भजनसंग्रह 36:1-4
भजनसंग्रह 36:1-4 नेपाली नयाँ संशोधित संस्करण (NNRV)
दुष्टका पापको सम्बन्धमा मेरो हृदयमा एउटा ईश्वरवाणी छ, त्यसका आँखाअगि परमेश्वरको डर हुँदैन। किनकि त्यसले आफ्नो यति प्रशंसा गर्छ कि आफ्नो पाप त्यसले फेला पार्दैन र घृणा गर्दैन। त्यसको मुखका कुराहरू दुष्ट र छली छन्। बुद्धिमानी हुनु र भलाइको काम गर्न त्यसले छोडिसकेको छ। त्यसले आफ्नो ओछ्यानमा पनि कुकर्मको योजना बनाउँछ, त्यसले आफूलाई कुमार्गतिर लगाउँछ, त्यसले खराबीलाई अस्वीकार गर्दैन।
भजनसंग्रह 36:1-4 पवित्र बाइबल, नेपाली समकालीन संस्करण (NCV)
दुष्टका पाप सम्बन्धी, मेरो हृदयमा परमेश्वरको एक सन्देश छ: तिनीहरूका आँखामा परमेश्वरको डर छैन। तिनीहरूले आफूलाई आफ्नो नजरमा उच्च ठान्छन्, तिनीहरूले आफ्ना अधर्म फेला पार्दैनन् वा आफ्ना पाप घृणा गर्दैनन्। तिनीहरूका मुखका शब्दहरू दुष्ट र छली छन्; तिनीहरू बुद्धिमानी हुन र भलाइको काम गर्न चुकेका छन्। तिनीहरूले आफ्ना ओछ्यानमा पनि कुकर्मको योजना बनाउँछन्; तिनीहरूले आफूलाई कुमार्गतिर लगाउँछन्; र तिनीहरूले खराबीलाई इन्कार गर्दैनन्।
भजनसंग्रह 36:1-4 पवित्र बाइबल (NERV)
एकजना दुष्ट मानिसले एकदमै दुष्ट कामगर्छ जब त्यो आफैंले आफैंलाई यसो भन्छ, “म न त परमेश्वरसँग डराउनेछु न त परमेश्वरलाई आदर नै गर्नेछु।” त्यो मानिस आफैंसित झूटो हुन्छ। त्यस मानिसले आफ्नो गल्ती देख्दैन। यसैले उसले क्षमाको याचना गर्दैन। उसका शब्दहरू बेकामे झूटहरू मात्र हुन्छन्। त्यो ज्ञानी पनि बन्न सक्तैन अथवा राम्रो कुरो सिक्न सक्दैन। राती उसले दुष्ट योजना तयार पार्दछ। ऊ उठ्छ तर राम्रो काम गर्दैन। तर उसले अधर्म गर्नलाई नाईँनास्ति गर्दैन।
भजनसंग्रह 36:1-4 सरल नेपाली पवित्र बाइबल (सरल नेपाली)
दुष्टको हृदयभित्र पाप बोल्दछ, त्यसले परमेश्वरलाई अस्वीकार गर्छ र उहाँलाई आदर दिँदैन। आफैंलाई खुब ठूलो भन्ठानेकोले त्यसले सोच्छ कि परमेश्वरले मेरो पाप भेट्टाउनुहुन्न र त्यसको लागि मलाई दोषी ठहराउनुहुन्न। त्यसका बोली दुष्टता र झूटले भरिएका हुन्छन्, जे कुरा बुद्धिमान् र असल छ, त्यो त्यसले गर्दैन। ओछ्यानमा लडिरहेको बेला त्यसले दुष्ट युक्तिहरू रच्दछ, त्यसले गरेको काम कुनै असल हुँदैन र दुष्ट कुरालाई त्यसले कहिल्यै इन्कार गर्दैन।