Popular Bible Verses from 1. Korintarya 15

Share

Doleske, mire kamle phrala, ačenn zoreles an o patsepen! Ma moukenn t'men kekestar o Debleskro dromestar tele te anell! Avenn hako tsiro o Debleske koy, oun boudrenn leske mishto! T'mer djinenna: Kay boudi, hoy leske krenna, hi gar čičeske.

Kanna parkrah men pash o Debleste. O merepen nashras peskri zoor pral mende. Maro ray, o Yezous Kristo, his zorleder har o merepen, oun las leskri zoor krik.

Ma patsenn, kay lengro čačo hi! Ma krenn kova, hoy yon krenna!

O Devel kamas an peskro baro lačepen, te vap me kova, hoy me kanna hom. Oun leskro baro lačepen, hoy yob man das, his gar čičeske. Me boudrom boudeder har kol tsele vavar. Gar me kokres, o Debleskro lačepen an mande boudras mantsa, te krap nay koy boudi.

Merepen, tiri zoor hi krik! Merepen, tou doukreh kekes bouder! O merepen lell peskri zoor dran o čilačepen, hoy o mensho krella. Hoy čilačo hi, djinah mer dran o Moseskre lila, kay činlo hi, har te djivas.

Shounenn, me penau t'menge, hoy kek djinella: Mer merah gar lauter. Vell i tsiro, koy lell men o Devel vin dran kova, hoy mer kanna ham, oun krell men vavarčandes. Kova vell ap yek kopo, yaake sik, har kek nay dikella. Ap ko tsiro shounah mer i bashepaskri, kay yek dren phourdell. Te shounah mer koy bashepaskri, stenn i moule pre, oun venn djido. Oun mer, kay gomme djivah, vah vin lino dran kova, hoy mer kanna ham, oun vavarčandes kerdo.

Yaake har vas o merepen yek menshestar, yaake vell ninna yekestar, kay stenn i moule pale pre. Yaake har vas o Adamestar, kay hounte merenn lauter, yaake vell o Yezous Kristestar, te krell o Devel len lauter djido

Hi yaake: I moule venn djido. Oun i djide hounte merenn bouder gar.

O Yezous Kristo hounte vell o ray yaake rah, bis te čivell o Devel lauteren, kay les gar kamenna, tel leskre pire. Ko palstouno, kolendar o Yezous Kristo i zoor krik lella, hi o merepen.