Mateo 23
23
Fariseo basoca tirecʉtirere, Moisécã ojariguere bueribasoca tirecʉtirere Jesúcã “tʉomasĩña” ĩ wederigue
(Mc 12:38-40; Lc 11:37-54; 20:45-47)
1Atiesiro Jesús basocare, ʉ̃sã cʉ̃ bueracãrẽ abiro ĩwĩ:
2—Moisécã ojariguere bueribasoca ĩñerõcã fariseo basoca ñawã Manigʉ̃cã Moisére dotire cũriguere: ‘Abiro ĩrugaro ya’ ĩ wede, buera. 3Tairo tira cʉ̃jãrẽ ñurõ yʉya. Nipetirere cʉ̃jãcã ĩriwãme tiquetatuya. Buri cʉ̃jãrẽ ĩñacũ, cʉ̃jãcã tirecʉtirora abirope tiherimocãña. Cʉ̃jãbasurupe cʉ̃jãcã ãpẽrãrẽ wede, buerora abiro tiheriwa. 4Cʉ̃jã ãpẽrãrẽ ‘abiro tiya’ ĩ dotira cʉ̃jãrẽ apeyeno bʉtoro nʉcʉ̃cametʉarere apadotirara abiro yawa. Tairo tira cʉ̃jã tie dotirere ãpõtĩõheriwa. Tora abire tidoticaperacãrã cʉ̃jãbasurupe cʉ̃jãcã dotirerena icãta pẽrõgãno tiere titamuheriwa cʉ̃jãcã dotirere tiaro ĩrã. 5Nipetirere basoca ĩñacoropʉ wadorena ñurẽrẽ tiẽñorĩtowa cʉ̃jãrẽ ‘ñurõ yawa’ ĩñerõcã bora. Tairo tira Manigʉ̃ye wederucũrẽ ojariapũpʉ nirẽrẽ ĩcãpũpʉ ojane, sãnirã, cʉoricũmuãrĩrẽ ãpẽrãyesotoape pacacũmuãrĩsãñurõ tinemo, cʉ̃jãya capetʉripʉ, dicaripʉ tuwa. Ĩñerõcã cʉ̃jãcã ñubueñerõcã cʉ̃jãrẽ ĩñaro ĩrã, ñubuera sãñarĩsutire, ãpẽrãyesotoape yaparipʉ yosarere yoaridari paca tinemo sãñawã, basoca cʉ̃jãrẽ: ‘Manigʉ̃cã dotirere queoro yʉquetatu, cʉ̃rẽ ñurõ wedewõrã ñawã’ ĩñerõcã bora. 6Boseyarepʉcãrẽ nisocore duiripĩrĩpʉ nirũpãrãcã duirenopʉ wado duirugawa. Tairora neãporiwiseripʉcãrẽ nisocore duiripĩrĩpʉ duirugawa. 7Macã decopʉre basocacã pajʉ nirõpʉre, basocare ñurõ cuwiopesaremena ñudotiñerõcã bowa. Ĩñerõcã cʉ̃jãrẽ ñurõpʉ ‘ʉ̃sãrẽ buera’ ĩ pisumemacũmuñerõcã bowa. 8Buri mʉjãpe cʉ̃jãcã tairo ĩcapetacãrã, basocare ‘mʉjã ʉ̃sãrẽ buera ña’ ĩdotiherimocãña. Mʉjãrẽ bueribasocʉ ĩcʉ̃rã ñawĩ. Mʉjã ĩcʉ̃pũnarã abiro nirã ña. 9Ĩñerõcã atiditapʉre icãta ĩcʉ̃ basocʉrena ‘ʉ̃sã pacʉ’ ĩherimocãña. Mʉjã Pacʉ ĩcʉ̃rã ñawĩ ʉmʉãwesepʉ nigʉ̃ Manigʉ̃ wado. 10Mʉjãrẽna ‘ʉ̃sã nirũpʉ̃ ñawĩ’ ĩ pisudotiherimocãña. Yʉ Cristo Manigʉ̃cã beseyorigʉ ĩcʉ̃rã mʉjã Nirũpʉ̃ ña. 11Mʉjãwatoapere nirũpʉ̃rã nirugagʉ ĩcʉ̃ mʉjãrẽ padedecotegʉra abiro nigʉ̃ nigʉagawi. 12No nigʉ̃ cʉ̃basurupe ‘Yʉ ãpẽrãsotoa nigʉ̃ ña’ ĩ wãcũgʉ̃norẽ Manigʉ̃ cʉ̃rẽ buri nigʉ̃ pʉtʉañerõcã tigʉagawi. Ãpĩpere cʉ̃basurupe ‘yʉ ãpẽrãsotoa nigʉ̃ niheri’ ĩ wãcũgʉ̃pere Manigʉ̃ cʉ̃rẽ ãpẽrãsotoa nigʉ̃ niñerõcã tigʉagawi. 13Mʉjã Moisécã ojariguere bueribasoca, fariseo basoca bʉtoro ñañacametʉaro tiyoroacu. Mʉjã basoca ĩñacoropʉ wadore ñurẽrẽ tiritoribasoca ña. Mʉjãcã bueremena basocare Manigʉ̃cã cʉ̃yarare dotiropʉ sãwarugarare acuta wipʉ sãwarugarare tiwi sopepʉtore biarara abiro. Mʉjãbasurupera Manigʉ̃cã cʉ̃yarare dotiropʉre sãwaheri. Tiwãmerã ãpẽrãcãrẽ topʉ sãwarugarare sãwadotiheri.
14”Mʉjã Moisécã ojariguere bueribasoca, fariseo basoca bʉtoro ñañacametʉaro tiyoroacu. Mʉjã basoca ĩñacoropʉ wadorena ñurẽrẽ tiritoribasoca ña. Ĩritoremena wapeariara nomiãrẽ cʉ̃jãcã wapamorẽ wapare wapatidotira, nipetire cʉ̃jãcã cʉorere nʉnidoti, cʉ̃jãyawiseripʉrena ema. Cʉ̃jãrẽ bopacaĩñahericaperacãrã ‘ñurã ñawã’ ĩñerõcã bora Manigʉ̃rẽ ñubuera paje wederucũrẽmena yoariwatoa ñubueñorito. Atieyewapamenarã Manigʉ̃ mʉjã ĩritoremena buerapere ãpẽrã ñañarẽ tiriarasotoapere bʉtoro ñañacametʉaro tigʉagawi.
15”Mʉjã Moisécã ojariguere bueribasoca, fariseo basoca ñañacametʉaro tiyoroacu. Mʉjã basoca ĩñacoropʉ wadorena ñurẽ tiritoribasoca ña. Ditaromenape, dia pairiyamenape, yoarepʉ wawõno, mʉjãye buerere quetatuacʉre amarã. Cʉ̃rẽ mʉjãye buerere wedewõãñerõcã tiremena mʉjãcã pecamepʉ wato sotoapere cʉ̃pere pʉãrĩpʉ pecamepʉ waditiacʉ niñerõcã ya.
16”Mʉjã caperi ĩñabʉahericaperacãrã ãpẽrãrẽ wejesʉguerara abiro Manigʉ̃yere basocare buerugami. Tairo buecaperacãrã mʉjãbasurupera Manigʉ̃rẽ icãta masĩheri. Tairo tira ñañacametʉaro tiyoroacu. Basocare abiro ĩ bue: ‘Ĩcʉ̃ Manigʉ̃wi wãmemena wãmebo “abiro tigʉda” ĩãrigʉ nicapeicã tiere tihegʉ wapa cʉoheriwi. Buri oro Manigʉ̃wi maquẽ wãmemenape wãmebo “abiro tigʉda” ĩãrigʉ nicapeicã tiere tihegʉ wapa cʉogʉ pʉtʉawi. Cʉ̃cã ĩãriarora abirora tigʉagawi’ ĩ. 17Mʉjã caperi ĩñabʉaherara abiro tʉomasĩhera ña. Manigʉ̃wipe orosotoare wapacʉticametʉanʉcã. Tiwi Manigʉ̃wipe doca orore Manigʉ̃cã ĩñacorore wapacʉtire pʉtʉañerõcã ya. 18Mʉjã basocare atiecãrẽ abiro ĩ bue: ‘Ĩcʉ̃ waibʉcʉrare sĩã soemʉõcopeoromena wãmebo “abiro tigʉda” ĩãrigʉ nicapeicã tiere tihegʉ, wapa cʉoheriwi. Buri Manigʉ̃rẽ nʉniyoarigue soemʉõcopeorosotoa pesaremenape wãmebo “abiro tigʉda” ĩãrigʉ nicapeicã tiere tihegʉ, wapa cʉogʉ pʉtʉawi. Cʉ̃cã ĩãriarora abirora tigʉagawi’ ĩ. 19Mʉjã caperi ĩñabʉaherara abiro tʉomasĩherijomocãrã ña. Waibʉcʉrare sĩã soemʉõcopeorope Manigʉ̃rẽ nʉniyoariguesotoapere wapacʉticametʉanʉcã. To soemʉõcopeoro doca Manigʉ̃rẽ nʉniyoariguere Manigʉ̃cã ĩñacorore wapacʉtire pʉtʉañerõcã ya. 20Tairo tigʉ ĩcʉ̃ waibʉcʉrare sĩã, soemʉõcopeoromena wãmebo ‘abiro tigʉda’ ĩgʉ̃, nipetire to soemʉõcopeorosotoa pesaremenacãrẽ wãmebogʉ yawí. 21Tairora ĩcʉ̃ Manigʉ̃wi wãmemena wãmebo ‘abiro tigʉda’ ĩgʉ̃, tiwi wadore wãmebogʉmerã yawí. Manigʉ̃ tiwipʉ nigʉ̃ wãmemenacãrẽ wãmebogʉ yawí. 22Ĩñerõcã ĩcʉ̃ ʉmʉãwese maquẽmena wãmebo ‘abiro tigʉda’ ĩgʉ̃, topʉ Manigʉ̃cã nirũpʉ̃rã abiro dotiduiromenapʉra, tore duigʉmenacãrẽ wãmebogʉ yawí.
23”Mʉjã Moisécã ojariguere bueribasoca, fariseo basoca bʉtoro ñañacametʉaro tiyoroacu. Mʉjã basoca ĩñacoropʉ wadorena ñurẽrẽ tiritoribasoca ña. Mʉjãye otere metãgãrẽ: menta, anís, comino wãmecʉtirere, yariguere sʉtiañuñerõcã tirenore seneõ upaquẽrĩ ya. Manigʉ̃cã dotirora abiro tira pʉaõpʉcʉñequẽrĩ cʉora, ĩcãquẽ Manigʉ̃wipʉ newa ‘yʉcã Manigʉ̃rẽ nʉnirẽ ña’ ĩnirã paire nʉni. Buri tiere tairo ticaperacãrã Manigʉ̃cã Moisére dotire cũrigue wapacʉtijomocãrẽpere: ãpẽrãrẽ queoro tirere, ãpẽrãrẽ bopacaĩñarẽrẽ, Manigʉ̃rẽ queoro wedewõquetaturere tiheri. Mʉjãye oterere Manigʉ̃rẽ nʉnirucũrõrã abirora atie itiawãme wapacʉtire docare tiro bo. 24Mʉjã caperi ĩñabʉaherara abiro nicaperacã basocare Manigʉ̃ye maquẽrẽ bueruga. Moisécã dotire cũriguere buri nirẽ wapamanirẽgãpere queoro ticaperacã tiesotoa dotire wapacʉtirepere tiheri.
25”Mʉjã Moisécã ojariguere bueribasoca, fariseo basoca bʉtoro ñañacametʉaro tiyoroacu. Mʉjã basoca ĩñacoropʉ wadorena ñurẽrẽ tiritoribasoca ña. Basocare ‘ñurã ñawã’ ĩñerõcã bora baunirõpʉ wadore ñurẽrẽ tirito bapari sotoape wado coseyorera abiro. Buri mʉjãye yeripũnarĩpʉpere yajarepe, niyeru cʉocaperacã bonemosãrẽpe nicametʉasu tibapari pupeape coseyoyamanirẽ wõẽrĩpirera abiro. 26Mʉjã fariseo basoca caperi ĩñabʉaherara abiro Manigʉ̃yere tʉomasĩhera ña. Baparire pupeape coserora abiro mʉjãye yeripunarĩpʉ ñañarẽ nirẽpere wasoasocoya. Tora abiro tira bapasotoapecãrẽ ñurõ coseariabapara abiro pʉtʉaroacu.
27”Mʉjã Moisécã ojariguere bueribasoca, fariseo basoca bʉtoro ñañacametʉaro tiyoroacu. Mʉjã basoca ĩñacoropʉ wadorena ñurẽrẽ tiritoribasoca ña. Masãcoperira abiro ña. Tie masãcoperi biarere ñurõ botiremena ʉ̃cʉ̃ãrigue nirẽrẽ ĩñarã ‘ñurõ bau’ ĩwã. Tie tairo ñurõ baucaperocã pupeapʉpere cõwõãriaya cõãrĩniguẽ, apeye ñañarẽ boareniguẽ sãñaga. 28Mʉjã atiera abiro basoca ĩñacoropʉre sotoa wadorena ñurãrã abiro bau. Tairo baucaperacãrã mʉjãye yeripũnarĩpʉpere tiritoripirere, ñañarẽ tirecʉtirere cʉocametʉasu.
29”Mʉjã Moisécã ojariguere bueribasoca, fariseo basoca bʉtoro ñañacametʉaro tiyoroacu. Mʉjã basoca ĩñacoropʉ wadorena ñurẽ tiritoribasoca ña. Mʉjã sʉguerimacãrã Manigʉ̃ye quetire wedesʉgueribasocaya masãcoperisotoapʉre ñurĩwiseri wenʉcõ. Ĩñerõcã basoca ñurã niriaraya masãcoperisotoa wenʉcõria wisericãrẽ ñurõ mamo. 30Tairo tituwanʉcõ mʉjãbasurupe abiro ĩ: ‘Marĩ ñecʉ̃sʉmʉãniãrãcã catiriwatoapʉre marĩ maniwʉ̃ marĩcʉ̃. Tiwatoapʉ nirãpʉa Manigʉ̃ye queti wedesʉgueribasocare sĩãñerõcã marĩ cʉ̃jãrẽ sĩãtamuheribogatiyu’ ĩ. 31Mʉjã atiere tora abiro ĩrã mʉjãbasurupe: ‘Ʉ̃sã Manigʉ̃ye queti wedesʉgueribasocare sĩãriara pãrãmerã nitutiara ña’ ĩrã ya. 32Tairo tira mʉjã ñecʉ̃sʉmʉãcã ñañarõ tisocoriaronorã, mʉjãcã tiwãmerã tituwanʉcõña.
33”Mʉjã basoca ñañarã tiritoripira ãña pũnarã abiro pũnirã ña. ¿Mʉjãcã ñañarẽrẽ tirecʉtire wapa mʉjãrẽ Manigʉ̃cã pecamepʉ cõãñerõcã dairo ti mʉjã camewitimasĩrõãgari? 34Tairo tigʉ yʉbasurupera mʉjã cʉtiropʉ Manigʉ̃ye queti wedesʉgueribasocare, cʉ̃yere masĩrĩbasocare ĩñerõcã cʉ̃yere bueribasocare ticogʉda. Yʉcã tairo tiñerõcã cʉ̃jã ĩcãrãrẽ mʉjãpe sĩã, ãpẽrãrẽ curusapʉ papatu, ãpẽrãrẽ cʉ̃jãya neãporiwiseripʉra bape, no cʉ̃jãcã warimacãrĩpʉ quetatuarucũrõãcu cʉ̃jãrẽ ñañarõ tirugara. 35Tairo tira mʉjã ñecʉ̃sʉmʉãcã nipetira basoca ñurãrẽ sĩãrigue wapare mʉjã wapa cʉo. Abel#23:35 Abel Adancã Evamena mama macʉ̃ cʉosocorigʉ Caín baji nirigʉ niwĩ. Bʉcʉtutipʉre Caíncã waibʉcʉre sĩã soemʉõcopeo Manigʉ̃re nʉnirẽrẽ Manigʉ̃ tiere boaherimocãnigʉ̃ Abelyepere borigʉ niwĩ. Tiemena Caín cua Abere sĩãmocãrigʉ niwĩ (Gn 4:1-8). diamacã maquẽ tirigʉmena sĩãsocowʉmʉãtira pʉ Berequías macʉ̃ Zacaríapʉre sĩãtucoriara niwã. Cʉ̃rẽna Manigʉ̃cã Nirĩtatiapʉ waibʉcʉrare sĩã soemʉõcopeoro watoapʉ sĩãriara niwã. 36Yʉ atiere mʉjãrẽ diamacãrã wede. Cʉ̃jãcã tairo tirigue wapare mʉjã anocawatoa macãrãpe Manigʉ̃rẽ ñañarõ tiyoana wapa cʉora pʉtʉaroacu ―ĩwĩ Jesús.
Jesúcã Jerusalén macãrãrẽ wãcũ otirigue
(Lc 13:34-35)
37Fariseo basocare tairo ĩãriasiro Jesús Jerusalén macãrãrẽ wãcũgʉ̃ abiro ĩwĩ:
—Mʉjã Jerusalén macãrã Manigʉ̃ye queti wedesʉgueribasocare sĩãcõã, cʉ̃ye quetire wededotigʉ ticoriarare ʉ̃tãperimena docasĩã. Yʉ mʉjãrẽ maĩgʉ̃ pajeri neõrugamiwʉ̃ mʉjãrẽ acuta cametʉogʉdagʉ cãmococã co pũnarẽ queripʉ docapʉ neõcũrõrã abiro. Mʉjãpe boheriwʉ. 38Buri marĩcʉorore tʉoya. Mʉjãya Manigʉ̃wi, mʉjãya macã Manigʉ̃cã waweoyoariamacã pʉtʉaroacu. 39Mʉjãrẽ diamacãrã wedegʉda. Yʉre mʉjã upatuti ĩñanemohericu pʉ yʉre ‘ãni ñawĩ Manigʉ̃cã ticoyorigʉ ñucametʉagʉ ñurõmena watiaro’ ĩrãpʉ mʉjã yʉre ĩñarõãcu tamʉ ―ĩwĩ Jesús.
Currently Selected:
Mateo 23: yui
Highlight
Share
ਕਾਪੀ।
Want to have your highlights saved across all your devices? Sign up or sign in
© 2026, SIL Global. All rights reserved.