Mateo 25
25
Jesúcã pʉaõpʉcʉñʉrã mamarã nomiã queoremena wederigue
1Siro tamʉ Jesús ʉ̃sãrẽ upatuti queoremena abiro ĩ buewi:
—Yʉcã atiditapʉre upatuti watiate Manigʉ̃cã cʉ̃yarare dotire ĩcãbʉreco wãmo siaribʉrecore wariarora abiro waroacu. Merẽ ñami niñerõcã pʉaõpʉcʉñʉrã mamarã nomiã cʉ̃jãcãrõ cʉ̃jãye sĩãworipagare ne, manʉ niãcʉre bocara wayura. 2Cʉ̃jã watoare nomiã ĩcãõpʉcʉñʉrã tʉomasĩhera niyura. Ãpẽrã nomiã ĩcãõpʉcʉñʉrãpe ñurõ tʉomasĩrã niyura. 3Tʉomasĩhera nomiãpe cʉ̃jãye sĩãworipagare newacaperacãrã ʉse petiñerõcã cʉ̃jãcã wasoatere pairo newaheriyura. 4Buri tʉomasĩrã nomiãpe cʉ̃jãye sĩãworipagamenarã petiñerõcã wasoatere apeye ʉsepaga newanemoyura. 5Manʉ niãcʉ mata eaheriñerõcã cʉ̃jã nipetira nomiãrẽ wʉgoa eayuro. Tairo tira caniãsuyura. 6Ñamidecomena ĩcʉ̃rẽ abiro ĩ caribiñerõcã tʉoyura: ‘Manʉ niãcʉ watisiawi. Nipetira cʉ̃rẽ bocara watiya’ ĩyugʉ. 7Tairo ĩ caribiñerõcã tʉora cʉ̃jã nipetira nomiãpʉra wãcãjea cʉ̃jãye sĩãworipaga maquẽ ʉ̃rẽrẽ quenoyura ñurõ bowero ʉ̃woaro ĩrã. 8Tʉomasĩhera nomiãpe ñurõ tʉomasĩrã nomiãrẽ ‘Ʉ̃sãcãrẽ mʉjãye ʉsere pẽrõ nʉnimocãña. Ʉ̃sãya sĩãworipaga yatiropʉ ya’ ĩyura. 9Tʉomasĩrã nomiãpe cʉ̃jãrẽ yʉyura: ‘Ʉ̃sãya ʉsere mʉjãrẽ nʉniheriga. Ʉ̃sãcã mʉjãrẽ nʉniñerõcã ʉ̃sãpere eaheriboga. Tairo tira mʉjãbasurupe ʉse duaritatiripʉ tiere wapatira waya’ ĩyura. 10Tʉomasĩhera nomiãcã ʉse wapatira waronorã manʉ niãcʉpe easiayugʉ. Tairo tira tʉomasĩrã nomiãpe ñurõ quenoyueariarapʉ ninirã cʉ̃rẽ ñurõ boca, cʉ̃menarã wãmo siaribosebʉrecopʉ sãsuyura. Cʉ̃jãcã sãwapetiremena wi sopepʉto biaro pʉtʉyuro. 11Tʉomasĩhera nomiãpe siropʉ eanirã: ‘Ʉ̃sã Nirũpʉ̃, ʉ̃sãcãrẽ tupãsoneña’ ĩ sãĩmiyura. 12Manʉ niãcʉpe cʉ̃jãrẽ abiro ĩ yʉyugʉ: ‘Yʉ mʉjãrẽ icãta ĩñamasĩheri; noãno nirã niga mʉjã’ ĩyugʉ ―ĩ wedewi Jesús.
13Tairo ĩ wedetuwacogʉra ʉ̃sãrẽ abiro ĩwĩ:
—Atie queorera abiro yʉcã upatuti watiatere ĩñerõcã tihoracãrẽ mʉjã icãta masĩheri. Tairo tira mʉjã yʉ buera tʉomasĩrã nomiãcã ñurõ quenoyueriarora abiro mʉjãcã ñurõ tʉomasĩ, quenoyueariarapʉ niña ―ĩwĩ.
Jesúcã ĩcʉ̃ nirũpʉ̃ cʉ̃rẽ padedecoterare niyerutiri nʉnirĩguemena queore buerigue
(Lc 19:11-27)
14Jesús tamʉ ʉ̃sãrẽ apeye queoremena abiro ĩ wedenemowĩ:
—Yʉcã atiditapʉre upatuti watiribʉrecore ʉmʉãwesepʉ Manigʉ̃cã cʉ̃yarare dotire ĩcʉ̃ basocʉ aperopʉ wagʉdagʉ cʉ̃rẽ padedecoterare sioco cʉ̃ye niyerure cotedotigʉ cũwʉmʉãriarora abiro waroacu. 15Cʉ̃jãrẽ ‘Anocãrõmena tocãrõ wapatanemorãgawa’ ĩ ĩñamasĩnigʉ̃ cʉ̃ya niyeru wapacʉtiritirire dicawocũwʉmʉãyugʉ. Tairo tigʉ ĩcʉ̃rẽ ĩcãõpʉcʉñetiri nʉniyugʉ. Ãpĩrẽ pʉati, ãpĩrẽ ĩcãti nʉniyugʉ. Cʉ̃jãrẽ nʉnituwa warisuayugʉ. 16Cʉ̃cã warosiro ĩcãõpʉcʉñe niyerutiri nʉniyoarigʉ mata titirimena apeyeno wapati, tiere dua, apeye ĩcãõpʉcʉñetiri wapatanemoyugʉ. 17Pʉati niyerutiri nʉniyoarigʉcã tiwãmerã apeye pʉatiri wapatanemoyugʉ. 18Ĩcãti niyeruti nʉniyoarigʉpe cope coa, ticopepʉ cʉ̃ nirũpʉ̃cã nʉniãriatire yacũmocãyugʉ.
19”Yoariasiropʉ cʉ̃jã nirũpʉ̃ coejeayugʉ. Coejeagʉ cʉ̃rẽ padedecoterare siocoyugʉ cʉ̃ya niyerutirimena cʉ̃jãcã wapatanemoãriguere quenogʉ̃dagʉ. 20Ĩcãõpʉcʉñe niyerutiri ñeãrigʉ easoco, cʉ̃cã wapatanemoãriatirire ĩñerõcã cʉ̃cã ñesocoariatirire neãti cʉ̃ nirũpʉ̃rẽ abiro ĩyugʉ: ‘Yʉ nirũpʉ̃, mʉ yʉre ĩcãõpʉcʉñe niyerutirira nʉniwʉ̃. ¡Ĩñaña! Buri yʉpe tiemena atie apeye ĩcãõpʉcʉñetiri wapatanemoãwʉ̃’ ĩyugʉ. 21Cʉ̃cã tairo ĩñerõcã tʉogʉ cʉ̃ nirũpʉ̃pe ĩyugʉ: ‘Ñujo. Mʉ ya padedecotegʉ ñugʉ̃ queoro tigʉ ña. Yʉcã mʉrẽ dotiriarora abiro pẽrõgã yʉcã mʉrẽ cũriguemenamañurẽ mʉ ñurõ tiayu. Mʉcã tora abiro ñurõ tiarigue wapa mʉrẽ yaye pajere cotedotigʉ cũgʉ̃da. Tairo tigʉ yʉmena ʉseagʉ watiya’ ĩyugʉ. 22Siro ãpĩ padedecotegʉ pʉati niyerutiri ñeãrigʉ ea, cʉ̃cã wapatanemoãriatirire ĩñerõcã cʉ̃cã ñesocoariatirire neãti, cʉ̃ nirũpʉ̃rẽ abiro ĩyugʉ: ‘Yʉ nirũpʉ̃ mʉ yʉre pʉati niyerutirira nʉniwʉ̃. ¡Ĩñaña! Buri yʉpe tiemena atie apeye pʉatiri wapatanemoãwʉ̃’ ĩyugʉ. 23Cʉ̃ nirũpʉ̃pe cʉ̃rẽ ĩyugʉ: ‘Ñujo. Mʉ ya padedecotegʉ ñugʉ̃ queoro tigʉ ña. Yʉcã mʉrẽ dotiriarora abiro pẽrõgã yʉcã mʉrẽ cũriguemenamañurẽ mʉ ñurõ tiayu. Mʉcã tora abiro ñurõ tiarigue wapa mʉrẽ yaye pajere cotedotigʉ cũgʉ̃da. Tairo tigʉ yʉmena ʉseagʉ watiya’ ĩyugʉ. 24Cʉ̃jãsiropʉ padedecotegʉ ĩcãtira niyeruti ñeãrigʉpe ea, cʉ̃ nirũpʉ̃rẽ abiro ĩyugʉ: ‘Yʉ nirũpʉ̃, mʉcã nʉnirõsotoape wapatadotigʉ, mʉ tutuaromena padededotiribasocʉ ña. Mʉbasurupe padedehericapeicã, oterere otedoti, tie dicare sedoti tinigʉ̃, mʉ tiere cʉo. 25Tairo tigʉ mʉrẽ cuigʉ mʉya niyerutire yepapʉ cope coa yacũnʉcõwʉ̃. Buri ¡ĩñaña! Atiti ña mʉya niyeruti’ ĩyugʉ. 26Cʉ̃cã tairo ĩñerõcã tʉogʉ cʉ̃ nirũpʉ̃pe cʉ̃rẽ abiro ĩ yʉyugʉ: ‘Mʉ ya padedecotegʉ ñañagʉ̃, cajiarepigʉ ña. Topʉare mʉ yʉre yʉcã nʉnirẽsotoape wapatadotigʉ tutuaromena padededotiribasocʉ nirẽrẽ masĩcapeicã 27¿dairo tigʉ ya niyerure niyeru quenoriwipʉ quenocũgʉ̃ waheriari? Mʉ topʉ quenocũãrigʉpʉa yʉcã coepʉtʉajeañerõcã tiecã wapatanemoãriguemena yʉre wiyoboatiyu’ ĩyugʉ. 28Tairo ĩtuwa ãpẽrã topʉ nirãrẽ abiro ĩyugʉ: ‘Ãni padedecotegʉre cʉ̃ya niyerutire ema ãpĩ padedecotegʉ pʉaõpʉcʉñetiri cʉogʉpere nʉniña. 29Ĩcʉ̃ cʉ̃cã cʉoariguemena ñurõ tʉomasĩrĩwãmemena apeye wapatanemo paje cʉogʉre cʉ̃rẽ sotoa nʉniyoroacu. Tairo tigʉ cʉ̃cã cʉoariguesotoape paje cʉonemogʉagawi. Buri ãpĩ cʉ̃cã cʉoariguemena ñurõ tʉomasĩheriwãmemenape apeye wapatanemorõ manirõ icãta cʉohegʉre cʉ̃cã pẽrẽgã cʉomoãriguegãpʉrena emapetiyoroacu. 30“Ãni padedecotegʉ queoro tihegʉre naĩtĩãrõpʉ cõãwiocoya. Topʉ bʉtoro pũniyogʉ cʉ̃ya opire bacadiotu otigʉagawi” ĩyugʉ cʉ̃jã nirũpʉ̃’ ―ĩ wedewi Jesús.
Nipetiridita macãrãrẽ Jesúcã ĩñabeseate
31Tairo ĩtuwaco Jesús ʉ̃sãrẽ wedenemowĩ:
—Yʉ Nipetira Sõwʉ̃, atiditapʉre upatuti watigʉ ĩcʉ̃ nirũpʉ̃ tutuacametʉanʉcãgʉ̃rã abiro yʉre wedecoteribasocamena watigʉacu. Tairo watigʉ ya dotiduiripĩrõpʉ asibateremena nirũpʉ̃rã abiro eanuãgʉacu. 32Topʉ, yʉre wedecoteribasoca atidita macãrã basocaburicãrõrẽ yʉ diamacãpe neneãporagawa. Tairo tigʉ yʉ topʉ basoca ñurãrẽ merĩã, ñañarãrẽ merĩã dicawogʉacu ĩcʉ̃ ecarare cotegʉ ovejare merĩã, cabracãrẽ merĩã dicaworora abiro. 33Basoca ñurãrẽ ovejara abiro nirãrẽ diamacãpanepe, basoca ñañarãrẽ cabrara abiro nirãpere acũnʉãpanepe dicawonʉcõgʉacu. 34Siro diamacãpanepe nucũrãrẽ yʉ Nipetira Nirũpʉ̃ abiro ĩgʉacu: ‘Mʉjã yʉpacʉcã ñurõ wañerõcã tiyora ñurõ watiya. Mʉjã cʉ̃yarare cʉ̃cã dotiropʉ matapʉra cʉ̃cã atiditare tiatosʉgueropʉra mʉjãrẽ quenoyuebosariaropʉ nirã watiya. 35Mʉjã yʉcã ʉaboañerõcã yʉre yarigue ecawʉ. Yʉcã ñemesipioyoñerõcã mʉjã yʉre oco tĩãwʉ̃. Yʉcã mʉjã cʉtiro eañerõcã yʉre ĩñamasĩhericaperacãrã canirõ cũwʉ̃. 36Yʉcã suti cʉoheriñerõcã mʉjã yʉre suti nʉniwʉ̃. Yʉcã diagʉ niñerõcã mʉjã yʉre ĩñawõnowʉ̃. Yʉcã peresupʉ niñerõcã mʉjã yʉre ĩñarã earucũwʉ̃’ ĩgʉacu.
37”Yʉcã tairo ĩñerõcã tʉora basoca ñurãpe yʉre abiro ĩ sãĩñarõãgawa: ‘¿Ʉ̃sã Nirũpʉ̃ nocawatoano niñerõcã mʉcã ʉaboañerõcã ʉ̃sã mʉrẽ yarigue ecari? ¿Ĩñerõcã nocawatoano niñerõcã mʉcã ñemesipioyoñerõcã ʉ̃sã mʉrẽ oco tĩãrĩ? 38¿Nocawatoano niñerõcã ʉ̃sã cʉtiropʉ mʉcã eañerõcã mʉrẽ ĩñamasĩhericaperacãrã ʉ̃sã mʉrẽ canirõ cũrĩ? ¿Tairora nocawatoano niñerõcã mʉcã suti cʉoheriñerõcã ʉ̃sã mʉrẽ suti nʉnirĩ? 39¿Nocawatoano niñerõcã mʉcã diañerõcã o mʉcã peresupʉ niñerõcã ʉ̃sã mʉrẽ ĩñarã eari?’
40”Cʉ̃jãcã tairo ĩ sãĩñañerõcã yʉ Nipetira Nirũpʉ̃pe abiro ĩ yʉgʉacu: ‘Yʉ mʉjãrẽ atiere diamacãrã wede. Mʉjã yara nipetirare no mʉjã watoapʉ nipetirasotoa buri nirãrẽ no nirẽmena ñurõ tiriara, yʉrena ñurõ tira tiwʉ’ ĩgʉacu cʉ̃jãrẽ.
41”Cʉ̃jãrẽ tairo ĩtuwa acũnʉãpanepe nucũrãrẽ abiro ĩgʉacu: ‘Mʉjã ñañarã Manigʉ̃cã ñañarõ tiyoana, ano yʉ cʉtirore waya. Pecame icãta yatiherimepʉ waya, Manigʉ̃cã wãtĩã nirũpʉ̃rẽ, cʉ̃rẽ quetatura wãtĩãrẽ quenoyuebosariamepʉ. 42Yʉcã ʉaboañerõcã yʉre mʉjã yarigue ecaheriwʉ. Yʉcã ñemesipioyoñerõcã yʉre mʉjã icãta oco tĩãheriwʉ. 43Yʉcã ya macãrẽ witi, mʉjã cʉtiropʉ camesãgʉ̃ eañerõcã mʉjã yʉre ĩñamasĩherinirã, canirõ cũheriwʉ. Yʉcã suti sãñarẽ cʉoheriñerõcã ĩñarã, mʉjã yʉre suti nʉniheriwʉ. Yʉcã diagʉ niñerõcã peresupʉ niñerõcãcãrẽ, yʉre mʉjã ĩñarã eaheriwʉ’.
44”Yʉcã tora abiro ĩñerõcã tʉora ñañarãpe yʉre sãĩñarãgawa: ‘¿Ʉ̃sã Nirũpʉ̃ nocawatoano niñerõcã mʉcã ʉaboañerõcã mʉcã ñemesipioyoñerõcã ʉ̃sã cʉtiropʉ camesãgʉ̃ eañerõcã mʉcã suti cʉoheriñerõcã mʉcã diagʉ niñerõcã peresupʉ niñerõcãcãrẽ ʉ̃sã mʉrẽ titamuheriri?’ ĩrãgawa.
45”Cʉ̃jãcã tairo ĩ sãĩñañerõcã yʉpe cʉ̃jãrẽ abiro ĩ yʉgʉacu: ‘Yʉ mʉjãrẽ diamacãrã wede. Mʉjã yara nipetirare no mʉjã watoapʉ nipetirasotoa buri nirãrẽ no nirẽmena ñurõ titamuheririara yʉrena ñurõ tihera tiwʉ’ ĩgʉacu cʉ̃jãrẽ ―ĩwĩ.
46Jesús abiro ĩ wedetʉocowi:
—Atiwãme basoca ñañarã, Manigʉ̃cã dotirere cametʉanʉcãriara, ñañarõ posarucũrõpʉ Manigʉ̃rẽ cõãyoroagawa. Basoca ñurãpe Manigʉ̃cã dotirere queoro yʉriara, catire petiherere cʉo, yʉmena tairo nirucũmocãrõãgawa ―ĩwĩ Jesús.
Currently Selected:
Mateo 25: yui
Highlight
Share
ਕਾਪੀ।
Want to have your highlights saved across all your devices? Sign up or sign in
© 2026, SIL Global. All rights reserved.