʉoyoarigʉpʉ pʉtʉayugʉ.
Jesúcã Pedro mañecõrẽ ñujeañerõcã tirigue
(Mc 1:29-31; Lc 4:38-39)
14Siro Jesús Pedroya wipʉ sãjeagʉ Pedro mañecõrẽ bʉtoro wioyogore cõãrõpʉ cõãgõrẽ ĩñayugʉ. 15Tairo tigʉ Jesús coya wãmorẽ ñeĩñayugʉ. Cʉ̃cã tairo tiremena mata wiore core tatiasuyuro. Tora co wʉmʉnʉcã cʉ̃rẽ yare ecayugo.
Jesúcã pajʉ diarare ñujeañerõcã tirigue
(Mc 1:32-34; Lc 4:40-41)
16Naĩcũmurĩ watoa pajʉ basocare wãtĩã sãyoriarare Jesús cʉtiropʉ nejeayura. Ĩcã ʉseromenarã wãtĩã cʉ̃jãpʉre sãriarare cõãwiocoyugʉ. Ĩñerõcã nipetira diarare ñujeañerõcã tiyugʉ. 17Jesús anorã abiro tiyugʉ sʉgueropʉmacʉ̃ Isaías Manigʉ̃ye queti wedesʉgueribasocʉcã ojariarora abiro queoro wañerõcã tigʉ. Abiro ĩ ojarigʉ niwĩ: «Marĩcã tutuaherere, marĩye diarere cʉ̃ ñujeañerõcã tibosagʉagawi».#Is 53:4.
Jesúre quetaturugariaraye maquẽ
(Lc 9:57-62)
18Pajʉ basoca cʉ̃ cʉtiropʉ neãponʉcãñerõcã ĩñagʉ̃ Jesús cʉ̃ buerare: “Jamʉ; atitara ainʉãpʉ tĩãwaco” ĩyugʉ.
19Cʉ̃cã tairo ĩñerõcã ĩcʉ̃ Moisécã ojariguere bueribasocʉ cʉ̃ cʉtiro wati abiro ĩyugʉ:
—Nirũpʉ̃, mʉcã no waro yʉ mʉrẽ quetaturibasocʉ nigʉ̃da.
20Jesúpe cʉ̃rẽ yʉyugʉ:
—Macãrʉ̃cʉ̃ macãrã diayiwa canirĩtotiri cʉogawa. Miniãcã cʉ̃jãcã canirĩsutiri cʉowa. Yʉ Nipetira Sõwʉ̃pe#8:20 “Nipetira sõwʉ̃” ĩrõ arameoye ʉseromena ĩrõ ya. Pecamasãye ʉseromenapere Hijo del Hombre (ʉmʉ macʉ̃) ĩrõ ya. Basocacã cʉ̃jãbasurupe “yʉ” ĩrugahera wederucũriwãme niyuro. Jesúcã tiwãmerã wãmeborigʉ niwĩ, cʉ̃basurupe “yʉ basocare cametʉoacʉ o Manigʉ̃cã beseyorigʉ ña” ĩgʉ̃. Cʉ̃cã tore wãmeborigue Manigʉ̃ye quetire wedesʉgueribasocʉ Danielcã 7:13-14 pʉmena “abiro waroacu” ĩ ojariguepʉmena wati, basocare cametʉoacʉye maquẽrẽ wedero ya. Bueya Nipetira Sõwʉ̃ maquẽrẽ Glosariopʉ. yʉcã nirĩwi cʉoheri ―ĩyugʉ.
21Ãpĩ Jesús buera watoa macʉ̃ ĩyugʉ:
—Nirũpʉ̃, yʉpacʉ cʉtiropʉ yʉre ticoya marĩcʉ̃. Cʉ̃cã cõwõñerõcã cʉ̃rẽ yatuwagʉpʉ mʉrẽ quetaturibasocʉ nigʉ̃da ―ĩyugʉ.
22Buri Jesúpe cʉ̃rẽ abiro ĩyugʉ:
—Mʉpe marĩcʉorora yʉmena watiya yʉre quetaturibasocʉ nirugagʉ. Manigʉ̃cã dotirere yʉhera cõwõãriarara abiro nirã ñawã. Tairo tira cʉ̃jã cõwõãriarara abiro nirãrã cʉ̃jãyara cõwõãriarare yaro ―ĩyugʉ Jesús.
Jesúcã wĩnorẽ, ocoturire disudotirigue
(Mc 4:35-41; Lc 8:22-25)
23Siro Jesús doriacũmuãpʉ muãsã cʉ̃ bueramena Galilea tarare tĩãwayugʉ. 24Wãcũña maniriwatoa titarare tĩãwariwatoa wĩño tutuaro papucoro ocoturire doriacũmuãpʉ papusãicãyuro. Tairo wariwatoare Jesúpe canigʉ̃ tiyugʉ. 25Tairo tira cʉ̃ buera cʉ̃ cʉtiropʉ wa cʉ̃rẽ wãcõrãrã ĩyura:
—Ʉ̃sã Nirũpʉ̃ ¡ʉ̃sãrẽ cametʉoya! Marĩ miniduiarapʉ ya.
26Jesús cʉ̃jãrẽ yʉyugʉ: —¿Dairo tira mʉjã tocãrõ cuiri? Mʉjã yʉre pẽrõgã wedewõrẽ cʉora ña.
Abiro ĩtuwagʉra wʉmʉnʉcã wĩnorẽ, ocoturire nʉcʉ̃ãdotiyugʉ. Tocãrõrã tie nʉcʉ̃ãduiapetiasuyuro. 27Tiere ĩñamaniãnirã cʉ̃jãbasurupe came sãĩñayura:
“¿Daigʉno basocʉ ñari ãni tocãrõ tutuare cʉogʉ? Cʉ̃rẽ wĩnopʉra, ocoturipʉra ñurõ yʉ.”
Jesúcã Gadara macãrã pʉ̃ãrãrẽ cʉ̃jãpʉre wãtĩã sãriarare cõãwiocorigue
(Mc 5:1-20; Lc 8:26-39)
28Jesúcã Galileatarare tĩãwa apenʉãpʉ Gadara ditapʉ tĩãjeañerõcã ʉmʉã pʉ̃ãrã cʉ̃jãpʉre wãtĩã sãriara dotiyoracã masãcoperi watoapʉ niãriara cʉ̃ cʉtiro watiyura. Cʉ̃jã bʉtoro tutuara cuwiora niyura. Tairo tira basoca to masãcoperi cʉtiro tʉariamapʉre icãta waheriyura. 29Jesúre ĩñarã caribiyura: —¿Mʉ Manigʉ̃ Macʉ̃, ʉ̃sã cʉtiropʉre dairo tigʉ watigʉ yari? ¿Ʉ̃sãrẽ ñañarõ tiatibʉreco queoriabʉrecosʉguero ñañarõ cametʉañerõcã tigʉ watigʉ yari? ―ĩyura.
30Cʉ̃jã cʉtiro pẽrõ yoasãñurõrã pajʉ yesea yara tiyura. 31Tairo tira wãtĩã basocapʉre nirã Jesúre bʉtoro abiro ĩ sãĩyura:
—Mʉ ʉ̃sãrẽ ãnijãpʉ nirãrẽ cõãwiocogʉdagʉ ãĩgʉ̃jã yeseapʉre ʉ̃sãrẽ sãwadotiya ―ĩyura.
32—Cʉ̃jãrẽna sãrã waya ―ĩyugʉ Jesús.
Cʉ̃cã tairo ĩrẽmenarã wãtĩã basocapʉre niãriara witiwa yeseapʉre sãrã wayura. Tocawatoamenarã ãnijã nipetira yesea cʉ̃jãpʉre wãtĩã sãñerõcã niãria bopira upatʉropʉ cʉtʉmawisibuawa ñañuã topʉ minipetiasuyura.
33Tairo wañerõcã ĩñarã yeseare ĩñanʉõrĩbasoca bʉtoro ʉcʉaremena cʉ̃jãcã nirĩmacãpʉ cʉtʉpʉtʉa nipetire cʉ̃jãcã ĩñariguere ĩñerõcã wãtĩã sãyoriarare wariguere wedeyura. 34Tiere tʉora timacã macãrã nipetirapʉra Jesús cʉtiropʉ eayura. Cʉ̃rẽ ĩñarãrã cʉ̃jãya ditare witiwʉmʉãdotiyura.
Currently Selected:
Mateo 8: yui
Highlight
Share
ਕਾਪੀ।
Want to have your highlights saved across all your devices? Sign up or sign in
© 2026, SIL Global. All rights reserved.