२ कोरिन्थी 3
3
छारा बाछार्बै के लब्मैं
1ङिइ ह्रोंसए बयन लइमुँ वा?#3:1 ङिइ ह्रोंसए बयन लइमुँ वा? कोरोन्थ मण्डलीर्बै स्योर ताँ लोमिंब्मैंइ धोंले पावलइ ह्रोंसए बयन ह्रोंसइन लइमुँ रो। ङिइ “छ्याँबै के लइमुँ” बिसि अरूमैंइ धोंले प्ह्रिछ्या प्ह्रिसिन् ङिइ क्हेमैंलाइ उँइँल् त्हुम् रो वा? छलेन क्हेमैंज्यै अरूमैंलाइ छाबै प्ह्रिछ्या प्ह्रिसिन् उँइँल् त्हुम्मा? 2आत्हु! तलेबिस्याँ क्हेमैंन् ङिए ल्हागिर प्ह्रिछ्या ग। च प्ह्रिछ्या ताँन् म्हिमैंइ था सेल्ले, खेल् खाँल्ले ङ्योए खोंर प्ह्रिथेंइमुँ। 3ङिइ लबै केमैंए रो नेरो ख्रीष्टजी प्ह्रिबै प्ह्रिछ्या क्हेमैंन् ग। मसिइ प्ह्रिबै प्ह्रिछ्या क्हेमैं आङिं, क्हेमैंने मुँबै प्ह्रिछ्या खोंयोंन् बिलै तरिबै परमेश्वरए प्ल्हजी प्ह्रिब् ग। चु युँमा प्लानर प्ह्रिब्#3:3 युँमा प्लानर प्ह्रिब् मोशाइ ठिम युँमा प्लानर प्ह्रिइ। धोंबै प्ह्रिछ्या आङिं, क्हेमैंए खोंर्न प्ह्रिथेंबै प्ह्रिछ्या ग।#प्रस २४:१२; यर ३१:३३; इज ११:१९; ३६:२६
4ख्रीष्टउँइँलेन् ङिइ परमेश्वरए फिर बिश्वास लबइले ङिइ छाबै क्ह्रोंसेंन्बै ताँमैं बिल् खाँइमुँ। 5ह्रोंसए भोंजीन् चु के लइ बिसि ङिइ बिबै घ्याँ आरे, दिलेया ङिइ के लबै भों परमेश्वरउँइँले योंम्। 6छारा बाछार्बै के लल् खाँब्मैं खीजी ङिलाइ लमिंइ। च बाछा म्हिइ प्ह्रिबै ठिम आङिं, दिलेया पबित्र प्ल्हजी फैबै बाछा ग। तलेबिस्याँ म्हिइ प्ह्रिबै ठिम म्हाँदिल् आखाँबइले ताँन् म्हि सिल् त्हुमल, दिलेया पबित्र प्ल्हजी ङ्योलाइ पापउँइँले फ्रेमिंसि छारा छ्ह पिंम्।#यर ३१:३१
स्योंम्बै बाछा भन्दा छारा बाछा झन् छ्याँब
7परमेश्वरजी मोशालाइ पिंबै ठिम युँमा प्लानर कुन्दिथेंल। च युँमार प्ह्रिबै ठिम म्हिमैंलाइ पिंमा परमेश्वरए थेबै ह्वे चारइ। च थेबै ह्वे मदुरो तदै ह्यालेया इस्राएलीमैंइ मोशाए लि ङ्ह्योल् आखाँमल।#प्रस ३४:२९ 8झन् पबित्र प्ल्हजी लबै केरि बेल्ले थेबै ह्वे चारम्। 9म्हिमैंलाइ दोषि ठर्दिबै ठिमै या छले चारल बिस्याँ, झन् म्हिमैंलाइ ठिक ठर्दिमिंबै के बेल्ले चारब्मुँ। 10तलेबिस्याँ तिंजोरोबै चारबै ह्वेइ लमा ओंसोंबै चारब म्हह्याइ। 11छले म्हह्याबै ठिमलै या मान तसेरो खोंयोंन् बिलै तरिबै छारा बाछाल झन् थेबै मान तल् त्हुम्।
छारा बाछार मुँब्मैं खाँसों ङ्हाँन् तयाइ
12छतसि ङिल छाबै क्ह्रोंसेंन्बै आशा मुँबइले सैं तोंबै ताँ बिप्रमा थेबै भों खम्। 13ङि मोशा धों तबै म्हिमैं आङिं, तलेबिस्याँ चइ ह्रोंसए मोंडउँइँले म्ह-म्हइ ह्याबै ह्वे इस्राएलीमैंइ आम्रोंरिगे बिसि खीए मोंड क्वेंइ हुमल।#प्रस ३४:३३ 14मोशाए मोंड क्वेंइ हुब् धोंले इस्राएलथेंमैंए सैं या हुथेंब् धोंन् तइमुँ। छतसि तिंयाँ समै या ठिम खेमा चमैंइ परमेश्वरए ताँ क्होल् आखाँ। ख्रीष्ट येशूजी मत्त्रे च हुथेंबै क्वें स्योवासि परमेश्वरए ताँ क्होमिंल् खाँम्। 15ओं, तिंयाँ समै या चमैंए सैं हुथेंब् धोंन् तइमुँ। छतसि चमैंइ मोशाए ठिम खेमा तोइ क्होल् आखाँ। 16दिलेया खाब्मैंइ सैं एसि याहवेहउँइँ तोमुँ चमैंए सैंलाइ हुथेंबै क्वें खीजी स्योवाब्मुँ।#प्रस ३४:३४ 17“याहवेह” पबित्र प्ल्ह ग, छतसि खाब्ने याहवेहए प्ल्ह तमुँ, च म्हि खाँसों ङ्हाँन् तल् योंम्। 18छतमा तारे ङ्यो ताँनइ मोंड आउल्लेन् प्रभुए चारबै ह्वे ङ्योए मोंडउँइँले चारल् पिंम्। झाइले खीउँइँले योंबै ह्वेइ लमा प्रभुजी अथवा पबित्र प्ल्हजी ङ्योलाइ झन् झन् खी धोंले चारब लदै बोम्।
Markert nå:
२ कोरिन्थी 3: GCMB
Marker
Kopier
Sammenlign
Del
Vil du ha høydepunktene lagret på alle enhetene dine? Registrer deg eller logg på
© 2020, Wycliffe Bible Translators, Inc. All rights reserved.