Hoziya 4
4
Enyɛnpe Ebɔrɛ ka kaŋɛ fanɛ Israɛlebi maŋ wora n nyalɛ be asheŋ
1Enyɛnpe Ebɔrɛ na yɛ ma nɛ basa nɛ b wɔ kasawule ere so
kikɛ kɔ asheŋ nɛ an ji.
Israɛlebi, men loto n nu kusɔ nɛ Enyɛnpe Ebɔrɛ na bee kaŋɛ.
E yɛ: “Kashenteŋji nɛ kasha maŋ naa wɔ
kasawule ere so nɛ basa malɛ maŋ naa
fɛ Ebɔrɛ be asheŋ.
2Baa nase nnɔ nna nsaa maa bɛ amo so.
B wɔtɔ nna a ku efɛ, a mɔ basa,
nsaa yuri nseŋ naa ji kesakalea.
Bumo be asheŋ lubi malɛ baa ti so nna
nɛ b wɔtɔ a mɔ abar saŋkama.
3Ŋkpal loŋ so ewule lubi beeŋ yili
menyi be kasawule ere so nɛ kusɔ kama
nɛ k wɔ kumo so kikɛ e wu.
Asɔbɔya nɛ mbuibi nɛ ekɔrɔtɔ kikɛ beeŋ wu.”
Enyɛnpe Ebɔrɛ ka kaŋɛ fanɛ bɔrɛmatapoana maŋ wora n nyalɛ be asheŋ
4Enyɛnpe Ebɔrɛ yɛ: “Esa kama wora kulubi,
fɔŋfɔŋ bɔrɛmatapoana na.
5Kapa nɛ kanyɛ, menyi nɛ menyi be anebiana na kikɛ
bee fiti nna a tɔr.
Ma alɛ beeŋ mur Israɛl nɛ e la men nio na.
6Ma basa bee mur nna ŋkpal b ka kini ma so.
Menyi bɔrɛmatapoana gba kini ma
nseŋ kini ma keŋini gba n ti so.
Ŋkpal loŋ so nɛ ma alɛ gba kini menyi na.
M maaŋ naŋ wu menyi be mbinyɛnsobi gba
fanɛ b la bɔrɛmatapoana.
7Kananɛ bɔrɛmatapoana na bee wora kishi a ti so, loŋ koŋwule nɛ baa wora alubi a gbiti ma a ti so. Ŋkpal loŋ so, meeŋ shin nɛ men be kemaŋkura nɛ men kɔ na e ki anishinyɔr n sa menyi. 8Alubi nɛ ma basa bee wora na so nɛ menyeeŋ bɔla n dii dama. Amoso nɛ men shin nɛ baa wora alubi a ti so saŋkama na. 9Menyeeŋ nya kasogberge nɛ basa na beeŋ nya na gbagba. Meeŋ gberge menyi kusoe ŋkpal alubi nɛ menyee wora na so. 10Menyee ji ajibi ga, ama menyi alɛ maa moɛ kikɛ. Menyee yɔ agbir to n ya kaa fin mbia, ama menyi alɛ maa nya bumo kikɛ. Ŋkpal manɛ so, men kini ma nna nseŋ ya kaa bɛ agbir so.”
Enyɛnpe Ebɔrɛ ka kaŋɛ fanɛ kagbirshuŋ maŋ walɛ be asheŋ
11Nɛ Enyɛnpe Ebɔrɛ yɛ: “Kasanuu be ga shin nɛ ma basa maŋ naa fɛ nfɛra! 12Agbir nɛ b ta ndibi n lɔŋɛ na to nɛ baa yɔ n ya kaa bishi so. Akpabi malɛ nɛ baa bɔla so a kaŋɛ bumo asheŋ. B kini ma nseŋ ta bumo be amu n ya sa agbir fanɛ kananɛ eche bee lar mo kul kaman a ji kesakalea na. 13Abeegboŋ be esoso nɛ baa yɔ n ya ka lara bumo be esarga nsaa chɔɔ eduwu malɛ abeebi so ashi ndibi tenteŋ nɛ a purge ga a kɔ kiyoyul na be afito.
Ŋkpal loŋ so nɛ menyi be mbichesobi bee ji kesakalea na, nɛ men shacheana malɛ bee lar bumo kulana be mman a sha benyɛn pɔtɛ. 14Ama m maaŋ kpal loŋ so ŋ gberge bumo kusoe, ŋkpal manɛ so men gbagba bee ya ka sha agbirlambu to be esakaleche nna nɛ menyi nɛ bumo bee lara esarga a sa agbirana na. Ama le nɛ keŋasa ko bee kaŋɛ: ‘Esa nɛ e maŋ nyi asheŋ kikɛ la esa mur so nna.’ ”
15“Menyi Israɛl be basa maa ji kashenteŋ a sa ma, ama men sa maŋ shin nɛ Judaebi gba e luri loŋ be kulubi koŋwule ere to. Men sa maŋ naa yɔ Gilgaal ŋko Bɛtavɛn n ya kaa bunyaŋ agbir ŋko a nase nnɔ Enyɛnpe Ebɔrɛ na be ketre to.” 16Israɛlebi ki basa kpeŋso nna fanɛ ekurmanyɛn. Nuso gba nɛ meeŋ wora ŋ keta bumo n yɔ keji to ashi kupuŋ to fanɛ mbolpɔbi? 17Agbir be eleŋ kre Israɛlebi na nna, amoso meeŋ kplaŋ bumo so nɛ b baa wora bumo be kepar. 18B baŋ nuu nsa m boo ŋ koso, baa luri kesakalea be keji to nna. Bumo alɛ shuli anishinyɔr ka ji bumo a chɔ b ka nya bunyaŋ. 19Kawuliwuli beeŋ ta bumo n choŋ nɛ anishinyɔr e pɛ bumo ŋkpal b ka bee lara esarga a sa agbir so.
Currently Selected:
Hoziya 4: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation