Populære bibelvers fra २ कोरिन्थी 5

Del

तलेबिस्याँ खाबइ ख्रीष्‍टए फिर बिश्‍वास लइमुँ च म्‍हि छारा तम्। ओंसोंबै आछ्याँबै सैमैं ताँन् म्हह्‍याइ, तोन्‍दोंरि सै छारा तयाल् खाँइमुँ।

तलेबिस्याँ ङ्यो ख्रीष्‍टउँइँले ठिक ठर्दिरिगे बिसि तोइ पाप आरेबै येशू ख्रीष्‍टलाइ परमेश्‍वरजी ङ्योइ लबै पापए ति नोल् पिंइ।

छतसि म्रोंबै सैए लिलि ङ्यो आप्रा, बिश्‍वास लसिन् प्रम्।

चु ताँन् छारा के परमेश्‍वरजीन् लमिंब् ग। परमेश्‍वर खीजीन् ख्रीष्‍टउँइँले ङ्योलाइ खीने क्ह्रिल् लमिंइमुँ, धै अरू म्हिमैंलाज्यै या खीने क्ह्रिल् लमिंबै के ङ्योलाइ पिंइमुँ। ङिइ बिबै सैं तोंबै ताँ चुन् ग: परमेश्‍वरजी ख्रीष्‍टउँइँले ताँन् म्‍हिमैंलाइ खीने बालु क्ह्रिल् लमिंइमुँ। म्‍हिमैंइ लबै पापए सजैं परमेश्‍वरजी आपिं। छतसि म्‍हिमैंलाइ खीने बालु क्ह्रिल् लमिंबै ल्हागिर खीए बारेर्बै ताँ म्हिमैंने बिमिंबै जिम्‍मा ङिलाइ पिंथेंइमुँ।

छतसि ङि येशू ख्रीष्‍टउँइँले खबै सैं तोंबै ताँ बिप्रब्‍मैं ग। ख्रीष्‍टए मिंर ङिइ क्हेमैंने यो छ्युँ लमुँ। क्हेमैं खीने ख्रे लब् पिवासि खीने क्ह्रिद् बिसि परमेश्‍वर ङिउँइँलेन् तसि क्हेमैंने पोंइमुँ।

ङ्यो ह्रोंसए ल्हागिर छ्ह थोब आङिं, खीए ल्हागिर छ्ह थोरिगे बिसि येशू ख्रीष्‍ट ङ्योए ल्हागिर सिमिंसि धबै सोगों तइ। छतसि तारे ङिइ म्हिमैंलाइ ङ्ह्‍योमा चमैंने मुँबै बैरुबै सैमैंउँइँले आङ्ह्‍यो। ख्रीष्‍टलाज्यै ओंसों ङिइ छलेन् ङ्ह्‍योमल, तारे ङिइ खीलाइ छले आङ्ह्‍यो।

येशू ख्रीष्‍टजी ङ्योने म्हाँया लबइले ङ्यो खीए अधीनर मुँ, तलेबिस्याँ ताँन् म्‍हिमैंए ल्हागिर ख्रीष्‍ट सिमिंबइले ङ्यो ताँन् खीने बालुन् सिब् धोंन् तइ बिबै ताँ ङ्योइ सेइमुँ।