Mark 6
6
1Alubwi Yesu avila vovo, aṽya gô ntye yèmè. N’azôngyô yè n’iṉèngi yè.
2Gw’aziṽi ntyugu yi soṉo avakilyi yè gô nènja gô nagô yi soṉo. N’aṉag’awenge gw’ayogyô waô yè w’am̃ami awulya inè: Isam̃u yiṉo yi re n’ôma wiṉo y’avili na gweṉi? N’imya nde siṉo si re pô pa gôr’ôma wiṉo, ni lemba yiṉo yi dendô n’ago mè sè? 3Wiṉo arang’ôkèngèkèngè, y’ômwaṉa wi Marya, na ya mwô’ngwè wi Yakobu, ni Yôsèf, ni Yudi, ni Simôn? Ni yombi yè yi zele vèṉo gôre zwè? N’avendyô waô g’ômwanji wè.
4Ndô Yesu awulinyi waô inè: Ôvogisi e zele n’ôlubô kaô gw’iṉongo nyèmè, na gô mbuṽe yèmè, na gô nagô yèmè. 5N’ayè e re jolye gô dend’elemby’edu vovo, kaô gô taly’ago mè gôr’aṉag’awèwo w’avegagi ni nkaṉi, ayinga waô. 6N’am̃ami yè g’ômwanja w’itwaṽekelyi saô. N’agèndi Yesu gw’inkala vingôvingô, aṉènjaga.
7Vovo aweyi yè igôm̃i n’aṽaṉi, avakilyi yè gô tôm̃a waô aṽaṉi aṽaṉi, aveṉi yè waô ngulu gô tômb’aṉiṉa m’isèkè. 8N’azômbyi yè waô inè, w’awong’ezom̃a g’ôgèndo waô, kaô ntôngô dadyè; arange puka, ge mpèmba, ge sika gw’itumbi yaô; 9ndô wi ga gènde n’intyôzô, w’awonga kè kôtô mbaṉi.
10N’awulinyi yè waô inè: Gô nagô edu yi be jingiṉô ṉwè, lwaṉaṉi vovo kaô aṉwè adubwa avila gô mbôra mè. 11Na j’adwaṉ’aṉagy’edu wi re w’awonga ṉwè ge pôganyô ṉwè, lubwaṉi avila vovo, ko palaṉi ntyèngè avila gw’intyôzô saṉi, ko yô dwaṉ’ôyeṉi gô sira waô. [Giligili mi bulinya ṉwè inè: Ntye yi Sôdoma na yi Gômora yi be dwaṉa n’azingô ma kwè gô ntyugu y’ijèkèlya vyagaṉô ni nkala mèyoṉo.]
12Agèndi waô, agambiṉa inè, aṉaga wi ga ṉige nkôndi. 13N’arômbi waô aṉiṉ’ambe am̃enge, n’agili waô agali gôr’aṉag’awenge w’avegagi n’inkaṉi ayinga waô.
14Ayogyô Erod y’ôga g’ômwanja wi Yesu, konde ini nyè ny’aliwô ny’ajagayagi, n’awulyi yè inè: Yôan‐Batist atôngwi avila gw’ijuwa, yeṉo lemba yiṉo yi dendô yè. 15Am̃ori w’awulyi nè: Ayè n’Eliya. N’am̃ori nè: Ayè n’ôvogisi, ga ôm̃ori gôr’ivogisi. 16Ndô Erod, gw’ayogyô yè yeṉo, awulyi nè: Wiṉo ne Yôan y’azèryô myè ômpele, atôngwi avila gw’ijuwa.
17Konde Erod ayèmè aliwô atôm̃i gô kôtize Yôan, agôrè awelè gô ntyôgô g’ômwanja w’Erôdyas, y’ômwantô wi Filipi, ya mwô’ngi yè, konde aliwô ajômbi yè, 18ko Yôan bulinyè inè: E zele kwèkwè gôre wè gô dwaṉa n’ômwantô wa mwô’ngi yo. 19Ndô Erôdyas aṽendiṉi Yôan aṽela gô jôṉè. 20Ndô e re jolye, konde Erod aryeṉi Yôan, konde amyeṉi nè, ayè ôma w’ôgôre n’ômbya; n’avenjavenjè yè, na gw’ayogyô yè yè, alend’isam̃u imyenge, avôganyô yè ni mbya.
21N’aṽyeṉi ntyugu mbya gw’avangi Erod ôgeṽe wi ntyugu y’ayanyô yè gôr’ivangiṉi yè, na gôr’ikômanda na gôr’ayôgô wi Galile. 22Ayingiṉi ômwaṉ’ômwantô w’Erôdyas gô ñanja; ayiṉi yè, arondye Erod na waô w’avegagi dwaṉa pa baru na yè gw’inya. N’awuliny’ôga ôlèngwaṉi nè: Ṽambya myè ezom̃a zi belô wè, gambèṉè mi be po zô. 23N’arô tangi yè ôrangô inè: Ezom̃’edu zi be belô wè, mi be po zô, kwanga gw’ereṉe z’ivendi nyam̃. 24N’agogwi yè, awulinye ngi yè inè: Mi ga ṽambye ande? Awiṉizi ngi yè inè: Ewônjô zi Yôan‐Batist. 25N’azunge jingiṉi yè nèganèga gôr’ôga, aṽambyè inè: Mi bela nè, va myè pelè ewônjô zi Yôan‐Batist gw’epèlè. 26Ayeṉi ôga ekèṽ’evôlô, ndô g’ômwanja w’irangô yè na g’ômwanja wa waô w’avegagi dwaṉa pa baru na yè gw’inya, e pa jivira gô nim̃iṉè zô. 27Azunge tôm̃i ôga sozè, azômbyè gô bag’ewônjô zi Yôan‐Batist. 28N’agèndi sozè azère Yôan ômpele gô nagô yi ntyôgô, aṽag’ewônjô gw’epèlè. N’aveṉi yè zô gôr’ôlèngwaṉi, n’ôlèngwaṉi aveṉi zô gôre ngi yè. 29Gw’ayogyô iṉèngi yi Yôan yeṉo, y’aṽyeṉi gô bong’ebende zè, aṽèṉa zô g’ôrônginô.
30Alataṉi rôm̃i gôre Yesu, arakilyè isam̃u yôdu nt’alendagi waô ni nt’aṉènjagi waô. 31N’awulinyô waô ne Yesu inè: Ôvirôṉi gô mbôra yi ntyorya gw’itôve, ko jowaṉi kwè. Konde avegagi awenge kèndaga ni mbyagaga, ko w’alèng’egômbe vangaṉe gô nya. 32Yeṉo alubwi waô n’elende, agènde ntyorya gô mbôra y’itôve. 33Aṉag’awenge w’ayeṉi waô wi kènda amya waô, n’agèndi waôdu ta ni mangô ni ntye avila gw’inkala sôdu avyagaṉa waô ni bôsô. 34Gw’aralwi yè avila gw’elende, Yesu ayeṉ’aṉag’awenge, avôgiṉa waô, konde w’avegagi g’adombè mi re mi zele n’ôvenjavenji; n’avakilyi yè gô nènja waô isam̃u imyenge.
35Gw’arweṉi ôwenja pyèrè gô jila, iṉèngi yè y’aṽyeṉi gôre yè, awulya inè: Yiṉo mbôra y’itôve, n’ôwenja w’akèndi; 36wiza waô, ko waô kènda gw’impindi na gw’inkala si re vingôvingô, agôliṉ’ikuṽi yaômè ezom̃a zi nya. 37Yesu awiṉizi waô inè: Vaṉi waô inya aṉwèmè. Ndô w’awulinyi yè inè: Azwè ga gènde gô kôl’inkam̃a s’ifura mbaṉi ni mpèmba ava waô gô nya? 38N’awulinyi yè waô inè: Amunga ntangô sèṉi mi re na ṉwè? Ge baleṉi. Na gw’amyeṉi waô w’awiṉizi nè: Ataṉè, ni ntyuè mbaṉi. 39Vovo azômbyi yè waô gô dwaṉiz’aṉaga waôdu igondo barugebaru gw’am̃aṉi ambezô, 40n’alwaṉi waô barugebaru ôgondo nkam̃a n’ôgondo agôm̃i ataṉè. 41Awongi yè amunga mè ataṉè mi mpèmba, n’intyuè mèsoṉo mbaṉi, n’arômbiṉi yè antyo mè g’ôrôṽa, av’akeṽa. N’am̃oguṉi yè amunga, ava mô gôr’iṉèngi yè gô dôṽya mô ageriṉa mô aṉaga. N’ageri yè kè intyuè mbaṉi gôr’aṉaga waôdu. 42Anyeṉi aṉaga waôdu ayôra kè, 43n’agum̃inyi waô nkizi yi mpèmba y’arigaṉi igôm̃i ny’itôndô n’itôndô mbaṉi, n’intyuè kè. 44Waô w’anyeṉi amunga mi mpèmba w’avegagi ntozèny s’aṉôm̃e ôtaṉè.
45Azômbyi yè iṉèngi yè pelè gô kweṉa gw’elende alalya gô bôsô yè gô ntye mori, gô Bètsayda, gô fwiṉizè aṉaga. 46Ayè fwiza p’aṉaga agèndi gô nômba gô kambiṉa.
47Gw’ayil’ôwenja, elende z’avegagi gô mbegare y’eliṽa, ni Yesu avegagi ay’anka gô ntye. 48Ayeṉi yè waô wi jela n’inuga; konde ômpunga w’avegagi akôm̃a na waô. Ayenjiṉa aṽyeṉi yè gôre waô njarag’eliṽa, n’arô pyagaṉi yè waô. 49Gw’ayeṉi waô yè e jar’eliṽa, w’avikilyi nè, ibambô, n’awôgiṉi waô; 50konde waôdu w’ayeṉi yè aratam̃iṉa. N’azunge kambi Yesu na waô, awulinya waô inè: Zindyaṉ’irèm̃a, ne myè, aryaṉi! 51N’agweṉi yè gôre waô gw’elende, n’ayèk’ômpunga. Yeṉo am̃ami waô pôlômè gw’ikuṽi yaô; 52konde wi re kôtize g’ômwanja w’elemba z’amunga mi mpèmba, konde irèm̃i yaô y’avegagi jola pa.
53Waô dalya p’eliṽa w’aṽyeṉi gô ntye yi Genezarèt, n’ayèzi waô g’ôzègè. 54Na gw’aralwi waô avila gw’elende, aṉaga w’amyeṉi Yesu pelè, 55avali waô mangô gô ntye mèyoṉo yôdu vingôvingô, avakilya gô twaṉa mongi wi jogw’inkaṉi gw’idô, gô mbôra y’ayogyô waô inè, are vovo. 56Gô mbôry’edu y’aṽyenyô yè, gw’inkal’inyangô, na gw’inkal’impôlô ge gw’impindi, w’alimbiṉi mongi jogo gw’agala, agwenè inkolo inè, wi ga wate vangaṉe anyègè mi ngoy yè. Na waôdu w’awati yè w’arôli.
Currently Selected:
Mark 6: MYE
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.
Mark 6
6
1Alubwi Yesu avila vovo, aṽya gô ntye yèmè. N’azôngyô yè n’iṉèngi yè.
2Gw’aziṽi ntyugu yi soṉo avakilyi yè gô nènja gô nagô yi soṉo. N’aṉag’awenge gw’ayogyô waô yè w’am̃ami awulya inè: Isam̃u yiṉo yi re n’ôma wiṉo y’avili na gweṉi? N’imya nde siṉo si re pô pa gôr’ôma wiṉo, ni lemba yiṉo yi dendô n’ago mè sè? 3Wiṉo arang’ôkèngèkèngè, y’ômwaṉa wi Marya, na ya mwô’ngwè wi Yakobu, ni Yôsèf, ni Yudi, ni Simôn? Ni yombi yè yi zele vèṉo gôre zwè? N’avendyô waô g’ômwanji wè.
4Ndô Yesu awulinyi waô inè: Ôvogisi e zele n’ôlubô kaô gw’iṉongo nyèmè, na gô mbuṽe yèmè, na gô nagô yèmè. 5N’ayè e re jolye gô dend’elemby’edu vovo, kaô gô taly’ago mè gôr’aṉag’awèwo w’avegagi ni nkaṉi, ayinga waô. 6N’am̃ami yè g’ômwanja w’itwaṽekelyi saô. N’agèndi Yesu gw’inkala vingôvingô, aṉènjaga.
7Vovo aweyi yè igôm̃i n’aṽaṉi, avakilyi yè gô tôm̃a waô aṽaṉi aṽaṉi, aveṉi yè waô ngulu gô tômb’aṉiṉa m’isèkè. 8N’azômbyi yè waô inè, w’awong’ezom̃a g’ôgèndo waô, kaô ntôngô dadyè; arange puka, ge mpèmba, ge sika gw’itumbi yaô; 9ndô wi ga gènde n’intyôzô, w’awonga kè kôtô mbaṉi.
10N’awulinyi yè waô inè: Gô nagô edu yi be jingiṉô ṉwè, lwaṉaṉi vovo kaô aṉwè adubwa avila gô mbôra mè. 11Na j’adwaṉ’aṉagy’edu wi re w’awonga ṉwè ge pôganyô ṉwè, lubwaṉi avila vovo, ko palaṉi ntyèngè avila gw’intyôzô saṉi, ko yô dwaṉ’ôyeṉi gô sira waô. [Giligili mi bulinya ṉwè inè: Ntye yi Sôdoma na yi Gômora yi be dwaṉa n’azingô ma kwè gô ntyugu y’ijèkèlya vyagaṉô ni nkala mèyoṉo.]
12Agèndi waô, agambiṉa inè, aṉaga wi ga ṉige nkôndi. 13N’arômbi waô aṉiṉ’ambe am̃enge, n’agili waô agali gôr’aṉag’awenge w’avegagi n’inkaṉi ayinga waô.
14Ayogyô Erod y’ôga g’ômwanja wi Yesu, konde ini nyè ny’aliwô ny’ajagayagi, n’awulyi yè inè: Yôan‐Batist atôngwi avila gw’ijuwa, yeṉo lemba yiṉo yi dendô yè. 15Am̃ori w’awulyi nè: Ayè n’Eliya. N’am̃ori nè: Ayè n’ôvogisi, ga ôm̃ori gôr’ivogisi. 16Ndô Erod, gw’ayogyô yè yeṉo, awulyi nè: Wiṉo ne Yôan y’azèryô myè ômpele, atôngwi avila gw’ijuwa.
17Konde Erod ayèmè aliwô atôm̃i gô kôtize Yôan, agôrè awelè gô ntyôgô g’ômwanja w’Erôdyas, y’ômwantô wi Filipi, ya mwô’ngi yè, konde aliwô ajômbi yè, 18ko Yôan bulinyè inè: E zele kwèkwè gôre wè gô dwaṉa n’ômwantô wa mwô’ngi yo. 19Ndô Erôdyas aṽendiṉi Yôan aṽela gô jôṉè. 20Ndô e re jolye, konde Erod aryeṉi Yôan, konde amyeṉi nè, ayè ôma w’ôgôre n’ômbya; n’avenjavenjè yè, na gw’ayogyô yè yè, alend’isam̃u imyenge, avôganyô yè ni mbya.
21N’aṽyeṉi ntyugu mbya gw’avangi Erod ôgeṽe wi ntyugu y’ayanyô yè gôr’ivangiṉi yè, na gôr’ikômanda na gôr’ayôgô wi Galile. 22Ayingiṉi ômwaṉ’ômwantô w’Erôdyas gô ñanja; ayiṉi yè, arondye Erod na waô w’avegagi dwaṉa pa baru na yè gw’inya. N’awuliny’ôga ôlèngwaṉi nè: Ṽambya myè ezom̃a zi belô wè, gambèṉè mi be po zô. 23N’arô tangi yè ôrangô inè: Ezom̃’edu zi be belô wè, mi be po zô, kwanga gw’ereṉe z’ivendi nyam̃. 24N’agogwi yè, awulinye ngi yè inè: Mi ga ṽambye ande? Awiṉizi ngi yè inè: Ewônjô zi Yôan‐Batist. 25N’azunge jingiṉi yè nèganèga gôr’ôga, aṽambyè inè: Mi bela nè, va myè pelè ewônjô zi Yôan‐Batist gw’epèlè. 26Ayeṉi ôga ekèṽ’evôlô, ndô g’ômwanja w’irangô yè na g’ômwanja wa waô w’avegagi dwaṉa pa baru na yè gw’inya, e pa jivira gô nim̃iṉè zô. 27Azunge tôm̃i ôga sozè, azômbyè gô bag’ewônjô zi Yôan‐Batist. 28N’agèndi sozè azère Yôan ômpele gô nagô yi ntyôgô, aṽag’ewônjô gw’epèlè. N’aveṉi yè zô gôr’ôlèngwaṉi, n’ôlèngwaṉi aveṉi zô gôre ngi yè. 29Gw’ayogyô iṉèngi yi Yôan yeṉo, y’aṽyeṉi gô bong’ebende zè, aṽèṉa zô g’ôrônginô.
30Alataṉi rôm̃i gôre Yesu, arakilyè isam̃u yôdu nt’alendagi waô ni nt’aṉènjagi waô. 31N’awulinyô waô ne Yesu inè: Ôvirôṉi gô mbôra yi ntyorya gw’itôve, ko jowaṉi kwè. Konde avegagi awenge kèndaga ni mbyagaga, ko w’alèng’egômbe vangaṉe gô nya. 32Yeṉo alubwi waô n’elende, agènde ntyorya gô mbôra y’itôve. 33Aṉag’awenge w’ayeṉi waô wi kènda amya waô, n’agèndi waôdu ta ni mangô ni ntye avila gw’inkala sôdu avyagaṉa waô ni bôsô. 34Gw’aralwi yè avila gw’elende, Yesu ayeṉ’aṉag’awenge, avôgiṉa waô, konde w’avegagi g’adombè mi re mi zele n’ôvenjavenji; n’avakilyi yè gô nènja waô isam̃u imyenge.
35Gw’arweṉi ôwenja pyèrè gô jila, iṉèngi yè y’aṽyeṉi gôre yè, awulya inè: Yiṉo mbôra y’itôve, n’ôwenja w’akèndi; 36wiza waô, ko waô kènda gw’impindi na gw’inkala si re vingôvingô, agôliṉ’ikuṽi yaômè ezom̃a zi nya. 37Yesu awiṉizi waô inè: Vaṉi waô inya aṉwèmè. Ndô w’awulinyi yè inè: Azwè ga gènde gô kôl’inkam̃a s’ifura mbaṉi ni mpèmba ava waô gô nya? 38N’awulinyi yè waô inè: Amunga ntangô sèṉi mi re na ṉwè? Ge baleṉi. Na gw’amyeṉi waô w’awiṉizi nè: Ataṉè, ni ntyuè mbaṉi. 39Vovo azômbyi yè waô gô dwaṉiz’aṉaga waôdu igondo barugebaru gw’am̃aṉi ambezô, 40n’alwaṉi waô barugebaru ôgondo nkam̃a n’ôgondo agôm̃i ataṉè. 41Awongi yè amunga mè ataṉè mi mpèmba, n’intyuè mèsoṉo mbaṉi, n’arômbiṉi yè antyo mè g’ôrôṽa, av’akeṽa. N’am̃oguṉi yè amunga, ava mô gôr’iṉèngi yè gô dôṽya mô ageriṉa mô aṉaga. N’ageri yè kè intyuè mbaṉi gôr’aṉaga waôdu. 42Anyeṉi aṉaga waôdu ayôra kè, 43n’agum̃inyi waô nkizi yi mpèmba y’arigaṉi igôm̃i ny’itôndô n’itôndô mbaṉi, n’intyuè kè. 44Waô w’anyeṉi amunga mi mpèmba w’avegagi ntozèny s’aṉôm̃e ôtaṉè.
45Azômbyi yè iṉèngi yè pelè gô kweṉa gw’elende alalya gô bôsô yè gô ntye mori, gô Bètsayda, gô fwiṉizè aṉaga. 46Ayè fwiza p’aṉaga agèndi gô nômba gô kambiṉa.
47Gw’ayil’ôwenja, elende z’avegagi gô mbegare y’eliṽa, ni Yesu avegagi ay’anka gô ntye. 48Ayeṉi yè waô wi jela n’inuga; konde ômpunga w’avegagi akôm̃a na waô. Ayenjiṉa aṽyeṉi yè gôre waô njarag’eliṽa, n’arô pyagaṉi yè waô. 49Gw’ayeṉi waô yè e jar’eliṽa, w’avikilyi nè, ibambô, n’awôgiṉi waô; 50konde waôdu w’ayeṉi yè aratam̃iṉa. N’azunge kambi Yesu na waô, awulinya waô inè: Zindyaṉ’irèm̃a, ne myè, aryaṉi! 51N’agweṉi yè gôre waô gw’elende, n’ayèk’ômpunga. Yeṉo am̃ami waô pôlômè gw’ikuṽi yaô; 52konde wi re kôtize g’ômwanja w’elemba z’amunga mi mpèmba, konde irèm̃i yaô y’avegagi jola pa.
53Waô dalya p’eliṽa w’aṽyeṉi gô ntye yi Genezarèt, n’ayèzi waô g’ôzègè. 54Na gw’aralwi waô avila gw’elende, aṉaga w’amyeṉi Yesu pelè, 55avali waô mangô gô ntye mèyoṉo yôdu vingôvingô, avakilya gô twaṉa mongi wi jogw’inkaṉi gw’idô, gô mbôra y’ayogyô waô inè, are vovo. 56Gô mbôry’edu y’aṽyenyô yè, gw’inkal’inyangô, na gw’inkal’impôlô ge gw’impindi, w’alimbiṉi mongi jogo gw’agala, agwenè inkolo inè, wi ga wate vangaṉe anyègè mi ngoy yè. Na waôdu w’awati yè w’arôli.
Currently Selected:
:
Highlight
Share
ਕਾਪੀ।
Want to have your highlights saved across all your devices? Sign up or sign in
Published by the British and Foreign Bible Society in 1927.