Korint I 4
4
1Hian, homo ma homo i ghanguruen iou lao dandedegei ad Kristo, iou da bogulue memrad ad Jehova. 2Ndorlaben i ha lengi su ndremda bogulue memrad ber lang, su gob mburer asu hian monen ge. 3Io da hanguruen bui, ar hom ndramed i gdieni io le mburer ordo, io da hanguruen surien ordo gle mburer ordo bui. 4Io de dono heb le longu hendre momen io gin hinen i bui, hanguruen ordo dagara molhe lie, Ndorlaben i ge, i da gdieni io, ma gord aden i monen ge. 5Mbue dieni homo de homo roud, irbelengeni Jehova, i ge, i gobharni longu masi su da gorni, longu masi i da le ndrogum ge, i meher le sul, i gobharni hanguruen ademu i da le bergolmu lie. Boen i gabmugueni homo ma homo monen ge.
6Mu ndere hian, nongen io da gin bosoui le ndro mu, aga longu le ordo ma le ad Apolos. Io ha lengi, danmu heb nongen ogo: Mbue hanguruen longu hendr e hendr i da le Bug Helian bui, debosan homo ademu i da mugueni homo adu, ma i gdieni homo lie. 7Sie i mugueni uo? Memrad adem gin meher oho? Ndorlaben gin hengen i le ndro uo, be i gin hengen i le ndro uo, desa uo mugueni i, uo hanguruen i adem ge. 8Mu de mundrul heb bui, memrad ademu i vonei le ndro mu, mu ndrolaben ge ber gor. Io ha lengi ndangen, mu ndounen longu momen, dege su ndorlaben su hinen i le ndro su ndramed. Boen iou la born ndro mu bersi. 9Jehova i gin hinen du Apostel aden, gina molhege, iou dege su ndaiian ndramed, su gin dieni su na gmed. Su gor masi, su hanguruen momen me ndro du, su hilou me goure, su beg ilndri du dege le gord asu, su ndramed ber boan, ma su Angelo lie. 10Iou da molhege, iou gin ibdi mburer ad Kristo, mu ge, ndramed hian ge le ndoui ad Kristo, iou heb ndroa bui, mu ge, mu ndoa. Su mugueni mu, ma su boii du. 11Iou mundrul le gan, goldu i mar le ndran, salo adu bui, iou ha somui, be su rii du. Gor adu bui, iou da dogi le horo ma le horo molhege. 12Iou bo mburer le gan anu bing si e rang si, be su da boii du, iou hengen hian le ndro su, be su hingismad adu, iou de vob bui. 13Be su boii du, iou besoui nongen hian le asu. Iou dege gulgon ber gor, su bieni du bing si e rang si. 14Io da gin hondre longu ogo le ndro mu, goloisden mu ge. Mu dege nduro hian ge. Io beg bosilieni le ndro mu sal hian monen ge. 15Su mabosanged, su da beg henunuen mu le longu ad Kristo, su damen ademu bui, io ge, io damen ademu, io da gin bohernou longu ber lang gle ndoui ad Jesu Kristo. 16Io ha soling ndro mu, hian ilndri io, io da dogi derbe. 17Io gin rendegien Timoteus le ndro mu, i nduro, goloisden i manden le golnisden ad Ndorlaben. I ge, i ghenunuen mu le nongen ordo, nongen le Jesu Kristo, io da henunuen su gor masi. 18Su holel, su da hanguruen momen le bergolsu, be su gin hirong, io de me bui. 19Be Ndorlaben i ha lengi io gmeher ndro mu, boen io da hanguruen nongen asu bui, io beg ilndro ndoui ad Jehova i da ndro su, de bui. 20Gor ad Jehova aga i de vonei nongen molhe bui, aga ndoui ber lang ge. 21Mu ha lengi sa malabo ie, io gmeher ndro mu le vusu, de io gmeher ndro mu le golnisden ordo gle meluan hian ge?
Nu geselecteerd:
Korint I 4: LLENT
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
Published by the British and Foreign Bible Society 1956