Jona 3
3
Jona ka yɔ Ninɛve be asheŋ
1Ndoŋ nna nɛ Enyɛnpe Ebɔrɛ naŋ kaŋɛ Jona kela nyɔsopo le: 2“Yɔ kadegboŋ nɛ baa tre Ninɛve na to n ya bɔ kubɔya nɛ n sa fo na n sa ndoŋebi.”
3Ndoŋ nna nɛ Jona nu Enyɛnpe Ebɔrɛ be kamalga na nseŋ yɔ Ninɛve. Ninɛve daa la kadegboŋ nɛ esa beeŋ ta nchɛ asa nna n nite kumo be kaba ko n ya fo kaba ko. 4Jona ka luri kade na to na nɛ e nite kachɛ koŋwule m bɔ le be kubɔya. E yɛ: “Yili kabre n ya fo nchɛ adena be kefɛato, Ninɛve beeŋ mur.” 5Ninɛveebi na ka nu kubɔya na nɛ b yirda Ebɔrɛ nseŋ yili kumo fanɛ ekama e kishi. Ndoŋ nna nɛ benimu nɛ mbia kikɛ ta kagbenejijaso be asɔbuuso m buu a ŋini fanɛ bumo be ŋgbene jija bumo.
6Kubɔya na ka tu Ninɛve be ewura gba, nɛ e koso mbe kuwurputi so m bugi mbe kuwurpiŋi n nase, nseŋ ta kagbenejijaso be asɔbuuso m buu n ya chena nsunɔ to. 7Kumo be kaman nɛ e sa Ninɛveebi kubɔya. Kubɔya na e daa la fanɛ ewura nɛ mbe benimuana yɛ: “Esa kama e sa maŋ ji shɛŋ. Dimɛdi ŋko kusɔbɔya e sa maŋ ta ajibi ŋko nchu n yɔ kɔnɔ. 8Edimɛdi kikɛ e buu kagbenejijaso be asɔbuuso nseŋ shu n tre Ebɔrɛ kenishipreso. Ekama e yige asheŋ lubi be kewora nɛ kebaawɔ kebaawɔtɔ lubi to. 9Ashere Ebɔrɛ be nfɛra beeŋ chɛrga nɛ mbe agbo e wushi nɛ e wu anyi kuwɔr nsaa maŋ shin nɛ an mur.”
10Ebɔrɛ ka wu kusɔ nɛ b wora na nɛ kananɛ b yige bumo be asheŋ lubi nɛ kebaawɔtɔ lubi na, nɛ e wu bumo kuwɔr nsaa maŋ naŋ shin nɛ b mur fanɛ kananɛ e daŋ yili na.
Currently Selected:
Jona 3: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation