လုကာ 17

အခန်း (၁၇)

ယေရှုလော့သတိအပိတ်ကဟော့ဝဲ့

1နီပေါင်ပိ ကိုယ်တော်ယေရှုလော့ ယတပည့်တော်ဝဲ့ဝါ "ချောင်ငဲ့လော့ ဘုရားရှင်ငဟော့ နာခံခြင်းမော့ငှားအုံ အခြားချောင်ငဲ့လော့ ဖျားရောင်သွေးဆောင်ငဲ့ငဟော့ အသေချာပြင်အဖြစ်။ ဆိတ်လော့ဟော ချောင်ငဲ့ငဟော့ ဘုရားရှင်ငဟော့ နာခံခြင်းမော့ငှားအုံ အတိုက်သွင်းငဟော့ချောင်ငဟော့ ဒုက္ခအခေါင်းလအယ်။ 2ထိုချောင်လော့ တစ်ခြားပေါတ်နောတ်အပေါ်ဝါ အပြစ်အစိုင်းဝဲထောက်ကာ နောင်းအလူးဝါ အရေ့တိုက်ငဟော့ လုံးသောက်ဝဟော့အလူးဝါဗို့သည်လော့တဲ့ ပါန်လိုင်ရာအပိုင်းအိုင်ယဟော့ အနီချောင်အတောတ်ပိုလော့အဘွယ်ရိုင်း။ 3နီကြောင်းငို နောင်းနိစိုင်းယဟော့အရာဝဲ့ သတိသောက်အောက်ဘွေ့တို့။ တကယ်လော့ စီးနော်သံနော်ဝဲ့လော့ အပြစ်အုဝတ်အစိုင်းဘာန်ကနို ယဝါ ဆုံးမဘွေ့။ တကယ်လော့ ယလော့နောင်တအလဟီနပါ ခွင့်လှို့ဘွေ့။ 4အနီချောင်လော့ နောင်းအပေါ်ဝါ နှုတ်တောတ်တာ ပတ်ရှေ့အမှားစိုင်းပုန်လော့ ပတ်ရှေ့လုံးလုံးကေ့လော့ 'နောင်တကလာ့ဟီ' သိမ်အဟောက်ကနို ယဝါဆက်သလော့ခွင့်လှို့လာ့ဝိုင့်" သိမ်အမိန်တော်မူတို့။

ကိုယ်တော်ယေရှုလော့ ယတပည့်တော်ဝဲ့ အပြစ်၊ ယုံကြည်မှုလော့ နာခံခြင်းငဟော့ အစုပ်ဟောက်ငဟော့

5နိပိစလော့ သာဝကဝဲ့လော့ အရှင်ဝါ "ကနိယာ ရွမ်အွမ်နောက်ကဟော့ပိုလော့တိုးပွားဘဲဆု" သိမ်ယနိရှောက်တင်ကြောင့်ငို 6အနီကြောင်းငို ကိုယ်တော်ယေရှုလော့ "နောင်းငါ အရောင်းစအောင်မုန်ရိုင်းစိသိခေ့ညှောင်းဟော့ ရွမ်အွမ်နောက်ကဟော့နမွက်ကနို နီပိုးစာပင်ငဟော့ အရုံးပါဒိုးကျွတ်လော့တဲ့ ပါန်လိုင်ဒိတ်ကာ ပုတ်ဆီးဘွေ့ သိမ် အမိန့်နပိတ်ကနို အနီအရုံးလော့ နောင်းမိန့်ကဟော့ အနာခံလာ့ဝိုင်။ 7နောင်နိဒိတ်ကာဟော့ ပေါတ်နောတ်ဟိ လိုင်ထွန်ဒွန်းနာဟော့အစေခံ ပဆိတ်ကာဆိတ် သိုးဝဲ့အထင်းဒွန်းနာဟော့ အစေခံ ပြန်လော့ဖိုးပိစ ယဝါ 'နီဝါလူးသိလော့တဲ့ ငုံးသလော့အေရဲ့' သိမ်နဟောက်ဝိုင့်မိုး။ 8အနလှောက်ကာ နဟောက်ဝိုင့်ထောက်ကာ 'နောင်းလော့ အောင်းကျီလှုန့်အလော့တဲ့ ကေ့တောတ် မအေးအုတ်ဗုန်းအုဝတ် အကျာန်ပိတ်ကဲ့။ အပေါင်ပိစလော့ ကေ့လော့ကအေးချိန်ဝါ အလိုအိုငဟော့ အစိုင်းပိတ်ဘွေ။ ကေ့လော့ အေဟလော့ အပုန်ကနို နောင်းနအေးခုဟီ' သိမ်နဟောက်ဝိုင့်။ 9နောင်းအစေခံနဲ့လော့ ယနိလော့အဟောက်တိုင်း အစိုင်းကြောင်းငို နောင်းလော့ အစေခံ ကျေးဇူးအထူးအတောင်အောင်ငိုင်လိုဝ။ 10နောင်နိလော့ဟော အနလှောက်ကာနော နောင်နိယာ အတို့ဝဟော့ တကား နောင်နိစိုင်းပုန်ကနို 'ကနိယဟော့ ထိုက်သံငှားငဟော့အစေခံနိုးကဖြစ်။ ကနိလော့စိုင်းလဝိုင်ယဟော့ ဝဲ့နော ကနိုစိုင်းအဖြစ်' သိမ်ဟောက်ဘွေ့တို့" သိမ်အမိန့်တို့။

ကိုယ်တော်ယေရှုလော့ အနာရောဂါမော့ဟော့ ပေါတ်ငှား အကုပိတ်ငဟော့

11နိပေါင်စလော့ ကိုယ်တော်ယေရှု ဂျေရုဆလင်မြို့ဝါအစိဒွန်းလွန်းနာမွက်ဟော့ ရှမာရိပြည်လော့ ဂါလိလဲ ကြားဝါအမော့ နန်းနယ်စပ်ကြားဝါဖြတ်လော့သဲ့ အစိတို့။ 12ကိုယ်တော် ငဟော့ နန်းနန်းနောတ်တာအဖိုးပိစ အနာလင်းရောဂါစွေဟော့ ချောင်ပေန်းငှာဝဲ့ ကိုယ်တော်ဝိုအလှိုးဝါ ယားလော့သဲ့ 13အလုတ်လုတ်ကာ "ကိုယ်တော်ယေရှု၊ သခင် ကနိယာ အဟင်းရှေ့သလော့" သိမ်ကိုယ်တော်ဝါအရှောက်တင်တို့။ 14ကိုယ်တော်လော့ ယငဟော့မူ့လော့တဲ့ "ပုရောဟိတ်ဝဲ့ငွါစိလော့တဲ့ နောင်းနိလုံသပြအာဘွေတွက်" သိမ်အမိန့်တော်မူတို့။ ထိုချောင်ငဲ့ဟော အစိနောက်ဒုန်းလောင်းဝါ ရောဂါဝဲ့ငဟော့ အကျုပ်မတ်တို့။ 15ယနိဒိက်ကာဟော့ ပေန်းနောတ်လော့ အနာရောဂါအကျုပ်ကဟော့ အမှတ်ပိစ ဘုရားရှင်ဂုဏ်တော်ဝဟော့ အလုတ်လုတ်ကာ ချီးမွမ်းလော့ ကိုယ်တော်ပါတ်တိုပြန်လော့အလှည့်လူးဘော်။ 16အနီပုန်ပိ ယလော့ ကိုယ်တော်ယေရှုအရှေ့ဝါ ဒူးထောက်လော့တဲ့ ကျေးဇူးအတောင်းအောင်တို့ ။ အနီချောင်ငဟော့ရှမာရိနယ် သားဝါဟော့ချောင်အဖြစ်။ 17အနီပုန်ပိ ကိုယ်တော်ယေရှုလော့ "အနာကြီးရောဂါကျုပ်ဟော့ပေန်းငှာဆိတ်ကမိုး။ အရာချောင်ပေန်းကုသဲ့ ဘောင်းငါဝိုး။ 18ဆိတ်လော့ဟော ဘုရားရှင်ဂုဏ်တော်ချီးမွမ်းနိုင်းပြန်လူးဘော်ဟော့ ပေါတ်ငှားဒိတ်ကာဟော့ အပြန်လူးပေါ်ငဟော့ ဂျူးချောင်မျိုးဆိတ်ငှားဟော့ချောင်နိုး" သိမ်အစက်တို့။ 19ကိုယ်တော်လော့ ဆက်လက်လော့တဲ့ အနီချောင်ငါ "ထော့သိလော့တဲ့ စိဝဲ့၊ နောင်းယုံကြည်ခြင်းငဟော့ နောင်းငဟော့အကမ်းပေါ်ဟီ" သိမ်အမိန့်တော်မူတို့။

ဘုရားရှင်သာသနာတော်အပေါ်လူးငဟော့

20နှုတ်တောတ်တာ ဖာရိရှဲအချို့လော့ ကိုယ်တော်ဝါ "ဘုရားသာသနာတော်ဝဟော့ ဘောင်းအချိန်ငါ အပေါင်လူးဝိုင်းရိုး" သိမ်အစက်။ အနီပိစ ကိုယ်တော်ယေရှုလော့ "ဘုရားသာသနာတော်ဝဟော့ နောင်နိမိတ်ကိုမှု့လာ့ဝိုင့်ယဟော့ ပုံစံဝုအပေါ်ဝဲဆိတ်လ။ 21ချောင်ငဲ့လော့ဟော 'ဘုရားရှင်သာသနာတော်ဟော့ နိနေရာဝါအမွက်' ဆိတ်ငှားတစ်အုံ 'တိုင်ဘွေတွက် ဘုရားရှင်သာသနာတော်ငဟော့ နီဝါအမော့ ထိုဝါမော့ သိမ်ဟောက်ဝဲဆိတ်လ။ ဘယ်သိမ်ကြောင်းငိုဝေါနိုးပုဝါ ဘုရားရှင်သာသနာတော်ဝဟော့ နောင်နိရိုအတွက်တူဝါ ဒိက်ကာအမွက်ကြောင်းငိုဖြစ်" သိမ်အမိန့်တော်မူတို့။ 22အနီပုန်ပိ ကိုယ်တော်ယေရှုလော့ ယတပည့်တော်ဝဲ့ယာ "နောင်းနိလော့ ချောင်စိုးနော်အမော့ငဟော့ အနှုတ်ဝဲရာ နှုတ်ဝေါတ်ပေါင်အမှုနှုးမှု့လအယ်ဆိတ်သိလ။ 23ချောင်ငဲ့လော့ နောင်းငါ 'ထိုအရပ်သာ ချောင်စိုးနော်အမွက်' ဆိတ်ငှားဝါ 'နီအရပ်သာချောင်စိုးနော်အမွက်' သိမ်ဟောက်ကနိုဟော အကြောင်ငါဆုတလော့တဲ့ ရွှီရိုင့်တို့။ 24ဘယ်သိမ်ကြောင်းငိုဝေါနိုးပုဝါ ချောင်စိုးနော်ငဟော့ အာကာဝါ ချိုင်းချာလတ်လတ်လော့တဲ့ ကာအာငဟော့ အဝါန်းငိုင်လော့တဲ့ ချောင်စိုးနော်အပြန်လူးပေါ်ကနိုဟော့ တစ်လောက်ကာ ပအဖြစ်ဝဲ။ 25ဆိတ်လော့ဟော ယလော့ ပထမဆုံးဒုက္ခခွန်းအွမ်လာ့လော့သဲ့ နီမျိုးဆက်ချောင်ငဲ့လော့ ယနိညာန်းငဟော့ အခွန်းအွမ်လာ့ဝိုင့်။ 26နောဧ#17.26 ဘုရားရှင်သည် ရေလွှမ်းမိုးခြင်းဖြင့် ကမ္ဘာမြေကို ဖျက်ဆီးသောအခါ နောဧနှင့် သူ၏မိသားစုကို ကယ်တင်ခဲ့သည်။ (ကမ္ဘာဦးကျမ်း ၁၉း၁-၂၉ ကိုကြည့်ပါ) ခေတ်တာ အဖြစ်လူးလှောက်ကာ ချောင်စိုးနော်အကြွလူးဝဟော့အချိန်ငါဟော့ အနီလှောက်ကာပါတ် အဖြစ်လူးဝိုင်း။ 27အနီအချိန်ငါ နောဧယဟော့ သင်္ဘောဒိက်ကာအဝေါင်းငဟော့နှုတ်စို့ ချောင်ငဲ့လော့ အေး၊ အုပ်၊ မင်္ဂလာပွေး စိုင်းအလော့အွမ်းတို့။ နီပေါင်ပိစလော့ တွီးလော့အလွှမ်းမိုးဝဟော့ ခွန်းအွမ်လာ့လော့သဲ့ ယနိအားလုံးငဟော့ ဒူး အဖျက်ဆီးအခွန်းအွမ်လာ့။ 28အလှောက်ကာ လောတလက်ထက်ဝါဟော့ သောဒုံမြို့ဝါဟော့ ချောင်ငဲ့လော့ ဈေးလှေ့အလို့၊ ရေ့အလို့သဲ့၊ စို့အလို့၊ ရှောက်အလော့ ရှာက်ကဲ့ လောတအနီမြို့ဝါဟော့ အရှုငှားမောင်ငိုအချိန်ထိ စိုင်းအလော့ယနိအွမ်း။ 29ဆိတ်လော့ဟော လောတဝဟော့ သောဒုံမြို့ဝါအဆုဝဟော့ အချိန်ငါ မီးအားရုတ်ကဲ့လော့ မီးရိုအူးဟော့လုံးသောက်ကဲ့ အာကာဝါဟော့ကျောက်လူးလော့သဲ့ အနီမြို့ဝါဟော့ ချောင်ငဲ့ အဒူးရှောက်တို့။ 30နီအဖြစ်အပျက်သဲ့ယဟော့ ချောင်စိုးနော်အပေါင်လူးဝိုင်းဟောနှုတ်တာ နီလှောက်ကာအဖြစ်လူးဝိုင်း။ 31အနီအချိန်ငါ နီလော့ဟော အုဝတ်ဟိအလာ့ဝိုင့်တောတ် အင်းသေ့ယာဟော့ အင်းဒိတ်ကာ ကွန်းနဟော့ စိုင်းရိုင်းတို့။ နီဟော လိုင်ယာဟော့ အင်းနာ အုဝတ်ဟိအတောတ်ည အင်းနာ အပြန်နဟော့ စိုင်းရိုင်းတို့။ 32လောတ အပေးဟာဟော#17.32 သောဒုံမြို့မှ သေပြေးရှင်ပြေးထွက်ပြေးကြရသော်လည်း လောတ၏ဇနီးသည် သောဒုံမြို့ကို သံယောဇဉ်မဖြတ်နိုင်သဖြင့် ဘုရားရှင်၏အပြစ်စီရင်ခြင်းကို ခံရလေ၏။ (ကမ္ဘာဦးကျမ်း၁၉း၁၂-၂၉) ဘောင်းခါအဖြစ်တောတ်သိမ် ဆတိလာ့ဘွေ့တို့။ 33ဘယ်ကြောင်နောင်နိရှောက်နောင်နိကယ်ဝိုင့်ကနို နောင်နိဆုံးရှုံးလာ့ဝိုင့်။ ဆိတ်လော့ဟော ကေ့အတောတ်ကြောင်းငို ယနိဘဝဝဟော့ စွန့်လှို့ဟော့ချောင်ငဟော့ ထာဝရအရှောက်လအာဝဲ့။ 34နောင်နိယာကဟောက်ဝိုင်။ ကေ့ပြန်လော့ကလူးဘော်ဝိုင်းဟော့နှုတ်တာ ချောင်ပေန်းဟိ အိဒွန်းအုဝေါတ်တာအိကနိုဟော့ ကေ့အရွန်အွမ်နောက်ဟော့ ချောင်ပေန်းနောတ်နော အဘိက်အိပ်ကဟော့ခွန်းအွမ်လာ့လော့ အရာချောင်ပေန်းနောတ်အအွမ်းနောတ်သိုင်။ 35စောင်အတွက်တူဝါ ကြိတ်ဟော့ နတိုးနူးပေန်းဟိယာဟော့ ပေန်းနောတ်စိအိလော့သဲ့ ပေန်းနောတ်အအွမ်းနောတ်လာ့ဝိုင့်။ 36လိုင်ဒိတ်ကာ ချောင်ပေန်းဟိမွက်လော့ဟော ပေန်းနောတ်စိအိလော့သဲ့ ပေန်းနောတ် အသောက်ကွက်သိုင်" သိမ်အဟောက်သို့။#17.36 (နီကျမ်းပိုဒ်ငဟော့ ကျမ်းစို ပြဝ) 37အနီပိစ တပည်တော်ဝဲ့လော့ "အရှင်၊ ဘောင်းအရပ်တာ အဖြစ်ပျက်လူးဝိုင်းရိုး" သိမ်အစက်ပိစ

ကိုယ်တော်လော့ "အရုတ်အမွက်ဟော့ အရပ်တာ ဖလာက်ကဲ့ အမြဲတမ်း အစုအုဝိုင်း" သိမ်အမိန့်တော်မူတို့။#17.37 မဿဲ ၂၄း၂၈၊ ယောဘ ၃၉း၃၀)

Currently Selected:

လုကာ 17: CEY

Highlight

ਕਾਪੀ।