Popular Bible Verses from Romanos 1

Share

Queorojoropʉare yʉ ñurẽ quetire wedegʉ tiecã Manigʉ̃ye tutuare niñerõcã icãta boboheri. Merẽ tiera nipetirare Jesúye maquẽrẽ wedeñerõcã tiere tʉo wedewõrãnorẽ cametʉore queti ña. Mamarõrẽ judío basocare easʉgueriaro niwʉ̃; sirore judío basoca niheracãrẽ eariaro niwʉ̃.

Merẽ ñurẽ quetira marĩrẽ Manigʉ̃cã tiwãmepe ñurã pʉtʉañerõcã tirere eño: Tiera ña Jesucristore wedewõrẽ cʉoremenarã Manigʉ̃cã “mʉjã ñurã ña” cʉ̃cã ĩrẽ Manigʉ̃ye wederucũripũrĩpʉre ojayoriarora abiro. Abiro ojayoriaro niwʉ̃: «Manigʉ̃ cʉ̃rẽ wedewõrãrẽ “ñurã wapa cʉoherara abiro ñawã” ĩ ĩñagʉagawi. Tairo tira cʉ̃jãrã cʉ̃mena tairo catirucũmocãrãgawa».

Manigʉ̃cã bauhegʉ nicapetacã cʉ̃cã mamarõpʉra atibʉreco maquẽ nipetirere tiriguemenarã “cʉ̃ ñawĩ” ĩ masĩyo. Tiemenarã cʉ̃cã tutuagʉ nirucũrẽ bau. Tairo tira nipetira Manigʉ̃rẽ “ʉ̃sã mʉrẽ masĩherinirã wapa cʉohera ña” ĩmasĩherigawa.

Tora abiro cʉ̃ Manigʉ̃rẽ ñurõ masĩmocãcaperacãrã cʉ̃rẽ tiboriwãmerã ñurõ cuwiopesaremena ĩñaheriwa ĩñerõcã tairora cʉ̃rẽ ʉseare nʉniheriwa. Buripe tora abiro tirono tira ñañarẽpe wadore tirugarucũ wãcũmequẽdesãsu õpemena bʉtoro ñañarõ tʉoiñasãsuwa. Tora abiro tiremena cʉ̃jãye wãcũrẽ naĩtĩãrẽpʉra abiro pʉtʉa.

Cʉ̃jã Manigʉ̃ye diamacã maquẽ nirẽpere ĩritoremenape wasoawa; tairo tira Manigʉ̃ nipetirere tirigʉpere wedewõrõno tira cʉ̃cã tiriguepere wedewõquetatuwa. Manigʉ̃pe docare cʉ̃cã nipetirere tirigʉ niñerõcã bʉrecoricãrõ cʉ̃rẽ basapeorucũboronorẽ tira. Tairope doca niãro.

Tairora Manigʉ̃ nipetira basoca ñañarãrẽ, cʉ̃rẽ cametʉanʉcãrĩbasocare cʉ̃jãcã ñañarẽrẽ tirecʉtiremenarã ãpẽrãrẽ diamacã maquẽrẽ masĩñerõcã tiheriñerõcã cʉ̃jãrẽ ʉmʉãwesepʉmenarã ñañarõ yawí cʉ̃ye cuarere eñogʉ̃.

Tairo tigʉ Manigʉ̃ cʉ̃jãrẽ cʉ̃jãcã boro bobore ñañarẽrẽ tiaro ĩgʉ̃ piticõãmocãwĩ. Tairo biñerõcã cʉ̃jãya nomiãpʉra ñurõ manʉcʉti niboriwãmerẽ tiherara cʉ̃jãbasurupera nomiã wado came ñañarõ yawa. Tiwãmerã ʉmʉãcã nomiãmenape niborere piticõãmocã cʉ̃jã ʉmʉãbasurupe wado ñañarẽ tirugarere cʉowa. Tairo tira cʉ̃jã ʉmʉãbasurupe wado boborere came yawa. Cʉ̃jãcã tora abiro tiyamanirẽrẽ tire wapamenarã cʉ̃jãbasurupera cʉ̃jãye ʉ̃pũrĩrẽ ñañarõ tiyoboriwãmerã Manigʉ̃rẽ ñañarõ tiñerõcã yawa. Tairora cʉ̃jãcã Manigʉ̃rẽ masĩrugahera nirẽye wapa cʉ̃ cʉ̃jãrẽ piticõãmocãwĩ cʉ̃jãcã ñañarẽrẽ wãcũpãmarẽmenape tiyamaniborepere tirucũãro ĩgʉ̃.

Cʉ̃jã “ʉ̃sã nipetirere masĩcametʉara ña” ĩrã nicaperacãrã queorojoropʉare icãta tʉomasĩherajoro biwa. Tairo binirã ĩcʉ̃rã Manigʉ̃ tairo catirucũgʉ̃ tutuagʉ nigʉ̃rẽ wedewõrõno tira cʉ̃rẽ wasoamocã cʉ̃jãbasurupe cʉ̃jãcã basocacã cõwõãna nicapetacã cʉ̃jãrã abiro baurara werapere, cʉ̃jãcã miniãrã abiro baurara werapere, cʉ̃jãcã waibʉcʉra pairara abiro baurara werapere ĩñerõcã pĩnoãrã abiro baurara cʉ̃jãcã werapere wedewõwã.