YouVersion Logo
Search Icon

Eemɔs 8

8
Kelantaŋɛ ka bɔlɔ asɔrso be asheŋ
1Ndoŋ nna nɛ Enyɛnpetale na naŋ shin nɛ ŋ ku bɔrɛdare n wu asɔrso belso kelantaŋɛ be bɔlɔ, 2nɛ e bishi ma le: “Eemɔs manɛ nɛ fo wu?”
Nɛ n yɛ: “Asɔrso belso kelantaŋɛ be bɔlɔ nɛ n wu.”
Nɛ Enyɛnpe Ebɔrɛ naŋ kaŋɛ ma le: “Kananɛ asɔrso ere bel ere aloŋ nɛ ma basa Israɛlebi be ekar fo. M maaŋ ta bumo be alubi m paŋ bumo kikɛ.” 3Enyɛnpetale yɛ: “Nshɛ nɛ baaŋ ba boŋ bɔrɛlambu to na beeŋ kilgi kushu. Bubuni beeŋ dese kaplɛkama nɛ kakpa kikɛ e wora shruum.”
Israɛl be kemur be asheŋ
4Menyi nɛ menyee ŋin betentaŋasepo nɛ efuli ere so be betirpo a lɛ a chichi so na e nu nfe. 5Menyi e naa kaŋɛ men be amu le na: “Saŋɛ mo nɛ kufɔl popɔr ere beeŋ wu nɛ an ya fa anyi be ayu. Saŋɛ mo nɛ kewushiachɛ na beeŋ choŋ nɛ an naaŋ fara a fa asɔ yawu kpakpaso nsaa puni a ta ekurwawurbi a karga asɔ? 6Saŋɛ mo nɛ anyeeŋ baa ta amimi a wea ayu to a fa yawu kpakpaso nsaa tɔ betentaŋasepo nɛ betirpo kesebeta be yawu ŋ ki anyi be anya.”
7Enyɛnpe nɛ e la Israɛl be Ebɔrɛ na bɔ ntaŋ ŋ kaŋɛ le: “M maaŋ teŋ bumo be asheŋ lubi nɛ b wora na kikɛ so. 8Amoso kasawule beeŋ gbuŋgbuŋ to nɛ kagbenejija e tɔr efuli ere be basa kikɛ so nɛ b baa wora kuwɔr be asheŋ. Efuli na kikɛ beeŋ baga to fanɛ kananɛ lɔrgboŋ nɛ baa tre Nail ashi Ijipt be efuli so na bee kaa ketili a yɔ a ba na. 9Loŋ be kachɛ na, ma Enyɛnpetale beeŋ shin nɛ epeŋi a tɔr kapaso nɛ kanyɛ e biri kapiidi. Ma Enyɛnpetale na e malga na. 10Meeŋ shin nɛ men be kejigboŋana e ki nli be kebaa shu nɛ menyi be kagbenefuli malɛ be nshɛ e ki kagbenejijaso be kushu. Meeŋ shin nɛ men she men be emin nseŋ buu kagbenejijaso be asɔbuuso a du fanɛ esa nɛ mbe kebia koŋwule nɛ e kɔ wu ŋ ka mo na. Loŋ be kachɛ na beeŋ baa la kachɛ lubi ga.
11Kachako bee ba nɛ n shin nɛ akoŋ e tɔr kasawule ere so. Akoŋ nɛ k maŋ la ajibi be akoŋ beeŋ pɛ basa, nɛ achukoŋ nɛ k maŋ la nchu be achukoŋ e mɔ basa. Ekama beeŋ baa fin abɔrɛsheŋ be kenu fanɛ kananɛ baa fin nchu nɛ ajibi na. Ma Enyɛnpetale na e malga na. 12Basa beeŋ shi kelargato be esoso be kaba so ŋ kilgi to n fin Ebɔrɛ be kamalga n ya fo epeŋilarkpa be kaba so. Baaŋ yɛla kenishi to n yɔ kaplɛkama n ya fin Enyɛnpe Ebɔrɛ be kamalga na, bumo alɛ maaŋ wu kumo. 13Kumo be kamɔnchɛ na achukoŋ beeŋ pɛ menyi be mbrantiɛfɔlbi nɛ menyi be besuŋgurbi nɛ b kɔ eleŋ ga na nɛ b tɔr ŋ kreŋ. 14Bekama nɛ baa bɔ agbir nɛ a wɔ Samɛria na nɛ kegbir nɛ k wɔ Dan na ŋko kegbir nɛ k wɔ Bɛshiba na, beeŋ tɔr a maaŋ naaŋ koso kikɛ.”

Currently Selected:

Eemɔs 8: GJNb

Highlight

Share

ਕਾਪੀ।

None

Want to have your highlights saved across all your devices? Sign up or sign in