1. Tessalonikarya 1
1
Ap i patslende an o foro Tessalonika
1Mer, o Paulo, o Silvano oun o Timoteo, činah kava liil ap t'mende, kol patslende, kay venna khetne an o foro Tessalonika. T'mer patsenn ap o Debleste, maro dadeste, oun ap maro rayeste, o Yezous Kristeste. Lačepen oun barht t'menge!
T'maro patsepen sikrell hakeneste o Debleskro kamlepen
2Hako tsiro, kay mangah o Debles, parkrah men t'menge pash leste, maro dadeste. 3Hako tsiro, kay parkrah men pash leste, vell menge kova an o shero, hoy t'mer leske krenna an o patsepen oun an o kamlepen ap i menshende, oun har t'mer moukenn gar tele, te dikenn ap ko dives, kay vell maro ray, o Yezous Kristo, pale.
4Mire phrala, o Devel kamell t'men o djiyestar. Mer djinah, yob rodas t'men vin, te djivenn leha khetne. 5Har vam pash t'mende, oun penam t'menge o Debleskro lačo lab, koy penam gar leskro lab kokres, na-a, koy dikan t'mer ninna o Debleskri zoor an halauter, hoy yob mashkral t'mende kras. Oun o Debleskro Dourho rakras ap t'mende, oun t'mer hayvan, leskro lab hi čačo.
Ninna djinenn t'mer, har djivam maro djipen pash t'mende, oun sikram t'men o Debleskro drom. 6Oun kova, hoy dikan t'mer ap mende, kova krenn t'mer kanna ninna, oun djivenn yaake, har o ray Yezous djivas. Har shounan t'mer o Debleskro lab, patsan les oun hans barhtelo pral kova, ninna te kran i menshe t'menge o djipen phares. Koy barht das o Debleskro Dourho an t'mende. 7Kanna dikenn kol tsele patsle an i themma Macedonia oun Akaya ap t'mende, oun kamenn kova yaake te krell, har t'mer kova krenna.
8T'mendar djas o lačo lab o Yezousestar, maro rayestar, doureder, gar kokres an i themma Macedonia oun Akaya. Na-a, ninna an boud vavar themma shounan i menshe, har t'mer patsenn ap o Debleste. Yaake hounte penas mer lenge bouder či pral kova. 9Yon hi kolla, kay penenn i vavarenge, har lan t'mer men pash t'mende pre, har moukan t'maro phouro drom, te djan ap o Debleskro drom, oun mangenn bouder gar vavar koova an har o djido oun čačo Debles kokres.
10T'mer dikenn ap ko dives, kay vell o Debleskro čavo dran o bolepen pale. Kova hi o Yezous, koles kras o Devel i moulendar djido. Yob lell men dran o Debleskri rholi vin, hoy pral i menshende vella.
Currently Selected:
1. Tessalonikarya 1: Sint-Man2024
Highlight
Share
ਕਾਪੀ।
Want to have your highlights saved across all your devices? Sign up or sign in
Tous droits réservés
Le contrat de licence autorise une utilisation non commerciale du texte. Toutefois, les modifications du texte sont interdites. Le titulaire des droits, Romanes-Arbeit-Marburg e.V., doit être mentionné à chaque publication. Pour toute distribution commerciale, un éditeur doit demander l’autorisation écrite du titulaire des droits.