ሉቃስ 9
9
አሲሬ ሄፔ ናዎባሳክቶኒን ዎሲ
1የሱስ አሲሬ ሄፔ ዎስኒ ሜያኖን ባርኪ ቴጌሬ ኪና አያናሶን አሱኒስኒ ክሶነክናዋ ሜሮ ዙታምባሴ አሲስን ፋቱሶነክና ግዶነዋ ሀእሱኒ ሁግናነ ባሶክ እሚ። 2ኤሲስማቶ ደይ ሀኦሲ ታቶኒ ካማኖን አሱ ዙታምባሴ አሲክ ማክሶነክናዋ ሜታን ሜያኖን ፋቱሶነክና ዎሲ። 3ኤካ ደይ ይ፦ «ኡጉንትሲክ ስኒ ሃሮ ስኑን፥ ሀማቶ ስኑን፥ ቱሻ ስኑን፥ ዋጋ ስኑን፥ ማይት ባርስታን ኦማኖን ዳይስራ ኤጳ ሀማትታ። 4ኤስ ግርት ካታማስን ኬሳትኔን ዜምማ ግርት ኬያስ ፎቲ። 5አሱኒ ሜያ ንቶትን ኤጴቶ ቤየፋቴነ ኤስታን ኬስፌት ካባሲክ ኦርጎንትስ ቱሎሶን ቴብራ ዎቱት። ኤስ ባር ደይ ባሶስታ ዛላ ስናና» ይ።
6ዎስኒ ሜያ ደይ ኬሴሬ ምስራቹኒ ካማሶን ማኬት ሜታኒስን ፋቲት ኬኤ ኬኤሲ አቴት ፌሴቴር።
7እሳ እሳ አሱኒ ሜያ፦ «ሀጵቅፌ ዮሀኒስ ክቱኒ ካብዋ» ይሴት ፌሴቴር ስንና ቦርአ ጋሊላኪ ዳሶን ሀእስፌ ሄሮድስ የሱስ ዛግና ቾዋሶን ዙትሬ ኦዴሬ ኤጴ አጉናዉዛ ዳጌ። 8ኤሲስማቶ እሳ እሳ አሱኒ ሜያ፦ «ራጁ ኤልያስ ዎል ሌ የዋ» ይሴቴን፥ ኦሚስ ደይ፦ «ዜሞቲ ራጁኒ ሜያስን እሳይስ ክቱኒ ካብዋ» ይሴት ፌሴቴር። 9ሄሮድስ ደይ፦ «ሀጵቅፌ ዮሀኒስኒን ታ ሱትባሶን ካትራ ዎሪጝዋ። ኤኪን ሀን ኦደፋና ባር ኦንሶ?» ይ። ኣፋሲክ ደይ ብያናክ ሾሌ።
የሱስ ኡች ኩም አሱኒን ማሲ
(ማት. 14:13-21፤ ማር. 6:30-44፤ ዮሀ. 6:1-14)
10ዎስኒ ሜያ ሀሜቴስን ዎል ሌ ዬሴሬ ዛግሴቴ ዉዛሶን ዙትሬ የሱስኒክ ማክሴቴ። ባር ደይ ቤቴሳይዳ ይስቴፋ ካታማስ ቴሻ ፋ ሻቶ ድማ ባሶ ባሶትን ኤጴ ሀሚ። 11ዳራስ ደይ የሱስ አይ ሀሚድፌናማቶ አሪፋት ባሶ ኦርፎሴ ሀሜቴ። የሱስ ደይ ሹነ ሀኦሲ ታቶኒ ቾዋኖን ባሶክ አሲ። ሜሮስኒ ፋሩክ ሾልሴሬ ዬሴ ባሶትን ደይ ፋቲ።
12ጌሮ ዋልፋና ካባሲክ አሲሬ ሄፔ ናዎባሳክቶ የሱስኒክ ዬሴሬ፦ «ሀን ፋኒ ድማስ ዛቦዋ። ኤስ ባሪ ቦርኣ ዳራስ ብራቶስታ ፋ ካታማስናዋ ቤደስና ሀሜ ሙነዋ ኩኑን ድምነ ሾልሶነክ ጋፍኩዋ» ይሴቴ።
13የሱስ ዎልግሬ፦ «ንቶ ሙሶነ ባሮን ባሶክ እምትዋ» ይ። ባሶ ደይ ዎሉግሴሬ፦ «እኖክ ፋዪስ ኡች ሙማ ቱሽነዋ ሄፕ ኩርጡሚነዋ። ኤስ ባር ደይ ሀማ ዋጌራ ዳይሱ ሻካኒነ ሀን ኤፌ ዳራሲክ ኣፋዋ ሆሮና ዉዛ» ይሴቴ። 14ኤስታክ ኡች ኩም ስኒ ኣርቃሱ ፌር።
የሱስ ናዎባሳክቶኒክ፦ «ኡቻስር ኡቻስር ዛግራ ባግ ባጋ ዱሱትዋ» ይ።
15ባሶ ደይ የሱስ ማኬናሲማቶ ዱስሴቴ። 16ኤስታን ኡች ሙማ ቱሻሴዋ ሄፕ ኩርጡሚሴ ካብግሬ ደን ሳማ ካነ ሀኦ ጋላቴፋት ባቴ ዳራሲክ ሃኦነክ ናዎባሳክቶኒክ እሚ። 17ዳራ ዙቴሬ ሜሬ ጋዊ፤ ናዎኒ ሜያ ደይ ፉእቴ ባቶሶን ናዎባስ ዙትሴቴን አሲሬ ሄፔ ማሳ ቱማ ካቢ።
ጴጥሮስ የሱስ ክርስቶስ ስንናማቶ ማኬ
(ማት. 16:13-19፤ ማር. 8:27-29)
18እሳ ዎና የሱስ ባር ባር ሀኦ ሺጴፌን ናዎባሳክቶ ባርኪ ዬሴሬ ፌሴቴር። የሱስ ደይ ባሶትን፦ «አሱኒ ሜያ ታን ኦ ይሴፌሶ?» ይሬ ማምሲ።
19ባሶ ደይ ዎልግሬ፦ «እሳ እሳይስ ሀጵቁን ዮሀኒስዋ። እሳ እሳይስ ኤልያስ፥ ደይ ኦሚስ ዜሞቲ ራጁኒ ሜያስን እሳይስ ክቱኒ ካብዋ ይሴፌዋ» ይሴቴ። 20ባሶክ ደይ፦ «ኤካን ንቶ ታን ኦ ይፌትሶ?» ይሬ ማምሲ። ጴጥሮስ ዎልግሬ፦ «ነ ሀኦኪን ዎስቴሬ የ ክርስቶስዋ» ይ። 21የሱስ ባሶክ፦ «ኤስ ባሮን ኦኒክኑ ማኮትታ» ይት ችኒሬ ማኬ።
22ቱስሬ ደይ፦ «አሱኒ ና አካማ ሻና ኤጴቶናክ ሾልሱዋ። ኤሲስ ደይ ኩርኡኒ ሜያክ፥ ማግኒ ጋኛንክ፥ ሙሴኒ ቱማሲ አስሲኛኒክ ካሽስቶና ደይ ዎርቶና። ኬስናር ዎኖ ደይ ክቱኒ ካቡና» ይ።
23ኤስታን ደይ ዙታምቤሲሴ አሲክ፦ «ታኔን አነ ሀማክ ሾሌፌ ባር ኦኑ ስንፋናነ ባሳ ቴትን ቾዋሶን ቤዮ። ዎንና ዎንና ሜስቀልባሶን ዎርኤ ታኔን አነ ዮዎዋ። 24ካባሶን ፉኦክ ሾሌፌ ባር ዙቴሬ ካባሶን ትሽኩና። ታክዋ እያት ካባሶን ኣትሬ እምፌ ባር ካባሶን ፉኦና። 25አሱ ዙቴሬ ሀን ዳስታኪ ኦትማሶን ዳናት ካባሶን ትሽካናነ ወደይ ዮእጋናነ ባርኪ አዉ ኬእንሪንሶ? 26ኦኑ ስንፋናነ ታክናዋ ታ ካማሲክና ኢቼፌ ባር አሱኒ ና ባሳ ኡልፍንቶሲክናዋ ሳማኪ አባባሳ ኡልፍንቶክና ደይ ኮርቶ ሀኦሲ ዎስያሲክቶኒ ኡልፍናክ ዬፌና ካባሲክ ባርኪ ኢቾና። 27ፉቶ ንቶክ ማኬፋውጙዋ፥ ሀንታ ዬሴ ባሶ ጋነያስን ሀኦሲ ታቶኖን ብዮኖይ ክቱኖር ፌሴቴርዋ» ይ።
የሱስኒ ግቶ ሶልቴ
28የሱስ ኤስ ባሮን ማኬና ናጙሪን ዎናኔን ኦርፎ ጴጥሮስኒን፥ ዮሀኒስናዋ ያቆብንና ዞንስሬ ሀኦ ሺጶናክ እሳ ኣምታ ኬስ። 29ኤስታክ ሺጴፌን ስኒባስ ግቶባስ ሶልቴ። ማምባስ ደይ ፎሬራ ፓልፓሊ። 30ጌሬጌሬ ሄፕ አሱ ሙሴናዋ ኤልያስና የሱስኔን ኡጰሬ ዎሉምሴቴ። 31ኡልፍናክ አምማኖን ቤስቴሴሬ የሱስ የሩሳለሙክ ሻና ኤጴቶናማቶናዋ ክቱናማቶና ዎሉምሴሴቴ። 32ስኑንታኖ ጴጥሮስናዋ ባርኔን አነ ፌ ባሶና አፋይ ኤጳን ኩነቴር። ጉዝሴሬ የሱስኒ ኡልፍናሶንናዋ ባርኔን አነ ዎል ሌት ፌ ሄፕ አሱኒ ሜያኖና ብየቴ። 33ኤስ አነ ዎሉምሴት ፌ አሱኒ ሜያ የሱስኒስታን ኦር ኬሴሬ ሀሜፌ ካባሲክ ጴጥሮስ፦ «ዳሚሶ ሀንታ ፎስ እኖክ ማአሪዋ። ኬዝ ሀፎ ሀኡንዋ። እሳር ኔር፥ እሳር ሙሴኒር፥ እሳር ደይ ኤልያስኒር» ይ። ስኑንታኖ አዉ ማኬድፌናማቶ ኣነ አሩዌ።
34ጴጥሮስ ኤስ ባሮን ማኬፌን ሻሩ ያራ ባሶትን ይኒ። ሻሩስ ይኒፋና ካባሲክ ድጌሴቴ። 35ሻሩስ ካሞ፦ «ታ ኮርና ናታስ ሀኒስዋ። ባሪን ኦዶትዋ» ይፋ ካማ ያ። 36ኤስ ካማስ ኦድቴናኔን ኦርፎ የሱስ ባር ባር ቤስቴ። ናዎባሳክቶ ደይ ብየቴ ዉዛሶን ኤስ ካባሲክ ኦኒክኑ ማክሶኖይ ሻክሴቴ።
የሱስ ኪና አያና ባሳስ ሀእና ናስን ፋቲ
(ማት. 17:14-18፤ ማር. 9:14-27)
37ዎኖትር ዎኖ ኣማስታን ኬርሴቴኔን ኦርፎ ሾዎ ዳራ የሱስኒክ ሁጰ። 38ኤስ ዳራሳ ጋነስን እሳ አሱ ኤካ ይት ቻጊ፦ «አስሲኛኖ፥ ሀን ባር ታክ እሳ ናታዋ፤ ያራ ብያታክ ሺጴፋዉጙዋ። 39ኪና አያናስ ባሪን ቻግሲር። ዳስታክ ጋንስራ ደይ ቶኮናክ ዛግራ ጉሳ ካርአሪ። አቱባሶን ማዛስራ ሚርኤናኔን ኦርፎ አካማ ሻናክ ቤይፋ። 40ነ ናዎሳክቶ ኤስ ኪና አያናሶን ናሳስን ክሶነክ ሺጴና ኣነ ችሞቶ።»
41የሱስ ኤስታ ፌ ዳራስን፦ «አማንቶኒት ፎንቶ ኤሊጛ ኮኒቶ፥ ኣጌኔን ካርአ ንቶኔን አነ ፎናሪ? ኣጌኔን ካርአ ንቶትን ፋ ኩናሪንሶ? ናኔስን ሀጝ ቴሸቦ» ይ።
42ናስ ሀጝ የሱስኒክ ታእሴፌና ካባሲክ ኪና አያናስ ናስን ዳስታክ ጋንስን ቶኬ። ስኑንታኖ የሱስ ኪና አያናሶን ኬእሬ ናስን ፋትሬ አባባሲክ እሚ። 43አሱኒ ሜያ ዙቴሬ ሀኦሲ አካማ ሁግናኖን ብየሴቴ ቦርአ ዲንቀሴቴ።
የሱስ ባሳ ክቱስ ቾዋኖን ሄፕሳ ማኬ
(ማት. 17:22-23፤ ማር. 9:30-32)
አሱ ዙቴሬ የሱስ ዛግና ዉዛሲክ ዲንቀሴፌን የሱስ ናዎባሳክቶኒክ ኤካ ይ፦ 44«ሀን ማኬፋና ካማሶን ጋዝግራ ኦዶትዋ። አሱኒ ና አሱኒ ሜኒ ኩሹስ አቴሬ እምቶኒርዋ» ይ። 45ስኑንታኖ ኤስ ባር ማኬና ባር ኣነ ባሶክ ጋሎዋ። ኤስ ዎላስ ኣቾ ቾዋኖን አሪሶነክ ኣነ ችሞቶ። ዎልግሬ ማምሱክ ደይ ድጌሴቴ።
አሪክር ኦንሶ
(ማት. 18:1-5፤ ማር. 9:33-37)
46ናዎባሳክቶኒ ጋነሲ፦ «እንኖስን ኦንሶ አሪክሪ?» ኡኒ ካራካሮ ካቢ። 47ስኑንታኖ የሱስ ባሶ ንብባሲ ሳፋራኖን አሪፋት እሳ ጋሮ ናኒን ቴሸሬ ቴሽባ ዬት። 48ኤስታን ባሶክ፦ «ሀን ጋሮ ናስን ታ ሱናሲክ ኤጴቴ ባር ኦኑ ስንፋናነ ታን ኤጴቶናዋ። ታን ኤጴቴ ባር ዎሲ አባታስን ደይ ኤጴቶናዋ። ንቶ ጋነያስን አቴስ ዙታምንትሴ አሲስታን አሪክርዋ» ይ። 49ዮሀኒስ ደይ የሱስኒን፦ «ዳሚሶ፥ እሳ አሱ ነ ሱናሲክ ኪና አያናሶን አሱኒስኒ ክስፌን ቢራ እኖኔን አነ ስና ቤይና ቦርአ ካልንዋ» ይ።
50የሱስ ዎልግሬ፦ «ንቶትን ኦምቶኖይ ባር ዙቴሬ ንቶኔን አነ ስንና ቦርአ ካላትታዋ» ይ።
ሳማርያኪ አሱኒ ሜያ የሱስኒን ኤጴቶ ቤየቴ
51የሱስ ደን ሳማ ሀማና ዎና ካርባሴ የሩሳሌም ሀማናክ ቡድሬ ካቢ። 52ባሳስታን ዜምሜ ስና ሀሚን ዎስኒን ጋፍኪ። ባሶ ደይ ሾልሱሶን ዙትሬ ሆሱሶነክ ሳማሪያኪ ፋ እሳ ኬኤስ ካርኤቴ። 53ስኑንታኖ የሩሳሌም ሀሚንር ስኒባሶ አራት አሱኒ ሜያ ኣነ ኤጴቶሶቶ። 54ናዎባሳስን ያቆብናዋ ዮሀኒስና ኤስ ባሮን ብያት፦ «ዳሚሶ፥ ደን ሳማን ጌያ ኬሬራ ባሶትን ኪቹናክ አጃጆንክ ማእ ኡታሮሶ?» ይ።
55ስኑንታኖ የሱስ የርቀሬ ባሶትን ኬእ። [አሮ ቴሳ አያና ንቶኔን አነ ፋናማቶ ኣነ አሩዌትዋ። አሱኒ ና ዬናስ አሱኒ ካኒ ፋቱክታኖ ትሽኩክታዋ።] 56ኤስታን ካብሴሬ ኦማ ኬኤስ ሀሜቴ።
የሱስኒ ኣነ ሀማ ዋጋ ካስሲር
(ማት. 8:19-22)
57የሱስናዋ ናዎባሳክቶና ኡጉነ ሀሜፌን እሳ አሱ፦ «ነ ሀሚታ ሀሚታስ ነኔን አነ ሀማናክ ሾሌፋኡጙዋ» ይ።
58የሱስ ዎልግሬ፦ «ቦዋሲክቶ ዶእባ ፋርዋ። ካሳስ ደይ ኬባ ፋርዋ፥ ስኑንታኖ አሱኒ ና ቴትባሶኑ ቴሱና ድምባ ኣፋዋ» ይ።
59ደይ ኦም አሱኒን፦ «ታኔን ሀሚንዋ» ይ። አሱስ ደይ፦ «ዳሚሶ፥ ዜምማ ሀማ አባታስን ካባሮናክ ማእ ኡዋ» ይ።
60የሱስ ዎልግሬ፦ «ክቱኒ ሜያ ክቱቤሲሶን ካባርሶነክ ቤይዋ። ስኑንታኖ ነ ሀማ ሀኦሲ ታቶኒ ቾዋኖን ማኮዋ» ይ።
61ኦም አሱ ደይ፦ «ዳሚሶ ነኔን አነ ሀማናዋ። ስኑንታኖ ዜምማ ሀማ ታክ ኬርክ አሱኒ ሜያኖን ማርኦን ፎቲ ኡናክ ማእ ኡዋ» ይ።
62የሱስ ደይ፦ «ጋቹኒ ቦዳ ኤጳት ኦርፎ የርቀፌ አሱ ሀኦሲ ታቶክ ሾልሱቴዋ» ይ።
Currently Selected:
ሉቃስ 9: YemNTEth
Highlight
Share
ਕਾਪੀ।
Want to have your highlights saved across all your devices? Sign up or sign in
The word for the world Ethiopia
ሉቃስ 9
9
አሲሬ ሄፔ ናዎባሳክቶኒን ዎሲ
1የሱስ አሲሬ ሄፔ ዎስኒ ሜያኖን ባርኪ ቴጌሬ ኪና አያናሶን አሱኒስኒ ክሶነክናዋ ሜሮ ዙታምባሴ አሲስን ፋቱሶነክና ግዶነዋ ሀእሱኒ ሁግናነ ባሶክ እሚ። 2ኤሲስማቶ ደይ ሀኦሲ ታቶኒ ካማኖን አሱ ዙታምባሴ አሲክ ማክሶነክናዋ ሜታን ሜያኖን ፋቱሶነክና ዎሲ። 3ኤካ ደይ ይ፦ «ኡጉንትሲክ ስኒ ሃሮ ስኑን፥ ሀማቶ ስኑን፥ ቱሻ ስኑን፥ ዋጋ ስኑን፥ ማይት ባርስታን ኦማኖን ዳይስራ ኤጳ ሀማትታ። 4ኤስ ግርት ካታማስን ኬሳትኔን ዜምማ ግርት ኬያስ ፎቲ። 5አሱኒ ሜያ ንቶትን ኤጴቶ ቤየፋቴነ ኤስታን ኬስፌት ካባሲክ ኦርጎንትስ ቱሎሶን ቴብራ ዎቱት። ኤስ ባር ደይ ባሶስታ ዛላ ስናና» ይ።
6ዎስኒ ሜያ ደይ ኬሴሬ ምስራቹኒ ካማሶን ማኬት ሜታኒስን ፋቲት ኬኤ ኬኤሲ አቴት ፌሴቴር።
7እሳ እሳ አሱኒ ሜያ፦ «ሀጵቅፌ ዮሀኒስ ክቱኒ ካብዋ» ይሴት ፌሴቴር ስንና ቦርአ ጋሊላኪ ዳሶን ሀእስፌ ሄሮድስ የሱስ ዛግና ቾዋሶን ዙትሬ ኦዴሬ ኤጴ አጉናዉዛ ዳጌ። 8ኤሲስማቶ እሳ እሳ አሱኒ ሜያ፦ «ራጁ ኤልያስ ዎል ሌ የዋ» ይሴቴን፥ ኦሚስ ደይ፦ «ዜሞቲ ራጁኒ ሜያስን እሳይስ ክቱኒ ካብዋ» ይሴት ፌሴቴር። 9ሄሮድስ ደይ፦ «ሀጵቅፌ ዮሀኒስኒን ታ ሱትባሶን ካትራ ዎሪጝዋ። ኤኪን ሀን ኦደፋና ባር ኦንሶ?» ይ። ኣፋሲክ ደይ ብያናክ ሾሌ።
የሱስ ኡች ኩም አሱኒን ማሲ
(ማት. 14:13-21፤ ማር. 6:30-44፤ ዮሀ. 6:1-14)
10ዎስኒ ሜያ ሀሜቴስን ዎል ሌ ዬሴሬ ዛግሴቴ ዉዛሶን ዙትሬ የሱስኒክ ማክሴቴ። ባር ደይ ቤቴሳይዳ ይስቴፋ ካታማስ ቴሻ ፋ ሻቶ ድማ ባሶ ባሶትን ኤጴ ሀሚ። 11ዳራስ ደይ የሱስ አይ ሀሚድፌናማቶ አሪፋት ባሶ ኦርፎሴ ሀሜቴ። የሱስ ደይ ሹነ ሀኦሲ ታቶኒ ቾዋኖን ባሶክ አሲ። ሜሮስኒ ፋሩክ ሾልሴሬ ዬሴ ባሶትን ደይ ፋቲ።
12ጌሮ ዋልፋና ካባሲክ አሲሬ ሄፔ ናዎባሳክቶ የሱስኒክ ዬሴሬ፦ «ሀን ፋኒ ድማስ ዛቦዋ። ኤስ ባሪ ቦርኣ ዳራስ ብራቶስታ ፋ ካታማስናዋ ቤደስና ሀሜ ሙነዋ ኩኑን ድምነ ሾልሶነክ ጋፍኩዋ» ይሴቴ።
13የሱስ ዎልግሬ፦ «ንቶ ሙሶነ ባሮን ባሶክ እምትዋ» ይ። ባሶ ደይ ዎሉግሴሬ፦ «እኖክ ፋዪስ ኡች ሙማ ቱሽነዋ ሄፕ ኩርጡሚነዋ። ኤስ ባር ደይ ሀማ ዋጌራ ዳይሱ ሻካኒነ ሀን ኤፌ ዳራሲክ ኣፋዋ ሆሮና ዉዛ» ይሴቴ። 14ኤስታክ ኡች ኩም ስኒ ኣርቃሱ ፌር።
የሱስ ናዎባሳክቶኒክ፦ «ኡቻስር ኡቻስር ዛግራ ባግ ባጋ ዱሱትዋ» ይ።
15ባሶ ደይ የሱስ ማኬናሲማቶ ዱስሴቴ። 16ኤስታን ኡች ሙማ ቱሻሴዋ ሄፕ ኩርጡሚሴ ካብግሬ ደን ሳማ ካነ ሀኦ ጋላቴፋት ባቴ ዳራሲክ ሃኦነክ ናዎባሳክቶኒክ እሚ። 17ዳራ ዙቴሬ ሜሬ ጋዊ፤ ናዎኒ ሜያ ደይ ፉእቴ ባቶሶን ናዎባስ ዙትሴቴን አሲሬ ሄፔ ማሳ ቱማ ካቢ።
ጴጥሮስ የሱስ ክርስቶስ ስንናማቶ ማኬ
(ማት. 16:13-19፤ ማር. 8:27-29)
18እሳ ዎና የሱስ ባር ባር ሀኦ ሺጴፌን ናዎባሳክቶ ባርኪ ዬሴሬ ፌሴቴር። የሱስ ደይ ባሶትን፦ «አሱኒ ሜያ ታን ኦ ይሴፌሶ?» ይሬ ማምሲ።
19ባሶ ደይ ዎልግሬ፦ «እሳ እሳይስ ሀጵቁን ዮሀኒስዋ። እሳ እሳይስ ኤልያስ፥ ደይ ኦሚስ ዜሞቲ ራጁኒ ሜያስን እሳይስ ክቱኒ ካብዋ ይሴፌዋ» ይሴቴ። 20ባሶክ ደይ፦ «ኤካን ንቶ ታን ኦ ይፌትሶ?» ይሬ ማምሲ። ጴጥሮስ ዎልግሬ፦ «ነ ሀኦኪን ዎስቴሬ የ ክርስቶስዋ» ይ። 21የሱስ ባሶክ፦ «ኤስ ባሮን ኦኒክኑ ማኮትታ» ይት ችኒሬ ማኬ።
22ቱስሬ ደይ፦ «አሱኒ ና አካማ ሻና ኤጴቶናክ ሾልሱዋ። ኤሲስ ደይ ኩርኡኒ ሜያክ፥ ማግኒ ጋኛንክ፥ ሙሴኒ ቱማሲ አስሲኛኒክ ካሽስቶና ደይ ዎርቶና። ኬስናር ዎኖ ደይ ክቱኒ ካቡና» ይ።
23ኤስታን ደይ ዙታምቤሲሴ አሲክ፦ «ታኔን አነ ሀማክ ሾሌፌ ባር ኦኑ ስንፋናነ ባሳ ቴትን ቾዋሶን ቤዮ። ዎንና ዎንና ሜስቀልባሶን ዎርኤ ታኔን አነ ዮዎዋ። 24ካባሶን ፉኦክ ሾሌፌ ባር ዙቴሬ ካባሶን ትሽኩና። ታክዋ እያት ካባሶን ኣትሬ እምፌ ባር ካባሶን ፉኦና። 25አሱ ዙቴሬ ሀን ዳስታኪ ኦትማሶን ዳናት ካባሶን ትሽካናነ ወደይ ዮእጋናነ ባርኪ አዉ ኬእንሪንሶ? 26ኦኑ ስንፋናነ ታክናዋ ታ ካማሲክና ኢቼፌ ባር አሱኒ ና ባሳ ኡልፍንቶሲክናዋ ሳማኪ አባባሳ ኡልፍንቶክና ደይ ኮርቶ ሀኦሲ ዎስያሲክቶኒ ኡልፍናክ ዬፌና ካባሲክ ባርኪ ኢቾና። 27ፉቶ ንቶክ ማኬፋውጙዋ፥ ሀንታ ዬሴ ባሶ ጋነያስን ሀኦሲ ታቶኖን ብዮኖይ ክቱኖር ፌሴቴርዋ» ይ።
የሱስኒ ግቶ ሶልቴ
28የሱስ ኤስ ባሮን ማኬና ናጙሪን ዎናኔን ኦርፎ ጴጥሮስኒን፥ ዮሀኒስናዋ ያቆብንና ዞንስሬ ሀኦ ሺጶናክ እሳ ኣምታ ኬስ። 29ኤስታክ ሺጴፌን ስኒባስ ግቶባስ ሶልቴ። ማምባስ ደይ ፎሬራ ፓልፓሊ። 30ጌሬጌሬ ሄፕ አሱ ሙሴናዋ ኤልያስና የሱስኔን ኡጰሬ ዎሉምሴቴ። 31ኡልፍናክ አምማኖን ቤስቴሴሬ የሱስ የሩሳለሙክ ሻና ኤጴቶናማቶናዋ ክቱናማቶና ዎሉምሴሴቴ። 32ስኑንታኖ ጴጥሮስናዋ ባርኔን አነ ፌ ባሶና አፋይ ኤጳን ኩነቴር። ጉዝሴሬ የሱስኒ ኡልፍናሶንናዋ ባርኔን አነ ዎል ሌት ፌ ሄፕ አሱኒ ሜያኖና ብየቴ። 33ኤስ አነ ዎሉምሴት ፌ አሱኒ ሜያ የሱስኒስታን ኦር ኬሴሬ ሀሜፌ ካባሲክ ጴጥሮስ፦ «ዳሚሶ ሀንታ ፎስ እኖክ ማአሪዋ። ኬዝ ሀፎ ሀኡንዋ። እሳር ኔር፥ እሳር ሙሴኒር፥ እሳር ደይ ኤልያስኒር» ይ። ስኑንታኖ አዉ ማኬድፌናማቶ ኣነ አሩዌ።
34ጴጥሮስ ኤስ ባሮን ማኬፌን ሻሩ ያራ ባሶትን ይኒ። ሻሩስ ይኒፋና ካባሲክ ድጌሴቴ። 35ሻሩስ ካሞ፦ «ታ ኮርና ናታስ ሀኒስዋ። ባሪን ኦዶትዋ» ይፋ ካማ ያ። 36ኤስ ካማስ ኦድቴናኔን ኦርፎ የሱስ ባር ባር ቤስቴ። ናዎባሳክቶ ደይ ብየቴ ዉዛሶን ኤስ ካባሲክ ኦኒክኑ ማክሶኖይ ሻክሴቴ።
የሱስ ኪና አያና ባሳስ ሀእና ናስን ፋቲ
(ማት. 17:14-18፤ ማር. 9:14-27)
37ዎኖትር ዎኖ ኣማስታን ኬርሴቴኔን ኦርፎ ሾዎ ዳራ የሱስኒክ ሁጰ። 38ኤስ ዳራሳ ጋነስን እሳ አሱ ኤካ ይት ቻጊ፦ «አስሲኛኖ፥ ሀን ባር ታክ እሳ ናታዋ፤ ያራ ብያታክ ሺጴፋዉጙዋ። 39ኪና አያናስ ባሪን ቻግሲር። ዳስታክ ጋንስራ ደይ ቶኮናክ ዛግራ ጉሳ ካርአሪ። አቱባሶን ማዛስራ ሚርኤናኔን ኦርፎ አካማ ሻናክ ቤይፋ። 40ነ ናዎሳክቶ ኤስ ኪና አያናሶን ናሳስን ክሶነክ ሺጴና ኣነ ችሞቶ።»
41የሱስ ኤስታ ፌ ዳራስን፦ «አማንቶኒት ፎንቶ ኤሊጛ ኮኒቶ፥ ኣጌኔን ካርአ ንቶኔን አነ ፎናሪ? ኣጌኔን ካርአ ንቶትን ፋ ኩናሪንሶ? ናኔስን ሀጝ ቴሸቦ» ይ።
42ናስ ሀጝ የሱስኒክ ታእሴፌና ካባሲክ ኪና አያናስ ናስን ዳስታክ ጋንስን ቶኬ። ስኑንታኖ የሱስ ኪና አያናሶን ኬእሬ ናስን ፋትሬ አባባሲክ እሚ። 43አሱኒ ሜያ ዙቴሬ ሀኦሲ አካማ ሁግናኖን ብየሴቴ ቦርአ ዲንቀሴቴ።
የሱስ ባሳ ክቱስ ቾዋኖን ሄፕሳ ማኬ
(ማት. 17:22-23፤ ማር. 9:30-32)
አሱ ዙቴሬ የሱስ ዛግና ዉዛሲክ ዲንቀሴፌን የሱስ ናዎባሳክቶኒክ ኤካ ይ፦ 44«ሀን ማኬፋና ካማሶን ጋዝግራ ኦዶትዋ። አሱኒ ና አሱኒ ሜኒ ኩሹስ አቴሬ እምቶኒርዋ» ይ። 45ስኑንታኖ ኤስ ባር ማኬና ባር ኣነ ባሶክ ጋሎዋ። ኤስ ዎላስ ኣቾ ቾዋኖን አሪሶነክ ኣነ ችሞቶ። ዎልግሬ ማምሱክ ደይ ድጌሴቴ።
አሪክር ኦንሶ
(ማት. 18:1-5፤ ማር. 9:33-37)
46ናዎባሳክቶኒ ጋነሲ፦ «እንኖስን ኦንሶ አሪክሪ?» ኡኒ ካራካሮ ካቢ። 47ስኑንታኖ የሱስ ባሶ ንብባሲ ሳፋራኖን አሪፋት እሳ ጋሮ ናኒን ቴሸሬ ቴሽባ ዬት። 48ኤስታን ባሶክ፦ «ሀን ጋሮ ናስን ታ ሱናሲክ ኤጴቴ ባር ኦኑ ስንፋናነ ታን ኤጴቶናዋ። ታን ኤጴቴ ባር ዎሲ አባታስን ደይ ኤጴቶናዋ። ንቶ ጋነያስን አቴስ ዙታምንትሴ አሲስታን አሪክርዋ» ይ። 49ዮሀኒስ ደይ የሱስኒን፦ «ዳሚሶ፥ እሳ አሱ ነ ሱናሲክ ኪና አያናሶን አሱኒስኒ ክስፌን ቢራ እኖኔን አነ ስና ቤይና ቦርአ ካልንዋ» ይ።
50የሱስ ዎልግሬ፦ «ንቶትን ኦምቶኖይ ባር ዙቴሬ ንቶኔን አነ ስንና ቦርአ ካላትታዋ» ይ።
ሳማርያኪ አሱኒ ሜያ የሱስኒን ኤጴቶ ቤየቴ
51የሱስ ደን ሳማ ሀማና ዎና ካርባሴ የሩሳሌም ሀማናክ ቡድሬ ካቢ። 52ባሳስታን ዜምሜ ስና ሀሚን ዎስኒን ጋፍኪ። ባሶ ደይ ሾልሱሶን ዙትሬ ሆሱሶነክ ሳማሪያኪ ፋ እሳ ኬኤስ ካርኤቴ። 53ስኑንታኖ የሩሳሌም ሀሚንር ስኒባሶ አራት አሱኒ ሜያ ኣነ ኤጴቶሶቶ። 54ናዎባሳስን ያቆብናዋ ዮሀኒስና ኤስ ባሮን ብያት፦ «ዳሚሶ፥ ደን ሳማን ጌያ ኬሬራ ባሶትን ኪቹናክ አጃጆንክ ማእ ኡታሮሶ?» ይ።
55ስኑንታኖ የሱስ የርቀሬ ባሶትን ኬእ። [አሮ ቴሳ አያና ንቶኔን አነ ፋናማቶ ኣነ አሩዌትዋ። አሱኒ ና ዬናስ አሱኒ ካኒ ፋቱክታኖ ትሽኩክታዋ።] 56ኤስታን ካብሴሬ ኦማ ኬኤስ ሀሜቴ።
የሱስኒ ኣነ ሀማ ዋጋ ካስሲር
(ማት. 8:19-22)
57የሱስናዋ ናዎባሳክቶና ኡጉነ ሀሜፌን እሳ አሱ፦ «ነ ሀሚታ ሀሚታስ ነኔን አነ ሀማናክ ሾሌፋኡጙዋ» ይ።
58የሱስ ዎልግሬ፦ «ቦዋሲክቶ ዶእባ ፋርዋ። ካሳስ ደይ ኬባ ፋርዋ፥ ስኑንታኖ አሱኒ ና ቴትባሶኑ ቴሱና ድምባ ኣፋዋ» ይ።
59ደይ ኦም አሱኒን፦ «ታኔን ሀሚንዋ» ይ። አሱስ ደይ፦ «ዳሚሶ፥ ዜምማ ሀማ አባታስን ካባሮናክ ማእ ኡዋ» ይ።
60የሱስ ዎልግሬ፦ «ክቱኒ ሜያ ክቱቤሲሶን ካባርሶነክ ቤይዋ። ስኑንታኖ ነ ሀማ ሀኦሲ ታቶኒ ቾዋኖን ማኮዋ» ይ።
61ኦም አሱ ደይ፦ «ዳሚሶ ነኔን አነ ሀማናዋ። ስኑንታኖ ዜምማ ሀማ ታክ ኬርክ አሱኒ ሜያኖን ማርኦን ፎቲ ኡናክ ማእ ኡዋ» ይ።
62የሱስ ደይ፦ «ጋቹኒ ቦዳ ኤጳት ኦርፎ የርቀፌ አሱ ሀኦሲ ታቶክ ሾልሱቴዋ» ይ።
Currently Selected:
:
Highlight
Share
ਕਾਪੀ।
Want to have your highlights saved across all your devices? Sign up or sign in
The word for the world Ethiopia