भजनसंग्रह 49:1-9
भजनसंग्रह 49:1-9 नेपाली नयाँ संशोधित संस्करण (NNRV)
हे सबै मानिसहरू हो, सुन, संसारका सबै निवासीहरू हो, सुन, उच्च र नीच, धनी र गरीब सबै ध्यान देओ: मेरो मुखले बुद्धिका कुरा बोल्नेछ, मेरो मनले बोलेका कुराले समझदारी प्रदान गर्नेछ। म एउटा हितोपदेशमा ध्यान दिनेछु, वीणा बजाएर म आफ्नो अड्को फुकाउनेछु। दु:खका दिन आउँदा, अनि खेदो गर्नेहरूको दुष्टताले मलाई घेर्दा म किन डराउने? तिनीहरू आफ्नो सम्पत्तिमाथि भरोसा राख्छन्, र आफ्नो ठूलो धनराशिको अहङ्कार गर्छन्, कुनै मानिसले मोल तिरेर अर्कालाई कदापि छुटाउन सक्दैन, वा परमेश्वरलाई उसको जीवनको मोल त्यसले दिन सक्दैन। जीवनको मोल बहुमूल्य हुन्छ, कुनै भुक्तानी कहिल्यै यथेष्ट हुँदैन। यस्तो कोही छैन जो सधैँ बाँचिरहन्छ, र कहिल्यै कुहुनुपर्दैन।
भजनसंग्रह 49:1-9 पवित्र बाइबल, नेपाली समकालीन संस्करण (NCV)
हे सबै जाति-जातिहरू हो, यो सुन; हे संसारका बासिन्दाहरू हो, सुन; साना र ठूला दुवै, धनी र गरिब सबै ध्यान देओ: मेरो मुखले बुद्धिका कुराहरू बोल्नेछ; मेरो हृदयका चिन्तनले समझशक्ति प्रदान गर्नेछ। म हितोपदेशमा ध्यान लगाउनेछु; वीणा बजाएर उखानको अर्थ खोल्नेछु। दुष्ट छलीहरूले मलाई घेर्दा, दुःखका दिनहरू आउँदा म किन डराउने, तिनीहरू, जसले आफ्नो सम्पत्तिमाथि भरोसा राख्छन्, र आफ्नो ठूलो धनसम्पत्तिको घमण्ड गर्छन्। कुनै पनि मानिसले कसैको प्राणको उद्धार गर्न सक्दैन, न त परमेश्वरलाई आफ्नो जीवनको लागि मोल नै दिन सक्छ। जीवनको मूल्य धेरै मूल्यवान् हुन्छ; कसैको धनले तिरेर कहिल्यै पुग्दैन। कोही पनि यस्तो मानिस छैन, जो सधैँ जीवित रहन्छ, र कहिल्यै कुहुनुपर्दैन।
भजनसंग्रह 49:1-9 पवित्र बाइबल (NERV)
तिमीहरू सबै जाति-जातिहरू यसलाई ध्यान दिएर सुन। पृथ्वीमा भएका सबै मानिसहरू यसलाई ध्यान दिएर सुन। प्रत्येक मानिस, धनी-गरीब सबैले बराबर ध्यान दिएर सुन्नु नै पर्छ। म तिमीहरूलाई ज्ञान र बुद्धिका कुराहरू भन्ने छु। मेरो विचारले तिमीहरूलाई बुझ्न सहायता गर्नेछ। मैले स्वयंले ती कथाहरू सुनें अनि अब मेरो वीणासँग गाउने छु अनि त्यो संदेश तपाईंलाई प्रकट गर्ने छु। कष्ट आउँछ भनेर म किन डराउनु? यदि दुष्ट-मानिसहरूले वरिपरि घेरेर मलाई पासोमा पार्ने कोशिश गर्छन् भने पनि म डराउने आवश्यकता छैन। कतिपय मानिसहरू सोच्छन् कि तिनीहरूको बल र धनले तिनीहरूलाई रक्षा गर्नेछ। तर ती मानिसहरू मूर्खहरू हुन्। कुनै तिम्रो मानव मित्रले तिमीलाई बचाउन सक्तैन, अनि तिमीले परमेश्वरलाई घूस दिन सक्तैनौ। कुनै मानिससँग त्यस्तो प्रशस्त धन हुनेछैन जसद्वारा उसले आफ्नो जीवन किन्न सकोस्। कुनै मानिसँग त्यस्तो प्रशस्त धन हुनेछैन जसद्वारा उसले अनन्त बाँच्ने अधिकार किन्न सकोस्, अनि आफ्नो जीवन चिहानमा सड्न देखि बचाउन सकोस्।
भजनसंग्रह 49:1-9 सरल नेपाली पवित्र बाइबल (सरल नेपाली)
हरेकले यो सुन, सारा जगत्मा मानिसहरूले कान थाप! ठूला-साना, धनी-गरीब र सबैले एकसाथ यो कुरा सुन। मेरा विचारहरू स्पष्ट हुनेछन्, म बुद्धिका कुरा भन्नेछु। म उखानतिर मेरो ध्यान लगाउनेछु र वीणा बजाएर म त्यसका अर्थ खोल्नेछु। शत्रुहरूले मलाई घेर्दा, खतराका समयमा पनि म डराउनेछैनँ, आफ्ना ठूले धनको अहङ्कार गर्ने र आफ्नो सम्पत्तिमाथि भरोसा गर्ने दुष्ट मानिसहरू देखि। मानिसले कहिल्यै आफ्नै उद्धार गर्न सक्दैन, उसले परमेश्वरलाई आफ्नो प्राणको मूल्य तिर्न सक्दैन। किनकि मानिसको प्राण बहुमूल्य छ, उसले जति तिर्न सक्छ, त्यो पुग्दो हुँदैन। त्यसले चिहानदेखि उसलाई बचाउँदैन र सधैँभरि जिउँदो राख्न सक्दैन।