Chacaría 6
6
Nango̱xetü ga Chacaría rü nüxü̃ nadau ga ãgümücü ga carugü ga daiweü̃
1Rü wena chango̱xetü rü nüxü̃ chadau ga ãgümücü ga carugü ga daiweü̃ ixĩgüne. Rü guma carugü rü taxre ga ma̱xpǘnegü ga bróũchenaxca̱xarü ngãxü̃wa nangóe.
2Rü wüxi ga guma caru rü cowarugü ga idauxü̃ inayatú. Rü guma norü taxre ga caru rü cowarugü ga iwaxüxü̃ inayatú.
3Rü guma norü tomaepü̱x ga caru rü cowarugü ga icómüxü̃ inayatú. Rü guma norü ãgümücü ga caru rü cowarugü ga waxüxü̃maxã rü cómüxü̃maxã ãmatüxü̃ inayatú.
4Rü nüxna chaca ga yema Tupanaarü orearü ngeruxü̃ i daxũcüã̱x ga chomaxã idexaxü̃ rü ñacharügü: —Pa Chorü Corix, ¿Ta̱xacüchiga nixĩ ya yima carugü? —ñacharügü.
5Rü yexguma nüma ga yema Tupanaarü orearü ngeruxü̃ i daxũcüã̱x rü choxü̃ nangãxü̃ rü ñanagürü: —Yima carugü rü nachiga nixĩ ya yimá ãgümücü ya buanecügü ya Cori ya Tupana ya guxü̃ma i ñoma i naanearü yorape̱xewa ixĩãchicü.
6Rü yima caru ya cowarugü iwaxüxü̃ itúgüne rü ngẽma nachixü̃ane i nórtewa ngẽxmaxü̃waama naxũ. Rü yima caru ya cowarugü icómüxü̃ itúgüne rü ngẽma nachixü̃ane i oéstewa ngẽxmaxü̃waama naxũ. Rü yima caru ya cowarugü i ãmatüxü̃ itúgüne rü ngẽma nachixü̃ane i súrwa ngẽxmaxü̃waama naxũ —ñanagürü.
7Rü yema cowarugü ga iporaexü̃ rü nañu̱xãẽgü nax guxü̃ i naanegu íyachoeguxü̃. Rü nüma ga yema Tupanaarü duü̃xü̃ ga daxũcüã̱x rü nüxü̃ ñanagürü: —¡Ẽcü paxa guxü̃ i naanegu ípeyachoegu! —ñanagürü. Rü nüma ga yema cowarugü rü yemaacü nanaxügü.
8Rü yemawena rü nüma ga yema Tupanaarü orearü ngeruxü̃ i daxũcüã̱x rü choxü̃ ñanagürü: —Dücax, rü ngẽma cowarugü i ngẽma nachixü̃ane i nórtewa ngẽxmaxü̃waama ĩxü̃, rü ngéma naxĩ nax ngẽma nachixü̃anewa Tupanaxü̃ yanangüxmüxẽẽgüxü̃ca̱x —ñanagürü.
Yochuéarü nga̱xcueruxü̃chiga
9Rü nüma ga Cori ya Tupana rü chomaxã nüxü̃ nixu ga ore ga ñaxü̃:
10—¡Ñu̱xmatama Chofonía nane ya Yochíapatawa naxũ! Erü yimáxü̃tawa nixĩ i nangugüxü̃ i ngẽma Babiróniaanewa ne ĩxü̃ i Yedái rü Tobía rü ñu̱xũchi Yedaía.
11¡Rü naxü̃tawa naxca̱x ínaca i ngẽma úiru rü diẽrumü i Babiróniawa ne nangegüxü̃! Rü ngẽma úiruwa rü diẽrumüwa tá cunaxü i wüxi i nga̱xcueruxü̃, rü ngẽmamaxã tá cunanga̱xcueru ya yima chacherdotegüarü ãẽ̱xgacü ya Yochué ya Yochadáx nane.
12-13Rü Yochuémaxã nüxü̃ ixu rü ñacurügü nüxü̃: “Tupana ya Guxãétüwa Ngẽxmacü rü ñanagürü cuxü̃: ‘Choma rü tá nua nüxü̃ chaxuneta i wüxi i yatü nax wena naxüaxü̃ca̱x ya chopata ya taxü̃ne. Rü naéga i ngẽma yatü rü Wena Namexẽẽcü, tá nixĩ. Rü nüma rü tá ãẽ̱xgacü nixĩ rü nagu tá nicu̱x i ãẽ̱xgacüchiru. Rü norü tochicaxü̃wa tá narüto rü ngéma tá duü̃xü̃gümaxã inacua̱x. Rü nacüwawa tá narüto i wüxi i chacherdóte. Rü ngẽma taxre rü tá nügüga naxĩnüe rü tá nügümaxã nataãẽgü’ ” —ñacurügü nüxü̃.
14Rü ngẽmawena rü chanaxwa̱xe nax Tupanapata ya taxü̃negu cunaxǘxü̃ i ngẽma nga̱xcueruxü̃. Rü ngẽmawa rü guxü̃gutáma nüxna nacua̱xãchie i Yedái rü Tobía rü Yedaía rü ñu̱xũchi Yochía i Chofonía nane.
15Rü ngẽxguma tá Cori ya Tupanaga pexĩnüegu, rü nua tá naxĩ i togü i duü̃xü̃gü i yáxü̃wa ne ĩxü̃, rü pexü̃ tá narüngü̃xẽẽgü nawa i Tupanapata ya taxü̃nearü mexẽxẽ. Rü ngẽxguma tá yanguxgu i ngẽma rü pema rü tá nüxü̃ pecua̱x nax Tupana ya Guxãétüwa Ngẽxmacü yixĩxü̃ i nua choxü̃ muxü̃ nax pemaxã nüxü̃ chixuxü̃ca̱x i norü ore.
Markert nå:
Chacaría 6: tcaP
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2022, Wycliffe Bible Translators, Inc. All rights reserved.