2 KORINT 1
1
1 #
Yunir 18.1
Thrünpuhnü amulongkhi hode Jisu Khrista amüsüh-thsangyurü Paul, tüsho isa keoniorü Timothi kilimnü,
Korint ching Thrünpuh borü, ju lung Akaia alala ching lakhi amüsührü alala kilim:
2Isa Abuh Thrünpuh tüsho Atungpuh Jisu Khrista kilimnü nüsa kilim amüthsüm tüsho mungtsü lashang.
Paulnü Thrünpuh kilim Makshe Jihkhi
3Isa Atungpuh Jisu Khrista Abuh tüsho Thrünpuh, mihmüthsümbo Abuh tüsho mulong shukheam alala Thrünpuh shiang, 4shepünü isa thsümütsü alala ching isa mulong shukheamcho, junangde Thrünpuhnü isa mulong shukheamkhi junü thsümütsü ching larü isanü mulong shukheampü kukbah. 5Tümüde isanü Khrista thsünükhi ching suhdahde chamachihkhi nangde, Khrista hode isanü mulong shukheampü ching suhdahde chamachihchoh. 6Isa thsünüsho, ju nüsa thsungkheak mulong shukheam tüsho akhümkhit lah; tüsho isa mulong shukheamsho, ju isa thsünükhi nangde nüsanü arümkheamde thsünükhi nüsa thsungkheak mulong shukheam lah. 7Nüsa thsungkheak isa mulonglam matrüt; tümüde isa thsünükhi ching nüsanü shihcham lukhi nangde, nüsanü isa mulong shukheam ching shihcham lubah de isanü mükheahlah.
8 #
1 Kor 15.32
Keoniorübo, tümüde Asia ching isa thsünükhi nüsanü mümükheahde mülashihne; isanü marümkhukpü thsüde isa thsünü ato khüp la, junangde rhangdung lapü mulonglam she akheam thsü. 9Isa asheshihpü lakheah; tüshe junü isa nihbuh kheak yungde asherü arhang kamloshihbuh Thrünpuh kheak angükihshih; 10apinü ashepü akhito chingnü bekhit, tüsho isa bekhitchoh; isanü api kheak kinchoh junangde kheaküshe apinü isa bekhitchoh. 11Nüsanü she tamkhüntamnü hode isa rungbeah, junangde ahihkhühnü tamkhüntamnü alojihde isa ki müngühmühi mülüjihkhi thsungkheak isa thsung thsüde ahihkhühnü makshe jihbah.
Paul Lümkhi Müthrikhi
12Tümüde isa kükheangkhi ju ha: isanü alomi ching tüsho nüsa miki, amüsühkhinü tüsho kinde kurhangkhinü, alomi lümlungnü yung tüshe Thrünpuh amüthsüm hode yakli huhdo de isa lümkhinü thiyumütsan lah. 13Tümüde isanü nüsa kilim thrütkhi ju tümü yung tüshe nüsanü akhekhukbe tüsho anikhitkhukbe lah; nüsanü khiukde anikhitbah de inü mulonglam lah, 14nüsanü chamkhüh anikhitkhi nangde, Atungpuh Jisu nimung ching isanü nüsa dünkheak nangde, nüsanü isa dünkheak kükheangbah.
15Tümütüsho nüsa alü asühkhi ngüpü thsüde I nüsa kilim akhuhde arüpü mütsande alakheah. 16#Yunir 19.21I Macedonia lim yüchoki inü nüsa rhuakheahnelah, tüsho Macedonia ching nüsa kilim alode arübah nüsanü rungde Judea lim yübah. 17Jumonü, küyimki inü ha lümkhi thsükhea, inü ju thülihde athsükhea de? Yungsho inü lümkhi thsükhi ching khülangkinü “Am, am” tüsho “Yung, yung” düpü alomi shih yande athsükhea de? 18Atsütsü Thrünpuh ju thiyuro lakhinü, nüsa kilim isa yu “Am” tüsho “Yung” de mülakheah. 19#Yunir 18.5Thrünpuh tsührü, Jisu Khrista dünkheak nüsa ki thsangyuthsangrarü Silvana le Timothi tüsho I a “Am” tüsho “Yung” de mülakheah; tüshe api lung kamruhroro “Am” de lah. 20Tümüde Thrünpuhnü alokhikhi alala api kheak “Am” ngüchoh. Jumonü isanü api hode Thrünpuh müretahpü lim “Amen” de thachoh. 21Tüshe Khrista ching nüsa lung isa arihshihkhi, tüsho isa mujude-müsühkhitkhi ju Thrünpuh ah; 22apinü isa kheak mütsanyüm yihkih tüsho mütsanmükhi thsüde isa mulong ching api Me jih.
23Nüsa muzhokhinü I nüsa kilim Korint ching alode marü de I yumütsan thsüde inü Thrünpuh jichoh. 24Nüsa akin kurungkheak isanü thiyuzüng mahori, tüshe nüsa asühpü thsüde rukhüh rhimorübo ah; tümüde akin hode nüsa düküngde zhiplah.
Currently Selected:
2 KORINT 1: YIMCBSI
Highlight
Share
ਕਾਪੀ।
Want to have your highlights saved across all your devices? Sign up or sign in
Yimkhiung Naga CL Bible - AMÜSÜH HÜM
Copyright © 2008 by The Bible Society of India
Used by permission. All rights reserved worldwide.