Hoziya 14
14
Hoziya ka kule Israɛlebi fanɛ b tuba be asheŋ
1Israɛl be basa, men bɛta m ba men Nyɛnpe nɛ men be Ebɔrɛ kutɔ. Men be kulubi e shin nɛ men fiti n tɔr na. 2Men bɛta m ba Enyɛnpe Ebɔrɛ na kutɔ nseŋ shin nɛ le be kabɔrɛkule ere e baa la sarga n sa mo. “Ta anyi be alubi m paŋ anyi nseŋ nu anyi be kabɔrɛkule saŋɛ na so anyeeŋ di fo epaŋ fanɛ kananɛ an nase kɔnɔ na gbagba. 3Asiriyaebi maaŋ tiŋ m mɔlga anyi. Kena to malɛ gba be egbaŋɛ maaŋ tiŋ ŋ kuŋ anyi. Anyi maaŋ naŋ kaŋɛ fanɛ anyi be agbirana na e la anyi be Ebɔrɛ. Fo Enyɛnpe Ebɔrɛ na nawule e naŋ tiŋ n chɛ anyi to.”
Enyɛnpe Ebɔrɛ ka nase kɔnɔ fanɛ e beeŋ nɛfa Israɛl be asheŋ
4Enyɛnpe Ebɔrɛ yɛ:
“Meeŋ shin nɛ ma basa e naŋ bɛta m ba ŋ kutɔ,
nɛ n ta ma kagbene kikɛ n sha bumo;
a maaŋ naŋ nya agbo n wɔtɔ bumo kikɛ.
5Meeŋ ki fanɛ bunyaŋ nɛ k bee tɔr kasawule so n sa
menyi, Israɛl be basa.
Menyeeŋ ba ki fanɛ Lebanɔn be ndibi nɛ a kɔ atoto damta
nɛ a bugi to a walɛ nɛ amo be nliŋi luri kasawule to
m pɛ amo to kpakpa na.
6Menyeeŋ ki fanɛ kedibi nɛ baa tre ɔlif
nɛ k purge afantaŋ a walɛ na.
Menyi beeŋ baa kɔ efɛa belbelso fanɛ ndibi
nɛ baa tre sida nɛ a wɔ Lebanɔn na.
7Menyeeŋ luri ma kayul to n nya kekuŋ.
Menyeeŋ purge afantaŋ nseŋ sɔr
asɔrso fanɛ ndibi sɔrso na.
Menyi alɛ be ketre beeŋ dii fanɛ Lebanɔn be nsa.
8Meeŋ nu ma basa Israɛlebi nɛ b maŋ naa shuŋ
agbir na be kabɔrɛkule nsaa keni bumo so.
Meeŋ shin nɛ b purge fanɛ kedibi nɛ kumo be afantaŋ
maa gbaŋgbaŋ na.
Ma so nɛ baaŋ bɔla n nya bumo be enɛfa kikɛ.”
Lalaloge be kamalga be asheŋ
9Benyiashempo beeŋ pin asheŋ ere be kifito nseŋ bɛ amo so. Enyɛnpe Ebɔrɛ be ekpa niŋi nna. Basa nɛ bumo alɛ kɔ kebaawɔtɔ cheembi nawule e naa bɔla kumo so. Belubiworapo bre bee fiti nna a tɔr ŋkpal b ka kini kumo be kebɛso so.
Currently Selected:
Hoziya 14: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation