Remarya 4
4
Har o Devel o Abrahames an o čačepen čivas
1Kova hi yaake har pash maro phouro dadeste, o Abrahameste, kolestar i bibolde venna. Har vas lo čačo glan o Debleskre yaka? 2Kras lo lauter, hoy mishto hi? Palle nay sharals pes lo glan i menshende, gar glan o Debleste. 3Hoy hi činlo an o Debleskro lab? Kote hi tardo: O Abraham patsas o Debles, oun doleske čivas o Devel les an o čačepen.
4I mensho, kay marell pes tele, te vell lo čačo, hi har i boudepaskro, kay hounte boudrella, te vell lo playsedo. Leskre love lell lo gar čičeske. 5I mensho, kay patsell ap o Debleste, hounte marell pes gar tele, te vell lo čačo. Leskro patsepen čivell les an o čačepen. Yob patsell ap koleste, kay krell i čilačen čačo. 6Yaake rakras o baro ray David i barht vin pral kolende, kolen o Devel čačo kras, ninna te kran le gar lauter, hoy mishto hi.
7O David penas: Barhtelo hi kolla, kolenge i doosh#4:7 doosh péché, faute krik lino vas, oun kolengro čilačepen o Devel bistras. 8Barhtelo hi ko mensho, koleske o Devel leskro čilačepen gar glan i yaka rikrella.
9Koy barht hi gar kolenge kokres, kay hi činlo ap pengro mass. Na-a. Koy barht hi ninna kolenge, kay hi gar ap o mass činlo. Kova hi yaake, har me t'menge penom: O Abraham patsas o Debles, oun doleske čivas o Devel les an o čačepen. 10Poučau t'mendar: Havo tsiro čivas o Devel les an o čačepen? Čivas lo les an o čačepen ap ko tsiro, kay yob ap o mass činlo vas? Na-a. Yob čivas les an o čačepen, har yob gar ap o mass činlo his.#4:10 dik: 1. Mose 15:1-6
11Činlo vas o Abraham, te vell diklo: Yob hi čačo dran o patsepen, hoy glan kava tsiro an leste his.#4:11 dik: 1. Mose 17:1-14 Doleske vas lo kharedo: O dad lauterendar, kay patsenn ap o Debleste, ninna te hi le gar ap o mass činlo. Lengro patsepen čivell len an o čačepen. 12Yob hi ninna o dad kolendar, kay hi činlo ap o mass, te djivenn le an o patsepen yaake, har o Abraham djivas glan ko tsiro, kay yob ap o mass činlo vas.
O Abrahameskro patsepen
13Glan rah tsiro das o Devel o Abrahames peskro lab, te lenn leskre čave i tseli phoub. Ap ko tsiro penas o Devel leske gar: Tou te kreh lauter, hoy toutar kamau, palle leh tou kova halauter.
Na-a. Yob penas leske: Tou patsal ap mande, doleske hal čačo glan mande.
14Te lans kolla i tseli phoub, kay rikrenn pen ap o Moseskre laba, palle vals o patsepen či moldo. Oun ko lab, hoy o Devel o Abrahameske das, vals vitar či moldo.
15Te djinell yek gar, hoy o Devel lestar kamella, oun krell i čilačo koova, nay djinell lo gar, kay kova čilačo hi. Kolla, kay djinenn, hoy o Devel lendar kamella oun krenn kova gar, pral kolende vell o Debleskri rholi. Yaake anenn o Moseskre laba, hoy menge penenna, hoy o Devel mendar kamella, čačepah o Debleskri rholi pral i menshende.
16Doleske krell o Devel kolen čačo, kay ap leste patsenna. Leskro čačepen dell o Devel čičeske lauterenge, kay ap leste patsenna. Yaake ačell ko lab, hoy yob o Abrahameste das, lauterenge, kay venna pal o Abrahameste, i biboldenge har kolenge, kay djivenn dran o patsepen har o Abraham. Kova hi o dad mendar lauterendar. 17Yaake hi činlo an o Debleskro lab: Me krom tout o dad boud menshendar an boud themma.#4:17 dik: 1. Mose 17:5
O Abraham dikas ap o Debleste oun patsas, te nay krell o Devel i moulen djido, oun nay krell kova, hoy gomme gar koy his.
18O Devel penas o Abrahameske: Tou leh i čaves. Kolestar venna boud boud menshe, yaake boud, te djivenn le an boud themma.
Ninna te dikas o Abraham či kolestar, hoy o Devel leske penas, patsas lo o Debles. 19Ap ko tsiro his o Abraham sheel bersha phouro. Leskri romni Sara his ninna boud phouro. Ninna te dikas o Abraham, har phouro yon his, ačas lo zorelo an o patsepen. 20Yob rikras pes ap kova, hoy o Devel leske penas, oun yob patsas gar i paash djiyestar. Yaake vas leskro patsepen gomme zorleder. Oun yob sharas o Debles.
21Peskro tselo djiyeha djinas lo, o Devel nay krell kova, hoy yob penas. 22Doleske čivas leskro patsepen les an o čačepen glan o Debleste. 23Kova vas gar leske kokres an i liil činlo. 24Kova vas ninna menge činlo, kay patsah ap o Debleste. Kova kras o Yezouses, maro rayes, i moulendar djido. Mer te djinas: Maro patsepen čivell men ninna an o čačepen. 25O Yezous Kristo hi kova, koles o Devel bičras, te merell lo menge, oun te lell lo mari doosh mendar krik. Oun o Devel kras les i moulendar djido, te nay krell lo men čačo glan leste.#4:25 dik: 2. Korintarya 5:21
Currently Selected:
Remarya 4: Sint-Man2024
Highlight
Share
ਕਾਪੀ।
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.