Lyfr y Psalmau 34
34
1Bendithiaf Arglwydd nef,
Yn wastad Ef a folaf;
Ni phaid fy ngenau tra bwyf byw
A moli Duw Goruchaf.
2Yr wyf yn Nuw a’i ddawn
Yn llawen iawn a hyfryd;
Yr isel clywed hyn a wnant,
A llonnant hwythau hefyd.
3Mawrygwch gyd â mi
Yr Arglwydd Rhi trugarog;
A chyd‐ddyrchafwn yma ’n awr
Ei Enw mawr ardderchog.
YR AIL RAN
4Mi geisiais Arglwydd nef,
Fe glybu ’m llef yn erfyn;
Gwaredodd f’ enaid gwan mewn pryd
O’i ofn i gyd a’i ddychryn.
5Eu llygaid at Dduw fry
O’u dunos obry troisant;
O’u cylch disgleiriai gwawl o’r nen,
Dim gwarth na sen ni chawsant.
6Fe lefodd y tlawd hwn
O dan ei bwn a’i benyd;
Fe ’i clybu Duw, i’w dynnu daeth
O’i gyni caeth a’i adfyd,
7O amgylch pawb sy ’n byw
Dan ofni Duw eu nodded,
Ei Angel Ef sy ’n gaer a thŵr
A gorau gwr i’w gwared.
8O profwch, gwelwch oll,
Mor ddigoll dda yw ’r Arglwydd;
A roddo ’i hyder arno ’n hy,
Oh dyna ’r dyn sy ddedwydd!
9Chwi sanctaidd blant Duw nef,
Arswydwch Ef a’i Enw;
Y neb sy ’n iawn yn ofni Ner
Ni bydd mewn prinder hwnnw.
10Mae ’r llewod er eu grym
Mewn newyn llym a chyni;
Ond ni bydd ar a geisio ’r Ner
Byth brinder dim daioni.
Y DRYDEDD RAN
11O deuwch, blant, gwrandêwch,
I’m hysgol de’wch yn hyrwydd;
Dysgaf i chwi ddoethineb ddofn,
Gwybodaeth ofn yr Arglwydd.
12Pa le mae’r gwr, pwy yw,
Sy ’n chwennych byw ac oesi?
Pwy gâr hir ddyddiau yn y tir
I weled hir ddaioni?
13O cadw ’r tafod tau
Rhag geiriau gau anwiredd;
Poed dôr dy wefus dan glo pwyll
Rhag traethu twyll na ffalsedd.
14Rhag drwg encilia draw,
A gwna ’n ddi‐fraw ddaioni;
A chais Dangnefedd yn dy ddydd,
Bydd beunydd yn ei chwmni.
Y BEDWAREDD RAN
15Mae llygaid tawel Duw
Ar bawb sy ’n byw yn gyfiawn;
Agored yw ei glustiau Ef
I wrando llef yr uniawn.
16Mae wyneb Duw mewn gwg
Ar bawb sy ’n ddrwg eu rhodiad;
I dorri eu coffa cas cyn hir
Yn llwyr o dir eu trigiad.
17Y cyfiawn dyrcha ’i lef,
A Duw o’r nef yn gwrando;
Fe ’i gweryd yn ei ras mewn pryd
O’i boen i gyd, pan lefo.
18Un agos yw ein Ion
At friwiau ’r galon glwyfus;
Rhoir balm a chordial gan Dduw Naf
I’r yspryd claf dolurus.
Y BUMMED RAN
19Trallodau mynych iawn
A ddaw i’r cyfiawn galon;
Ond Duw a’i gweryd yn ddi‐goll
Oddi wrth ei holl helbulon:
20Mae llygaid Arglwydd nef
Fyth arno ef yn dadol;
Ac ni chaiff un o’i esgyrn friw,
Fe ’u ceidw Duw hwy ’n fanol.
21Rhyw ddrwg a melldith fawr
A dyr i lawr yr anwir;
A’r rhai gasânt yr union rai,
Hwynt am eu bai a ddemnir.
22Drwy farn yr Arglwydd Ion
Ei weision a waredir;
Y sawl bo ’i hyder ar Dduw Rhi,
Byth bythoedd ni chondemnir.
Nu geselecteerd:
Lyfr y Psalmau 34: SC1850
Markering
Kopiëren
Vergelijk
Delen
Wil je jouw markerkingen op al je apparaten opslaan? Meld je aan of log in
Y Psallwyr gan y Parch. Morris Williams (Nicander). Cyhoeddwyd gan H. Hughes, Llundain 1850. Cafodd y testun ei ddigideiddio gan Gymdeithas y Beibl yn 2021.