Matiu 19
19
Yesu ka ŋini kakilgboŋi be asheŋ
(Maak 10:1-12)
1Yesu ka malga asheŋ ere n loge nɛ e lar Galili n yɔ Judiya be kasawule so ashi Jɔɔdan be lɔr be kaba ndoŋ. 2Nɛ jimaŋ damta muu m bɛ mo so nɛ e chɛ bumo kikɛ be alɔana ndoŋ. 3Ndoŋ nna nɛ Efarisiana ko ba mo kutɔ nɛ b ba wora mo ŋ keni m ba bishi mo: “Mbra na bee shuli fanɛ enyɛn e kini mbe eche ŋkpal kesheŋ ko so a?” 4Nɛ Yesu bishi bumo: “Men maŋ naŋ kraŋ ashi abɔrɛsibɛ na to fanɛ sososo na enyɛn nɛ eche nɛ Epɔrpo na pɔr 5nseŋ kaŋɛ le: ‘Amoso, enyɛn beeŋ yige mo tuto nɛ mo nio nɛ mo nɛ mbe eche e ya far n chɛ abar nɛ bumo benyɔ na e ki eyur koŋwule’ na a? 6Amoso, b maŋ naa la basa anyɔ, ama esa koŋwule. Amoso, asɔ kama nɛ Ebɔrɛ ta m ber abar so, bomin kikɛ e sa maŋ barga amo to.” 7Nɛ basa na naŋ bishi mo: “To nɛ manɛ e ba nɛ anebi Mosis daŋ nase fanɛ enyɛn e sa mbe eche kakilgboŋi be kawɔl nseŋ ju mo na?” 8Nɛ Yesu kaŋɛ bumo: “Anebi Mosis daŋ sa menyi loŋ be ekpa nna nɛ men kini menyi be beche ŋkpal menyi be ŋgbene ka du kpakpa so. Dafanɛ mannɛ loŋ e daa la sososo na. 9Ma e kaŋɛ menyi na fanɛ enyɛn kama nɛ e kini mbe eche nseŋ naŋ ta eche pɔtɛ ji kubojua nna ŋ gbiti mbe eche dra na nna na ama e baŋ kini eche dra na nna ŋkpal mbe kesakalea so.” 10Ndoŋ nna nɛ bebɛsopo na kaŋɛ mo le: “Nɛ enyɛn nɛ eche be kebaawɔtɔ baa du loŋ bre, esa maŋ ta eche, k bɔ.” 11Nɛ Yesu kaŋɛ bumo: “Mannɛ ekama e naaŋ tiŋ n sɔ le be keŋini ere she bumo nɛ Ebɔrɛ sa bumo kumo be eleŋ na nawule. 12Beko fir nna, ŋkpal manɛ so, loŋ nɛ b kurge bumo. Beko malɛ, basa fɛl bumo nna. Beko malɛ kini kakil nna nsaa wɔtɔ ŋkpal ebɔrɛso be kuwura na so. Amoso, ekama nɛ e beeŋ tiŋ n sɔ loŋ be kebaawɔtɔ, e sɔ.”
Yesu ka nɛfa mbia be asheŋ
(Maak 10:13-16; Luuk 18:15-17)
13Kachako basa ko bar mbia Yesu kutɔ fanɛ e ta mbe enɔana n deŋi n deŋi bumo so nseŋ kule Ebɔrɛ n sa bumo. Nɛ bebɛsopo na fara a ŋmenyaŋ basa na. 14Nɛ Yesu kaŋɛ: “Men shin nɛ mbia na e baa ba ma kutɔ, men sa maa kuŋ bumo ekpa, ŋkpal manɛ so, ebɔrɛso be kuwura na la loŋ be basa peya nna.” 15E ka ta mbe enɔana n deŋi n deŋi bumo so n loge nɛ e lar ndoŋ n naŋ yɔ kakpa ko.
Damawura ko be asheŋ
(Maak 10:17-31; Luuk 18:18-30)
16Ndoŋ nna nɛ kanyɛn ko ba Yesu kutɔ m ba bishi mo: “Eŋinipo, manɛ be kelela nɛ meeŋ wora n tiŋ n nya ŋkpa nɛ k maŋ kɔ ekar na?” 17Nɛ Yesu bishi mo: “Manɛ e ba nɛ fee bishi ma kelela be asheŋ? Esa koŋwule e baa la elelapo. Nɛ fee sha keluri ŋkpa na to, baa bɛ mbraana na so.” 18Nɛ kanyɛn na bishi mo: “Amo malɛ?” Nɛ Yesu kaŋɛ mo: “Amo e la fanɛ, sa maŋ kaŋ mɔ, sa maa ji kubojua, sa maŋ kaŋ yuri, sa maŋ kaŋ ji efɛ be shɛda, 19baa bunyaŋ fo tuto nɛ fo nio nsaa sha fo barkasa fanɛ fo kumu.” 20Nɛ kabrantiɛbia na kaŋɛ Yesu le: “M bɛ ade kikɛ so, manɛ e naŋ ka ma?” 21Ndoŋ nna nɛ Yesu kaŋɛ mo: “Nɛ fee sha kebaadu cheembi, fo ya fa fo asɔ kikɛ n ta amo be amansherbi n sa betirpo, loŋ nɛ feeŋ nya ekpanjawu ashi ebɔrɛso. Ade be kaman nɛ fo ba bɛ ma so.” 22Kanyɛn na ka nu loŋ nɛ e kilgi n yɔ nɛ kagbenejija, ŋkpal manɛ so, e daa kɔ asɔ ga.
23Nɛ Yesu kaŋɛ mbe bebɛsopo na: “Ma e kaŋɛ menyi kashenteŋto na fanɛ a beeŋ nu damawuraana ga pɔɛŋ nɛ b luri ebɔrɛso be kuwura na to. 24Ŋ kraa kaŋɛ menyi nna na fanɛ damawura be keluri ebɔrɛso be kuwura na to du kpakpa a chɔ b ka beeŋ ta kemamprɔŋ n wɔtɔ kebasibi be kemaŋ to.” 25Bebɛsopo na ka nu loŋ nɛ k chinchiŋ bumo ga nɛ b bishi mo: “To, nɛ basa mo malɛ e naaŋ tiŋ n nya kumɔlga?” 26Ndoŋ nna nɛ Yesu keni bumo nseŋ kaŋɛ le: “Nyiŋgbasa bre kutɔ loŋ maaŋ tiŋ n wora, ama shɛŋ shɛŋ maŋ du Ebɔrɛ so kpakpa.” 27Nɛ Pita kaŋɛ Yesu: “Keni, anyi ere yige kusɔ kama nna nseŋ ba kaa bɛ fo so na, nɛ manɛ nɛ anyi alɛ beeŋ nya?” 28Nɛ Yesu kaŋɛ bumo: “Ma e kaŋɛ menyi kashenteŋto na fanɛ durnya popɔr na to jemanɛ nɛ ma, Nyiŋgbasa Pibinyɛn beeŋ chena ma kemaŋkura be kuwurputi na so na, menyi nɛ men bɛ ma so na malɛ gba beeŋ chena nwurputi kuduanyɔ so a ji Israɛlebi be nnaŋ kuduanyɔ na demu. 29Ekama malɛ nɛ e yige mo pe ŋko beda nɛ besipo ŋko besipoche ŋko betuto ŋko benio ŋko bibi ŋko nsawule ŋkpal ma so, amodoŋwura beeŋ nya amo be ntuŋ kalfaso nseŋ nya ŋkpa nɛ k maŋ kɔ ekar na n ti so.
30Ama bedamta nɛ b juŋkpar naniere beeŋ ba ki bemantopo nɛ bedamta nɛ b shir kaman naniere e ba ki bejuŋkparpo.”
Currently Selected:
Matiu 19: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation