Hoziya 11
11
Kasha nɛ Ebɔrɛ kɔ n sa mbe basa be asheŋ
1Enyɛnpe Ebɔrɛ yɛ:
“Jemanɛ so nɛ Israɛl wɔ Ijipt be efuli so fanɛ kebia na
nɛ n tre mo n lar ndoŋ fanɛ m pibinyɛn shaso.
2Ama saŋɛ nɛ m pere kenishi a tre bumo na,
nɛ bumo alɛ pere kenishi a shile ma.
Bumo alɛ maŋ yige sarga be kebaa lara nɛ
duwu be kebaa chɔɔ a sa Baal be kegbir na.
3Ma e pɛ Israɛlebi be enɔ to n ŋini bumo enite,
ŋkeshin nɛ bumo alɛ maaŋ wu gba
fanɛ ma e naa chɛ bumo to.
4Ŋ koli bumo m mata ma kumu kashaso,
nseŋ maŋ bumo so m pɛga.
N sa bumo ajibi nɛ b ji,
5Ama b kraŋ kini k ba ŋ kutɔ nseŋ bɛta n yɔ Ijipt be efuli so. Naniere, Asiriyaebi e naaŋ baa ji bumo so eleŋ. 6Baaŋ ta kena n luri bumo be nde to n jija bumo be kadegboŋ be kabuna to be akuloŋgboŋ na, nɛ kusɔ nɛ baa fɛ baaŋ wora na e jija. 7Ma basa baŋ yili kumo nna fanɛ baaŋ kini ma, nseŋ ya kaa bɛ agbir nɛ e maaŋ tiŋ n chɛ bumo to so.
8Ama m maaŋ tiŋ n yige Israɛlebi
ŋko ŋ kplaŋ bumo so kikɛ.
M maaŋ tiŋ n jija bumo fanɛ kananɛ
n jija Adma nɛ Zeboyim be nde na.
Ma kasha nɛ ŋ kɔ n sa bumo na shi ga.
9M maaŋ naŋ kaa agbo m mur Israɛlebi kikɛ;
ŋkpal manɛ so, n la Ebɔrɛ nna, mannɛ dimɛdi.
N la Ebɔrɛ nɛ n du cheembi nna a wɔ bumo to.
M maaŋ kaa agbo m ba bumo so kikɛ.
10Ma basa baŋ nu ŋ ka ponte bumo doŋana so fanɛ buluŋ na, baaŋ shi epeŋitɔrkpa be kaba so n chicha kufuso m ba ŋ kutɔ. 11Baaŋ shi Ijipt be efuli so m mel abar so m ba fanɛ mbuibi na. Nseŋ shi Asiriya be efuli so m ba fanɛ elɔpo na. Loŋ be saŋɛ na nɛ meeŋ bɛta bumo m ba chena bumo peana. Ma Enyɛnpe Ebɔrɛ na e kaŋɛ na.”
Israɛl nɛ Juda ka ji n tɔr be asheŋ
12Enyɛnpe Ebɔrɛ yɛ: “Israɛl be basa ta efɛ nɛ kafule nna ŋ kulti ma, nɛ Juda malɛ be basa kini kenu n sa ma nɛ n la kashenteŋ be Ebɔrɛ nsaa du cheembi na.
Currently Selected:
Hoziya 11: GJNb
Highlight
Share
ਕਾਪੀ।
Want to have your highlights saved across all your devices? Sign up or sign in
© 2015 GILLBT Ghana Institute of Linguistics, Literacy and Bible Translation