Zakareya 3
3
Joshuwa nɛ Setani be asheŋ
1Nɛ n naŋ ku bɔrɛdare n wu bɔrɛmatapo nimuso Joshuwa nɛ e yil Enyɛnpe Ebɔrɛ na be malaika kutɔ nɛ Setani malɛ yil Joshuwa be jisoso m mata mo e shin nɛ e ku asheŋ n deŋi mo. 2Ndoŋ nna nɛ Enyɛnpe Ebɔrɛ be malaika na kaŋɛ Setani le: “Enyɛnpe Ebɔrɛ na e fiɛ fo so, Setani! Enyɛnpe Ebɔrɛ nɛ mbe kasha wɔ Jerusalɛm so na e fiɛ fo so. Kanyɛn ere du fanɛ kadɛdibi nɛ b pee edɛ to nna.”
3Joshuwa daŋ buu asɔ biriso nna a yil ndoŋ. 4Ndoŋ nna nɛ malaika na kaŋɛ basa nɛ b daa yil ndoŋ na le: “Men lara kanyɛn ere be asɔ biriso nɛ e buu ere.” Kumo be kaman nɛ e kaŋɛ Joshuwa malɛ le: “N lara fo alubi ashi fo so, ma alɛ beeŋ naŋ sa fo asɔbuuso popɔr nɛ fo buu.”
5Kede be kaman nɛ e naŋ kaŋɛ basa na fanɛ b ta neemu popɔr m mɛa Joshuwa be kumu so. Ndoŋ nna nɛ b ta asɔbuuso popɔr m buu mo nɛ malaika na yil a keni.
6Nɛ malaika na leŋ Joshuwa to ŋ kaŋɛ le: 7Enyɛnpetale Ebɔrɛ na yɛ: “Nɛ fo baa wora ma mbraana kasonu nsaa shuŋ ashuŋ nɛ meeŋ baa sa fo bre, meeŋ shin nɛ fo baa keni ma bɔrɛlambu na nɛ kumo be kelɔnɛ so. Ma alɛ beeŋ baa nu fo kabɔrɛkule fanɛ kananɛ mee nu emalaika nɛ b wɔ ŋ kutɔ ere be kabɔrɛkule na.” 8Amoso fo, Joshuwa nɛ fo la bɔrɛmatapo nimuso nɛ fo braana bɔrɛmatapoana nɛ b wɔ nfe, e nu nɛnɛ. Menyi so nɛ echefoso be asheŋ lela kikɛ beeŋ bɔla so m ba, ŋkpal loŋ so mee sha kelara ma kayɛrbi nɛ e la ma ewura laraso na efuli nna. 9Kejembu nɛ ŋ kɔ a nase Joshuwa be anishito ere kɔ mba ashunu nna. Meeŋ sibɛ kusɔ ko n deŋi kumo so nseŋ ta kachɛ koŋwule n lara kasawule ere so ebi be alubi ashi bumo so. 10Kachɛ na kaŋ fo ekama beeŋ kela n tre mo kurgepoana nɛ b ba chena n ji kekurge kagbenewushiso ashi bumo be ndibi sɔrso be afito.
Currently Selected:
Zakareya 3: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation