Maika 6
6
Asheŋ nɛ Enyɛnpe Ebɔrɛ na kɔ a gbiti Israɛlebi be asheŋ
1Nu kusɔ nɛ Enyɛnpe Ebɔrɛ na yɛ e kɔ a gbiti Israɛlebi na. E yɛ: “Men niŋi to n ta men be asheŋ n nase abeegboŋana be anishito nseŋ shin nɛ abeebi e nu kusɔ nɛ men kɔ nɛ men kaŋɛ. 2O abeegboŋ nɛ durnya be nsawule be egbaltɔlase nɛ a wɔtɔ mbaanaayɔ, men nu asheŋ nɛ Enyɛnpe Ebɔrɛ na kɔ a semaŋ mbe basa Israɛlebi na.”
3E yɛ “Ma basa, manɛ nɛ n wora menyi? Men kaŋɛ ma, n la esulɔ nna n sa menyi a? 4Ma e lara menyi nseŋ mɔlga menyi ashi kenyaya to ashi Ijipt be efuli so. Mosis nɛ Ɛɛrɔn nɛ Miriam nɛ n daŋ shuŋi fanɛ b ya juŋkpar menyi n lar ndoŋ. 5Ma basa, men baa nyiŋi kusɔ nɛ Mowab be ewura Balak daŋ kre kewora menyi nɛ kusɔ nɛ Biyɔɔ pibinyɛn Balaam daŋ kaŋɛ mo a laŋɛ menyi be kaplɛa so na. Men naŋ nyiŋi asheŋ nɛ e wora saŋɛ nɛ men lar Shitim a yɔ Gilgaal na nseŋ nyiŋi kananɛ ma, Enyɛnpe Ebɔrɛ na mɔlga menyi ale damta.”
Kashenteŋto be kasonu be asheŋ
6Manɛ bre nɛ meeŋ ta m ba Enyɛnpetale Ebɔrɛ nɛ e wɔ ebɔrɛso na kutɔ m ba bunyaŋ mo? N ta egbolu lela ga nɛ a ji nfɛ koko m ba lara sarga chɔɔso n sa mo a? 7N ta mbolpɔ ŋgboŋto ŋgboŋto ŋko ɔlif be ŋku nɛ e du fanɛ lɔr be bɔlɔ m ba mo kutɔ, k beeŋ par mo a? N ta ma wurkoŋnyɛn n lara sarga n sa mo ŋkpal ma alubi so a? 8Ayai, Enyɛnpe Ebɔrɛ na teŋ kaŋɛ anyi kusɔ nɛ k walɛ. Kusɔ nɛ e bee fin anyi kutɔ e la, kebaawora asheŋ nɛ amo be ekpa so nɛ kebaa ŋini kasha nsaa kɔ kamubrase a nu a sa mo.
9Nu nfe! Enyɛnpe Ebɔrɛ na bee kela a shoŋi Jerusalɛm be kadegboŋ na to ebi. E yɛ: “Men baa de kuwurkpabi na, nɛ esa nɛ e kɔ kumo to a ba na so. 10Kayu be asɔ nɛ men ta m bɔlɔ ebuana n yili nseŋ ta kapuni be ekurwa nɛ ŋ kishi amo be asheŋ ga na a ber asɔ. 11Nuso nɛ meeŋ tiŋ n ta m paŋ bumo nɛ baa ta kapuni be ekurwa a ber asɔ a sa basa? 12Damawuraana na bee puni betirpo nna nɛ ekama malɛ bee ku efɛ. 13Amoso n teŋ fara nɛ m mur menyi nna ŋkpal menyi be asheŋ lubi so. 14Menyeeŋ ji ajibi, ama menyi alɛ maaŋ moɛ. Menyeeŋ chala asɔ n yili, ama menyi alɛ maaŋ baa kɔ mpetɛ nɛ a yil. Ma, Enyɛnpe Ebɔrɛ na beeŋ shin nɛ bedoŋ e ba kɔ n suge amo kikɛ. 15Menyi beeŋ dɔ n duu, ama menyi maaŋ nya shɛŋ n teŋi. Menyeeŋ ta ɔlif be bibi n wora ŋku, ama menyi alɛ maaŋ nya ŋku na n wora shɛŋ. Menyeeŋ ku eyabra ŋko n daŋɛ nsa, ama menyi maaŋ nya yabra ŋko nsa n nuu. 16Le be asheŋ ere beeŋ ba menyi so nna ŋkpal men ka bɛ ewura Omri nɛ mo pibinyɛn, ewura Ehab be asheŋ lubi so so. Bumo be edaŋkare to nɛ men bee kute to. Amoso meeŋ shin nɛ men mur cheche nɛ ekama e baa tege nsaa mushe menyi fanɛ asɔ jiga na.”
Currently Selected:
Maika 6: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation