Huan 19

19
1E ora ei Pilato a kohe Hesus i laga batiÉ ku karbachi. 2E sòldánan a bistiÉ un korona ku nan a flèktu di sumpiña i un mantel kòrá püs. 3Despues nan a bini serka djE i bis'É: ‘Biba rei di hudiu!’ I nan a bòft'É.
4Pilato a bolbe bai pafó i a bisa e hendenan: ‘Tende, mi a tres'é pafó aki serka boso pa boso mira ku mi no ta haña ningun motibu pa konden'é.’ 5Hesus a bini pafó ku e korona di sumpiña riba su kabes i e mantel kòrá püs bistí. Pilato a bisa e hendenan: ‘Ata e hòmber akí!’
6Ora e saserdotenan importante i e guardianan a mir'É, nan a grita: ‘Krusifik'é! Krusifik'é!’ Pilato a bisa nan: ‘Awèl, bai kuné i krusifik'é boso mes; ami no ta haña ningun motibu pa konden'é.’ 7E hendenan a kontestá: ‘Nos tin un lei i segun e lei ei e mester muri, pasobra el a pretendé di ta Yu di Dios!’
8Ora Pilato a tende esei, el a haña mas miedu ainda. 9El a drenta bèk den e residensia prinsipal i puntra Hesus: ‘Di unda bo ta bini?’ Ma Hesus no a dun'é kontesta. 10Pilato a bis'É: ‘Bo no ke papia ku mi? bo no sa ku t'ami tin outoridat pa laga bo liber i outoridat pa krusifiká bo?’ 11E ora ei Hesus a rospond'é: ‘Lo bo no tabatin e outoridat ei riba Mi, si no ta Dios a duna bo e oportunidat ei. P'esei mes esun ku a entregá Mi den bo man ta mas kulpabel ainda ku bo.’ 12Ora Pilato a tende esei, el a buska un manera di pone Hesus den libertat. Ma e pueblo a grita: ‘Si bo laga e hòmber akí liber, bo no ta amigu di emperador! Ken ku pretendé di ta rei, ta bai kontra emperador.’
13Ora Pilato a tende e palabranan akí, el a hiba Hesus pafó i a kai sinta riba e stul ku hues ta usa den e lugá ku yama ‘Patio di Piedra’. Na hebreo e nòmber ta ‘Gabata’. 14Tabata diesdos or di mèrdia riba dia di preparashon pa Pésag. Pilato a bisa e hudiunan: ‘Ata boso rei!’ 15Nan a grita: ‘Kaba kuné! Kaba kuné! Krusifik'é!’ Pilato a puntra nan: ‘Krusifiká boso rei?’ E saserdotenan importante a rospondé: ‘Ta un rei so nos tin: emperador!’ 16E ora ei Pilato a entregá Hesus na nan pa nan krusifik'é.
Ta krusifiká Hesus
(Mateo 27:32-44; Marko 15:21-32; Lukas 23:26-43)
Nan a bai ku Hesus. 17Ora El a sali, E mes tabata karga su krus. El a yega na un lugá ku yama ‘Lugá di Karpachi’, ku na hebreo yama ‘Gólgota’. 18Ei nan a krusifik'É huntu ku dos otro hòmber; Hesus tabata meimei di nan dos. 19Pilato a laga skibi riba un bòrchi i pon'é riba e krus. Tabatin skibí: ‘Hesus di Nazarèt, Rei di hudiu’. 20Hopi hende a les'é, pasobra e lugá kaminda Hesus tabata krusifiká no tabata keda muchu leu for di siudat i loke tabatin skibí riba e bòrchi tabata skibí tantu na hebreo komo na latin i griego. 21P'esei e saserdotenan importante a bisa Pilato: ‘Bo no mester a pone “Rei di hudiu”, ma “E hòmber akí a bisa ku e ta rei di e hudiu”.’ 22Pilato a bisa nan: ‘Loke Mi a skibi ta keda skibí!’
23Despues ku e sòldánan a krusifiká Hesus, nan a kohe su pañanan i parti nan den nan kuater. Tambe nan a kohe su kamisa, pero e no tabatin nachi; e tabata tehé di un solo pida, djariba te abou. 24P'esei nan a bisa otro: ‘Laga nos no sker e, ma tira lòt, wak ken ta gan'é.’ Asin'ei anto e palabranan di Skritura a keda kumplí:
‘Parti nan a parti mi pañanan entre nan
i a tira lòt pa mi bistí.’#Salmo 22:18
I esei ta loke e sòldánan a hasi. 25Turesten Hesus su mama, ruman muhé di su mama, Maria kasá di Kleopas i Maria Magdalena tur tabata pará na su krus. 26Ora Hesus a mira su mama i su disipel stimá pará einan, El a bisa su mama: ‘Señora, ata bo yu!’ 27Despues El a bisa e disipel: ‘Ata bo mama!’ For di e ora ei e disipel a tuma Maria den su kas.
Hesus ta kumpli ku su mishon
(Mateo 27:45-56; Marko 15:33-41; Lukas 23:44-49)
28Despues di esei Hesus tabata sa ku tur kos tabata kumplí. Pa kumpli ku Skritura,#Salmo 69:21 El a bisa: ‘Mi tin set!’ 29Tabatin un butishi ku biña zür. Nan a papa un spòns ku e biña, pon'é na un taki di un mata ku yama hisopo i pon'é na Hesus su boka. 30Hesus a bebe e biña i bisa: ‘Ta kumplí!’ Despues El a baha su kabes i entregá su spiritu.
Ta traspasá Hesus su kustia
31E outoridatnan hudiu a pidi Pilato pèrmit pa laga kibra pia di e hendenan ku nan a krusifiká i baha e kurpanan for di krus. Nan a pidi esei, komo tabata dia di preparashon, esta bispu di sabat, i nèt e sabat ei tabata un dia mashá santu; nan no tabata ke pa e kurpanan keda na krus durante sabat. 32P'esei e sòldánan a bai i kibra pia di e promé i despues di e di dos hòmber ku tabata krusifiká huntu ku Hesus. 33Ma ora nan a yega serka Hesus nan no a kibra su pianan, pasobra nan a mira ku El a muri kaba. 34Sinembargo un di nan a traspasá Hesus su kustia ku un lansa i mesora sanger i awa a basha afó. 35Esun ku a mira esaki, ta testiguá pa boso tambe kere; su testimonio ta kuadra ku bèrdat i e sa ku e ta papia bèrdat. 36E kosnan akí a sosodé pa Skritura keda kumplí: ‘Lo no kibra niun di su wesunan!’#Éksodo 12:46; Numbernan 9:12; Salmo 34:20; 1 Korintionan 5:7 37I tambe tin un otro Skritura ta bisa: ‘Nan lo fiha nan bista riba Esun ku nan a traspasá!’#Zakarías 12:10; Revelashon 1:7
Nan ta dera Hesus
(Mateo 27:57-61; Marko 15:42-47; Lukas 23:50-56)
38Despues di loke a pasa, Hosé di Arimatea a pidi Pilato pa por a baha kurpa di Hesus. Hosé tabata un siguidó di Hesus na skondí, pasobra e tabatin miedu di e outoridatnan hudiu. Pilato a dun'é pèrmit i Hosé a kohe e kurpa bai kuné. 39Nikodemo, ku promé aya tambe a bai bishitá Hesus anochi,#Huan 3:1-2 a bai huntu ku Hosé. El a bai ku un trinta kilo di un meskla di mira i bálsamo ku ta hole dushi pa hunta kurpa di e morto kuné. 40Nan a kohe Hesus su kurpa i lor'É den paña di lenen huntu ku e spesereinan, segun kustumber hudiu di drecha morto pa entiero. 41Kaminda nan a krusifiká Hesus tabatin un hòfi ku un graf nobo ku nan no a usa ainda. 42Komo tabata dia di preparashon pa sabat i e graf no tabata leu, nan a pone Hesus eiden.

Nu geselecteerd:

Huan 19: BPK13

Markering

Deel

Kopiëren

None

Wil je jouw markerkingen op al je apparaten opslaan? Meld je aan of log in

YouVersion gebruikt cookies om je ervaring te personaliseren. Door onze website te gebruiken ga je akkoord met ons gebruik van cookies zoals beschreven in ons Privacybeleid