Genesis 12
INSCU

Genesis 12

12
No Katawag no Dyos si Abram
1Sinpangan na, binata ni ĀPO di Abram a kāna, “Karwan mo tana mwaya kontodo saw kakabagyan mo saya kan kapamilyaan ni āmang mo, as kangay mo do tanaw a ipaboya konchi dyimo.#12:1 Ara. 7:2-3; Heb. 11:8
2“Torohan konchimo so āro a kapotōtan,
as maypāro sanchi mandan mayparin sa asa rakoh a nasyon.
Bindisyonan konchimo, as matonngan anchin tabo a tawotawo ngaran mo
tan mabindisyonan sanchiw tawotawo a maynamot dyimo.#12:2 Mana “tan bata danchin tawotwo a, ‘Bindisyonan pakono no Dyos yaken a akmas Abram’ ” mana “tan osaren danchin tawotawo ngaran mo a pagkari”.
3Bindisyonan konchiw tawo a mangbindisyon dyimo,
as abayen konchiw mangabay dyimo.
An maynamot dyimo,
mabindisyonan sanchiw tabo tawotawo do tanaya.”#12:3 Mana “Akdawen anchi dyaken no tabo nasyon pamindisyon ko dyira a akmas nakabindisyon ko si Abram.” Gen. 18:18; 22:18; 26:4; 28:14; Ara. 3:25; Gal. 3:8
4Dawa, do nakapagtawen nas papito a poho kan dadima, komnaro si Abram akmas inbaheyaw ni ĀPO dya do idi a Haran a niyanan na, ki nachirayay dya si Lot. 5Inhap ni Abram si Sarai a baket na, si Lot a kaanakan na, kan tabo no warawara a chinpeh da, kan siraw adīpen da saw a inhap da do Haran, kan insiknan daw nangay do tana no Kanaan.
Do nakapakarapit daw do tana a Kanaan, 6nayam si Abram a nandad nakapakarapit nad masngen do idi a Sikem do yanan nagdindināmagaw a kayo ni More.#12:6 Siraw Kananeo a tawo a minyan do dawri a tana a Kanaan, ki inanohdan da a myan saw anyito a omyan do kayokayo. Dawa, napatnek saw papādi daw so pagdaydayāwan da do dawri a kayo. No chakey na batahen “More,” ki “maistro” mana ngaran no asa tawo. Do dāwri a chimpo, omyan pa saw Kananeo a tawo do dawri a tana. 7Do kayan daw do dāwri, napaboya si ĀPO di Abram, as nakabata na sya a kāna, “Mo Abram, nya tana, ki itoroh konchi dyira do kapotōtan mo saw.” Dawa, namarin si Abram so pangidātonan na di ĀPO a napaboya dya. 8Katayoka no nawri, nayam a nagpaabagātan do paytokotokonanaw do mangket do dāya no idi a Betel. Sinpangan na, nagtolda sa do payawan Betel kan Ai. No Betel, ki mangket do lāod, as no Ai, ki mangket do dāya. Do dāwri, pinarin ni Abram pangidātonanaw, as nakadaydāyaw na si ĀPO. 9Sinpangan na, tinongtong ni Abram mayadiyadis do yanan kan naypakwan do Negeb do abagātanaw no Kanaan.
Sa Abram do Egipto
10Do dāwri a chimpo, myan nakapaychapteng da do Kanaan a tana. Ki maynamot ta naypāngay danaw kaptengaw, tinongtong ni Abram naypakwan do abagātanaw a mangay do Egipto, kan minyan daw so dēkey a chimpo. 11Do kasngen naranaw do Egipto, inbahey ni Abram di Sarai a baket na a kāna, “Ay, chapatak ko a asa ka a mapintas a mabakes. 12Anchan maboya daymo no taga Egipto saw, batahen danchi a kabahay koymo, kan dimanen danchi yaken. Ki imo, ki sigorādo a imonchiw mabyay. 13Dawa, ibahey monchi dyira a maykakteh#12:13 Oyod a maykakteh sa. Gen. 20:12 ta, ah, tan maynamot anchi dyimo, palobōsan danchi yaken a mabyay! Tan komwan, maganay anchiw kaparin da dyaken.” 14Sinpangan na, do nakapakarapit da do Egipto, naboya dan taga Egipto saw a mapintas sawen baketaw ni Abram. 15Siraw opisyalis saw do palasyo, ki naboya da pa, kan inpadāyaw da do āryaw a matawagan so Paraon kapintas naw. Do nakadngeyaw sya ni Paraon, inpahap na si Sarai do palasyo tan kabahayen na. 16Maganay pinarin no āryaw di Abram maynamot di Sarai. Tinorohan nas āro a karniro kan kalding, bāka, asno, kamilyo, kan adīpen a mahahakay kan mababakes.
17Ki maynamot ta inhap ni Paraon si Sarai, pinaganyit ni ĀPO Paraonaw kan siraw myan saw do palasyo na, kan sinsinan abaw nya ganyit. 18Dawa, inpatawag ni Paraon si Abram, as nakaiyahes na sya a kāna, “Āngo pinarin mo dyaken? Āngo ta dyi mwa inbahey a baket mo? 19Āngo ta inbahey mo a kakteh mo, kan ninonolay mwa inhap ko baket mwaya? Ni! Cha dyaw baket mwaya. Apen mo na, as komaro kamo na sigīda!” 20Do dāwri, binilin ni Paraon soldādo na saw a patodahen da sa Abram a mapaksyat do Egipto. Dawa, nanyeng da a yangay a pinayam sa Abram kan baket na kan tabo warawara naw.

© Wycliffe Bible Translators, Inc. All rights reserved.

Meer informatie over Chirin ni Āpo Dyos