Mateo 20
20
Ʉse wese padederibasoca queoremena Jesúcã buerigue
1Cʉ̃cã wedeariguere ñurõ eñogʉ̃dagʉ Jesús abiro ĩ wedenemowĩ:
—Manigʉ̃cã cʉ̃yarare dotire atiera abiro ña. Ĩcʉ̃ ʉse wese cʉogʉ boweduicũmuãrẽmena cʉ̃ya wesere padedeanarẽ amagʉ̃ wayugʉ. 2Cʉ̃jãrẽ bʉagʉ ‘Ĩcãbʉreco padedera wapatarocãrõ mʉjãrẽ ĩcã niyeruti wapatigʉda’ ĩ cʉ̃jãmena quenotuwa cʉ̃jãrẽ padededotigʉ cʉ̃ya wesepʉ ticoyugʉ. 3Siro tamʉ nueve niñerõcãrã macã decopʉra wagʉ, topʉ ãpẽrã ñeno tiro manirõ padedere amanucũrãrẽ ĩñayugʉ. 4Cʉ̃jãrẽ abiro ĩyugʉ: ‘Mʉjãcã ya wesepʉ padedera waya. Yʉ mʉjãrẽ queoro wapatigʉda’ ĩyugʉ. Tairo tira cʉ̃jãcã cʉ̃mena quenotuwa cʉ̃ya wesepʉ padedera warisuayura. 5Wese cʉogʉ tamʉ cotoarora sotoa niñerõcãjoro, ñamicape tres niñerõcãjoro ãpẽrã padederibasocare ama padededotigʉ wayugʉ. 6Upatuti tamʉ ñamica cinco niñerõcãpʉra macã decopʉ wagʉ, ãpẽrãrẽ tamʉ ñeno tiro manirõ padedere yuenucũrãrẽ bʉajeayugʉ. Cʉ̃jãrẽ bʉajeagʉ ‘¿dairo tira mʉjã marĩcʉ̃ãrẽ padedehericaperacãrã tairo ninajĩõãsuri?’ ĩ sãĩñayugʉ. 7Cʉ̃jãpe: ‘Icãta ĩcʉ̃no ʉ̃sãrẽ “padedera waya” ĩheriwa’ ĩ yʉyura. Wese cʉogʉ cʉ̃jãrẽ: ‘Topʉare mʉjãcã ya wesepʉ padedera waya’ ĩyugʉ. 8Queoro naĩcũmuãrẽmena wese cʉogʉ padederibasocare dotigʉre abiro ĩyugʉ: ‘Padederibasocare sioco tinigʉ̃ cʉ̃jãcã padedearigue wapare wapatiya. Cʉ̃jãrẽ wapatigʉ siropʉ padedera eariaramenape wapatisocowʉmʉã pʉ easocoariaramena wapatitʉocoya’ ĩyugʉ. 9Tairo tira ñamica cinco niñerõcãpʉ padedesocoariara cʉ̃ cʉtiropʉ ea cʉ̃jãcãrõ ĩcã bʉreco padedera wapatarocãrõ ĩcã niyeruti ñeyura. 10Siro menamegãpʉra padedera easʉgueariara topʉ eara cʉ̃cã cʉ̃jãrẽ tocãrõ wapatiñerõcã ĩñarã: ‘Ʉ̃sã docare cʉ̃jãsotoapere wapatigʉagawi’ ĩ wãcũmiyura. Buri cʉ̃jãcã tairora ĩcãbʉreco padedera wapatarocãrõrã ĩcã niyerutira ñeyura. 11Cʉ̃jãrẽ tocãrõrã wapatiñerõcã ĩñarã cʉ̃jãbasurupe wese cʉogʉmena ũrũrũã cʉ̃rẽ abiro ĩyura:
12”‘Ãĩgʉ̃jã ʉ̃sãsiropʉ eariarape ĩcã horara padedeawa. Ʉ̃sãpe niãria bʉreco muĩpʉ̃ bʉtoro asiro deco padedenajĩõãsuawʉ. Ʉ̃sãcã tocãrõ padedeariasiro nicapetacãrã mʉpe ʉ̃sãrẽ wapatiariarocãrõrã cʉ̃jãcãrẽ wapatiawʉ’ ĩyura. 13Cʉ̃jãcã tairo ĩñerõcã tʉogʉ wese cʉogʉpe ĩcʉ̃ cʉ̃jã watoa nigʉ̃rẽ abiro ĩyugʉ: ‘Yʉmenamacʉ̃ yʉ mʉrẽ icãta queoro tiherimocã tigʉmerã ya. Merẽ yʉcã “mʉrẽ tocãrõ wapatigʉda” ĩrẽrẽ tʉogʉ yʉmena tiere quenotuwagʉpʉ mʉ padedeawʉ. Tairo tigʉ yʉcã mʉrẽ ĩãriarora abirora queoro wapatiawʉ. 14Mʉcã wapatariguere mʉ tora cʉo, tiere ne, anorẽ waya. Ãni mʉsiropʉ padedegʉ earigʉcãrẽ mʉrẽ wapatiariarocãrõrã wapatirugaga. 15Ya niyerumena yʉcã boriwãme timasĩ. ¿Yʉcã ñurõ tigʉ niñerõcã ĩñanigʉ̃ yʉre mʉ ĩñatutigʉ yari quepa?’ ĩyugʉ wese cʉogʉ.
16Jesús tiere abiro ĩ wedetʉocowi:
—Atiera abirora marĩcʉorore pajʉ buri nira siropʉre nirũpãrãrã abiro nirã earagawa. Marĩcʉoropere nirũpãrãrã abiro nirãpe siropʉre buri nirã pʉtʉara earagawa ―ĩwĩ Jesús ʉ̃sãrẽ.
Jesús tamʉ cʉ̃cã cõwõãte maquẽrẽ wederigue
(Mc 10:32-34; Lc 18:31-34)
17Jesús mamena Jerusalénpʉ mawagʉra ʉ̃sã cʉ̃ buera doce wadorena sioco abiro ĩwĩ:
18—Mʉjãcã ĩñarõrã abirora marĩ marĩcʉorore Jerusalénpʉ wara ya. Topʉ yʉ Nipetira Sõwʉ̃ paia nirũpãrãpʉre, Moisécã ojariguere bueribasocapʉre wiyoyogʉacu. Cʉ̃jãpʉra yʉre sĩãcõãdotira 19judío basoca niherapʉre yʉre wiyotutiaragawa cʉ̃jãpʉ yʉre ñañarõ ĩ buiepe, bapepe, curusapʉ papatu sĩãcõãtora abiro. Buri cʉ̃jãcã yʉre tairo ticapetacãrã itiabʉrecosiromenarã masãsugʉacu ―ĩwĩ Jesús.
Santiago, Juan paco Jesúmena wederucũrigue
(Mc 10:35-45)
20Zebedeo nʉmo co pũna Santiago, Juanmena Jesús cʉtiropʉ wati ãsʉ̃rʉ̃poperimena eacumuwago cʉ̃rẽ sãĩgõdago. 21Jesúpe core:
—¿Ñenorẽ bogo yari mʉ? ―ĩ sãĩñawĩ.
Co cʉ̃rẽ:
—Mʉ nirũpʉ̃ sãgʉ̃ ãnijã yʉ pũna pʉ̃ãrãrẽ mʉmena dotiduiana soneña, ĩcʉ̃rẽ mʉcã duiro diamacãpanepe, ãpĩrẽ mʉcã duiro acũnʉãpanepe duidotiwa ―ĩgõ. 22Cocã tairo ĩñerõcã tʉogʉ Jesús co pũnapere:
—Mʉjã mʉjacã tora abiro yʉre sãĩrẽrẽ icãta tʉomasĩheri. Yʉ bʉtoro ñañarõ posagʉacu. ¿Mʉjãcã topʉare yʉcã bʉtoro ñañarõ cametʉatiwãmerã bʉtoro ñañarõ cametʉara, tiere apõtĩãnarã ñari? ―ĩwĩ.
Cʉ̃jãpe cʉ̃rẽ:
—Ʉ̃sã apõtĩõmocãrõãcu ―ĩ yʉwa.
23Jesús cʉ̃jãrẽ:
—Nirõrã ña. Yʉcã bʉtoro ñañarõ cametʉatiwãmerã mʉjãcã bʉtoro ñañarõ cametʉaroacu. Buri yʉpe mʉjãrẽ tiere wedemasĩcapeicãrã ya diamacãpanepe, ya acũnʉãpanepe duianarẽ besemasĩheriga. Merẽ yʉpacʉ tiepʉ duianarẽ besecũsiarigʉ niwĩ ―ĩwĩ.
24Ʉ̃sã Jesús buera pʉaõpʉcʉñʉrãpe atiere tʉora Santiago, Juanmena cuasuwʉ. 25Buri Jesúpe ʉ̃sãcã cuañerõcã ĩñagʉ̃ ʉ̃sã nipetirare sioco abiro wedewi:
—Mʉjã ñurõ masĩ. Atidita macãrã nipetira nirũpãrã Manigʉ̃rẽ masĩhera cʉ̃jãcã dotiriwãmepe tiñerõcã bora cʉ̃jãyarare tutuaromena dotiwa. Tairora cʉ̃jã doca macãrãcã ãpẽrãsotoare dotiribasoca ñawã. 26Buri mʉjãwatopere cʉ̃jãrã abiro tireno manimocãrõ bo. Buripe mʉjãwatoapere nirũpʉ̃rã nirugagʉ ĩcʉ̃ mʉjãrẽ padedecotegʉra abiro nigʉ̃ niãro. 27Ĩñerõcã mʉjãwatoare ãpẽrãsotoa nisocogʉ nirugagʉno nipetiraya dotiepeyoribasocʉra abiro niãro. 28Tairora yʉ Nipetira Sõwʉ̃cã basocare titamuãro ĩgʉ̃merã watiwʉ. Buripe cʉ̃jãrẽ yʉpe titamu, pajʉ basocare yʉcã cõwõãrẽmena cʉ̃jãcã ñañarẽ tirigue wapare wapatibosagʉ watigʉ tiwʉ ―ĩwĩ Jesús ʉ̃sãrẽ.
Jesúcã pʉ̃ãrã caperi ĩñabʉaherare ñujeañerõcã tirigue
(Mc 10:46-52; Lc 18:35-43)
29Cʉ̃cã Jericópʉ niãrigʉ ʉ̃sã cʉ̃ bueramena tore witiwʉmʉãñerõcã pajʉ basoca Jesúre quetatuwa. 30Ʉ̃sãcã warima tʉsaro pʉ̃ãrã caperi ĩñabʉahera duira basocacã Jesúre “Ano tʉagʉ yawí” ĩrẽrẽ tʉora cʉ̃jã bʉtoro bʉsʉromena abiro ĩ caribiwa:
—Nirũpʉ̃ David pãrãmi nitutiagʉ ʉ̃sãrẽ bopacaĩñamocãña ―ĩwã.
31Cʉ̃jãcã tora abiro ĩñerõcã tʉora basocape cʉ̃jãrẽ:
—Tocãrõrã disuaya ―ĩ tutimiwã.
Cʉ̃jãcã tairo ĩcapetacãrã cʉ̃jãpe sotoape caribinemocowa:
—Nirũpʉ̃ David pãrãmi nitutiagʉ ʉ̃sãrẽ pẽrõ bopacaĩñaña ―ĩwã.
32Cʉ̃jãcã tairo ĩñerõcã tʉogʉ Jesúpe pʉtʉanʉcãjea cʉ̃jãrẽ pisuco abiro ĩ sãĩñawĩ:
—¿Mʉjãrẽ ñenorẽ tiñerõcã bogari? ―ĩwĩ.
33Cʉ̃jã cʉ̃rẽ yʉwa:
—Nirũpʉ̃, ʉ̃sãrẽ caperi ĩñabʉañerõcã tiya ―ĩwã.
34Tiere tʉogʉ Jesús cʉ̃jãrẽ bopacaĩñagʉ̃ cʉ̃jãya caperire papeowi. Cʉ̃cã tairo tiremenarã pʉ̃ãrãpʉra caperi ĩñabʉasuwa. Tairo tira cʉ̃jã Jesúre quetatusocowa.
Currently Selected:
Mateo 20: yui
Highlight
Share
ਕਾਪੀ।
Want to have your highlights saved across all your devices? Sign up or sign in
© 2026, SIL Global. All rights reserved.