1. Timoteo 5
5
I phoure oun i terne patsle
1Ma činge ap i phoureste! Tou te peneh o phouro morsheske, kay kova gar mishto hi, hoy yob kras, palle rake leha, har te vals yob tiro dad! Oun i terne morshentsa rake, har te vans le tire phrala!
2Rake i phouri djouvyah, har te vals li tiri day! Rake i terne djouvyentsa, har te vans le tire phenya, oun kre kova i djoudjo djiyeha!
I patsle djouvya, kolengre romma bouder gar djivenna
3Kanna rakrau pral kol djouvyende, kolengre romma bouder gar djivenna. De yak, te vell kolen doha djipaske, kay hi len čačepah kek menshe, kay lenge koy hi. 4Te hi kol djouvyen čave, čavengre čave, hounte venn kolla lenge koy. Yaake sikrenn yon, te patsenn le ap o Debleste. Oun yon parkrenn pen pash pengri day oun pengri mami, hoy kolla lenge lauter kran. Kova hi mishto glan o Debleskre yaka. 5I patsli djouvel, kay hi lat bouder kek rom, vitar kek vavar menshe, kolake hounte venn t'mer koy. Koya dikell ap o Debleste kokres oun mangell lestar, te dell lo lat doha djipaske. Yoy mangell les i tselo djiyestar o dives oun i rati, oun moukell gar tele.
6Hi vavarčandes pash i djouvyate, kolakro rom bouder gar djivella, oun kay dikell ap peste kokres, te vell lat i shoukar djipen. Kolakro patsepen hi moulo.
7Pen i patslenge, te djivenn le pal kal laba, te hatsell kek i doosh ap lende! 8Koon gar peskre menshenge koy hi, oun kolenge, kay pash leste an o kheer djivenna, kova nashras peskro patsepen, oun hi har yek, kay patsell gar ap o Yezous Kristeste.
9Kanna rakrau pral ko liil, kay i laba kol djouvyendar dren činlo venna, kolakro rom bouder gar djivella. Te hi yek lendar terneder har shob-deesh bersh (60), ma čin lakro lab pre! Koya, kay vell dren činlo, kolat hounte his yek rom. 10Vavar menshe hounte dikenn ap late, te kras li lačo koova, oun te tserdas li peskre čaven mishto pre. Yon hounte dikan, te las li menshen pash peste pre, oun te thovas li i patslenge i herya. Yon hounte dikan, te his li kolenge koy, kolen i pharo djipen hi, oun te kras li hako lačo koova.
11Kanna rakrau i terne djouvyendar kolengre romma bouder gar djivenna. Ma čin kolengre laba an ko liil! Yon nay kamans boudeder pale i romes te lell, har te venn le o Yezous Kristeske koy. 12Yaake rikrenn le gar pengro lab, hoy yon o Yezous Kristeste dan#5:12 Kol djouvya, kolengre laba dren činlo hi an ko liil, kolla penan, te kamenn le o Yezous Kristeske kokres koy te vell.. Oun doleske anenn le doosh ap pende. 13Kal terne djouvya kamenn bouder gar te boudrell, oun yon djan dran yek kheer an o vavar, oun čamrenn boud. Yon kamenn lauter feteder te djinell, oun rakrenn yaake, hoy gar mishto hi. 14Doleske kamau, te romedinerenn kol terne djouvya pale, te lenn yon čaven, oun te boudrenn yon an pengro kheer, yaake te nay penell kek djoungelo koova pral i patslende. 15Djinau savendar, kolla moukan o čačo drom, oun djan o bengeske palla.
16Te hi i patsli djouvyat vavar djouvya an lakri familya, kolengro rom bouder gar djivella, hounte dikell yoy ap lende, te hi len doha djipaske. Kay boudi hi gar i boudi i tsele patslendar.
I patsle hounte venn kol djouvyenge koy, kay len kek menshe hi.
I phoureder mank i patslende
17Kanna rakrau pral kolende, kay hi kol phoureder mank i patslende, oun krenn pengri boudi mishto. I patsle hounte dikenn pre ap lende oun shounenn ap lende. Ninna hounte denn le len love. Kova penau boudeder kolendar, kay penenn i menshenge o Debleskro lab, oun sikrenn lende o Debleskro drom. 18An o Debleskro lab hi činlo: Te boudrell i firho touke, palle pande gar leskro mouy, te kamell lo te rhal!#5:18a dik: 5. Mose 25:4 Ninna hi činlo: O boudepaskro hi moldo, te vell lo playsedo.#5:18b dik: Louka 10:7
19Ma shoun ap yekeste, kay anell i doosh ap i phoureder pre, te hi gar douy, triin patsle koy, kay penenn kova nay ninna, hoy yob kras. 20Kolla, kay kran čilačo koova, kolen dess trad glan lauterende, te vell kol vavaren daar.
21Me penau touke zoreles glan o Debleste, oun glan o Yezous Kristeste, oun glan kol Debleskre bolepangre, te rikress tout ap ko koova, hoy me touke kanna penom! Pash hakeneste dja pal o čačepen! Ma tserde yekes glan o vavareste!
22Ma čip sik tire vasta ap yekeste pre! De yak, te vell i doosh#5:22 doosh péché, faute i vavarestar gar ap toute! Rike tiro dji djoudjo! 23Tou te piyeh pani, palle čore ninna mool dren! Kova hi mishto tiro pereske. Tou hal yaake boud nasselo.
24Denna menshe, kay lengri doosh diklo vella i vavar menshendar. Pash vavar menshende hi lengri doosh khatedo. O dives vella, kay lengri doosh diklo vella. 25Yaake hi ninna pash i menshende, kay krenn lačo koova. Pash yekeste nay dikell kova hakeno. Pash i vavareste hi kova khatedo. Vell i dives, kay vell o lačo koova diklo.
Currently Selected:
1. Timoteo 5: Sint-Man2024
Highlight
Share
ਕਾਪੀ।
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.