Maika 4
4
Enyɛnpetale na be kagbenewushi ka beeŋ ba kaplɛkama be asheŋ
1Lalaloge be nchɛ na to kebee nɛ
Enyɛnpe Ebɔrɛ be bɔrɛlambu na yil so na
e naŋ ba ki abee kikɛ to be kejeŋgreŋ ga.
K beeŋ baa du jeŋgreŋ a chɔ abee kikɛ nyam,
nɛ efuliana na kikɛ be basa e shile m ba kumo ase
2m ba kaŋɛ le:
“Men shin nɛ an dii
n yɔ Enyɛnpe Ebɔrɛ na be kebee na so,
n ya luri Israɛl be Ebɔrɛ na be bɔrɛlambu na to.
E beeŋ ŋini anyi kusɔ nɛ e bee sha fanɛ an wora;
nɛ an baa wora mbe aparsheŋ saŋkama.
Ŋkpal manɛ so, Enyɛnpe Ebɔrɛ na
be keŋini bee shi Jerusalɛm nna;
nɛ mo alɛ bee shi Zayɔn be kebee so
a malga a sa mbe basa.”
3E beeŋ naŋ lɔŋɛ efuliana nɛ a wɔ kufɔ nɛ tatato kikɛ,
nɛ kelaŋtokɔ wɔ bumo be kefɛato na
nɛ b naŋ nyalɛ abar so.
Saŋɛ na so nɛ b ta bumo be etokobi m bel ntekpa
nseŋ ta bumo akpa malɛ m bel eloji.
Efuliana na maaŋ naa ŋini bumo basa
kena be kekɔ kikɛ ŋko n naŋ kɔ abar kena gba kuraa.
4Loŋ be jemanɛ na, ekama na beeŋ chena
mbe ndibi sɔrso be kudɔ to nɛ kayurwushi
nɛ esa kikɛ maaŋ naa funti mo.
Ŋkpal manɛ so, Enyɛnpetale Ebɔrɛ na
be kɔnɔ naseso nna na.
5Efuli kama so ebi bee bunyaŋ nsaa wora bumo be kegbir kasonu nna, ama anyi ere beeŋ baa bunyaŋ nsaa wora Enyɛnpe anyi be Ebɔrɛ na kasonu nna mbaanaayɔ.
Israɛlebi ka beeŋ shi kenyaya to m bɛta m ba be asheŋ
6Kede be kaman nɛ Enyɛnpe Ebɔrɛ na kaŋɛ, “Jemanɛ ko bee ba nɛ ŋ gama basa nɛ ŋ gberge kusoe n shin nɛ b yɔ kenyaya to ashi efuli wɔfɔana so n ya ji awurfoŋ na abar so. 7Meeŋ shin nɛ ma basa nɛ b shir kaman kasawule na so nsaa du fanɛ ebobi na e naŋ ki efuli lempo so ebi. Ma alɛ beeŋ baa wɔ Zayɔn be kebee na so nna a ji kuwura bumo so hale mbaanaayɔ.”
8Kumo be kaman nɛ Jerusalɛm nɛ k la kakpa nɛ Ebɔrɛ wɔ nsaa keni mbe basa so fanɛ mbolpɔkpapo na e naŋ ki efuli na so be kadegboŋ. 9Jerusalɛmebi, manɛ so nɛ menyee shu awɔrso ŋko a ji awurfoŋ fanɛ eche nɛ kakurge ta mo? Menyi ka maŋ kɔ ewura ŋko menyi be asoetojipoana ka wu so nɛ menyee shu a? 10Men baa shu nsaa kii nnɔ to fanɛ eche nɛ kakurge ta na, ŋkpal manɛ so, k maaŋ chɛr nɛ men lar kadegboŋ na to n yaa kaa wɔ kupuŋ to. Baaŋ pɛ menyi n yɔ kufɔ kufɔ Babilɔn be efuli so, ama ma, Enyɛnpe Ebɔrɛ na, beeŋ mɔlga menyi ashi men doŋana be enɔ to ndoŋ. 11Efuli damtaana gama abar so nna nɛ b kɔ menyi kena. B yɛ: “A daga fanɛ Jerusalɛm ka mur! Anyi be kenishi pere nna a fin kewu kumo be ŋaba.” 12Ama efuliana ere maŋ nyi kusɔ nɛ k wɔ Enyɛnpe Ebɔrɛ na be nfɛra to. B maŋ nyi fanɛ b gama abar so nna nɛ kasogberge e ba bumo so fanɛ kananɛ baa bri ayu na.
13Kumo be kaman nɛ Enyɛnpe Ebɔrɛ na naŋ kaŋɛ le: “Jerusalɛm to ebi, men ya gberge men doŋana kusoe. Meeŋ shin nɛ men baa kɔ eleŋ fanɛ egbolu nɛ amo be alambɛ du fanɛ abɛlso nɛ amo be alotobi malɛ du fanɛ danyaŋ na. Menyeeŋ pɔ efuli damtaana so nseŋ sɔ asɔ nɛ b daŋ ta eleŋsheŋ n nya na m ba sa ma, nɛ n la durnya kikɛ be Enyɛnpe Ebɔrɛ na.”
Currently Selected:
Maika 4: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation